ཆོས་དབྱིངས་སྐྱིད།
གསེར་དངུལ་རྩྭ་ཐང་གི་གཟི་བརྗིད།
ཁོ་མོ་སྟེ་བོད་ཀྱི་བུ་མོ་ཆོས་དབྱིངས་སྐྱིད་ལགས་ནི་མཚོ་སྔོན་ཞིང་ཆེན་མཚོ་བྱང་བོད་རིགས་རང་སྐྱོང་ཁུལ་ཧེ་ཡན་རྫོང་ཝ་འཇོག་ཡུལ་ཚོའི་མཚོ་ཆུང་སྡེ་བར་སྐྱེས། བོད་ཀྱི་བུ་མོ་ཆོས་དབྱིངས་སྐྱིད་ལགས་ནི། སྤྱི་ལོ༡༩༩༠ལོར་ངུ་ངག་གི་དབྱངས་རྟ་ཐོག་མ་མཚོ་སྔོན་པོའི་གསེར་དངུལ་རྩྭ་ཐང་དུ་འཐོར་ཏེ་འབྲོག་ཁྱིམ་དཀྱུས་མ་ཞིག་ཏུ་ལྟེ་ཁྲག་འཕོས། དུས་དེ་ནས་བཟུང་འབའ་འབའ་ལུ་གུའི་རྩེད་མཚར་གྱི་དབྱངས་རྟ་དང་ལྷན་དུ། ནོར་ནག་གི་རྨིག་རྗེས་བསྙེགས་ཏེ་བྱིས་དུས་ཀྱི་ལང་ཚོ་རིམ་བཞིན་གཉོམ་ལག་རྒྱས་འགོ་ཚུགས། རེ་ཞིག་ཁོ་མོར་བྱམས་ལྡན་ཕ་མའི་བཀའ་དྲིན་ལ་བརྟེན་ནས་སློབ་གྲྭར་འགྲིམས་རྒྱུའི་སྐལ་བ་ལྡན། འོན་ཀྱང་། ཁོ་མོ་འགྲོ་སའི་སློབ་གྲྭ་ནི་དེང་དུས་ཀྱི་ཀློག་རྡུལ་དང་། ཚན་རིག སློབ་གསོ་སོགས་ཀྱི་ཆ་རྐྱེན་ཡོངས་སུ་འཛོམས་པའི་རྒྱ་ནག་གི་རྩེ་ཕུད་སློབ་གྲྭ་དེ་འདྲ་མིན་ལ། དེ་བས་ཀྱང་རྒྱལ་སྤྱིའི་ཚད་ལྡན་སློབ་གྲྭ་དེ་འདྲ་ག་ལ་ཡིན་སྲིད། འོན་ཀྱང་། དེ་ནི་འབྲོག་པའི་རྩྭ་ཐང་གི་ཡིག་རྨོངས་སེལ་བ་ཙམ་གྱི་སྤུས་ཚད་ལས་གཞན་མེད། ཡིན་ཡང་། ཁོ་མོས་སློབ་གྲྭའི་ནང་རང་ཉིད་ཀྱི་དགའ་ཕྱོགས་འཚོལ་བཞིན། དཀའ་སྤྱད་སྡུག་རུས་ཀྱི་རྡོ་རྗེ་རི་ལ་འུ་ཁུང་ཕུག་ཅེས་པའི་དཔེ་ལྟར། དཀའ་ངལ་གདོང་ལེན་དང་བརྩོན་པ་དང་ལེན་བྱས་ཏེ་ཉིན་ལྟར་སློབ་ལ་བརྩོན་བཞིན་པའི་དུས་དེར། གསེར་དངུལ་རྩྭ་ཐང་གི་ལུས་རྩལ་འགྲན་བསྡུར་ནང་ཞུགས་རྒྱུའི་གོ་སྐབས་ཐོབ། དེ་ནས་གསེར་དངུལ་རྩྭ་ཐང་གི་ལུས་རྩལ་བ་རྩེ་ཕུད་ཀྱི་མིང་རྟགས་ཐོག