སྤྱི་ལོ་༢༠༡༩ལོའི་ཟླ་༡༡པའི་ཚེས་༥ཉིན། སྐབས་གཉིས་པའི་རྒྱལ་སྤྱིའི་ནང་འདྲེན་དངོས་མང་འགྲེམ་ཚོགས་དངོས་སུ་འགོ་ཚུགས་ཡོད། ད་ལོ། རྒྱལ་ཁབ་འགྲེམ་སྟོན་ཁང་གི་སྤྱིའི་རྒྱ་ཁྱོན་ལ་སྨིད་ངོས་སྙོམས་གྲུ་བཞི་མ་ཁྲི་༣ཟིན་པ་དང་། ཀྲུང་གོ་ཚུད་པའི་རྒྱལ་ཁབ་༦༤དང་རྒྱལ་སྤྱིའི་སྒྲིག་འཛུགས་༣འགྲེམ་སྟོན་ལ་ཞུགས་ཡོད། སྐབས་གཉིས་པའི་རྒྱལ་སྤྱིའི་ནང་འདྲེན་དངོས་མང་འགྲེམ་ཚོགས་ཐོག་རྒྱ་ཁྱོན་ཆེ་ཤོས་ཡིན་པའི་རྒྱལ་ཁབ་འགྲེམ་སྟོན་ཁང་ཡིན་པའི་ངོས་ནས། ཀྲུང་གོའི་འགྲེམ་སྟོན་ཁང་ནི་དེའི་ཁྲོད་གལ་ཆེ་ཤོས་ཤིག་ཡིན། ཚོས་མདོག་སྔོན་པོ་དང་དཀར་པོ་ལས་གྲུབ་པའི་ཀྲུང་གོའི་འགྲེམ་སྟོན་ཁང་དེ་དཀར་ཆ་དོད་ལ་རྒྱལ་སྤྱིའི་ཉམས་མངོན་ཞིང་། ནང་འདྲེན་དངོས་མང་འགྲེམ་ཚོགས་ཐོག་གི་ཀྲུང་གོའི་མིང་བྱང་ལྟ་བུར་གྱུར་ཡོད།
ཀྲུང་གོའི་འགྲེམ་སྟོན་ཁང་གི་རྒྱ་ཁྱོན་ལ་སྨིད་ངོས་སྙོམས་གྲུ་བཞི་མ་༡༥༠༠ཟིན་པ་དང་། དེའི་ནང་འགོ་ཚུགས་བརྙན་མཐོང་དང་། གསར་གཏོད་ཀྱི་ཀྲུང་གོ སྒོ་དབྱེའི་ཀྲུང་གོ མཛེས་སྡུག་གི་ཀྲུང་གོ བདེ་སྐྱིད་ཀྱི་ཀྲུང་གོ སྐམ་ས་ཆེན་མོ་དང་ཀང་ཨའོ་ཐའེ་ས་ཁུལ་མཉམ་འདྲེས་གོང་འཕེལ་བཅས་ཁག་༦ལ་དབྱེ་ཡོད། ཀྲུང་གོའི་འགྲེམ་སྟོན་ཁང་གིས་ཀྲུང་གོ་གསར་པ་དབུ་བརྙེས་ནས་ལོ་ངོ་༧༠འཁོར་བར་རྟེན་འབྲེལ་ཞུ་རྒྱུ་བརྗོད་དོན་གཙོ་བོར་བྱས་ཐོག ལོ་ངོ་༧༠རིང་ཀྲུང་གོར་གནམ་ས་བླ་འོག་ལྟ་བུའི་འགྱུར་ལྡོག་བྱུང་བ་མངོན་ཡོད་ལ། ཀྲུང་གོའི་དཔལ་འབྱོར་དང་སྤྱི་ཚོགས་གོང་འཕེལ་གྱི་ལོ་རྒྱུས་རང་བཞིན་གྱི་གྲུབ་འབྲས་དང་དུས་རབས་གསར་པ་དང་གོ་སྐབས་གསར་པ་མངོན་པར་བྱས་ཡོད།
ཀྲུང་གོའི་འགྲེམ་སྟོན་ཁང་གི་བཟོ་བཀོད་ནི་སྒོ་དབྱེ་དང་ཉམས་དོད་པ་ཞིག་ཡོད་ཅིང་། བར་སྣང་གི་གྲུབ་ཆའི་ཆ་ཤས་ལྔ་དཀྱིལ་ནས་ཕྱོགས་བཞིར་བཀྲམས་ཡོད་པས། དེས་ཀྲུང་གོས་གོང་འཕེལ་གྱི་འདུ་ཤེས་གསར་པའི་ཁྲིད་སྟོན་འོག་སྤུས་ཚད་མཐོ་བའི་གོང་འཕེལ་གྱི་རླབས་ཆེའི་ལག་ལེན་བསྟར་བཞིན་པ་དང་། དུས་རབས་གསར་པར་གླིང་ཆེན་ལྔ་ཞི་བདེ་མཉམ་གནས་བྱེད་པ་མཚོན་གྱི་ཡོད་ལ། ཀྲུང་གོ་དང་འཛམ་གླིང་རྒྱལ་ཁབ་ཁག་གིས་མཉམ་དུ་མདུན་སྐྱོད་དང་འབྱུང་འགྱུར་མཉམ་སྤྱོད་བྱེད་པའི་བསམ་འདུན་མངོན་གྱི་ཡོད།
སང་ཉིན། ང་ཚོས་བཀྲ་ཤིས་མཚོན་རྟགས་དང་མཉམ་དུ་ཁྱེད་ལ་འགྲེམ་སྟོན་ལ་ཞུགས་མཁན་རྒྱལ་ཁབ་གཞན་དག་གི་འགྲེམ་སྟོན་ཁང་ངོ་སྤྲོད་ཞུ་རྒྱུ་ཡིན།
རྩོམ་སྒྲིག་པ། བདེ་སྒྲོལ།