རྙིང་མ་བ་ཞེས་པ་བསྟན་པ་ཕྱི་དར་གྱི་དབུ་ཚུགས་སྐབས་པཎྜི་ཏ་སྨྲྀ་ཏི་དང་།ལོ་ཆེན་རིན་ཆེན་བཟང་བོ་སོགས་ཀྱིས་གསང་སྔགས་ཀྱི་རྒྱུད་སྡེ་བོད་སྐད་དུ་བསྒྱུར་བ་མན་ཆད་ལ་གསང་སྔགས་གསར་མ་ཞེས་ཟེར།དེའི་ཟླས་དྲངས་པའི་བསྟན་པ་སྔ་དར་གྱི་དུས་སུ་ལོ་ཙཱ་བ་བཻ་རོ་ཙ་ན་སོགས་ཀྱིས་བསྒྱུར་བའི་རྒྱུད་སྡེ་ལ་གསང་སྔགས་རྙིང་མ་ཞེས་ཟེར།གསར་རྙིང་ཞེས་པའི་ཐ་སྙད་འདི་སྔགས་ཕྱོགས་མ་གཏོགས་མདོ་ཕྱོགས་ལ་མི་སྦྱོར།དེའི་ཕྱིར་གསར་རྙིང་གི་རྒྱུད་སྡེ་དེ་ཉམས་སུ་ལེན་མཁན་ལ་གསང་སྔགས་རྙིང་མ་བ་དང་།གསང་སྔགས་གསར་མ་བ་ཟེར།ཚིག་བསྡུས་པས་གསར་མ་དང་རྙིང་མ་ཞེས་ཡོངས་སུ་གྲགས།ཐུའུ་བཀན་གྲུབ་མཐའ་ཤེལ་གྱི་མེ་ལོང་ལས།པཎྜི་ཏ་སྨྲྀ་ཏི་བྱོན་པ་ཡན་ཆད་དུ་བསྒྱུར་བའི་རྒྱུད་རྣམས་ལ་གསང་སྔགས་རྙིང་མ་དང་།ལོ་ཙཱ་བ་རིན་ཆེན་བཟང་བོ་ཕྱིན་ཆད་དུ་བསྒྱུར་བ་རྣམས་ལ་གསང་སྔགས་གསར་མིའ་ཐ་སྙད་བྱེད་དོ།།ཞེས་པ་དང་།དེ་དང་མཐུན་པར་ཨ་ཀྱཱ་ཡོངས་འཛིན་བློ་བཟང་དོན་གྲུབ་ཀྱི་གསུང་ལས།སྨྲྀ་ཏི་ཡན་ཆད་བསྒྱུར་བ་རྙིང་རྒྱུད་དང་།།གསར་མ་ལོ་ཆེན་རིན་བཟང་སོགས་བཟུང་།།ཞེས་གསུངས་པ་གཉིས་ཀྱི་དགོངས་པ་འདི་ལྟར་ལེན་དགོས་ཏེ།གསར་མ་དང་རྙིང་མའི་མཚམས་ནི་བསྟན་པ་སྔ་དར་གྱི་མཇུག་བསྡུས་པ(སྤྱི་ལོ༩༠༢)དང་།ཕྱི་དར་གྱི་མགོ་ཚུགས་པ(སྤྱི་ལོ༩༧༨)ནས་འཛིན་དགོས།དེ་ཡང་སྨྲྀ་ཏི་དང་།ལོ་ཆེན་རིན་ཆེན་བཟང་བོ(སྤྱི་ལོ༩༥༨ནས་སྤྱི་ལོ༡༠༥༥)གཉིས་ཕལ་ཆེར་དུས་མཉམ་པས་དེ་གཉིས་ཀྱིས་བསྒྱུར་བའི་རྒྱུད་སྡེ་རྣམས་ནི་གསང་སྔགས་གསར་མར་གཏོགས་ལ།སྨྲྀ་ཏིས་རྒྱུད་སྡེ་གང་བསྒྱུར་རྣམས་རྙིང་རྒྱུད་ཡིན་པའི་དོན་དུ་འཛིན་མི་རུང་ངོ་།།ཚལ་བ་ཀུན་དགའ་རྡོ་རྗེས་བརྩམས་པའི་དེབ་དམར་དུ།སྤྱི་ལོ་བརྒྱད་བརྒྱ་ཞེ་གཅིག་པའི་ལོར་གླང་དར་མས་བསྟན་པ་བསྣུབས་ནས་སྔ་དར་གྱི་མཇུག་བསྡུས་པར་བཤད་པ་ལ་ལོ་དྲུག་ཅུས་སྔ་བའི་སྐྱོད་ཡོད་དོ།།