རིམ་བཞིན་མཚོ་བྱང་ཁུལ་ལུས་རྩལ་རུ་ཁག་གི་གྲས་སུ་བདམས། དུས་དེ་ནས་བཟུང་ཁོ་མོ་སྟེ། ཆོས་དབྱིངས་སྐྱིད། སེར་དངུལ་རྩྭ་ཐང་གི་གཟི་བརྗིད་རེད་ཅེས་སྡེ་མི་ཡོངས་ཀྱིས་བསྔགས་བརྗོད་ཀྱི་མེ་ཏོག་གཏོར།
མཚོ་སྔོན་པོའི་གཟི་བརྗིད།
གསེར་དངུལ་རྩྭ་ཐང་གི་གཟི་བརྗིད་མཚན་བྱང་ཐོག་ཁོ་མོ་མཚོ་བྱང་ཁུལ་ལུས་རྩལ་རུ་ཁག་ནང་ཞུགས་རྒྱུའི་སྐལ་བ་ལྡན། སྐབས་དེ་ནས་བཟུང་སྔར་ལས་ལྷག་པའི་སེམས་ཤུགས་དང་ཧུར་བརྩོན་གྱི་ཕུགས་འདུན་གསར་བ་ཞིག་མངོན་པ་ནི། ང་རང་སྟེ་གསེར་དངུལ་རྩྭ་ཐང་གི་གཟི་བརྗིད་དུ་གྱུར་ཡོད་པས། མོས་ཅི་ནུས་ཀྱིས་གཟི་བརྗིད་ཀྱི་རིན་ཐང་ལ་བརྩི་འཇོག་དང་ང་ལ་སྤྲད་པའི་གདེང་སྤོབས་དེ། དུས་ནམ་ཡང་འཐོར་འདེགས་བྱེད་དགོས་སོ་ཞེས། ཁོ་མོས་འབྲི་ཚིག་འདི་དག་ཞལ་འདོན་ལྟར་སྐྱོར་ཏེ། རང་ཉིད་ཀྱི་ཕུགས་འདུན་གསར་བ་མངོན་འགྱུར་གྱི་ཕྱོགས་སུ་རྨང་གཞི་བརྟན་པོ་བཞག སྤོབས་སེམས་དང་ཡིད་ཆེས་དེའི་ཁྲོད། ཁོ་མོར་ཡང་བསྐྱར་གཟི་བརྗིད་ཀྱི་མཚན་སྙན་གསར་བ་ཞིག་གྲགས་འགོ་ཚུགས། དེ་ནི་ཞིང་ཆེན་རིམ་པའི་འགྲན་རྩོད་སྟེགས་བུ་བརྒྱུད། ཁོ་མོ་མཚོ་སྔོན་ཞིང་ཆེན་ལུས་རྩལ་རུ་ཁག་ནང་བདམས་ཐོན་བྱུང་། དུས་དེ་ནས་བཟུང་མཚོ་སྔོན་གྱི་ཡུལ་མི་ཀུན་གྱིས་ཁ་གཡང་བཀྲ་ཤིས་ཀྱི་ཤིས་ཚིག་བསྒྲགས་ཏེ། ཁོ་མོར་རང་ལོ༡༦སྟེང་མཚོ་སྔོན་པོའི་གཟི་བརྗིད་ཀྱི་མཚན་སྙན་ཐོབ།
བོད་གངས་ཅན་གྱི་གཟི་བརྗིད།
