ནས“ཧི་མ་ལ་ཨང23པ”གྲོ་མོ་རྫོང་དུ་ལོ་ལེགས་བྱུང་བ།

ནས“ཧི་མ་ལ་ཨང23པ”བོད་རང་སྐྱོང་ལྗོངས་གཞིས་རྩེ་གྲོང་ཁྱེར་གྲོ་མོ་རྫོང་དུད་སྣ་ཞང་དུ་ལོ་ལེགས་བྱུང་བ།

　　ད་ལོ་ནི་གྲོ་མོ་རྫོང་དུད་སྣ་ཞང་གིས་ནས“ཧི་མ་ལ་ཨང23པ”ཁྱབ་གདལ་གཏོང་བའི་ལོ་གསུམ་པ་ཡིན། 2022ལོར་གཞིས་རྩེ་གྲོང་ཁྱེར་ཞིང་ལས་ཞིབ་འཇུག་ལྟེ་གནས་ཀྱིས་ཞིབ་འཇུག་གསར་སྤེལ་བྱས་པའི་ནས“ཧི་མ་ལ་ཨང23པ”དེ་དུད་སྣ་ཞང་རྒུར་རུ་གྲོང་ཚོར་ཚོད་འདེབས་བྱས་པ་རེད། ས་གནས་དེ་གའི་ནས་སོན་དང་བསྡུར་ན་ནས“ཧི་མ་ལ་ཨང23པའི”སྙེ་མ་ཆེ་བ་དང་། རྒྱགས་པ། ཚོས་མདོག་ཁ་གསལ་བ། ཐོན་ཚད་མཐོ་བ་སོགས་ཀྱི་ཁྱད་ཆོས་ལྡན་ཡོད། ཁྱབ་གདལ་བཏང་བ་ནས་བཟུང་། གཞིས་རྩེ་གྲོང་ཁྱེར་ཞིང་ལས་ཞིབ་འཇུག་ལྟེ་གནས་དང་གྲོ་མོ་རྫོང་ཞིང་ལས་དང་གྲོང་གསེབ་ཅུས་ཀྱི་ཁྱོན་ཡོངས་ཀྱི་མཛུབ་ཁྲིད་འོག དུད་སྣ་ཞང་གིས་དུས་འགོའི་རྒུར་རུ་གྲོང་ཚོའི་ཚོད་འདེབས་གྲུབ་འབྲས་གཞིར་བཟུང་། ཞང་དེ་ཡོངས་ཀྱི་ཁྱབ་ཁོངས་ནང་ཁྱབ་གདལ་དྲིལ་བསྒྲགས་དང་སོན་འདེབས་འདོད་མོས་བརྟག་དཔྱད་སོགས་ཀྱི་ལས་དོན་སྤེལ་བ་མ་ཟད། མང་ཚོགས་ཀྱི་འདོད་བློར་གཞིགས་ཏེ་ཁྱབ་གདལ་གྱི་ཁྱབ་ཁོངས་ཞང་དེ་ཡོངས་ལ་རིམ་བཞིན་ཁྱབ་པར་བྱས་ནས་འདེབས་ཁྱོན2023ལོའི་མུའུ80ནས་མུའུ520བར་མང་དུ་བཏང་བ་དང་དུད་སྣ་གྲོང་ཚོ་ཁག་ལ་ཁྱབ་གདལ་ཡག་པོ་བཏང་ཡོད།   

