ཀྲུང་གོའི་བོད་ལྗོངས་དྲ་བའི་འཕྲིན། རིག་གཏོད་ཡུལ་སྐོར་ཐོན་རྫས་སྟོང་ཕྲག་ལ་ཉེ་བ་ཅིག་མེ་ཏོག་གིས་བསྐོར་ཏེ་བོད་རྒྱ་ཡིག་རིགས་གཉིས་ཀྱི་ “ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ་འཁོར་70འཁོར་བར་དགའ་སྟོན་རྟེན་འབྲེལ་ཞུ།”ཞེས་པ་མཚོན་པར་བྱས་ཡོད་ལ། བོད་ཀྱི་རིག་གཏོད་ཡུལ་སྐོར་ཁེ་ལས་འཐུས་མི་དང་འཁྲབ་སྟོན་མི་སྣ་བརྒྱ་ལྷག་གིས་མཉམ་དུ་ལག་གི་མེ་ཏོག་གཡུག་ནས་མེས་རྒྱལ་གྱི་འཁྲུངས་སྐར་ལ་རྟེན་འབྲེལ་ཞུས། ……ཟླ་9པའི་ཚེས་28ཉིན་གྱི་དགུང་མོར། སྐབས་བདུན་པའི་“བོད་ཀྱི་ཕྱག་རྟགས”ཞེས་པའི་རིག་གཏོད་ཡུལ་སྐོར་ཚོང་ཟོག་འགྲན་ཚོགས་སུ་གསར་འགྱུར་ཁྱབ་བསྒྲགས་ཚོགས་འདུ་སྤེལ་ཏེ། ཕྱོགས་ཡོངས་ནས་བསྡུ་རུབ་བྱེད་པའི་བྱ་བའི་འགོ་དངོས་སུ་ཚུགས།
ཁྱབ་བསྒྲགས་ཚོགས་འདུའི་ཡུལ་དངོས།
འགྲན་ཚོགས་འདི་ནི་བོད་རང་སྐྱོང་ལྗོངས་ཡུལ་སྐོར་འཕེལ་རྒྱས་ཐིང་གིས་གཙོ་སྒྲུབ་མཛད་པ་དང་། སྤྱི་ལོ་2013ལོར་འགོ་ཚུགས་ནས་ད་བར་སྐབས་དྲུག་སྤེལ་ཚར་སོང་། ལོ་ངོ་དྲུག་གི་འཁོར་སྐྱོད་དང་ཉམས་མྱོང་བརྒྱུད་ནས་འགྲན་ཚོགས་དེ་བོད་ལྗོངས་ཡུལ་སྐོར་རིག་གཏོད་ཁྱབ་ཁོངས་ཀྱི་ཤུགས་རྐྱེན་ཆེས་ཆེ་བ་དང་ཚད་གཞི་ཆེས་མཐོ་བའི་བྱེད་སྒོར་གྱུར་ཡོད། ད་ལོའི་འགྲན་ཚོགས་སུ་“རིག་གཏོད”དང་ཡུལ་སྐོར་ཚོང་ཟོག་མཉམ་འདྲེས་འབུར་དུ་བཏོད་ནས། མིང་ལ་“བོད་ཀྱི་ཕྱག་རྟགས་ཞེས་པའི་རིག་གཏོད་ཡུལ་སྐོར་ཚོང་ཟོག་འགྲན་ཚོགས”ཞེས་སུ་གསོལ།
ཁྱབ་བསྒྲགས་ཚོགས་འདུའི་སྟེང་བོད་ལྗོངས་ཡུལ་སྐོར་འཕེལ་རྒྱས་ཐིང་གི་འབྲེལ་ཡོད་འགན་འཛིན་མི་སྣས་བརྗོད་དོན། ཐེངས་འདིའི་འགྲན་ཚོགས་ནི་ལོ་སྔོན་མ་དག་དང་བསྡུར་ན། མིང་ཐོ་འགོད་པའི་ཚད་བཀག་ཇེ་ཉུང་དུ་བཏང་སྟེ། བྱ་དགའ་སྔར་ལས་མཐོན་པོ་སྟེར་རྒྱུ་ཡིན་པས། གསར་གཏོད་ཀྱི་བློ་བཀོད་ལྡན་པའི་བོད་ཀྱི་