ཀྲུང་གོའི་བོད་ལྗོངས་དྲ་བའི་འཕྲིན། ཀྲུང་དབྱང་དྲ་རྒྱའི་བདེ་འཇགས་དང་ཆ་འཕྲིན་ཅན་གྱི་ཨུ་ཡོན་ཚོགས་པའི་གཞུང་སྒྲུབ་ཁང་གིས་མཛུབ་སྟོན་བྱས་པ་དང་། ཀྲུང་གུང་ཐེན་ཅིན་གྲོང་ཨུ་དྲ་རྒྱའི་བདེ་འཇགས་དང་ཆ་འཕྲིན་ཅན་གྱི་ཨུ་ཡོན་ཚོགས་པ། མི་དམངས་ཉིན་རེའི་ཚགས་པར། ཀྲུང་ཧྭ་རྒྱལ་ཡོངས་གསར་འགྱུར་ལས་བྱེད་པའི་མཐུན་ཚོགས། ཀྲུང་གོའི་དྲ་རྒྱའི་སྤྱི་ཚོགས་རྩ་འཛུགས་མཉམ་འབྲེལ་ཚོགས་པ་བཅས་ཀྱིས་གཙོ་སྒྲུབ་བྱས་པའི་2019ལོའི་ཀྲུང་གོའི་དྲ་རྒྱའི་སྨྱན་སྦྱོར་གྲོས་མོལ་ཚོགས་འདུ་དེ་ཟླ་7པའི་ཚེས་29ཉིན་ཐེན་ཅིན་ནས་བསྡུས།
པར་འདི་ནི་2019ལོའི་ཀྲུང་གོའི་དྲ་རྒྱའི་སྨྱན་སྦྱོར་གྲོས་མོལ་ཚོགས་འདུ་འགོ་ཚུགས་པའི་མཛད་སྒོའི་ཡུལ་དངོས་རེད།
ཐེངས་འདིའི་གྲོས་མོལ་ཚོགས་འདུ་ནི་“མཉམ་འདྲེས་དང་བསྒྱུར་བཅོས་ཏེ། ཀྲུང་གོའི་དྲ་རྒྱའི་སྨྱན་སྦྱོར་འཕེལ་རྒྱས་ཀྱི་ཐོད་རྒལ་གསར་པ།”ཞེས་པ་བརྗོད་དོན་གཙོ་བོ་བྱས་ཏེ། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པའི་མཛུབ་སྟོན་འོག དུས་རབས་གསར་པའི་དྲ་རྒྱའི་སྨྱན་སྦྱོར་འཕེལ་རྒྱས་ཀྱི་ཁ་ཕྱོགས་ལ་དམིགས་ནས་དྲ་རྒྱའི་སྟེང་གི་བརྗོད་དོན་འཛུགས་སྐྲུན་ལ་ཤུགས་སྣོན་པ་སོགས་བརྗོད་བྱར་བཟུང་ནས་གྲོས་ཞིབ་གནང་བ་དང་། ལས་རིགས་འཕེལ་རྒྱས་ཀྱི་བསམ་བློ་གསར་པ་དང་རིགས་ལམ་གསར་པ་གཅིག་བསྡུས་བྱས།
ཀྲུང་དབྱང་དྲིལ་སྒྲོག་པུའུ་ཡི་པུའུ་ཀྲང་གཞོན་པ་དང་ཀྲུང་དབྱང་དྲ་རྒྱའི་བདེ་འཇགས་དང་ཆ་འཕྲིན་ཅན་གྱི་ཨུ་ཡོན་ཚོགས་པའི་གཞུང་སྒྲུབ་ཁང་གི་ཀྲུའུ་རིན། རྒྱལ་ཁབ་མཉམ་སྦྲེལ་དྲ་རྒྱའི་ཆ་འཕྲིན་གཞུང་སྒྲུབ་ཁང་གི་ཀྲུའུ་རིན་ཀྲང་རོང་ཝིན་གྱིས་གྲོས་མོལ་འགོ་ཚུགས་པའི་མཛད་སྒོའི་སྟེང་ཤིས་ཚིག་བརྗོད་སྐབས་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་གསར་འགྱུར་གླེང་ཕྱོགས་ཀྱི་ལས་དོན་ལ་ཧ་ཅང་མཐོང་ཆེན་བྱེད་པ་དང་། ཐེངས་མང་པོར་མཉམ་སྦྲེལ་དྲ་རྒྱར་བདག་དམ་ལེགས་པོ་དང་བཀོལ་སྤྱོད་ལེགས་པོ་བྱེད་དགོས་པ་ནན་གྱིས་བསྟན་ཡོད། ལྷག་པར་དུ་ད་ལོའི་ཟླ་1པའི་ཚེས་25ཉིན་ཀྲུང་དབྱང་ཆབ་སྲིད་ཅུས་ཀྱི་ཐུན་མོང་སློབ་སྦྱོང་ཐེངས་བཅུ་གཉིས་པའི་སྐབས་སུ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བསྟན་དོན། དྲང་ཕྱོགས་ནི་སྤྱིའི་བླང་བྱ་ཡིན་པ་དང་། བདག་གཉེར་ཐུབ་པ་ནི་གནས་ལུགས་མཐར་ཐུག་ཡིན། བཀོལ་སྤྱོད་ལེགས་པོ་ཐུབ་པ་ནི་འཇོན་ནུས་ངོ་མ་ཡིན་ཞེས་བསྟན་པ་དང་། ཆ་འཕྲིན་གསར་བརྗེའི་འབྲས་བུ་བཀོལ་སྤྱོད་ལེགས་པོ་བྱས་ཏེ། སྨྱན་སྦྱོར་མཉམ་འདྲེས་ཀྱི་འཕྲེད་གཞུང་ཕྱོགས་ཀྱི་འཕེལ་རྒྱས་ལ་སྐུལ་འདེད་གཏོང་དགོས་པར་ནན་གྱིས་བསྟན། འདི་ནི་མདུན་སྐྱོད་ཀྱི་སྣེ་ཁྲིད་དང་། ལྷག་པར་དུ་འབད་བརྩོན་གྱི་བཀའ་རྒྱ་ཡིན། དྲ་རྒྱའི་སྨྱན་སྦྱོར་ཀྱི་རྩ་བ་བརྟན་པོ་དགོས་པ་དང་། དྲང་ཕྱོགས་ཀྱི་བརྒྱུད་སྒྲོག་མཁན་བྱེད་དགོས། གསར་གཏོད་བྱེད་ཕོད་པ་དང་། མཉམ་འདྲེས་བསྒྱུར་བཅོས་ཀྱི་སྔོན་བསྐྱོད་པ་བྱེད་དགོས། རལ་གྲི་ཤུང་ནས་གཙོ་ཕྱོགས་རིན་ཐང་གི་སྲུང་སྐྱོང་པ་བྱེད་ཕོད་དགོས། དཀའ་སྤྱད་འབད་བརྩོན་སྒོས་ལག་རྩལ་གསར་པའི་སྣ་འདྲེན་པ་བྱེད་དགོས། འགན་འཁུར་ཐུབ་པའི་སྒོ་ནས་དྭངས་གཙང་བར་སྟོང་གི་སྲུང་སྐྱོབ་པ་བྱེད་དགོས། གླེང་ཕྱོགས་ལ་སྣེ་ཁྲིད་པ་དང་བསམ་བློ་ལ་སྣེ་ཁྲིད་པ། རིག་གནས་བརྒྱུད་འཛིན་དང་མི་དམངས་ལ་ཞབས་འདེགས་ཞུ་བ་བཅས་ཀྱི་སྐབས་སུ་བརྒྱུད་སྒྲོག་གི་གཙོ་སྣེ་འཛིན་ཐུབ་པའི་སྒོ་ནས། ཐུན་མོང་གིས་མཉམ་སྦྲེལ་དྲ་རྒྱ་ཞེས་པའི་“ཆེས་ཆེ་བའི་འགྱུར་གྲངས” འདི་བྱ་གཞག་འཕེལ་རྒྱས་ཀྱི་““ཆེས་ཆེ་བའི་འཕེལ་གྲངས””དུ་འགྱུར་ཐུབ་པ་བྱེད་དགོས་ཞེས་བརྗོད།
ཐེན་ཅིན་གྲོང་ཨུའི་ཧྲུའུ་ཅི་གཞོན་པ་དང་ཧྲེ་ཀྲང་ཀྲང་གའོ་ཆིན་དང་། རྒྱལ་ཡོངས་དམངས་ཆེན་སྤྱི་ཚོགས་འཛུགས་སྐྲུན་ཨུ་ཡོན་ཚོགས་པའི་ཀྲུའུ་རིན་ཨུ་ཡོན་གཞོན་པ་དང་ཀྲུང་གོའི་དྲ་རྒྱའི་སྤྱི་ཚོགས་རྩ་འཛུགས་མཉམ་འབྲེལ་ཚོགས་པའི་ཚོགས་གཙོ་རིན་ཞན་ལེང་། ཀྲུང་ཧྭ་རྒྱལ་ཡོངས་གསར་འགྱུར་ལས་བྱེད་པའི་མཐུན་ཚོགས་ཀྱི་ཏང་ཙུའུ་ཧྲུའུ་ཅི་དང་རྒྱུན་ལས་ཀྲུའུ་ཞི་གཞོན་པ་ཧུའུ་ཞའོ་ཧན་གྱིས་འགོ་འཛུགས་མཛད་སྒོའི་སྟེང་ཤིས་ཚིག་བརྗོད། མི་དམངས་ཉིན་རེའི་ཚགས་པར་གྱི་སྤྱི་ཁྱབ་རྩོམ་སྒྲིག་པ་དང་ད་དུང་ཕྱི་རྒྱལ་པར་མའི་རྩོམ་སྒྲིག་ཁང་གི་སྤྱི་ཁྱབ་རྩོམ་སྒྲིག་པའི་འགན་འཁུར་བའི་ཞུའུ་ཀྲིན་ཀྲུང་། ཞིན་ཧྭ་གསར་འགྱུར་ཁང་གི་འགོ་གཙོ་གཞོན་པ་དང་ཏང་ཙུའུ་ཁོངས་མི་ལེའུ་སི་དབྱང་། ཀྲུང་དབྱང་རྒྱང་སྒྲོག་བརྙན་འཕྲིན་སྤྱི་སྟེགས་ཀྱི་ཏང་ཙུའུ་ཁོངས་མི་དང་ཐའེ་ཀྲང་གཞོན་པ་ཡན་ཞའོ་མིང་། ཐིན་ཞོན་སྤྱི་གཉེར་ཁང་གི་ལས་འཛིན་ཚོགས་པའི་ཀྲུའུ་ཞི་དང་ད་དུང་དབུ་བཞུགས་ལག་བསྟར་པའི་འགན་འཁུར་བའི་མ་ཧྭ་ཐིན། ཝང་ཡུ་སྤྱི་གཉེར་ཁང་གི་གསར་འཛུགས་པ་དང་ད་དུང་དབུ་བཞུགས་ལག་བསྟར་པའི་འགན་འཁུར་བའི་ཏིང་ལི། ཀྲུང་གོའི་བཟོ་བཀོད་གླིང་གི་ཡོན་ཧྲི་ལེའུ་ཡོན་ཅེ་བཅས་ཀྱིས་བརྗོད་དོན་གཏམ་བཤད་གནང་།
དོ་སྣང་བྱེད་རིན་ཡོད་པ་ཞིག་ནི། མཉམ་འདྲེས་སྨྱན་སྦྱོར་གྱི་ནང་དོན་གསར་གཏོད་ཇི་ལྟར་བྱེད་དགོས་གནད་དོན་ཐད་ལ། ཏིང་ལི་ཡི་གཏམ་བཤད་ལ་ཡུལ་དངོས་ཀྱི་ལྟད་མོ་བའི་དོ་སྣང་ཐོབ། ཁོས་བརྗོད་དོན། མ་འོངས་པར་སྨྱན་སྦྱོར་མཉམ་འདྲེས་བྱེད་སྐབས་ནང་དོན་ཐད་སྤོབས་པ་ཆེན་པོས་བར་མཚམས་ལས་བརྒལ་ཐུབ་པ་བྱས་ཏེ། ཞིང་ཁམས་གསར་པ་ཞིག་མཐོང་ཐུབ་པ་བྱེད་དགོས་ཞེས་ཟེར།
“ཀྲུང་གོར་དྲ་མི་མི་གྲངས་དུང་ཕྱུར་8.29ཡོད་པ་དང་། ཉིན་རེར་ཐོན་སྐྱེད་བྱས་པའི་ཆ་འཕྲིན་གྱི་ཁ་གྲངས་དུང་ཕྱུར་300ལ་སླེབས་ཐུབ། ”ཏིང་ལི་ཡིས་བརྗོད་དོན། “འགུལ་སྐྱོད་འབྲེལ་མཐུད་དྲ་རྒྱའི་ལག་རྩལ་གསར་པའི་འཕེལ་རྒྱས་དང་བསྟུན་ནས། མི་ཚང་མར་སྐད་སྦུག་ཡོད་ལ། བརྒྱུད་སྒྲོག་ཐབས་ལམ་ཡང་མི་ནས་མིའི་བར་ལ་ཐད་ཀད