བོད་ཀྱི་སངས་རྒྱས་ཆོས་ལུགས་དེ་ནང་ས་ནས་དར་ཡོད་ལ་རྒྱ་གར་ནས་ཀྱང་དར་ཡོད།དེ་ཡང་ནང་ས་ནས་དར་བ་དེ་མང་བ་ཡོད་དམ་རྒྱ་གར་ནས་དར་བ་དེ་མང་བ་ཡོད།དེའི་ཐད་ང་ཚོས་བཀའ་འགྱུར་པོད་བརྒྱ་ཐམ་པ་དང་བསྟན་འགྱུར་པོད་ཉིས་བརྒྱ་བཅུ་ཡོད་པ་དེའི་ནང་གཟིགས་ན་ཧ་ཅང་གསལ་པོ་ཡོད།མ་གཞི་ནང་ས་ནས་མང་པོ་བསྒྱུར་ཡོད་ནའང་རྒྱ་གར་ནས་བསྒྱུར་བ་དང་བསྡུར་ན་བཅུ་དང་གཅིག་གི་མང་ཉུང་ཤོར་ཡོད།འོ་ན་ཐོག་མར་རྒྱ་གར་ནས་དར་བ་ཡིན་ནམ་ཡང་ན་ནང་ས་ནས་དར་བ་ཡིན་ཞེ་ན།ཐོག་མར་རྒྱ་གར་ནས་དར་བ་ཡིན།སངས་རྒྱས་བཅོམ་ལྡན་འདས་ཀྱི་སྐུ་འདྲ་དེ་ཐོག་མར་ག་ནས་བྱུང་བ་ཡིན་ནམ་ཞེ་ན།དེ་ནང་ས་ནས་བྱུང་བ་ཡིན།དེའི་དབྱེ་བ་དེ་གསལ་པོ་ཕྱེ་དགོས།འོན་ཀྱང་སངས་རྒྱས་ཆོས་ལུགས་དར་དང་མ་དར་ཟེར་བ་དེ་སྐུ་འདྲ་ཡོད་དང་མེད་ལ་ལྟ་རྒྱུ་མེད།དེ་ནི་མིས་སངས་རྒྱས་ཆོས་ལུགས་ཀྱི་ནང་དོན་ཤེས་ཏེ་ལག་ལེན་བསྟར་བ་ནས་སངས་རྒྱས་ཆོས་ལུགས་དར་བར་བརྩི་དགོས།དཔེར་ན་རྒྱལ་ནང་དུ་མར་ལེ་རིང་ལུགས་དར་དང་མ་དར་ཟེར་བ་དེ་མར་ལེ་རིང་ལུགས་ཀྱི་རིགས་པའི་གཞུང་ལུགས་དེ་མིའི་བསམ་བློའི་ནང་དུ་ཟུག་ནས་མིས་ཁས་ལེན་པ་དེ་ནས་འགོ་བཙུགས་ཏེ་མར་ལེ་རིང་ལུགས་དེ་རང་རྒྱལ་དུ་དར་བ་རེད་ཅེས་བརྗོད་དགོས་པ་ལས་མར་ཁེ་སིའི་སྐུ་པར་དང་ལེ་ཉིན་གྱི་སྐུ་པར་ནང་སར་བྱུང་བ་དེ་ལ་མར་ལེ་རིང་ལུགས་དར་བར་བརྩི་མི་རུང་བ་ལྟ་བུ་ཡིན།དེར་བརྟེན་སངས་རྒྱས་ཆོས་ལུགས་བོད་ལ་དར་དང་མ་དར་ཟེར་བ་དེ་ཡང་སངས་རྒྱས་ཆོས་ལུགས་ཀྱི་ནང་དོན་མིའི་བསམ་བློའི་ནང་དུ་ཟུག་སྟེ་མིས་ཁས་བླངས་ནས་ལག་ལེན་བསྟར་བ་དེ་ནས་འགོ་བཙུགས་ཏེ་སངས་རྒྱས་ཆོས་ལུགས་དར་བ་ཡིན་ཞེས་བརྗོད་དགོས།རྒྱལ་པོ་སྲོང་བཙན་སྒམ་པོའི་དུས་སུ་སངས་རྒྱས་ཆོས་ལུགས་ཀྱི་དཔེ་ཆ་ཉི་ཤུ་རྩ་གཅིག་ཐུ་མི་སམ་བྷོ་ཊས་བསྒྱུར་གནང་བ་དང་དེ་བཞིན་སངས་རྒྱས་ཆོས་ལུགས་ཀྱི་ནང་དོན་དགེ་བ་བཅུ་དེ་རྒྱལ་པོ་སྲོང་བཙན་སྒམ་པོས་ཁྲིམས་སུམ་ཅུ་སོ་དྲུག་གི་ནང་དུ་གཏན་འབེབས་མཛད་པ་དེ་ནས་སངས་རྒྱས་ཆོས་ལུགས་བོད་ལ་དར་བ་ཡིན།འོན་ཀྱང་མི་ལ་ལས་རྒྱལ་པོ་སྲོང་བཙན་སྒམ་པོའི་སྐབས་སུ་བོད་མིའི་ཆོས་ཀྱི་ཆུ་ཚད་མཐོ་པོ་དེ་འདྲ་མེད་པས་སངས་རྒྱས་ཆོས་ལུགས་ཀྱི་དཔེ་ཆ་ཉི་ཤུ་རྩ་གཅིག་ཐུ་མི་སམ་བྷོ་ཊས་བསྒྱུར་ཟེར་བ་ཡོང་མི་སྲིད་པའི་ངོས་འཛིན་བྱེད་ཀྱི་ཡོད་པ་རེད།དེ་ནི་བསམ་བློ་ཧ་ཅང་གུ་དོག་པོ་ཞིག་ཡིན་ཏེ་སྐབས་དེར་ནང་ས་དང་།དེ་བཞིན་ཉེ་འཁོར་དུ་ཡོད་པའི་རྒྱ་གར་དང་བལ་ཡུལ་སོགས་འཛམ་གླིང་རྒྱལ་ཁབ་གཞན་ཚང་མ་བཀས་བཀོད་རྒྱུད་འཛིན་གྱི་སྤྱི་ཚོགས་སུ་སླེབས་ནས་ཡར་རྒྱས་ཆེན་པོ་བྱུང་སྟེ་ལོ་སྟོང་ཕྲག་ཁ་ཤས་སོང་ཟིན་ནའང་བོད་དེ་ད་དུང་བསྐལ་བ་ཡ་ཐོག་གི་སྤྱི་ཚོགས་ཀྱི་ཧ་ཅང་རྗེས་ལུས་ཀྱི་རྣམ་པར་ལུས་པ་ལྟ་བུ་ཞིག་ཡོང་མི་སྲིད་པས་བཤད་སྟངས་དེ་རྩ་བ་ནས་མི་འགྲིགཐུ་མི་སམ་བྷོ་ཊས་བསྒྱུར་གནང་བའི་སངས་ཆོས་ལུགས་ཀྱི་ཆོས་དཔེ་ཉི་ཤུ་རྩ་གཅིག་དེ་བཀའ་འགྱུར་གྱི་ནང་དུ་ཡོད་པས་དེ་ཚོ་ལྟ་དུས་དེང་སང་གི་མི་ཚོ་ཡིད་ཆེས་ཀྱི་མེད་པ་རེད།དེ་བཞིན་ཏུན་ཧོང་ཡིག་ཆའི་ནང་༼ལུགས་ཀྱི་བསྟན་བཅོས༽ཟེར་བ་ཞིག་ཡོད་པ་དེའི་ནང་སྤུན་མཆེད་རྒན་གཞོན་གཉིས་ཕན་ཚུན་གཏམ་གླེང་བྱས་ཏེ་མི་ལ་འགྲེལ་བ་བྱེད་སྟངས་དང་།སོ་སོའི་བཟའ་ཚང་ལ་འབྲེལ་བ་བྱེད་སྟངས།མི་ལ་སྐད་ཆ་ཤོད་སྟངས།ཕྲུ་གུར་སློབ་གསོ་རྒྱག་སྟངས་སོགས་སྐོར་ལ་དྲི་བ་དྲིས་ལན་བྱས་པའི་དཔེ་ཆ་ཡག་པོ་ཞིག་ཡོད་པ་དེའང་མི་ལ་ལས་དེ་དུས་བོད་ལ་ཆུ་ཚད་དེ་འདྲ་ཡོང་ཤེས་ཀྱི་མ་རེད་ཅེས་སྐབས་དེ་དུས་བྲིས་པ་ཡིན་པར་ཡིད་ཆེས་བྱེད་ཀྱི་མེད་པ་རེད།དེ་བཞིན་གནས་ཚུལ་གཞན་ཞིག་སྟེ།བོད་ཀྱི་རིག་གནས་དེ་སངས་རྒྱས་ཆོས་ལུགས་བོད་ལ་བྱུང་བའི་རྗེས་སུ་བྱུང་བ་མ་གཏོགས།སངས་རྒྱས་ཆོས་ལུགས་མ་བྱུང་གོང་དུ་བོད་ལ་རིག་གནས་རྩ་བ་ནས་མེད་པར་ངོས་འཛིན་བྱེད་ཀྱི་ཡོད་པ་རེད།ངོས་འཛིན་བྱེད་སྟངས་དེའང་འགྲིག་གི་མེད།བོད་ཀྱི་ཆོས་དང་རིག་གནས་ཚང་མའི་ཁུངས་གཏུགས་ས་རྒྱ་གར