ཤིན་ཧྭ་གསར་ཁང་གིས་ལྷ་ས་ནས་བཏང་པའི་གློག་འཕྲིན། གསར་འགོད་པས་བོད་ལྗོངས་དིང་རི་རྫོང་ཡུལ་སྐོར་ཅུས་ནས་ཤེས་རྟོགས་བྱུང་བར། ཇོ་མོ་གླང་མའི་ལྗོངས་རྒྱུའི་ཁུལ་གྱི་ཉེ་འདབས་སུ་བསྐྲུན་པའི་སྨན་བཅོས། བཟའ་བཏུང་དང་ཞག་སྡོད། ཉོ་ཆ་རྒྱག་ཁུལ་སོགས་བྱེད་ནུས་སྣ་མང་གཞི་གཅིག་ཏུ་སྡེབ་པའི་ཡུལ་སྐོར་ཕྱོགས་བསྡུས་ཞབས་ཞུའི་ས་ཚིགས་འདི་ལོའི་ཟླ 5པའི་སྔོན་ཏེ་ཡུལ་སྐོར་གྱི་དུས་ཚིགས་བཟང་ཤོས་འཆར་ཉེའི་སྔོན་དུ་འཛུགས་སྐྲུན་ལེགས་གྲུབ་དང་དངོས་སུ་ལས་གཉེར་བྱ་རྒྱུ་ཡིན་པ་རེད། ཞབས་ཞུའི་མ་ལག་འདིས་ཇོ་མོ་གླང་མའི་ལྗོངས་རྒྱུའི་ཁུལ་དུ་ཡུལ་སྐོར་སྤྲོ་གསེང་དུ་ཕེབས་མཁན་གྱི་འགྲུལ་པར་སྟབས་བདེ་གང་ལེགས་བསྐྲུན་རྒྱུ་རེད།
དིང་རི་རྫོང་ཡུལ་སྐོར་ཅུས་ནས་ངོ་སྤྲོད་གནང་བར། ཉེ་བའི་ལོའི་ནང་དུ་ཇོ་མོ་གླང་མའི་ལྗོངས་རྒྱུའི་ཁུལ་གྱི་རྨང་གཞིའི་སྒྲིག་ཆས་འཐུས་སྒོ་ཇེ་ཚང་དུ་བཏང་པ་དང་། དིང་རི་རྫོང་ཐོག་ནས་ཇོ་མོ་གླང་མའི་སྒར་ས་ཆེན་མོའི་བར་སྣུམ་ནག་གཞུང་ལམ་ཤར་གཏོང་བྱས་ཤིང་། སྒར་ས་ཆེན་མོར་གློག་ཀྱང་གཏོང་ཐུབ་པ་བྱུང་ཡོད། ཇོ་མོ་གླང་མའི་ཡུལ་སྐོར་གནམ་གཤིས་ཞབས་ཞུའི་མ་ལག་འཛུགས་སྐྲུན་གྲུབ་ཅིང་འཁོར་སྐྱོད་ལས་གཉེར་བྱེད་འགོ་བརྩམས་པས། ཇོ་མོ་གླང་མའི་སྒར་ས་ཆེན་མོའི་ཆུ་ཚོད 72རིང་གི་གནམ་གཤིས་སྔོན་བརྡ་དང་སྐབས་འཕྲལ་གྱི་གནམ་གཤིས་གནས་ཚུལ་ཤེས་རྟོགས་ཐུབ་སྲིད།
ས་གནས་ཡུལ་སྐོར་སྡེ་ཁག་གིས་དྲན་སྐུལ་གསལ་འདེབས་གནང་བར། ས་ཕྱོགས་ཁག་གི་ཡུལ་སྐོར་བ་དག་ཇོ་མོ་གླང་མའི་སྒར་ས་ཆེན་མོར་ལྗོངས་རྒྱུར་ཕེབས་འཆར་ཡོད་ཚེ། རང་རང་གི་ཐོབ་ཐང་ལག་ཁྱེར་བསྣམས་དགོས་ཤིང་། ད་དུང་མཐའ་མཚམས་འགྲོ་སྐྱོད་ལམ་ཡིག་གི་འགྲོ་ལུགས་གཉེར་དགོས། གཞན་ཡང་ལྗོངས་རྒྱུའི་ཁུལ་གྱི་ཉིན་མཚན་གྱི་དྲོད་ཚད་ལ་ཧེ་བག་ཆེ་བས་ཡུལ་སྐོར་བ་ཚོས་ཉེར་མཁོའི་གྱོན་ཆས་དང་ཅ་དངོས་འདང་ངེས་པ་འཁྱེར་དགོས་ལ་གྲང་འགོག་དྲོད་སྲུང་གནང་རྒྱུར་གསལ་འདེབས་ཞུས་འདུག
ཇོ་མོ་གླང་མ་ནི་འཛམ་གླིང་ཐོག་གི་རི་བོ་མཐོ་ཤོས་དེ་ཡིན་པ་དང་། དེའི་བྱང་འདབས་ནི་རང་རྒྱལ་གྱི་བོད་ལྗོངས་དིང་རི་རྫོང་ཁོངས་སུ་ཆགས་ཤིང་། ཇོ་མོ་གླང་མའི་སྒར་ས་ཆེན་མོའི་མཐོ་ཚད་ལ་རྒྱ་མཚོའི་ངོས་ལས་རྨིད5200ཡོད་པ་རེད། སྒར་ས་ཆེན་མོ་དང་ཐག་མི་རིང་བའི་སར་འཛམ་གླིང་ཐོག་གི་ས་བབ་མཐོ་ཤོས་ཀྱི་དགོན་པ་སྟེ་རོང་ཕུ་དགོན་པ་ཆགས་ཤིང་། དེའི་ས་བབ་ཀྱི་མཐོ་ཚད་ལ་རྒྱ་མཚོའི་ངོས་ལས་རྨིད5100ཡོད་པ་རེད།
