ཉེ་ལམ་དྲ་སྟེང་ན་སྒོ་ཤེས་རབ་རྒྱ་མཚོ་ལགས་ཀྱིས་བརྩམས་པའི《དཔྱད་འཚོལ་དང་ལྟ་ཚུལ》དང་། རྗེ་ཙོང་ཁ་བ་ཆེན་པོའི་རྟོགས་བརྗོད་འདུན་ལེགས་མའི་སློབ་ཁྲིད་སྒྲ་བཤུས《སྐྱེས་ཆེན་གྱི་བཞུད་ལམ》ཞེས་པའི་དེབ་གཉིས་ཚོང་རར་བཀྲམ་ཟིན་པའི་གསར་འགྱུར་གང་ས་གང་དུ་སྤེལ་བཞིན་ཡོད་པ་དང་། དེ་རིང་གྲོགས་པོ་ཞིག་གི་སྐད་འཕྲིན་ལས“སྒོ་ཤེར་དང་ནམ་མཁའ་བསྡུར་བ”ཞེས་པའི་གསར་འགྱུར་འདི་འདྲ་ཞིག་མཐོང་སྟེ། ཟི་ལིང་དུ་གཞིས་སྡོད་བྱེད་པའི་བོད་ཀྱི་ཚོང་བ་ཞིག་གིས་བདག་ལ། “ཉིན་གསུམ་གྱི་ནང་དུ་བདག་གིས་སྒོ་ཤེར་གྱི་དེབ་བརྒྱད་དང་རྡུང་ལེན་པ་ནམ་མཁའི་གླུ་གཞས་ཆེད་སྒྲིག་འོད་སྡེར་སུམ་བརྒྱ་ལྷག་བཙོངས་པ་ཡིན”ཞེས་སྨྲས་བྱུང་།
གསར་འགྱུར་འདི་མཐོང་རྗེས་བདག་གིས་རང་དབང་མེད་པར་རང་གིས་རང་ལ“ངེས་པ་དོན་གྱི་གླུ་དང་གར་ལ་སྤྲོ་བའི་མི་རིགས། མཁས་པའི་བློ་གྲོས་ཀྱིས་རྩལ་ལས་བཏོན་པའི་བསྟན་བཅོས་ལ་དོ་སྣང་བྱེད་མཁན་ནི་དགུན་གྱི་མེ་ཏོག་ཇི་བཞིན་དུ་གྱུར་ཡོད་དམ”ཞེས་པའི་དྲི་བ་ཞིག་འདྲི་དགོས་བྱུང་། གློ་བུར་དུ་ཟླ་འགའི་སྔོན་ལ་དྲ་སྟེང་ན་ཁྱབ་བཞིན་པའི”འཇར་མན་པའི་དཔེ་ཀློག”ཅེས་པའི་རྩོམ་ཐུང་དེ་ཡིད་ལ་དྲན་ཞིང་། དེས་བོད་རིགས་གཞོན་ནུ་རྣམས་ལ་བློ་སྐྱེད་ཅུང་ཟད་སྟེར་ཐུབ་བམ་སྙམ་པའི་ཀུན་སློང་དང་བཅས་འདིར་བཀོད་པ་ཡིན།
འཇར་མན་རྒྱལ་ཁབ་ཏུ་ཆུ་ཚོད་བཅུའི་སྟེང་དུ་ཟ་ཁང་དུ་ཞིམ་མངར་གྱི་ཟས་ལ་རོལ་བཞིན་པ་ནི་དཀོན་ལ། ཉིན་རྒྱུན་རྒྱ་སྲང་དུ་རྩེད་འཇོ་ལ་རོལ་བཞིན་པ་ཡང་མཐོང་རྒྱུ་མེད་པར་མ་ཟད། ན་གཞོན་རྣམས་ཀྱང་རྒྱུན་པར་མཉམ་དུ་འཛོམས་ནས་སྐྱིད་པོ་བྱེད་པ་ཉུང་། མི་དམངས་ཕྱུག་ཅིང་རྒྱལ་ཁབ་སྟོབས་འབྱོར་ལྡན་པའི་འཇར་མན་ནི་ལྷིང་འཇགས་ངང་དཔེ་ཀློག་ལ་བརྩོན་པའི་རྒྱལ་ཁབ་ཞིག་ཡིན་ལ། རྒྱལ་ཁབ་འདིར་མཚན་ཉིད་རིག་པ་བ་དང་། བསམ་བློ་བ། རྩོམ་པ་པོ། སྙན་ངག་པ་མང་པོ་བྱུང་མྱོང་བ་ཐམས་ཅད་ནི་དཔེ་ཀློག་དང་འབྲེལ་བ་དམ་ཟབ་ཡོད།
འཇར་མན་པའི་དཔེ་ཀློག་དེ་ཕྱོགས་གསུམ་དུ་སྤྱི་སྡོམ་བྱས་ཆོག་སྟེ། དཔེ་ཀློག་གི་གོམས་སྲོལ་དང་། དཔེ་ཀློག་གི་ཁ་དབུགས། དཔེ་ཀློག་གི་ཆ་རྐྱེན་བཅས་སོ། ། དཔེ་ཀློག་དེ་སྤྱི་དམངས་ཡོངས་ཀྱི་རིག་གནས་ཞིག་ཏུ་གྲུབ་ཡོད་པའི་སྐབས་སུ། མི་དམངས་ཕྱུག་ཅིང་རྒྱལ་ཁབ་སྟོབས་འབྱོར་ལྡན་པ་ཞིག་ཏུ་འགྱུར་རྒྱུ་དང་ཁ་ཐག་མི་རིང་ངོ་། །
ཞིབ་འཇུག་གི་འབྲས་བུར་གཞིགས་ན། འཇར་མན་གྱི་མི་བརྒྱ་ཆའི ༩༡ གིས་ལོ་སྔོན་མའི་ནང་དུ་དཔེ་ཆ་གཅིག་ཀློག་མྱོང་ཡོད་པ་དང་། དེའི་ནང་བརྒྱ་ཆའི ༢༣ གྱིས་དཔེ་ཆ ༩ ནས ༡༨ ཀློག་མྱོང་ཡོད་ལ། བརྒྱ་ཆའི ༢༥ ཡིས་དཔེ་ཆ ༡༨ ལས་མང་བར་ཀློག་ཡོད། ཆ་སྙོམས་གཟའ་འཁོར ༣ རེར་དེབ་རེ་ཀློག་བཞིན་ཡོད། བརྒྱ་ཆའི ༧༠ ཟིན་པའི་འཇར་མན་གྱི་མི་དཔེ་ཀློག་ལ་དགའ་ཞིང་། མི་གྲངས་ཕྱེད་ཙམ་གྱིས་དུས་ཚོད་ངེས་གཏན་གྱི་ནང་དུ་དེབ་ཉོ་བ་དང་། མི་གྲངས་ཀྱི་གསུམ་ཆའི ༡ གིས་ཉིན་རེར་དཔེ་ཀློག་བྱེད། གླེང་འོས་པ་ཞིག་ནི་ལོ་ཚོད་མི་འདྲ་བའི་འཇར་མན་གྱི་མིའི་ནང་དུ་དཔེ་ཀློག་ལ་འཇུག་པར་ཆེས་སྤྲོ་བ་ནི་ལོ་སུམ་ཅུའི་མན་གྱི་ན་གཞོན་རྣམས་ཡིན་ལ། དཔེ་ཀློག་ནི་ཁོ་ཚོ་ཝུ་ཆང་ལ་དགའ་བ་ནང་བཞིན་རེད། ལོ་བཅུ་བཞིའི་ཡན་གྱི་འཇར་མན་པའི་ནང་དུ། བརྒྱ་ཆའི ༦༩ ཡིས་གཟའ་འཁོར་རེར་ཉུང་མཐའ་ཡང་དཔེ་ཆ་གཅིག་ཀློག་གིན་ཡོད་པ་དང་། བརྒྱ་ཆའི ༣༦ གིས་རང་ཉིད་ཀྱིས་རྒྱུན་པར་དཔེ་ཀློག་བྱེད་ཟེར་བ་དང་། བརྒྱ་ཆའི ༢༢ ཀྱིས་དཔེ་ཀློག་མང་པོ་བྱེད་བཞིན་ཡོད་ལ། བརྒྱ་ཆའི་བཅུ་དྲུག་ལ་ཉིན་རེར་དཔེ་ཀློག་བྱེད་པའི་གོམས་སྲོལ་ཡོད།