གསང་སྔགས་གསར་མ་ནི་ས་སྐྱ་བ་དང་བཀའ་བརྒྱུད་པ་ནས་བཟུང་དགེ་ལྡན་པ་ལ་ཐུག་གི་བར་གྱི་གྲུབ་མཐའ་འཛིན་པ་ཐམས་ཅད་ལ་ཟེར།འོན་ཀྱང་བཀའ་གདམས་པ་ནི་མདོ་ཕྱོགས་རྩལ་དུ་འདོན་པ་ལས་གསང་སྔགས་མངོན་ཆེར་མི་མཛད་པས་ན་བཀའ་གདམས་པ་ལ་གསང་སྔགས་གསར་མ་ཞེས་པའི་མིང་མངོན་མཚན་དུ་མི་འདོགས་སོ།།ད་ལྟ་རྙིང་མ་ཞེས་པ་ནི་སློབ་དཔོན་པདྨ་འབྱུང་གནས་རྩ་བའི་སློབ་དཔོན་དུ་འཛིན་པ་དང་།དེས་གསུངས་པའི་རྒྱུད་སྡེའི་དོན་ཉམས་སུ་ལེན་མཁན་ལ་ངོས་འཛིན་དགོས།དེས་ན་ཆོས་བརྒྱུད་དེ་ལ་དམར་པོའི་ཆོས་ལུགས(ཧུང་ཀྱོ)ཞེས་འདོགས་པའི་གཞི་ནི་རི་བོང་གི་རྭ་དང་མཚུངས་པ་ཡིན།བོད་རང་གི་ཐ་སྙད་ལ་རྗེ་ཙོང་ཁ་བས་དབུ་ཞྭ་མདོག་སེར་བོ་ཅན་མནབས་པ་ལ་བརྟེན་ནས་དགེ་ལུགས་པ་ལ་ཞྭ་སེར་བ་ཞེས་པའི་ཐ་སྙད་བཏགས།དེའི་ཟླས་དྲངས་པའི་དགེ་ལུགས་པ་ལས་གཞན་གྲུབ་མཐའ་འཛིན་པའི་སྡེ་ཐམས་ཅན་ལ་ཞྭ་དམར་བ་ཞེས་མིང་གིས་འབོད།རྒྱུ་མཚན་འདི་ཙམ་ལ་བརྟེན་ནས་རྙིང་མ་བ་ལ་དམར་པོའི་ཆོས་ལུགས(ཧུང་ཀྱོ)ཞེས་བརྗོད་ན་ནི།ས་སྐྱ་བ་དང་བཀའ་བརྒྱུད་པ་ཇོ་ནང་བ་རྣམས་ཀྱིས་ཀྱང་ཞྭ་མདོག་དམར་པོ་ཅན་གྱོན་པས་དེ་ཐམས་ཅད་ཀྱང་དམར་པོའི་ཆོས་ལུགས(ཧུང་ཀྱོ)ཅན་དུ་འགྱུར་བའི་སྐྱོན་ཡོད་དོ།།དེ་ལྟར་ན་ད་ལྟ་རྒྱ་ནག་སྐད་དུ་ཞྭ་སེར་བའི་གྲུབ་མཐའ་འཛིན་ལ་ཧོང་མོ་ཕེ་ཞེས་པ་དང་།ཞྭ་དམར་བའི་གྲུབ་མཐའ་འཛིན་མཁན་རྣམས་ལ་ཧུན་མོ་ཕེ་ཞེས་བརྗོད་ན་ནི་མི་རུང་བ་ཅི་ཡང་མེད་དོ།།གང་ལྟར་རྙིང་མ་བ་ལ་རྙིང་མ་ཕེ་ཞེས་རྒྱ་བོད་སྐད་གཉིས་སྦྲགས་མའི་ཐ་སྙད་འདིས་མཚོན་པར་བྱས་ན་འོས་པ་ཡིན་གྱི།དམར་པོའི་ཆོས་ལུགས(ཧུང་ཀྱོ)ཞེས་བརྗོད་ན་མི་རུང་བ་གོང་སྨོས་ལྟར་རོ།།
