ཀྲུང་གོ་དང་རྒྱ་གར་མཐའ་མཚམས་གནད་དོན་གྱི་དམིགས་བསལ་སྐུ་ཚབ་ཀྱི་ཞལ་འཛོམས་ཐེངས་བཅུ་དགུ་པ་དེ་སྤྱི་ཚེས་ཉི་ཤུ་ཉིན་པེ་ཅིན་དུ་གནང་ཡོད་པ་དང་། ཀྲུང་གོའི་ཕྱོགས་ཀྱི་དམིགས་བསལ་སྐུ་ཚབ། རྒྱལ་དོན་ཨུ་ཡོན་ཡང་ཇད་ཁྲེ་ཡིས་རྒྱ་གར་གྱི་དམིགས་བསལ་སྐུ་ཚབ། རྒྱལ་ཁབ་ཀྱི་བདེ་འཇགས་བློ་འདྲི་ཏོ་ཝའར་དང་མཐའ་མཚམས་གནད་དོན་དང་། ཕྱོགས་གཉིས་པོའི་འབྲེལ་བ། རྒྱལ་སྤྱི་དང་ས་ཁུལ་གྱི་འབྲེལ་ཡོད་གནད་དོན་སོགས་ཀྱི་ཐད་རྒྱ་ཆེ་བ་དང་། གཏིང་ཟབ་པ། ཁ་ཞེ་གཉིས་མེད་བཅས་ཀྱི་ཐོག་ནས་བགྲོ་གླེང་གནང་ཡོད་པ་རེད།
ཕྱོགས་གཉིས་པོས། ཀྲུང་གོ་དང་རྒྱ་གར་གྱི་མཐའ་མཚམས་གནད་དོན་གྱི་དབྱེ་འབྱེད་གྲོས་མོལ་འཕེལ་ཚུལ་ཡག་པོ་ཡོད་པ་དང་། མཐའ་མཚམས་སྐོར་གྱི་རྩོད་གླེང་ཚོད་འཛིན་ནུས་ལྡན་ཐུབ་པ། མཐའ་མཚམས་ས་ཁུལ་གཞི་རྩའི་ཆ་ནས་བརྟན་བརླིང་ཡིན་པའི་ངོས་འཛིན་གནང་གི་ཡོད། ཕྱོགས་གཉིས་པོས་རྒྱལ་ཁབ་གཉིས་པོའི་འབྲེལ་བའི་ཡུན་རིང་གོང་འཕེལ་གྱི་སྤྱི་ཡོངས་ལ་ཐུགས་བསམ་བཞེས་པ་དང་། ཕན་ཚུན་བརྩི་འཇོག་དང་བསམ་ཤེས་བྱེད་པའི་རྣམ་འགྱུར་ཡག་པོའི་ཐོག་ནས། ད་ཡོད་དབྱེ་འབྱེད་གྲོས་མོལ་གྲུབ་འབྲས་ཀྱི་རྨང་གཞིའི་སྟེང་། ཆབ་སྲིད་ཐོག་ནས་ཐག་གཅོད་བྱ་རྒྱུའི་ཁ་ཕྱོགས་རྒྱུན་འཁྱོངས་དང་། ཞི་བའི་དབྱེ་འབྱེད་གྲོས་མོལ་བྱེད་པའི་ཐོག་ནས་མཐའ་མཚམས་གནད་དོན་ཐག་གཅོད་བྱ་རྒྱུ་ཡིན་པ། མདུན་ཕྱོགས་སུ་ཁ་གཏད་དེ་མུ་མཐུད་སྒྲོམ་གཞིའི་དབྱེ་འབྱེད་གྲོས་མོལ་བྱེད་པའི་འཕེལ་རིམ་ལ་སྐུལ་འདེད་བཏང་ནས། དྲང་བཞག་དང་ལུགས་མཐུན་ཡིན་པ་དང་། ཕྱོགས་གཉིས་པོས་དང་ལེན་བྱེད་ཐུབ་པའི་ཐག་གཅོད་ཇུས་གཞི་ཞིག་འདོན་ཆེད་འབད་ཐབས་བྱ་རྒྱུ་ཡིན་པ་རེད།
དུས་མཚུངས་སུ་དོ་དམ་ཚོད་འཛིན་འོས་འཚམ་བྱེད་པ་དང་རྩོད་གླེང་ཐག་གཅོད་བྱེད་པ་དང་། མཐའ་མཚམས་བྱ་དོན་ཐད་གྲོས་མོལ་བྱ་རྒྱུར་ཤུགས་སྣོན་རྒྱག་པ། མཐའ་མཚམས་ས་ཁུལ་གྱི་ཞི་བདེ་བདེ་འཁོད་ལ་སྲུང་སྐྱོང་ཡག་པོ་བྱས་ནས། རྒྱལ་ཁབ་གཉིས་པོའི་འབྲེལ་བ་གོང་འཕེལ་འགྲོ་རྒྱུར་ཕན་ཡོད་ཆ་རྐྱེན་སྐྲུན་དགོས་པའི་ངོས་འཛིན་གནང་ཡོད་པ་རེད།
