རིམས་ནད་སྔོན་འགོག་ཚོད་འཛིན་དང་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གཙོ་གནད་ལས་དོན་ལ་གཅིག་གྱུར་འཆར་འགོད་ཀྱིས་དམ་འཛིན་ཡག་པོ་བྱེད་དགོས
སྤྱི་ཚེས་19ཉིན་ཀྲུང་དབྱང་བརྙན་འཕྲིན་ལས་ཁུངས་ཀྱིས་རིམས་ནད་སྔོན་འགོག་ཚོད་འཛིན་དང་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གཙོ་གནད་ལས་དོན་ལ་གཅིག་གྱུར་འཆར་འགོད་ཀྱིས་དམ་འཛིན་ཡག་པོ་བྱེད་དགོས་ཞེས་པ་སྤེལ་ཡོད་པ་རེད།
དཔྱད་གཏམ་ནང་། མིག་སྔར། རིམས་ནད་སྔོན་འགོག་ཚོད་འཛིན་ཐད་སྔར་བཞིན་འགོག་སྲུང་གཙོ་བོར་བཟུང་རྒྱུ་རྒྱུན་འཁྱོངས་བྱེད་དགོས་པ་མ་ཟད། རྒྱལ་ཁབ་ཕྱི་ནང་གི་རིམས་ནད་སྔོན་འགོག་ཚོད་འཛིན་དུས་བབ་ཀྱི་འགྱུར་ལྡོག་ལ་གཞིགས་ནས་ལེགས་སྒྲིག་བྱེད་དགོས། ཕྱི་ཕྱོགས་ལ་འགོག་སྲུང་འཛིང་རགས་བརྟན་པོ་བཙུགས་ནས་མངའ་ཁོངས་ཕྱིའི་ནད་ཡམས་ནང་དུ་མཆེད་པའི་གནད་དོན་གསར་པར་དམ་འཛིན་ནན་པོ་བྱེད་དགོས། རིམ་ཁག་འགོ་ཁྲིད་ལས་བྱེད་པས་ཕྱོགས་གཅིག་ནས་ནང་ནུས་སྦྱོང་བརྡར་བྱས་ཏེ། ཕྱི་ནས་ནང་དུ་མཆེད་རྒྱུ་འགོག་པའི་གཙོ་གནད་ལས་འགན་དོན་འཁྱོལ་བྱེད་པ་དང་། གྲངས་གཞི་མཉམ་སྤྱོད་དང་། ཆ་འཕྲིན་བརྡ་ཁྱབ། རྒྱལ་ཁོངས་སུ་འཛུལ་བའི་མི་སྣའི་ཞིབ་བཤེར་དཔྱད་བསྡུར་བཅས་ཀྱི་ལམ་སྲོལ་འཐུས་ཚང་དུ་གཏོང་བ། མཁའ་ཐོག་སྐྱེལ་འདྲེན་དང་། འགག་སྒོའི་ནད་ཡམས་ཞིབ་བཤེར། དམིགས་སར་སྐྱེལ་བ། སྡེ་ཁུལ་གྱི་སྔོན་འགོག་ཚོད་འཛིན་བཅས་ཀྱི་ལྷུ་ཚིགས་ཚང་མ་འབྲེལ་མཐུད་ཡག་པོ་བྱེད་དགོས། ཕྱོགས་གཞན་ཞིག་ནས་རྒྱལ་སྤྱིའི་མཉམ་ལས་ལ་ཤུགས་སྣོན་རྒྱག་པ་དང་། སྐྱོབ་བཅོས་དང་སྔོན་འགོག་ཚོད་འཛིན་གྱི་ཉམས་མྱོང་མཉམ་སྤྱོད་ཧུར་ཐག་བྱེད་པ། རིམས་ནད་ཚབས་ཆེ་བའི་རྒྱལ་ཁབ་ལ་ནུས་པས་གང་ལྕོགས་ཀྱི་རོགས་རམ་བྱེད་པ་བཅས་བྱས་ནས། མིའི་རིགས་ཀྱི་ལས་དབང་གཅིག་མཐུན་མ་ལག་གི་འདུ་ཤེས་ལག་བསྟར་བྱེད་དགོས་ཞེས་བསྟན་ཡོད་པ་རེད།
དཔྱད་གཏམ་ནང་། རིམས་ནད་སྔོན་འགོག་ཚོད་འཛིན་གྱི་ལས་དོན་ཡག་པོ་སྒྲུབ་པ་དང་ཆབས་ཅིག་ཁ་ཚ་དགོས་གཏུགས་ཀྱི་འདུ་ཤེས་ཟབ་ཏུ་གཏོང་བ་དང་གནད་སྨིན་ཇུས་འདོན་ཡག་པོ་བྱས་ཏེ། འབད་བརྩོན་ཆེན་པོས་དཔལ་འབྱོར་དང་སྤྱི་ཚོགས་འཁོར་སྐྱོད་ཀྱི་རྒྱུན་གཏན་སྒྲིག་ལམ་སླར་གསོ་བྱེད་དགོས། རིམ་ཁག་ཏང་ཨུད་དང་སྲིད་གཞུང་གིས་རིམས་ནད་སྔོན་འགོག་ཚོད་འཛིན་དང་འཚམ་པའི་དཔལ་འབྱོར་དང་སྤྱི་ཚོགས་འཁོར་སྐྱོད་ཀྱི་སྒྲིག་ལམ་གང་མགྱོགས་བཙུགས་ཏེ། རིམས་ནད་ཀྱིས་བཟོས་པའི་གྱོང་གུན་ཚད་གཞི་དམའ་ཤོས་སུ་གཅོག་གང་ཐུབ་བྱ་དགོས་ཞེས་ནན་བཤད་བྱས་ཡོད་པ་རེད།