མཚོ་སྔོན་པོའི་གཟི་བརྗིད་ཀྱི་མཚན་སྙན་བསྩལ་ནས་ཅུང་མ་འགོར་པར། ཁོ་མོ་སྔར་དང་མ་འདྲ་པར་སྦྱོང་བརྡར་དང་འགྲན་རྩོད་གྲངས་མེད་སྟེང་ཞུགས་ནས་མཚོ་སྔོན་གྱི་གཟི་བརྗིད་སྟེགས་བུ་ལས་རྣམ་པར་རྒྱལ་ཏེ། སྤྱི་ལོ༢༠༡༠ཟླ༦པར་རྒྱ་ནག་རྒྱལ་ཡོངས་ལུས་རྩལ་རུ་ཁག་ནང་བདམས་ཐོན་བྱུང་། འདི་ནི་བོད་མི་རིགས་ཞིག་རྒྱ་ནག་རྒྱལ་ཡོངས་ལུས་རྩལ་རུ་ཁག་ནང་ཐོན་པ་ཐོག་དང་པོ་རེད། དེ་ཡང་བོད་གངས་ཅན་གྱི་ལོ་རྒྱུས་ཐོག་ལུས་རྩལ་རིག་པའི་ཟིན་ཐོ་བརྒལ་ཏེ། བོད་གངས་ཅན་གྱི་གཟི་བརྗིད་རྡོ་རིང་ཐོག་མ་དེ་བསྐྲུན། འདི་ནས་བཟུང་། བོད་མི་ཀུན་གྱིས་བོད་ཀྱི་ལོ་རྒྱུས་ཐོག་ལུས་རྩལ་ཆེད་ལས་པ་ཆོས་དབྱིངས་སྐྱིད་ལགས་ནི། རྒྱ་མི་དུང་ཕྱུར་དུ་མའི་འགྲན་རྩོད་དང་གནོན་ཤུགས་ཁྲོད། རང་ཉིད་ཀྱི་འབད་བརྩོན་སྙིང་སྟོབས་ལ་བརྟེན་ནས་རྒྱ་ནག་རྒྱལ་ཡོངས་ལུས་རྩལ་རུ་ཁག་ནང་བདམས་ཐོན་བྱུང་བ་ནི། བོད་གངས་ཅན་གྱི་གཟི་བརྗིད་རེད་ཅེས་མཚན་སྙན་གྱི་གྲགས་པ་གང་སར་ཁྱབ།
རྒྱ་ནག་གི་གཟི་བརྗིད།
སྤྱི་ལོ་ཉིས་སྟོང༢༠༡༡ལོར་ཁོ་མོ་རྒྱ་ནག་རྒྱལ་ཡོངས་ལུས་རྩལ་རུ་ཁག་གི་འཐུབ་ཚབ་ཐོག་རྒྱལ་སྤྱིའི་ལུས་རྩལ་འགྲན་ཚོགས་སྟེང་ཞུགས་ཏེ་དངུལ་གྱི་སྟེགས་མའི་བྱ་དགའ་བླངས་པས། རྒྱ་རིགས་དུང་ཕྱུར་དུ་མའི་དགའ་བསུ་དང་ཡིད་ཆེས་ཁྲོད། བོད་རིགས་བུ་མོ་ཆོས་དབྱིངས་སྐྱིད་ནི་རྒྱ་ནག་གི་གཟི་བརྗིད་རེད་ཅེས་རྒྱ་མི་ཀུན་གྱིས་སྤོབས་སེམས་ཀྱི་རེ་བ་ཁོ་མོར་བཅོལ། མཚན་སྙན་འདི་ལས་ཁོ་མོ་ནི་གཉའ་གནོན་དང་མཐོང་ཆུང་ལ་མི་སྐྲག་པར། དཔའ་ངར་གྱི་མགོ་བོ་ནམ་ཡང་ཡར་འགྲེངས་པའི་བོད་མི་ལ་རྒྱ་ཅན་ཞིག་ཡིན་པ་མཐོང་ཐུབ། ལོ་དེར་ཁོ་མོས་ཡང་བསྐྱར་འཛམ་གླིང་ལུས་རྩལ་འགྲན་ཚོགས་ཀྱི་འདུར་རྒྱུགས་འགྲན་བསྡུར་ཁྲོད་བྱ་དགའ་ཨང་ལྔ་པ་བླངས་ཏེ། ཁོ་མོར་སྔར་ལས་ཀྱང་དཔའ་ངར་གྱི་སྙིང་སྟོབས་ཆེ་རུ་ཕྱིན། སྤྱི་ལོ༢༠༡༢ལོའི་ཟླ༣པའི་ཚེས༣༠ཉིན་གྱི་ལོན་ཌོན་ཨོ་རྩལ་འགྲན་ཚོགས་ཀྱི་སྔོན་འགྲོའི་འདེམས་སྒྲིག་འགྲན་ཚོགས་སྟེང་། སྤྱི་ལེ༢༠ཅན་གྱི་བུད་མེད་ཀྱི་འདུར་རྒྱུགས་འགྲན་བསྡུར་ཁྲོད་ཁོ་མོས་དུས་ཚོད༡དང་སྐར་མ༢༧སྐར་ཆ༤བརྒྱབ་སྟེ་ཨང་གསུམ་པའི་གྲུབ་འབྲས་ལས༢༠༡༢ལོའི་ལོན་ཌོན་ཨོ་རྩལ་འགྲན་ཚོགས་ནང་ཞུགས་རྒྱུར་བདམས་ཐོན་བྱུང་། དུས་དེ་ནས་བཟུང་། ཡ་གླིང་གི་ཟིན་ཐོ་གསར་བ་དབུ་བརྙེས་འགོ་ཚུགས།
གླིང་ཆེན་ཨེ་ཤ་ཡའི་གཟི་བརྗིད།
སྤྱི་ལོ༢༠༡༢ལོའི་ཟླ༨པའི་ཚེས༡༢ཉིན། བོད་རིགས་བུ་མོ་ཆོས་དབྱིངས་སྐྱིད་ལོན་ཌོན་ཨོ་ལེམ་ཕུག་རྩེད་འགྲན་ནང་འཛུལ་ཞུགས་ཀྱིས་རྒྱལ་ཁབ༣༣དང་བུ་མོ་ལུས་རྩལ་བ༦༡ལས་གྲུབ་པའི་བུད་མེད་ཀྱི་འདུར་རྒྱུགས་འགྲན་བསྡུར་ཁྲོད། རྒྱུགས་ཡུན་དུས་ཚོད༡དང་སྐར་མ༢༥སྐར་ཆ༡༦གི་གྲུབ་འབྲས་ལས་ཟངས་ཀྱི་རྟགས་མ་བླངས་ཏེ། ཡ་གླིང་གི་ཟིན་ཐོ་ལས་བརྒལ། ཉིན་འདི་ནས་བཟུང་ཁོ་མོ་ནི་ཨེ་ཤ་གླིང་ཆེན་གྱི་གཟི་བརྗིད་དུ་གྱུར། དེ་དང་ཆབས་ཅིག་གླིང་ཆེན་ཨེ་ཤ་ཡའི་གཟི་བརྗིད། བོད་རིགས་བུ་མོ་ཆོས་དབྱིངས་སྐྱིད་ཞེས་མཚན་སྙན་གྱི་བ་དན་དཀར་པོ་འཛམ་གླིང་དུ་ གྲགས།
འཛམ་གླིང་གི་གཟི་བརྗིད།
སློབ་གསོ་དང་སློབ་ སྦྱོང་ཕྱོགས་གང་ཅིའི་ཐད། ཆ་རྐྱེན་ཧ་ཅང་ཞན་པའི་གྲངས་ཉུང་མི་རིགས་ཤིག་སྟེ་བོད་རིགས་རེད། འཚོ་ཐབས་ཀྱི་ཆ་ནས་ཀྱང་རྟ་ནོར་ལུགས་གསུམ་གྱི་འཕེལ་ཁ་ལ་བརྟེན་དགོས་པས། ཡོང་འབབ་ཧ་ཅང་ཉུང་ཉུང་རེད། འོན་ཀྱང་། གནས་བབ་འདི་འདྲའི་འོག་འཚོ་བ་བསྐྱལ་བཞིན་པའི་འབྲོག་ཁྱིམ་དཀྱུས་མ་ཞིག