གནམ་གཤིས་འགྱུར་ལྡོག་ལ་ཁ་གཏད་གཅོག་པའི་ཁྲོད་ནགས་རྩྭས་ནུས་པ་གལ་ཆེན་ཐོན་གྱི་ཡོད། ནགས་རྩྭའི་རང་མོས་བཙོག་འབུད་ཉུང་གཏོང་རྣམ་གྲངས་ཏེ་ནགས་རྩྭའི་ཐཱན་འདུས་རྣམ་གྲངས་ནི་ཐཱན་ཁྲོམ་རར་ཞུགས་པའི་རིགས་གྲས་ཤིག་ཡིན་པའི་ངོས་ནས་ཀྲུང་གོའི་ནགས་རྩྭའི་ཐཱན་འདུས་མཚོན་པའི་སྐྱེ་ཁམས་ཐོན་རྫས་དངུལ་ལོར་ཅན་དུ་འགྱུར་བར་སྐུལ་འདེད་གཏོང་རྒྱུར་ཕན་ཐོགས་ཡོད་པ་དང་། “རི་སྔོན་ཆུ་དྭངས”དེ“གསེར་རི་དངུལ་རི”འགྱུར་རྒྱུར་ནུས་ཤུགས་སྦྱིན་རྒྱུ་རེད།
བོད་རང་སྐྱོང་ལྗོངས་ཆབ་མདོ་གྲོང་ཁྱེར་ལྷོ་རོང་རྫོང་གིས་ནགས་རྩྭའི་ལས་རིགས་ཀྱི་འཕེལ་རྒྱས་ལ་མཐོང་ཆེན་པོ་བྱས་ནས་ནགས་རྩྭ་སྲུང་སྐྱོང་དང་རྩྭ་ཐང་གི་རྒྱུན་མཐུད་དོ་དམ་ཐད་རྩྭ་ཁ་བཀག་པ་དང་། རྩྭ་ར་བསྙལ་བ། རྩྭ་ཁ་རེས་སྐོར་སོགས་ཚན་རིག་དང་མཐུན་ལ་གོ་ཆོད་པའི་གཉེར་སྐྱོང་བྱ་ཐབས་སྤྱད་དེ། རྫོང་དེ་གའི་ཐོན་ཁུངས་ཀྱི་གནས་ཚུལ་དངོས་ལ་གཞིགས་ནས་མིག་སྔར་གསར་སྤེལ་བྱེད་ཆོག་པའི་ཐཱན་འདུས་ནགས་བཟོ་རྣམ་གྲངས་ཀྱི་རྒྱ་ཁྱོན་མུའུ་ཁྲི3ལྷག་ཙམ་བསྡོམས་རྩིས་བྱས་པ་དང་། ནགས་ལས་ཀྱི་ཐཱན་འདུས་རྣམ་གྲངས་ལ་སྐུལ་འདེད་ཤུགས་ཆེན་བཏང་ནས་ཐོན་ལས་ཀྱི་ཕན་འབྲས་ཆེ་རུ་བཏང་སྟེ་སྐྱེ་ཁམས་ཀྱི་རིན་ཐང་དེ་དཔལ་འབྱོར་རིན་ཐང་དུ་བསྒྱུར་པ་རེད།
2023ལོའི་ཟླ2པའི་ཚེས8ཉིན། ཆོན་ཀྲོའུ་གྲོང་ཁྱེར་གྱི་བོད་སྐྱོར་ལས་དོན་རུ་ཁག་གིས་ལྷོ་རོང་རྫོང་གི་ལས་དོན་པ་འཁྲིད་དེ་ཧྥུའུ་ཅན་སན་མིང་གྲོང་ཁྱེར་ཅང་ལེ་རྫོང་དུ་ནགས་ལས་ཐཱན་འདུས་ཀྱི་རྟོག་ཞིབ་བྱེད་བཞིན་པ།
ཐོན་ཁུངས་ཀྱི་ལེགས་ཆར་གཞི་ཚུགས་ནས་ལྷོ་རོང་རྫོང་གིས་ཆབ་མདོ་གྲོང་ཁྱེར་གྱི་ནགས་ལས་ཐཱན་འདུས་ཉོ་ཚོང་ཐོག་མ་དེ་ལག་ལེན་བསྟར་རྒྱུར་གསར་གཏོད་སྐུལ་འདེད་བཏང་བ་དང་། ཆོན་ཀྲོའུ་ཡི་བོད་སྐྱོར་ལས་དོན་རུ་ཁག་གི་མཛུབ་ཁྲིད་དང་རོགས་རམ་འོག་བོད་རང་སྐྱོང་ལྗོངས་སུ་ཐཱན་འདུས་ལག་རྩལ་ཞིབ་འཇུག་དང་རིན་ཐང་བརྗེ་སྒྱུར་སོགས་ཀྱི་ལས་དོན་སྔོན་ལ་སྤེལ་ནས“ལག་རྩལ་དང་ནགས་ལས་ཟུང་འབྲེལ”གྱི་ཐཱན་འདུས་རིན་ཐང་བརྗེ་སྒྱུར་ལ་བརྟེན་ནས་སྐྱེ་ཁམས་ཤེས་དཔལ་འཛུགས་སྐྱོང་གི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་བ་རེད།
ཕྱོགས་མང་པོའི་སྟོབས་ཤུགས་གཅིག་ཏུ་བསྒྲིལ་ནས་ལྗང་མདོག་འཕེལ་རྒྱས་དོན་གཉེར་བྱ་ཆེད། ལྷོ་རོང་རྫོང་གིས་ཕྱི་ཕྱོགས་སུ་ཧུར་ཐག་བསྐྱོད་དེ་ཧྥུའུ་ཅན་ཞིང་ཆེན་སན་མིང་གྲོང་ཁྱེར་ཅང་ལེ་རྫོང་དུ་ནགས་ལས་ཐཱན་འདུས་ཀྱི་རྟོག་ཞིབ་ལས་དོན་སྤེལ་བར་སྒྲིག་འཛུགས་བྱས་པ་མ་ཟད། ཚོང་རར་བཏོན་པའི་གཞུང་ཁོངས་ཁེ་ལས་ཧྥུའུ་ཅན་ཅིན་སེན་ནགས་ལས་མ་རྐང་ཚད་ཡོད་ཀུང་སི་དང་། ཇི་ལྟར་བྱས་ནས་ནགས་ལས་ཐཱན་འདུས་གསར་སྤེལ་དང་ཉོ་ཚོང་ལ་སྐུལ་འདེད་མྱུར་པོ་དང་ནུས་ཆེ་གཏོང་བར་སྤེལ་རེས་སོགས་གྲོས་བསྡུར་གཏིང་ཟབ་བྱས་པ་དང་། དེ་བས་རང་འགུལ་ངང་རིགས་གཅིག་མཁས་ཅན་དང་མཁས་དབང་གདན་དྲངས་ནས《ཐཱན་ཉོ་ཚོང་གི་རྨང་གཞིའི་ཤེས་བྱ》དང《ཐཱན་འདུས་གསར་སྤེལ་གྱི་བརྒྱུད་རིམ་དང་ནང་དོན》སོགས་ཐཱན་འདུས་རིགས་པའི་གཞུང་ལུགས་ཀྱི་ཤེས་བྱ་ངོ་སྤྲོད་དང་སྒྲོག་འགྲེལ་བྱས་པ་རེད།
མིག་སྔར་ལྷོ་རོང་རྫོང་མི་དམངས་སྲིད་གཞུང་གིས་སྔ་རྗེས་སུ་ཧྥུའུ་ཅན་ཅིན་སེན་ནགས་ལས་མ་རྐང་ཚད་ཡོད་ཀུང་སི་དང《ལྷོ་རོང་རྫོང་གི་ནགས་རྩྭའི་ཐཱན་འདུས་རྣམ་གྲངས་སྒྲོམ་གཞིའི་གྲོས་མཐུན》བཞག་པ་དང་། ཧྥུང་ཐཱན་རྒྱུ་ནོར་དོ་དམ（ཝུའུ་ཧན）ཚད་ཡོད་ཀུང་སི་དང་ནགས་ལས་ཐཱན་འདུས་ཀྱི་རྒྱལ་ཁབ་ཀྱི་ཆོག་འཐུས་ལག་ཁྱེར་གྱི་རང་མོས་བཙོག་འབུད་ཉུང་གཏོང་ཚད（CCER）སྔོན་འཚོང་ཉོ་ཚོང་གི་གན་རྒྱ་དངོས་སུ་བཞག་ཡོད། དུས་ཐེངས་དང་པོའི་ཉོ་ཚོང་གི་ཐཱན་འདུས་ཚད་སྔོན་དཔག་བྱས་ན་ཏུན4500དང་ཉོ་ཚོང་དངུལ་འབོར་སྒོར་ཁྲི270ཙམ་ཟིན་གྱི་ཡོད། དཔལ་འབྱོར་དང་སྐྱེ་ཁམས་ཀྱི་ཁེ་ཕན་གཉིས་ཀ་ཡག་པོ་བྱུང་ནས “སྐྱེ་ཁམས་ཐོན་ལས་ཅན་དང་། ཐོན་ལས་སྐྱེ་ཁམས་ཅན། སྐྱེ་ཁམས་སྤྱི་ཚོགས་ཅན”བཅས་ཀྱི་ལྗང་མདོག་འཕེལ་རྒྱས་ཀྱི་བགྲོད་ལམ་ཞིག་ཏུ་བསྐྱོད་ཡོད།