་ལ་གཏུགས་ཐོག་རྒྱ་གར་ནས་བྱུང་བ་ཡིན་ན་ཧ་ཅང་ཡག་པོ་ཡིན་པ་ཞིག་ངོས་འཛིན་པ་དང་།རྒྱ་གར་ནས་མ་བྱུང་ན་སོ་སོ་རང་ལ་གང་ཡང་མེད་པ་ལྟ་བུའི་ལྟ་བ་ཞིག་ཡོད།དེའི་ཐད་སྔོན་མ་བོད་ཀྱི་ལོ་རྒྱུས་འབྲི་སྟངས་ལ་གནད་དོན་དེ་རིགས་མང་པོ་ཞིག་ཡོད་པས་དེ་མི་འགྲིག་པ་རེད།གཞན་ཡང་སོ་སོའི་ཆོས་ལུགས་ཀྱི་ལངས་ཕྱོགས་ཁོ་ནར་ལངས་ནས་བོད་ཀྱི་ལོ་རྒྱུས་ཤོད་མི་རུང་།ལོ་རྒྱུས་མི་སྣར་དབྱེ་ཞིབ་བྱེད་སྐབས་མི་དེས་ཆོས་ལུགས་གང་འདྲ་ཞིག་ལ་དགའ་པོ་བྱེད་ཀྱི་ཡོད་དང་མི་དེ་ཆོས་ལུགས་གང་འདྲ་ཞིག་གི་ཁོངས་སུ་གཏོགས་མིན་ལ་བལྟས་ནས་མི་དེ་ཡག་པོ་ཡིན་དང་སྡུག་པོ་ཡིན་དཔྱད་བརྗོད་བྱེད་མི་རུང་།བོད་ཀྱི་ལོ་རྒྱུས་འབྲི་སྐབས་ལོ་རྒྱུས་ཁྱོན་ཡོངས་ཀྱི་འཕེལ་ཚུལ་ཇི་མ་ཇི་བཞིན་ཤོད་དགོས་པ་ལས་སོ་སོ་ཆོས་གང་ལ་དད་ཞེན་ཆེ་བ་ཡོད་མེད་ཀྱི་ལངས་ཕྱོགས་སུ་བསྡད་ནས་ལོ་རྒྱུས་མི་སྣར་གདེང་འཇོག་དང་ཚོད་དཔག་བྱས་ན་དེ་ནི་ཕྱོགས་ཞེན་ཟེར་བ་དེ་ཡིན་པས་དེ་ལྟར་བྱེད་མི་རུང་།བོད་ཀྱི་རིག་གནས་དེ་སངས་རྒྱས་ཆོས་ལུགས་མ་བྱུང་གོང་གནའ་སྔ་མོ་ནས་བོན་པོའི་ཆོས་དང་འབྲེལ་བ་ཧ་ཅང་དམ་པོ་ཡོད་པས་བོན་པོའི་ཆོས་ལ་བརྟག་དཔྱད་བྱས་ན་དེའི་ནང་ནས་གནའ་རབས་ཀྱི་བོད་ཀྱི་རིག་གནས་མང་པོ་ཞིག་རྙེད་ཐུབ་པ་ཡིན།སྔོན་མ་བོད་ཀྱི་རྒྱལ་པོ་དེ་ཡང་རྒྱ་གར་ནས་བྱུང་བ་རེད་ཟེར་བ་དང་།བོད་ཀྱི་མི་དེ་ཡང་དང་པོ་རྒྱ་གར་ནས་བྱུང་བ་རེད་ཟེར་བ།བོད་ཀྱི་ཆོས་དེའང་དང་པོ་རྒྱ་གར་ནས་བྱུང་བ་རེད་ཟེར་བ་སོགས་མང་པོ་ཞིག་རྒྱ་གར་ནས་བྱུང་བ་ལྟ་བུ།རྒྱ་གར་གྱི་ཟླ་བ་དེ་ཡང་བོད་ཀྱི་ཟླ་བ་ལས་ཡག་པ་ཡོད་པ་ལྟ་བུ།སོ་སོ་རང་ལ་ཟླ་བ་རྩ་བ་ནས་ཤར་རྒྱུ་མེད་པ་ལྟ་བུའི་ལྟ་བ་ཞིག་ཡོད།ང་ཚོས་ལྟ་བ་དེ་ལེགས་བཅོས་གཏོང་དགོས།བོད་དུ་སངས་རྒྱས་ཆོས་ལུགས་མ་དར་གོང་དུ་ཐོག་མར་བོན་པོའི་ཆོས་དར་བ་རེད།དེར་བརྟེན་བོན་པོའི་ཆོས་ཀྱི་སྐོར་དེ་སངས་རྒྱས་ཆོས་ལུགས་ཞུས་ཟིན་རྗེས་མཇུག་ཏུ་ཞུ་རྒྱུ་ཡིན།