སློབ་གསོའི་རྒྱབ་ལྗོངས་མེད་པ་དང་། དཔོན་སའི་རྒྱབ་སྐྱོར་མེད་པའི་མི་ཚང་གཉོམ་ཆུང་ཞིག དེ་ནི་ཨ་ཁུ་མགོན་པོ་རབ་བརྟན་ཚང་སྟེ། གསེར་དངུལ་རྩྭ་ཐང་གི་འབྲོག་ཁྱིམ་དཀྱུས་མ་ཞིག་རེད། འབྲོག་ཁྱིམ་འདིར་འཚར་ལོངས་བྱུང་པའི་བོད་རིགས་བུ་མོ་ཆོས་དབྱིངས་སྐྱིད་ཀྱིས། རང་ཉིད་ཀྱི་དཀའ་སྡུག་འབད་བརྩོན་ལ་བརྟེན་ནས། འཛམ་གླིང་གི་སྡིངས་ཆའི་སྟེང་འཛེགས་པ་ནི། དྲང་བདེན་དང་། གནས་ལུགས། ཁྲིམས་མཐུན་གྱི་འཛམ་གླིང་འདི་ཉིན་རེ་ནས་ཉིན་རེར་དམངས་གཙོ་དང་། རང་དབང་། འདྲ་མཉམ་ཀྱི་ཕྱོགས་སུ་འཕེལ་བཞིན་པ་གསལ་པོར་མངོན། དེར་བརྟེན་ཕྲན་གྱིས་ཁོ་མོ་ནི་འཛམ་གླིང་གི་གཟི་བརྗིད་རེད་ཞེས་བརྗོད་པར་སྤོབས།
ལོན་ཌོན་ཨོ་རྩལ་འགྲན་ཚོགས་ཀྱི་གཟི་བརྗིད།
ལོན་ཌོན་ཨོ་ལེམ་ཕུག་རྩལ་འགྲན་འགོ་བཙུགས་པ་ནས་བཟུང་། མི་རྣམས་སོ་སོའི་རྒྱལ་ཁབ་དང་མི་རིགས་ཀྱི་ཞེན་ཁོག ལ་རྒྱའི་ཆེད། སྡང་སེམས་ཀྱི་མེ་ལྕེ་འབར་ཞིང་། ཁྱོད་ཕམ་དང་ང་རྒྱལ་གྱི་བསམ་བློ་ཁོག་པར་བཅུགས་ཏེ། རྩེད་འགྲན་པ་སུ་ཡིན་ཡང་། རང་ཉིད་མ་ཐོབ་པར་ངོ་གདོང་ཡོད་ཚད་སྡུག་གི་མུན་པ་དང་འདྲ་བར་འཁོན་སེམས་ཀྱིས་ཁེངས་ཡོད། ཡིན་ཡང་ཐུན་མོང་མ་ཡིན་པའི་ཁྱད་ཆོས་ཞིག་སྟེ། བོད་རིགས་བུ་མོ་ཆོས་དབྱིངས་སྐྱིད་ནི་འགྲན་བསྡུར་འགོ་བཙུགས་པ་ནས་བཟུང་། ཞལ་རས་དུང་ཟླ་དཀར་པོ་འཛུམ་གྱིས་ཕྱུག་ཅིང་དགའ་སྤྲོའི་རྣམ་འགྱུར་གྱི་རྒྱལ་ཁ་གདོང་ལ་ཤར་ཏེ། ཚང་མར་འདྲ་མཉམ་དང་བརྩེ་སེམས་ཀྱི་ལྟ་ཚུལ་ཡང་དག་བཟུང་ཡོད་པ་གསལ་པོར་ཤེས་ཐུབ། ཁོ་