དཔྱིད་གསར་དུས་ཆེན་དང་བོད་ཀྱི་ལོ་གསར་རིང་། ཡར་ཀླུང་ས་གཞི་ཆེན་མོའི་ས་ཕྱོགས་གང་སར་དུས་ཆེན་གྱི་རྣམ་པས་ཁེངས། གནའ་གྲོང་རྩེད་ཐང་གི་ཁྲོམ་གཞུང་ཐོག་བསྐྱོད་སྐབས། ཚོང་ཁང་དང་གྲོང་མིའི་སྡོད་ཁྱིམ་གྱི་སྒོ་མོ་སོགས་ལ་ཤམ་བུ་སོགས་ཀྱིས་བརྒྱན་པ་དང་སྒོ་མོའི་ཐོག་རྟེན་འབྲེལ་ཤིས་ཚིག་སྦྱར་བ། སྒོའི་མདུན་དུ་དཀར་རག་དང་རྩམ་པས་བཀྲ་ཤིས་མཚོན་པའི་རི་མོ་བྲིས་ཏེ། མི་རིགས་ཁག་གི་མང་ཚོགས་ཚོས་ལོ་གསར་པར་བསུ་བ་ཞུས། ཁྲོམ་གཞུང་ཐོག་གྲོགས་པོ་སྤུན་མཆེད་ཕན་ཚུན་འཕྲད་སྐབས་བཀྲིས་བདེ་ལེགས་ཀྱི་སྨོན་ཚིག་སྒྲོན་རེས་བྱས་ནས། ལོ་གསར་པའི་ནང་བཀྲ་ཤིས་ཕུན་ཚོགས་དང་ནད་མེད་ཚེ་རིང་ཡོང་བ། ལོ་ལེགས་རྟག་ཏུ་ལེགས་པའི་རྟེན་འབྲེལ་མཚོན་པར་བྱེད།“ས་ཆ་འདིར་དགུན་ཁའི་གནམ་གཤིས་གྲང་མོ་དེ་ཙམ་མི་འདུག རང་ཉིད་ཀྱི་ངོས་ནས་བརྗོད་ན་ད་ཐེངས་ནི་ཐུན་མོང་མ་ཡིན་པའི་ཡུལ་སྐོར་བྱེད་ཐེངས་གཅིག་ཡིན”ཞེས་གསར་འགོད་པས་ཁྲོམ་གཞུང་ཐོག་བཅར་འདྲི་བྱེད་སྐབས་ཡར་ཀླུང་ཚོ་པའི་ཟ་ཁང་གི་སྒོ་འགྲམ་ནས་བོད་དུ་ལོ་གསར་གཏོང་བར་ཡོང་མཁན་ལེའུ་རུང་རུང་གིས་བརྗོད་པ་དང་། ལེའུ་རུང་རུང་གིས་དགའ་ཚོར་ཆེན་པོས་གསར་འགོད་པར། ཁོ་མོ་རང་ཉིད་སྔ་ས་ནས་བོད་ལ་ཡོང་རྒྱུའི་འཆར་གཞི་ཡོད་པ་དང་ད་ཐེངས་འདུན་པ་དེ་མངོན་གྱུར་བྱུང་སོང་།“དཔྱིད་གསར་དུས་ཆེན་དང་བོད་ཀྱི་ལོ་གསར་རིང་། ངས་རྣམ་པ་མཛེས་པོ་ཞིག་བཏོན་ནས་འདྲ་པར་འགའ་ཤས་བརྒྱབ་ཏེ་ད་ཐེངས་བོད་ལ་ཡུལ་སྐོར་དུ་ཡོང་སྐབས་ཀྱི་དྲན་རྟེན་དུ་ཉར་གྱི་ཡིན”ཞེས་བརྗོད།
“རྒྱུན་གཏན་རང་ཉིད་ཀྱི་ལས་ཀ་ཛ་དྲག་ཆེ་བས་ཡུལ་སྐོར་བྱེད་པའི་དུས་ཚོད་དཀོན། ད་ཐེངས་ལོ་གསར་གྱི་གུང་གསེང་བེད་སྤྱད་ནས་བོད་ལ་ཡོང་ཏེ་ས་མཐོའི་དགུན་དུས་ཀྱི་དྲོ་འཇམ་ཉི་འོད་ལ་རོལ་འདོད་བྱུང་། ཚོར་སྣང་དངོས་འབྲེལ་ཡག་པོ་འདུག ད་ཐེངས་ཡུལ་སྐོར་དུ་ཡོང་བ་དེར་དོན་སྙིང་ཆེ”ཞེས་ལེའུ་རུང་རུང་དང་མཉམ་དུ་ཡོང་མཁན་གྲུང་ཆིང་གི་ཚོང་དོན་ཀུང་སིར་ལས་ཀ་བྱེད་མཁན་ཝང་ཕིང་གིས་བརྗོད། ཁོང་གིས་ཀྱང་ད་ཐེངས་བོད་ལ་ཡུལ་སྐོར་དུ་ཡོང་བའི་དགའ་སྤྲོའི་སེམས་པ་མཚོན་པར་བྱས། ཁོང་ཚོས་གསར་འགོད་པར། དཔྱིད་གསར་དུས་ཆེན་དང་བོད་ཀྱི་ལོ་གསར་རིང་ད་དུང་ཡུམ་བུ་བརླ་མཁར་དང་བཙན་པོའི་བང་སོ་སོགས་ལ་བསྐྱོད་ནས་བོད་ཀྱི་རིག་གནས་ཀྱི་འབྱུང་ཁུངས་ཀྱི་ཐུན་མིན་ཁྱད་ཆོས་ལ་རྒྱུས་ལོན་བྱ་རྩིས་ཡོད་ཅེས་བརྗོད། དུས་ཆེན་རིང་། རྩེད་ཐང་གྲོང་ཁུལ་གྱི་འཁྲུག་ཆ་དོད་པའི་ཁྲོམ་རའི་རྣམ་པ་སྔར་བཞིན་གནས་ཡོད་པ་དང་། མང་ཚོགས་ཚོས་ཁྲོམ་གཞུང་དུ་བསྐྱོད་ནས་དངོས་ཟོག་མཁོ་སྒྲུབ་བྱེད་པའི་རྣམ་པ་སྔར་མུས་བཞིན་གནས།“ལོ་གསར་པའི་ནང་ཁྱིམ་མི་ཚང་མ་བདེ་ཐང་དང་བུ་མོར་ལས་ཀ་ཞིག་འཚོལ་ཐུབ་རྒྱུའི་རེ་བ་ཡོད”ཅེས་ལོ་གསར་པའི་སྨོན་འདུན་སྐོར་བརྗོད་སྐབས་ལྷོ་ཁ་ས་ཁུལ་གྱི་ཁང་གླ་དམའ་བའི་སྡོད་ཁང་ནང་གནས་སྤོ་ཚར་བའི་ཚེ་རིང་རྡོ་རྗེས་དགའ་ཚོར་ཆེན་པོས་བརྗོད།