རིག་གཏོད་ཡུལ་སྐོར་ཁེ་ལས་འདིར་ཞུགས་ཐུབ་པར་རེ་བ་ཡོད་ལ། སྤུས་ཀ་མཐོ་བའི་བོད་ཀྱི་ཕྱག་རྟགས་མི་རྣམས་ཀྱི་སེམས་གཏིང་ལ་འབབ་དུ་བཅུག་ནས། མུ་མཐུད་ནས་བོད་ཀྱི་ཡུལ་སྐོར་སྣང་བརྙན་མཐོར་འདེགས་དང་། དངོས་པ་དོན་གྱི་སྒོ་ནས་“བོད་ལྗོངས་གསར་པར་ཡུལ་སྐོར་བྱེད་པ་དང་། སྣེ་གསུམ་པ་སྲུང་སྐྱོང་བྱེད་པ།”ཞེས་པའི་ཡུལ་སྐོར་འཕེལ་རྒྱས་ཀྱི་འདུ་ཤེས་འབུར་དུ་གཏོད་དགོས་ཞེས་ཟེར།
ཤེས་རྟོགས་བྱུང་བར་གཞིགས་ན། གསར་བྱུང་ཁེ་ལས་དང་གསར་བྱུང་ཚོགས་པ་སྔར་ལས་མང་པོ་ཞིག་གི་ནུས་རྩལ་ཐོག་མར་མངོན་དུ་འཇུག་ཆེད། ད་ལོའི་ཡུལ་སྐོར་ཚོང་ཟོག་འགྲན་ཚོགས་སུ་ཐོན་རྫས་ཀྱི་རིགས་དབྱེ་མེད་པར་བཟོས་པ་དང་། འགྲན་ཞུགས་མིང་ཐོ་འགོད་པར་རིགས་དབྱེའི་ཚད་བཀག་མེད་པར། བཟང་པོའི་ནང་གི་ཡང་རྩེ་འདེམས་པར་སྐུལ་འདེད་བཏང་། བོད་རང་སྐྱོང་ལྗོངས་ཁྱབ་ཁོངས་ཀྱི་ཇུས་འགོད་དང་གསར་སྤེལ་བྱས་པའི་རིག་གཏོད་ཡུལ་སྐོར་ཚོང་ཟོག་ཞིག་ཡིན་ཚུན་ཆད་ལ། བཀོལ་སྤྱོད་ཀྱི་གསར་གཏོད་དང་འཚམས་ལ་ལྡེབ་མའི་ཐོན་སྐྱེད་ཆོག་པ་སོགས་ཀྱི་ཆ་རྐྱེན་ལྡན་པའི་ཡུལ་སྐོར་རིག་གཏོད་ཐོན་རྫས་ཚང་མས་མིང་ཐོ་འགོད་ཆོག
དེ་ལས་གཞན། འགྲན་ཚོགས་སུ་བྱ་དགའ་ཐོབ་པའི་ཁེ་ལས་ཀྱི་བྱ་དགའི་རོགས་དངུལ་ཇེ་མཐོར་བཏང་ཡོད་པ་མ་ཟད། ཁེ་ལས་ཀྱི་རྗེས་མཐུད་ཐོན་ལས་འཕེལ་རྒྱས་ལའང་རོགས་སྐྱོར་གནང་རྒྱུ་རེད། དེའི་ནང་དུ་ཚུད་པའི་ཐོན་རྫས་ཚང་མར་བོད་ལྗོངས་སྣེ་གསུམ་པའི་མི་རིགས་ཁྱད་ལྡན་ཐོན་རྫས་འགྲེམ་འཚོང་ལྟེ་གནས་ཀྱི་“བོད་ལྗོངས་ཡུལ་སྐོར་རིག་གཏོད་སྤུས་ལེགས་ཐོན་རྫས་ཁང”དུ་རིན་མེད་འགྲེམ་འཚོང་དང་དྲིལ་སྒྲོག་བྱེད་པའི་གོ་སྐབས་ཡོད་ལ། ད་དུང་པེ་ཅིང་ཕོ་བྲང་རྙིང་པའི་རིག་གཏོད་སོགས་རྒྱལ་ཡོངས་ཀྱི་ཡང་རྩེའི་རིག་གཏོད་དཔུང་ཁག་དང་མཉམ་དུ་འགྲན་པའི་གོ་སྐབས་ཀྱང་ལྡན་ངེས་ཡིན།