མི་གྲངས་ཁྲི ༨༠༠༠ ལས་ལྷག་པའི་འཇར་མན་པར་འཛམ་གླིང་སྟེང་ཆེས་ཆེ་བའི་དཔེ་མཛོད་ཀྱི་ཚོང་ར་གཉིས་པ་དེ་ཡོད་ལ། ལོ་རེར་ཚོང་རའི་བཙོང་ཚད་ཀྱིས་ཡོ་རོབ་ཀྱི་སྒོར་དུང་ཕྱུར ༩༦ ཟིན་ཡོད་པར་མ་ཟད། ལོ་རེར་དེབ་གསར་ཁྲི ༩ ལྷག་དཔེ་སྐྲུན་བྱེདབཞིན་ཡོད། འཇར་མན་ནི་དཔེ་མཛོད་ཁང་ཆེས་མང་བའི་རྒྱལ་ཁབ་ཞིག་ཡིན་ལ། ཆ་སྙོམས་ཀྱིས་མི་ཁྲི ༡ དང་ ༧ གྱི་བར་དུ་དཔེ་མཛོད་ཁང་གཅིག་རེ་ཡོད།
འཇར་མན་པའི་དཔེ་ཀློག་རིག་གནས།
འཇར་མན་གྱི་གནས་གང་དུ་སོང་ཡང་དཔེ་ཀློག་བྱེད་པའི་མི་མཐོང་ཐུབ་ལ།མི་སོ་སོའི་རྒྱབ་ཁུག་གི་ནང་དུ་དེབ་རེ་གཉིས་ཁུར་ཡོད་ལ། ཁོ་ཚོ་རླངས་འཁོར་ས་ཚུགས་དང་ཇ་ཁང་གང་དུ་སོང་ཡང་དུས་ཚོད་ཡོད་ཚེ་དཔེ་ཀློག་ལ་བྲེལ་བ་ཡིན། གལ་ཏེ་ཁྱེད་རང་འཇར་མན་དུ་འཚོ་སྡོད་བྱེད་པ་ཞིག་ཡིན་ན། ཁྱེད་ཀྱིས་དེ་རུ་དཔེ་དེབ་ནི་ཇི་འདྲའི་གོང་ཆེན་པོ་ཞིག་ཡིན་པ་ཤེས་ཐུབ། ༢༠༡༢ལོར་རྒྱུག་ཆེ་བའི་བརྩམས་སྒྲུང《Eristwieder da》ལ་ཡོ་རོབ་ཀྱི་སྒོར ༡༩.༩ ཡིན་ཏེ། དེ་ནི་ཀྲུང་གོའི་སྒོར ༡༧༠ དང་མཚུངས། འཇར་མན་གྱི་མི་དཔེ་ཀློག་ལ་དགའ་བའི་རྐྱེན་གྱིས་འཇར་མན་གྱི་ཨ་མི་ཟིན (Amazon)གྱི་དཔེ་ཆ་དང(Kindle)དཔེ་ཀློག་འཕྲུལ་ཆས་གཉིས་ཀྱིས་འཚོང་ཧ་ཅང་རྒྱུག་ཆེ། འཇར་མན་པ་དག་གློག་རྡུལ་གྱི་དེབ་ལས་ཤོག་བུའི་དེབ་ལ་དགའ་བོ་བྱེད་ཀྱི་ཡོད་དེ། རྒྱུ་མཚན་གཅིག་ནི་ཤོག་བུའི་དེབ་དེ་ལག་ཏུ་བཟུང་ན་བདེན་པའི་སྣང་བ་སྟེར་ཞིང་། གཉིས་ནི་གློག་རྡུལ་གྱི་དེབ་དང་ཤོག་བུའི་དེབ་གཉིས་ཀྱི་བར་དུ་རིན་གོང་བར་ཁྱད་ཆེན་པོ་མེད་པས་སོ། །
འཇར་མན་པ་དག་ནི་རིན་ཐང་ལྡན་པའི་དཔེ་ཆ་ཀློག་རྒྱུར་དགའ་བ་ལས་དོན་སྙིང་ཆེར་མི་ལྡན་པའི་གསར་འགྱུར་སོགས་ཀློག་རྒྱུ་ལ་དགའ་བོ་བྱེད་ཀྱི་མེད། ཁོ་ཚོ་ཆེས་དགའ་བ་ནི་ནང་དོན་གཏིང་ཟབ་ལ་བསམ་གཞིགས་ཀྱི་རིན་ཐང་ལྡན་པ། སེམས་ལ་སྟོབས་སྦྱིན་ཐུབ་པའི་རྩོམ་རིག་བརྩམས་ཆོས་དག་ཡིན།
དཔེ་ཀློག་གི་ཁ་དབུགས།
རྐང་རྩེད་སྤོ་ལོ་ལས་གཞན། དཔེ་ཀློག་ནི་འཇར་མན་གྱི་དམངས་ཡོངས་ཀྱིས་དགའ་བོ་བྱེད་པའི་དོན་དག་ཅིག་ཡིན་ལ། རྒན་དར་གཞོན་གསུམ་སུ་ཡིན་ཡང་དཔེ་ཀློག་བྱེད་ལ། དཔེ་ཀློག་ཀྱིས་སྒེར་ཚུགས་ཀྱིས་བསམ་བློ་གཏོང་བའི་ནུས་པ་དང་གནད་དོན་ཐག་གཅོད་པའི་ནུས་པ་སྐྱེད་སྲིང་བྱ་ཐུབ་པར་ཡིད་ཆེས་རྐྱེན། ཁོ་ཚོར་རང་འགུལ་གྱིས་སློབ་སྦྱོང་བྱེད་པ་དང་ཚེ་གང་ལ་སློབ་སྦྱོང་བྱེད་དགོས་པའི་ལྟ་བ་རྒྱུད་ལ་གྲུབ་ཡོད། འཇར་མན་པས་དཔེ་ཀློག་ནི་རྒྱལ་ཁབ་ཀྱི་མ་འོངས་པ་དང་རག་ལས་པར་ཡིད་ཆེས་ཡོད་ལ། རྒྱུན་པར་དཔེ་ཀློག་གི་ལས་ལ་གཞོལ་ན་དཔེ་ཀློག་གི་ཆུ་ཚད་དང་གོ་བ་ལེན་པའི་ནུས་པ། བསམས་གཞིགས་ཀྱི་ནུས་པ་བཅས་གོང་འཕེལ་དུ་གཏོང་ཐུབ། དེའི་རྐྱེན་གྱིས་ཁྱིམ་བདག་དང་སློབ་གྲྭ་ལས་གཞན། སྲིད་གཞུང་གིས་ཀྱིས་དཔེ་ཀློག་ནི་བྱིས་པའི་བློ་སྒོ་འབྱེད་པའི་སྤྱི་ཚོགས་ཀྱི་ལས་གཞི་ཞིག་ཏུ་བརྩིས་ཏེ་ལོ་རིམ་ལྔ་བའི་སློབ་མས་དཔེ་མཛོད་ཁང་ནས་རིན་གོང་མི་དགོས་པའི་དཔེ་ཆ་རེ་བླངས་ཆོག
འཇར་མན་གྱི་ཕ་མས་བྱིས་པ་ཆུང་དུས་ནས་བཟུང་དཔེ་ཀློག་གི་སྤྲོ་བ་སྐྱེད་སྲིང་བྱེད་པ་ཡིན་ཏེ། བྱིས་པའི་མི་ཚེའི་ཆེས་ཐོག་མའི་རྩེད་ཆས་ནི་དཔེ་ཆ་ཡིན་ལ། ཉིན་རེར་གཉིད་མ་ལོག་སྔོན་དུ་བྱིས་པར་དཔེ་ཆ་ཀློག་པ་དང་ཡང་ན་བྱིས་པ་དང་ལྷན་དུ་དཔེ་ཀློག་བྱེད་པ་ཡིན། འཇར་མན་གྱི་སློབ་ཆུང་གི་སློབ་མར་སློབ་ཁྲིད་ཧ་ཅང་ཉུང་བ་དང་ཉིན་གུང་ཆུ་ཚོད་གཉིས་ཀྱི་གཡས་གཡོན་དུ་སློབ་གྲྭ་གྲོལ་བ་ཡིན་ལ། སློབ་ཕྱིའི་སྐབས་སུ་དཔེ་མཛོད་ཁང་གིས་ཁོ་ཚོར་དཔེ་ཀློག་གི་བྱ་འགུལ་མང་པོ་སྤེལ་བ་ཡིན། སློབ་འབྲིང་གི་སྐབས་སུ་དགེ་རྒན་གྱིས་སློབ་མར་སློབ་ཕྱིའི་དཔེ་དེབ་མང་པོ་བཀླགས་ན་ད་གཟོད་འབྲི་ཐུབ་པའི་ལས་བྱ་བཀོད་སྒྲིག་བྱེད་པ་ཡིན།
