ཟི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་ས་ཁུལ་ཡོངས་ཀྱི་གནས་སྐོར་འཕེལ་རྒྱས་སུ་སོང་བ་དང་བསྟུན་བོད་ཁུལ་གྱི་ཞིང་འབྲོག་མི་མང་རྣམས་ཀྱིས་དམངས་སྡོད་སྣེ་ལེན་ཁང་དང་ཞིང་ཁྱིམ་སྤྲོ་སྐྱིད་ར་བ་འཛུགས་སྐྲུན་བྱས་པར་བརྟེན་གནས་སྐོར་དབུལ་ཐར་གྱི་ལམ་དུ་ཞུགས་ཡོད། ཕྱག་ཕྲེང་རྫོང་ཆིན་ཏི་གྲོང་རྡལ་པུའུ་ཅི་སྡེ་བའི་མི་རིགས་རིག་གནས་འགྲེམ་སྟོན་ཁང་གི་ཞིང་སྡེ་རི་ཆུའི་མཛེས་ལྗོངས་རྐྱང་རྐྱང་གིས་ཀྱང་གནས་སྐོར་བ་རྣམས་ཀྱིས་སྔར་ལས་ལྷག་པར་ས་གནས་དེའི་མི་ཆོས་གོམས་གཤིས་དང་ཡུལ་ལྗོངས་ཀྱི་རྣམ་པ་རྒྱུས་ལོན་བྱེད་ཐུབ་པར་བྱུང་།
ཆིན་ཏི་གྲོང་རྡལ་པུའུ་ཅི་སྡེ་བའི་མི་རིགས་རིག་གནས་འགྲེམ་སྟོན་ཁང་འཛུགས་སྐྲུན་ཡུལ་དངོས་སུ་རོང་འབྲོག་མང་ཚོགས་རྣམས་ཀྱིས་རང་ནུས་གང་ཡོད་ཀྱིས་ངལ་རྩོལ་བྱེད་བཞིན་ཡོད་པས་སྤྲོ་དགའི་ངལ་རྩོལ་ཀྱི་རྣམ་པ་ཞིག་ཏུ་ཆགས་འདུག བུད་མེད་སྐོར་ཞིག་གིས་གྲལ་སྒྲིག་ནས་གླུ་ལེན་བཞིན་དུ་གྱང་རྡུང་བཞིན་ཡོད་པ་དང་ལག་བཟོ་སྒྱུ་རྩལ་པ་སྐོར་ཞིག་ཀྱང་ཁང་བའི་མདའ་གཡབ་ནས་ཞིབ་ཚགས་ངང་རི་མོ་བརྐོ་བཞིན་འདུག་ལ། ཁོ་ཚོའི་ལག་རྩལ་འོག་གསོན་ཉམས་ལྡན་པའི་མཛེས་ཆོས་རི་མོ་སྣ་ཚོགས་ཡུན་གྱིས་ལེགས་འགྲུབ་བྱུང་བཞིན་ཡོད།
རྒྱུས་ལོན་བྱས་པ་ལྟར་ན་པུའུ་ཅི་སྡེ་བའི་ཁྱིམ་ཚང52ཀྱིས་རང་གིས་མ་དངུལ་བཏང་སྟེ་གསར་འཛུགས་བྱས་པའི་མི་རིགས་རིག་གནས་འགྲེམ་སྟོན་ཁང་དུ་ཁྱད་ལྡན་ཞིང་ལས་ཐོན་རྫས་དང་མི་རིགས་ལག་ཤེས་བཟོ་ལས་ཀྱི་སྒྱུ་རྩལ་ཐོན་རྫས། གྱོན་པ་དང་རྒྱན་ཆོས་སོགས་འགྲེམ་སྟོན་བྱས་ཡོད། མི་རིགས་རིག་གནས་འགྲེམ་སྟོན་ཁང་དེ2015ལོའི་ཟླ10བ་ནས་ལས་འགོ་བརྩམས་པ་དང་སྔོན་དཔག་བྱས་ན2017ལོའི་ཟླ1པའི་ནང་བཀོལ་སྤྱོད་བྱེད་ཐུབ་རྒྱུ་རེད།
སྡེ་དམངས་ཨུ་ཡོན་ལྷན་ཁང་གི་ཀྲུའུ་རིན་གྱིས་མཚམས་སྦྱོར་བྱས་པར་གཞིགས་ན། འདས་པའི་ལོ་མང་པོའི་ནང་དུ་སྡེ་མིའི་འཚོ་བའི་ཆ་རྐྱེན་ཧ་ཅང་ཞན་པ་དང་ལོ་རེར་དབྱར་རྩ་དགུན་འབུ་བརྐོ་བ་དང་ཤ་མོ་འཐུས་ནས་འཚོ་བ་རོལ་རྒྱུ་མ་གཏོགས་གཞན་ཡོང་སྒོ་ཅི་ཡང་མེད་པས། སྡེ་བའི་ཨུ་ཡོན་ལྷན་ཁང་གཉིས་ཀྱིས་གྲོས་མོལ་བྱས་རྗེས་སྔོན་ལ་གནས་སྐོར་འཕེལ་རྒྱས་སུ་གཏོང་བ་ནས་འགོ་བརྩམས་སྟེ། གཅིག་ནས་དམངས་སྡོད་སྣེ་ལེན་ཁང་དང་གཉིས་ནས་ཞིང་སྡེའི་ཡུལ་ལྗོངས། གསུམ་ནས་འགྲེལ་སྟོན་ཁང་ལེགས་པར་འཛུགས་སྐྲུན་བྱས་ནས་གནས་སྐོར་བ་རྣམས་ཚུར་བཀུག་སྟེ་མི་རིགས་རིག་གནས་ལ་རོལ་མྱོང་བྱེད་དུ་འཇུག་དགོས་པར་ཐག་བཅད།
