ཉིན་ཤས་བསྟུད་མར། ཕྱི་རྒྱལ་གྱི་གླེང་ཕྱོགས་ཀྱིས་ཀྲུང་གོས་ཇི་ལྟར་བྱས་ཏེ་ལོ་ལྔ་ཚན་གྱི་འཆར་འགོད་བཅུ་གསུམ་པ་འགོ་ཚུགས་པའི་ལོར་བསྒྱུར་བཅོས་འགག་གཏོར་བྱེད་མིན་ཐད་ཚད་མཐོའི་དོ་ཁུར་བྱས་པ་དང་། རིགས་གཅིག་མཁས་པ་དང་རིག་གནས་པ་ཁག་ཅིག་གིས་གཅིག་མཇུག་གཉིས་མཐུད་སྒོ་ནས་དཔལ་འབྱོར་བརྗེ་འགྱུར་གྱི་དུས་མཚམས་སུ་རྒྱལ་ཁབ་སུ་འདྲ་ཞིག་ཡིན་རུང་ཚང་མར་གནད་དོན་སྣ་ཚོགས་འཕྲད་སྲིད་ཀྱི་རེད།ཁོ་ཚོས་ཀྲུང་གོའི་སྲིད་གཞུང་གིས་ཐད་ཀར་དཀའ་གནད་ལ་འགྲན་རྩོད་བྱེད་པའི་རྣམ་འགྱུར་ལ་བསྔགས་བརྗོད་བྱས་པ་མ་ཟད། ཀྲུང་གོས་གནད་དོན་དེ་དག་ཐག་གཅོད་བྱེད་པའི་བྱ་ཐབས་དང་འབད་བརྩོན་ལ་ཡིད་ཆེས་ཀྱིས་ཁེངས་ཡོད་ཅེས་བསྟན་ཡོད་པ་རེད།
སེང་གེ་ཕོའི་མཉམ་འབྲེལ་ཞོགས་པའི་ཚགས་པར་ཞེས་པའི་ཐོག་རྩོམ་ཡིག་སྤེལ་ནས། དེ་སྔ་དང་བསྡུར་ན། ལོ་ལྔ་ཚན་གྱི་འཆར་འགོད་བཅུ་གསུམ་པའི་རྩ་གནད་ཀྱིས་གནད་དོན་གྱི་ཕྱོགས་སྟོན་ལ་དོ་སྣང་སྔར་བས་ཆེ་བ་བྱས་པ་དང་། གོང་འཕེལ་ལ་འཕྲད་པའི་དཀའ་ངལ་གཏན་ཁེལ་བྱུང་རྗེས། སྲིད་ཇུས་ཀྱི་ལས་འགན་སླར་ཡང་འཆར་འགོད་དང་གནད་དོན་དེ་དག་ཐག་གཅོད་བྱ་རྒྱུར་དམ་འཛིན་བྱ་རྒྱུ་རེད་ཅེས་བསྟན་ཡོད་པ་རེད།ཀྲུང་གོའི་གནད་དོན་གྱི་རིགས་གཅིག་མཁས་པ། ཕེ་རུའི་ཤར་ཕྱོགས་ཞེས་པའི་ཟླ་རེའི་དུས་དེབ་ཀྱི་གཙོ་འགན་རྩོམ་སྒྲིག་པ་ཨ་ག་ཐེས། དཔལ་འབྱོར་བརྗེ་འགྱུར་བྱེད་པའི་དུས་མཚམས་སུ་རྒྱལ་ཁབ་སུ་འདྲ་ཞིག་ཡིན་རུང་ཚང་མས་དཀའ་ངལ་འཕྲད་སྲིད་ཀྱི་རེད།མ་འོངས་ལོ་ལྔའི་ནང་ཀྲུང་གོས་ཀྲུང་གོས་བཟོས་པ་ཞེས་པ་ནས་ཀྲུང་གོའི་གསར་སྐྲུན་ཞེས་པར་འགྱུར་བའི་བརྒྱུད་རིམ་ཐེངས་གཅིག་བརྒྱུད་རྒྱུ་ཡིན་པ་དང་། ལོ་ལྔ་ཚན་གྱི་འཆར་འགོད་བཅུ་གསུམ་པའི་རྩ་གནད་ནང་དགེ་མཚན་ལྡན་པའི་བྱ་ཐབས་མང་པོ་བཟུང་ནས་ལས་རིགས་ཁག་གིས་ཞིབ་འཇུག་གསར་སྤེལ་དང་རང་བརྟེན་གསར་གཏོད་བྱ་རྒྱུར་སྐུལ་མ་གཏོང་རྒྱུ་ཡིན་པའི་ངོས་འཛིན་གནང་བ་དང་། ཁོང་གིས་མ་འོངས་པར་ཀྲུང་གོར་གསར་སྐྲུན་གྱི་ནུས་པ་མི་འདང་བའི་གནད་དོན་དེ་དག་ཁྱད་བསད་ཐུབ་རྒྱུའི་ཡིད་ཆེས་ཡོད་ཅེས་ཡོད་པ་རེད།ཀྲུང་གོར་འཚམས་འདྲི་ཐེངས་མང་གནང་མྱོང་བ་དང་ཀྲུང་གོའི་གནད་དོན་ལ་ཞིབ་འཇུག་གནང་མྱོང་བའི་ཧྥ་རན་སིའི་ཕ་རི་སིའི་སློབ་ཆེན་ཨང་བརྒྱད་པའི་སྤྱི་ཚོགས་རིག་གནས་དང་ས་ཁམས་རིག་པའི་འབུམ་རམས་པ་ཕི་གའར་གྱིས། ཀྲུང་གོའི་སྲིད་གཞུང་གིས་གྲུབ་ཆ་བསྒྱུར་བཅོས་བྱེད་པ་དང་གསར་སྐྲུན་ལ་དམིགས་པའི་གོང་འཕེལ་འཐབ་ཇུས་ལག་བསྟར་བྱེད་པ་མ་ཟད། མང་ཚོོགས་ཀྱི་བདེ་སྐྱིད་དང་འབྲེལ་བ་ཡོད་པའི་རྨང་གཞིའི་སྒྲིག་བཀོད་དང་སློབ་གསོ། སྨན་བཅོས། སྡོད་ཁང་། སྤྱི་ཚོགས་འགན་སྲུང་། ཟ་རིགས་བདེ་འཇགས། ཁོར་ཡུག་སྲུང་སྐྱོང་སོགས་ནང་དོན་ཁག་མང་པོ་མིག་སྔའི་སྲིད་གཞུང་ལས་དོན་གྱི་གཙོ་གནད་དུ་བཞག་ཡོད་པའི་ངོས་འཛིན་གནང་བ་དང་། ཁོང་གིས་ཀྲུང་གོའི་སྲིད་གཞུང་གི་བྱ་ཐབས་དེ་དག་གིས་འགྲན་རྩོད་ལ་རྒྱལ་ཁ་ཐོབ་རྒྱུ་དང་མང་ཚོགས་ལ་ཕན་བདེ་སྔར་བས་ཆེ་བ་སྐྲུན་ཐུབ་ངེས་རེད་ཅེས་ཡོད་པ་རེད།