་བརྒྱུད་སྒྲོག་བྱེད་པར་གྱུར་པ་དང་། སྔོན་ཆད་ཀྱི་བར་ཁེ་བའི་རིན་གོང་ལྷག་མ་མེད་པར་གྱུར། དེའི་མཇུག་འབྲས་ནི་ཆ་འཕྲིན་བརྒྱུད་སྒྲོག་ནི་སྔར་བས་ལས་ཞོར་གྱི་རྣམ་པར་གྱུར་བ་དང་། སྨྱན་སྦྱོར་ཀྱི་ཆ་འཕྲིན་གདམ་གསེས་བྱེད་པའི་ནུས་པ་ཇེ་ཞན་དུ་གྱུར་ལ། རྫུན་མ་དང་ཐ་ཤལ་གྱི་ཆ་འཕྲིན་གྱིས་དྲ་རྒྱའི་བར་སྟོང་ཁེངས་པར་བྱས།”ཞེས་ཟེར།
ཏིང་ལི་ཡིས་བརྗོད་དོན། སྨྱན་སྦྱོར་མཉམ་འདྲེས་ཀྱི་སྲིད་ཕྱོད་ཀྱི་ཐད་ནས་བལྟས་ན། བརྒྱུད་སྒྲོག་ལ་སྤོབས་པ་ཆེན་པོས་བར་མཚམས་ལས་བརྒལ་ཐུབ་པ་དགོས་པ་དང་། མ་འོངས་པའི་སྨྱན་སྦྱོར་ཐོད་རྒལ་ནི་ལག་རྩལ་ཙམ་མ་ཡིན་པར་བརྗོད་དོན་ཡིན། དཔེར་ན་སྨྱན་སྦྱོར་དང་སློབ་གསོ། རིག་རྩལ། འཚོ་བ་སོགས་ཕྱོགས་མང་པོའི་ཐད་ཀྱི་མཐུན་སྦྱོར་དང་། ཀྲུང་གོའི་སྐད་ཆ་བརྒྱུད་སྒྲོག་དང་ཀྲུང་གོའི་གཏམ་རྒྱུད་གླེང་ཐུབ་དགོས། དེ་དང་མཉམ་དུ་སྨྱན་སྦྱོར་མཉམ་འདྲེས་ཀྱི་ཟབ་ཚད་ཀྱི་ཐད་ནས་བལྟས་ན། དྲ་རྒྱའི་སྟེང་མྱུར་དུ་བརྒྱུད་སྒྲོག་བྱེད་པའི་ནུས་པ་དང་། དྲ་རྒྱའི་ཕྱི་ནས་གསུང་རབ་གསོག་ཉར་བྱེད་པའི་ནུས་པ་ལྡན་དགོས། ཆ་འཕྲིན་ནི་ཟད་གྲོན་དངོས་རྫས་ཙམ་མ་ཡིན་པར་ཡུན་རིང་པོར་འཕེལ་རྒྱས་འབྱུང་བའི་རང་བཞིན་ཅན་གྱི་བརྗོད་དོན་ཞིག་ཏུ་འགྱུར་ཐུབ་པ་བྱེད་དགོས་ཞེས་བསྟན།
ཤེས་རྟོགས་བྱུང་བར་གཞིགས་ན། ཐེངས་འདིའི་གྲོས་མོལ་ཚོགས་འདུར་བརྗོད་དོན་དང་ཐོན་ལས། ལག་རྩལ་དང་རྒྱལ་སྤྱིའི་བརྒྱུད་སྒྲོག་བཅས་ཕྱོགས་བཞིའི་གྲོས་མོལ་བཀོད་སྒྲིག་བྱས་ཡོད། སོ་སོས་སྨྱན་སྦྱོར་མཉམ་འདྲེས་འཕེལ་རྒྱས་དང་སྨྱན་སྦྱོར་ཡོངས་ཀྱི་བརྒྱུད་སྒྲོག་རྣམ་པ་གསར་འཛུགས་ལ་དམིགས་ནས། བར་མཚམས་ལས་བརྒལ་ཏེ་མཉམ་དུ་འཕེལ་བ་སྟེ། དྲ་རྒྱའི་སྨྱན་སྦྱོར་ཀྱི་རིམ་སྤར་གསར་བསྒྱུར་གྱིས་ཐོན་ལས་སྤུས་ཚད་མཐོན་པོར་འཕེལ་རྒྱས་བྱུང་བ། ལག་རྩལ་གསར་གཏོད་ལ་རིག་ནུས་སྨྱན་སྦྱོར་དང་དྲ་རྒྱའི་སྨྱན་སྦྱོར་གྱི