འཇར་མན་གྱི་ཁྱིམ་ཚང་སོ་སོའི་མགྲོན་ཁང་དང་ཡང་ན་དཔེ་ཁང་གི་ནང་དུ་དཔེ་སྒྲོམ་ཡོད་ལ། དེ་ནི་ཁྱིམ་ཚང་གི་རྒྱན་སྤྲོས་ཆས་ལྟར་དུ་གྱུར་ཡོད། འཇར་མན་པའི་ཁྱིམ་ཚང་རེའི་ཆ་སྙོམས་ཀྱི་དཔེ་ཆ་ཉར་ཚགས་བྱེད་ཚད་ནི་དེབ ༣༠༠ རེ་ཡིན་ལ། མི་རེའི་དེབ་ཉར་ཚད་ནི་དེབ ༡༠༠ ལྷག་ཡིན། འཇར་མན་པ་མང་ཆེ་ཤོས་ཀྱིས་དཔེ་སྒྲོམ་སྟེང་གི་དཔེ་ཆ་ཚང་མ་བཀླགས་ཡོད། ཁོ་ཚོས་བསམ་པར། དཔེ་ཆ་མེད་པའི་ཁྱིམ་ཚང་ནི་སྒེའུ་ཁུང་མེད་པའི་ཁང་བ་ཞིག་དང་གཉིས་སུ་མེད།
དཔེ་ཀློག་གི་ཆ་རྐྱེན།
འཇར་མན་དུ་དཔེ་ཁང ༧༧༠༠ དང་དེར་ལས་བྱེད་པ་མི་གྲངས ༣༡༠༠༠ ཙམ་ཡོད། འཇར་མན་གྱི་གནས་གང་དུ་ཕྱིན་ཀྱང་དཔེ་ཁང་མཐོང་ཐུབ་སྟེ། ཆེ་བ་གྲོང་ཁྱེར་དཀྱིལ་སྙིང་གི་དཔེ་མཛོད་ཁང་ཆེ་བ་དང་ཆུང་བ་རླངས་འཁོར་ས་ཚིགས་ཀྱི་དཔེ་ཁང་ལྟ་བུ་དང་། གནས་མང་ཆེ་ས་རུ་དཔེ་ཆ་རྙིང་བས་སྤུངས་བའི་དཔེ་ཁང་ཆུང་བ་དག་མཐོང་ཐུབ་ལ། དེ་རུ་རིན་མེད་དུ་དཔེ་ཆ་གཡར་ཆོག དཔེ་ཁང་དག་གི་ནང་ནི་རྒྱུན་པར་གཙང་ཞིང་ལྷིང་འཇགས་ཡིན་ལ། སྒོ་ཁ་རུ་ཁོ་ཧྥེ་འཐུང་ཞོར་དུ་དཔེ་ཀློག་བྱེད་ས་ཡོད་ལ། གལ་ཏེ་ཁྱེད་ཀྱིས་འཚོང་མ་བརྒྱབ་པར་དཔེ་ཀློག་བྱས་ཀྱང་ཁྱེད་རང་སྒོར་ཕུད་མཁན་ནི་མེད།
དཔེ་ཁང་ཆེ་བ་དག་གིས་རྒྱུན་པར་དཔེ་ཀློག་དང་གྱེར་འདོན་སོགས་ཀྱི་བྱེད་སྒོ་སྤེལ་ཏེ་མི་ཚང་མ་དཔེ་ཀློག་ལ་འཇུག་པར་སྐུལ་མ་གཏོང་བར་བྱེད་ལ། དཔེ་ཁང་དག་གིས་ཁེ་སྤོགས་རྐྱང་བ་བསམ་ནས་རྒྱུག་ཆེ་བའི་དཔེ་ཆ་གཅིག་པུ་བཙོང་བ་ཡང་མ་ཡིན། གལ་ཏེ་ཁྱེད་རང་དཔེ་སྐྲུན་བྱེད་མཚམས་བཞག་པའི་དཔེ་ཆར་བལྟ་རྒྱུར་དགའ་བ་ཡིན་ན། དེ་ལ་ཡང་ཚོང་ར་ཡོད།
དམངས་ཡོངས་ཀྱིས་དཔེ་ཀློག་བྱེད་པ་ལས་གཞན། འཇར་མན་རྒྱལ་ཁབ་ཀྱི་གྲོང་ཁྱེར་མི་འདྲ་བས་ཀྱང་འཛམ་གླིང་གི་དཔེ་སྐྲུན་ཁང་མང་དུ་འདུ་བའི་དཔེ་ཀློག་གི་རིག་གནས་དང་ཚོང་ལས་བརྗེ་རེས་ཀྱི་དཔེ་ཆའི་འགྲེམ་སྟོན་བསྡུ་བཞིན་ཡོད་དོ།།(རྩོམ་འགན་པ། རྟ་མགྲིན)