མོས་སོ་སོ་རང་ཉིད་ཀྱི་ནུས་ཤུགས་དང་སྤོབས་སེམས་ལ་བརྟེན་དགོས་པ་ལས་འཁོན་སེམས་དང་ཆགས་སྡང་ག་ལ་རུང་། ཚང་མ་ཕན་ཚུན་མཐུན་སྒྲིལ་དང་། འདྲ་མཉམ། ཕན་ཚུན་གོ་རྟོགས་དགོས་ཞེས་དྲང་བདེན་གྱི་བརྡ་ལན་དེ་ཁོ་མོའི་ཞལ་གྱི་མཛུམ་མདངས་ལས་ལྟད་མོ་བ་དང་འགྲན་ཞུགས་པ་ཚང་མར་གསལ་བཤད་བྱས་ཡོད། དེ་ནི་ཨོ་རྩལ་འགྲན་ཚོགས་ཀྱི་ཉིན་མཐའ་མ་སྟེ། སྤྱི་ལོ༢༠༡༢ལོའི་ཟླ༨པའི་ཚེས༡༢ཉིན་བོད་རིགས་བུ་མོ་ཆོས་དབྱིངས་སྐྱིད་ཀྱི་མཛུམ་མདངས་ཀྱི་རྒྱལ་ཁ་ལས། ལོན་ཌོན་ཨོ་རྩལ་འགྲན་ཚོགས་ནི་ཕན་ཚུན་མཐུན་སྒྲིལ་དང་། འདྲ་མཉམ། གོ་རྟོགས། ཕན་ཚུན་བརྩེ་སེམས་ཀྱིས་ཡོངས་སུ་ཁེངས་ཏེ། གཟི་བརྗིད་དང་རྒྱལ་ཁའི་ངང་མཇུག་སྒྲིལ་པས་བརྡ་ལན་སྤྲད་ཅིང་ཁོ་མོ་ནི་ལོན་ཌོན་ཨོ་རྩལ་འགྲན་ཚོགས་ཀྱི་གཟི་བརྗིད་དུ་གྱུར།
མཐར་བོད་རིགས་བུ་མོ་ཆོས་དབྱིངས་སྐྱིད་ལགས་ཀྱིས་གསེར་དངུལ་རྩྭ་ཐང་གི་གཟི་བརྗིད་ནས་མཚོ་སྔོན་པ་ཡི་གཟི་བརྗིད། བོད་གངས་ཅན་གྱི་གཟི་བརྗིད་ནས་རྒྱ་ནག་གི་གཟི་བརྗིད། ཨེ་ཤ་ཡ་གླིང་ཆེན་གྱི་གཟི་བརྗིད་ནས་འཛམ་གླིང་གི་གཟི་བརྗིད། མཐའ་མཇུག་ལོན་ཌོན་ཨོ་རྩལ་འགྲན་ཚོགས་ཀྱི་གཟི་བརྗིད་སོགས། གཟི་བརྗིད་ཀྱི་མཚན་སྙན་བདུན་ལས་རྣམ་པར་རྒྱལ་ཏེ། ཁོ་མོའི་སྙིང་སྟོབས་དང་སྤོབས་པ། ཡིད་ཆེས། དཔའ་ངར། བརྩོན་སེམས། དྲང་བདེན། བརྩེ་སེམས་སོགས་ཀྱིས་ཡོངས་སུ་ཕྱུགས་པའི་བོད་མི་རིགས་ཀྱི་ཁྱད་ཆོས་དེ། སྤྱི་ལོ༢༠༡༢ལོའི་ལོན་ཌོན་ཨོ་རྩལ་འགྲན་ཚོགས་ཀྱི་ལོ་རྒྱུས་དེབ་ཐེར་དུ་བཀོད། འདི་ནི་བོད་གངས་ཅན་གྱི་མི་རབས་གསར་པའི་ལོ་རྒྱུས་རྡོ་རིང་ཡིན།
