《ཡེ་ཤེས་འཆོལ་བ》(Crazy Wisdom)—ཆོས་རྒྱམ་དྲུང་པ་རིན་པོ་ཆེའི་དུས་རབས་དང་མི་ཚེ(Crazy Wisdom: The Life & Times of Chogyam Trungpa Rinpoche)——ནི་ཁོང་གི་བུ་སློབ་ཏུ་གྱུར་བའི་གློག་བརྙན་ཕྱག་ལས་གནང་མཁནJohanna Demetrakas བྱ་བས་བཟོས་ཤིང་། སྣེ་མང་ལ་སྒོ་དུ་མ་ནས་དྲུང་པ་རིན་པོ་ཆེའི་སྐུ་ཚེའི་མཛད་པ་སྐོར་ཟོལ་མེད་རྗེན་པར་བསྟན་འདུག
སྤྱིར་དྲུང་པ་རིན་པོ་ཆེ་འདི་བ་ཀརྨ་པ་སྐུ་ཕྲེང་བཅུ་དྲུག་པ་རིག་པའི་རྡོ་རྗེས་ངོས་འཛིན་གནང་པའི་སྤྲུལ་སྐུ་ཞིག་ཡིན་ཞིང་། ཁོང་གི་དགོན་པ་དེ་ནི་ཁམས་ཟུར་མང་བདུད་རྩི་དིལ་ཞེས་པ་དེ་རེད། ཁོང་གི་རྩ་བླ་གཅིག་ནི་གངས་ཤར་མཁན་པོ་ཞེས་པའི་སྐུ་ཚེ་དེ་ལ་རྟོགས་པ་བརྙེས་པའི་རྣལ་འབྱོར་བ་དེ་རེད། རྒྱ་གར་དུ་ཕེབས་རྗེས། ཨ་སྐོང་སྤྲུལ་སྐུ་དང་མཉམ་དུ་དབྱིན་ཡུལ་ལ་ཕེབས་ནས་སློབ་གཉེར་ཁྱུག་ཙམ་གནང་ཞིང་དེ་ནས་ཨ་རིར་ཕེབས། དང་པོར་ཝེ་ཐི་ནམ་དམག་འཁྲུག་ལ་རྒོལ་བའི་ཨ་རིའི་སྐྱིད་ཉལ་རིང་ལུགས་པ་HIPPIEཚོ་དང་མཉམ་དུ་རོ་སྙོམས་ཀྱི་སྤྱོད་པ་ཡང་གང་འཚམ་ཞིག་བསྐྱངས།
དམག་ཐག་ཆོད་རྗེས་ཁོང་གི་ལྡོམ་གྲོགས་ཚོར་སྒྲིག་ཁྲིམས་བཟོས་ནས་སྤྱོད་པ་གཙང་བའི་ནང་ཆོས་དད་ལྡན་པར་བསྒྱུར་ཏེ་རིམ་པས་ཆོས་ཚོགས་ཁག་མང་གསར་འཛུགས་གནང་ཞིང་། མཐའ་མར་འཛམ་གླིང་སྟེང་དང་ཨ་རིའི་ནང་གི་ནང་པའི་མཐོ་སློབ་ཐོག་མ་ནཱ་རོ་བ་མཐོ་སློབ་གསར་འཛུགས་བསྐྱངས་པ་དང་། དེ་བཞིན་བོད་ཀྱི་བླ་ཆེན་ཀརྨ་པ་དང་དིལ་མགོ་མཁྱེན་བརྩེ་རིན་པོ་ཆེ་སོགས་ནུབ་ཕྱོགས་སུ་ཐོག་མར་གདན་ཞུ་མཁན་ཁོང་གི་ཆོས་ཚོགས་པ་དག་རེད། ཁོང་ནི་སྔགས་འཆང་བླ་མ་ཞིག་ཡིན་པས་བདུད་རྩི་མཆོད་པ་དང་ཕྱག་རྒྱ་བསྟེན་པའི་ཐད་ལ་སྐབས་དེའི་མི་དག་གི་བྱེད་སྟངས་བཞིན་ཡང་གནང་འདུག ཡིན་ན་ཡང་དགོང་ལོ་མཐོན་པོར་མ་བཞུགས་པར་སྔ་ཙམ་ནས་གྲོངས་འདུག