་རྒྱལ་སྤྱིའི་བརྒྱུད་སྤེལ་གྱི་རྣམ་པ་གསར་པ་སོགས་བརྗོད་དོན་གཙོ་བོར་གྱུར་ཡོད། ཕྱོགས་མང་པོ་ནས་དུས་རབས་གསར་པའི་སྨྱན་སྦྱོར་དྲ་རྒྱའི་སྨྱན་སྦྱོར་གསར་བསྒྱུར་གྱི་རིམ་སྤར་དང་མཉམ་འདྲེས་འཕེལ་རྒྱས་ཀྱི་ལམ་བུའི་སྐོར་བགྲོ་གླེང་གནང་།
ཚོགས་ཞུགས་སྐུ་མགྲོན་རྣམས་ཀྱིས་བསྟན་པར། སྨྱན་སྦྱོར་དེ་གཞུང་ཕྱོགས་གཏིང་ཟབ་ངང་འཕེལ་བ་ནི་སྤྱིའི་འཁོར་ཕྱོགས་ཡིན་པ་དང་། དྲ་རྒྱའི་སྨྱན་སྦྱོར་ལ་གསར་བསྒྱུར་གྱི་སྤོབས་པ་ལྡན་དགོས་ལ་དུས་ཐོག་འཕེལ་འགྱུར་བྱེད་ཐུབ་དགོས། བསམ་བློ་དང་བྱེད་ཕྱོགས་བྱེད་ཐབས། ལམ་ལུགས་སོགས་ཀྱི་ཐད་ལ་སྤོབས་པ་ཆེན་པོས་གསར་གཏོད་བྱས་ནས། གསར་བསྒྱར་གྱི་སྔོན་བསྐྱོད་པ་ཞིག་ཏུ་འགྱུར་ཐུབ་དགོས། ནང་དོན་ལེགས་པོའི་རྩ་བ་བརྟན་པོར་ཚུགས་ནས། མང་ཉུང་ནས་སྤུས་ཚད་ལེགས་བསྒྱུར་དང་། དྲ་ནུས་ནས་མང་སེམས་གཅིག་བསྡུས་ཀྱི་ཐད་ལ་ཐོད་བརྒལ་བྱེད་དགོས་ལ། ནང་སྙིང་ལག་རྩལ་གསར་གཏོད་ཐད་ལ་ཐོད་བརྒལ་རང་བཞིན་མངོན་འགྱུར་ཐུབ་པ་དགོས་ལ། སྨྱན་སྦྱོར་དུས་རབས་ཀྱི་ལག་རྩལ་གྱི་སྣེ་བཟུང་ནས་ཕྱོགས་ཡོངས་ནས་གླེང་ཕྱོགས་ཀྱི་སྣེ་ཁྲིད་པའི་ནུས་པ་ལྡན་དགོས་པར་བསྟན།
ཀྲུང་གོའི་དྲ་རྒྱའི་སྨྱན་སྦྱོར་གྲོས་མོལ་ཚོགས་འདུ་ནི་རང་རྒྱལ་དྲ་རྒྱའི་སྨྱན་སྦྱོར་ལས་རིགས་ཀྱི་རིམ་པ་ཆེས་མཐོ་བ་དང་གཞུང་ཕྱོགས་དང་ཤུགས་རྐྱེན་ཆེས་ཆེ་བའི་ལོ་ཚོགས་ཤིག་ཡིན་ལ། དེ་ནི་ཀྲུང་གོའི་དྲ་རྒྱའི་སྨྱན་སྦྱོར་འཕེལ་རྒྱས་ཁ་ཕྱོགས་ཀྱི་སྒུའུ་ཁུང་ལྟ་བུ་ཡིན། གཙོ་བདག་ལས་ཁུངས་དང་རྒྱལ་ཁབ་པུའུ་ཨུ། ཀྲུང་དབྱང་དང་ས་གནས་གསར་འགྱུར་ལས་ཁུངས། ས་གནས་སོ་སོའི་དྲ་འཕྲིན་ཁང་། ཚོང་དོན་དྲ་ཚིགས། སྨྱན་སྦྱོར་གསར་པའི་ལས་ཁུངས། མཉམ་སྦྲེལ་དྲ་རྒྱའི་ལས་ཁུངས་ཀྱི་སྐུ་མགྲོན་དང་ལས་རིགས་ཁག་གི་ཆེས་མཁས་པ། དྲ་རྒྱའི་སྤྱི་ཚོགས་རྩ་འཛུགས་བཅས་ནས་ཡོང་བའི་མི་800ལྷག་གྲོས་མོལ་ཚོགས་འདུ་འདིར་ཞུགས་ཡོད།