ད་ལྟ་ཁོང་གི་ཡང་སྲིད་ཅིག་སྔ་འགྱུར་གྲུབ་དབང་པད་ནོར་རིན་པོ་ཆེ་ཚང་གིས་ངོས་འཛིན་གྱིས་ཁོང་གི་གདན་ས་ཟུར་མང་དུ་བཞུགས་ཡོད་ཚུལ་ཐོས། ཁོང་དང་པོར་ཨ་རིར་ཕེབས་དུས་སྐུ་ཡོན་མཐོ་བ་མ་གཏོགས་འཇིག་རྟེན་གྱི་ཟང་ཟིང་ཅི་ཡང་མེད་པས་ཉི་མ་མང་པོར་ཁོང་བཟའ་འཚོ་གཉིས་ཀྱིས་འབྲས་སྐྱ་གཅིག་པོ་མཆོད་ནས་བཞུགས་ཚུལ་ཡང་རྣམ་ཐར་དུ་བྲིས་འདུག་པ་དང་། མཐའ་མར་གདུལ་བྱ་ནམ་མཁའ་ལྟ་བུར་རྒྱས་ཏེ་ནོར་ལོངས་སྤྱོད་རྒྱལ་པོ་ལྟར་ཆགས་པས་ཁོང་གིས། གྲྭ་རྐྱང་བཞིན་སྐྱེས། རྒྱལ་པོ་བཞིན་ཤི། ཞེས་པའི་གསུང་ཚིག་སྐད་གྲགས་ཅན་གཉིས་འབྲི་གནང་མཛད་པ་དང་། ཁོང་ནི་སྙན་ངག་གི་རྩ་མདུད་ཡོངས་སུ་གྲོལ་བ་ཞིག་ཡིན་པས་བོད་ཡིག་དང་ཁྱད་པར་དུ་དབྱིན་ཡིག་ནང་ཁྱད་དུ་འཕགས་པའི་སྙན་ངག་དུ་མ་བྲིས་ནས་སྐབས་དེའི་ཨ་རིའི་སྙན་ངག་པའི་གཙུག་རྒྱན་ཞིག་ཀྱང་ཁོང་གི་སྐུ་ཡོན་ལ་ཧ་ལས་ནས་བསྟོད་ཕྱག་ཕུལ་ནས་ཞབས་ལ་གཏུགས་པ་ཡོངས་གྲགས་རེད།
དེ་བཞིན་ཁོང་ནི་རི་མོ་མཁས་ཅན་ཞིག་དང་རྒྱ་ནག་དང་འཇར་པན་པ་བཞིན་ཡིག་ཆེན་འབྲི་བའི་སྒྱུ་རྩལ་ལ་མཁས་པས་སྒྱུ་རྩལ་ཡིག་ཆེན་ཡང་དུ་མ་ཞིག་བྲིས་འདུག དེ་བཞིན་དབྱིན་ཡིག་ནང་བོད་པའི་ནང་ཆོས་ཀྱི་ཆོས་ཚིག་གསར་བཟོ་ཡང་གང་མང་ཞིག་གནང་ཡོད་པའི་ཁྲོད་ཀྱི་གཅིག་ནི། བོད་ཡིག་ཏུ་གྲུབ་ཐོབ་ཀྱི་རྟོགས་པ་ཞེས་པར་དབྱིན་ཡིག་ཏུ་crazy wisdom སྟེ་ཡེ་ཤེས་འཆོལ་བ་ཞེས་བཏགས་པ་ལྟ་བུའོ།། ཁྱབ་འཇུག་གི་འཇུག་པ་བཅུ་ལྟ་བུའི་ཁོང་གི་མཛད་པ་དག་མདོར་བསྡུས་ན་བཅུ་རུ་འདུ་བ་སྟེ། ནང་ཆོས་གསུངས། སྙན་ངག་གྱེར། རི་མོ་བྲིས། སྤྲོ་བསང་གནང་། བདུད་རྩི་མཆོད། རིག་མ་བསྟེན། སྐྱེས་ཆེན་བསྐོངས། ཆོས་ཚོགས་བཙུགས། དེབ་རྒན་བརྩམས། སྒོམ་སྒྲུབ་གནང་བ་བཅས་སོ།། མཐའ་སྡོམ་དྲུང་པ་རིན་པོ་ཆེ་འདི་བས་ཤམ་བྷ་ལའི་མིང་འདི་སྐུ་ཚེ་གང་བོར་བེད་སྤྱོད་གནང་སྟེ་ཤམ་བྷ་ལའི་མིང་ཅན་གྱི་ཆོས་ཚོགས་དང་། དཔེ་སྐྲུན་ཁང་། དུས་དེབ། ཆོས་མགུར། རི་མོ། སྙན་ངག དར་ཆ། གྱོན་ཆས་སོགས་གང་མང་ཞིག་གསར་བཏོད་གནང་འདུག(རྩོམ་འགན་པ། ལྷ་དབང)