　　ནས་ཐོན་འཕར་གྱི་བྱ་ཐབས་བརྟན་དུ་བཏང་སྟེ། ནས་ཐོན་འཕར་ཆེ་རུ་གཏོང་ཆེད།  ད་ལོ་ནས་བཟུང་གྲོང་ཁྱེར་ཞིང་ལས་ཞིབ་འཇུག་ལྟེ་གནས་ཀྱི་ལག་རྩལ་མཛུབ་ཁྲིད་འོག རྫོང་ཞིང་ལས་དང་གྲོང་གསེབ་དང་ཚན་རིག་ལག་རྩལ་ཅུས་དང་ཞང་ཞིང་འབྲོག་ཕྱོགས་བསྡུས་ཞབས་ཞུ་ལྟེ་གནས་ཀྱི་ལག་རྩལ་པ་ཞིང་ནང་དང་མུ་ཁར་ཐེངས་མང་བསྐྱོད་དེ།  ཡུལ་དངོས་ཀྱི་ལྟ་ཞིབ་དང་།  ཞིབ་བསྡུར།  སྐབས་བསྟུན་འཐེན་བཤེར་སོགས་ཀྱི་བྱེད་ཐབས་བརྒྱུད་དུད་ཚང་ཚང་མའི་འདེབས་འཛུགས་རྒྱ་ཁྱོན་དང་།  འདེབས་འཛུགས་དུས་ཚོད།  ས་བོན་འདེབས་ཚད།  འདེབས་འཛུགས་བྱེད་ཚད།  ལུད་རྒྱག་པ་སོགས་ཀྱི་གཞི་རྩའི་གནས་ཚུལ་ལ་ཁྱོན་ཡོངས་ནས་ལྟ་ཞིབ་ཚད་ལེན་བྱས་པ་མ་ཟད།  དུད་ཚང་ཚང་མའི་གནས་ཚུལ་མི་འདྲ་བར་གཞིགས་ནས་རྩྭ་ངན་བཀོག་པ་དང་།  ཆུ་འདྲེན་པ།  ལུད་རྒྱག་པ།  ནད་འབུའི་གནོད་འཚེ་འགོག་བཅོས་སོགས་ཀྱི་ལག་རྩལ་མཛུབ་ཁྲིད་བྱས་ཏེ་ཞང་ཡོངས་ཀྱི་འབྲུ་རིགས་ཐོན་སྐྱེད་དེ་འདེབས་འཛུགས་ནས་ཞིང་ནང་དུ་དོ་དམ་བྱེད་པ་དང་།  ལྗང་པ་སྲུང་སྐྱོང་ནས་ཞིང་ཆུ་འདྲེན་པ།  ནད་འབུ་འགོག་བཅོས་ནས་རྩྭ་ངན་བཀོག་པ་དང་ལུད་རྒྱག་པ་བཅས་ཀྱི་ལག་རྩལ་མཛུབ་ཁྲིད་བྱས་ནས།  ཞང་ཡོངས་ཀྱི་འབྲུ་རིགས་ཐོན་སྐྱེད་དེ་འདེབས་འཛུགས་ནས་ཞིང་ནང་དུ་དོ་དམ་བྱེད་པ་དང་།  ལྗང་པ་སྲུང་སྐྱོང་ནས་ཞིང་ཆུ་འདྲེན་པ།  ནད་འབུ་འགོག་བཅོས་ནས་རྩྭ་ངན་བཀོག་པ་དང་ལུད་རྒྱག་པ་བཅས་བར་ཁྱོན་ཡོངས་ནས་འགན་ལེན་ཐུབ་པའི་འགན་ལེན་བྱས་པ་རེད།   དེ་དང་ཆབས་ཅིག་ནས་ཀྱི་ལོ་ཏོག་གི་ཐོན་འབབ་ལ་ཚོད་རྩིས་བྱེད་པའི་དུས་ཚོད་ཡག་ཤོས་ལ་དམ་འཛིན་བྱས་ནས་ཞིང་ཁུལ་རེ་ནས་འདེབས་དཔེ་གསུམ་ནས་ལྔ་བར་བདམས་ཏེ།  སྐབས་བསྟུན་དཔེ་ལེན་གྱི་བྱ་ཐབས་བརྒྱུད། “ཧི་མ་ལ་ཨང23པ”དང་དེ་བཞིན་ས་གནས་དེ་གའི་ནས་ཀྱི་སྐྱེ་ཚུལ་དང་།  སྙེ་མ་རེའི་གྲངས།  སྙེ་རྡོག་གི་གྲངས།  སྙེ་ཤད་ཀྱི་མཐོ་ཚད་སོགས་ལ་དཔེ་འཐེན་དཔྱད་ཞིབ་ཀྱི་བརྟག་དཔྱད་ལས་དོན་སྤེལ་ཡོད།

ཞིང་ལས་ལག་རྩལ་པས་ཞིང་ནང་དུ་འདེབས་འཛུགས་ལ་ལྟ་ཞིབ་ཚད་ལེན་བྱེད་བཞིན་པ།

　　འབྲུ་རྡོག་དུས་ཐོག་ཏུ་མཛོད་ནང་འཇུག་ཐུབ་པ་བྱས་ནས་འབབ་འཕར་བརྟན་པོ་ཡོང་བའི་འགན་ལེན་བྱ་ཆེད།  དུད་སྣ་ཞང་གི་ལག་རྩལ་པས་རྟག་ཏུ་ཞིང་ནང་དང་མུ་ཁར་བསྐྱོད་ནས་ནས་ཀྱི་སྨིན་ཚད་དང་ནས་ཀྱི་ཐོན་ཚད་ཚད་ལེན་སོགས་ཀྱི་ལས་ཀའི་རྨང་གཞིའི་ཐོག་མང་ཚོགས་སྒྲིག་འཛུགས་བྱས་ནས་གནམ་གཤིས་ཀྱི་འགྱུར་ལྡོག་དང་། ནས་ཀྱི་སྨིན་ཚད་ལ་གཞིགས་ཏེ་གཅིག་སྨིན་ན་གཅིག་བརྔ་བསྡུ་ཐུབ་པར་བྱས་ནས་སྟོན་བསྡུའི་ཐད་གནམ་གཤིས་ཧ་ཅང་ངན་པའི་ཤུགས་རྐྱེན་མི་ཐེབས་པའི་འགན་ལེན་བྱས་པ་རེད། དེ་དང་ཆབས་ཅིག་ཞིང་ཕན་སྟོན་བསྡུའི་དང་བླངས་ཞབས་ཞུའི་བྱེད་སྒོ་དམ་འཛིན་བྱ་གཞིར་བྱས་ཏེ་ངལ་ནུས་ཞན་པའི་མང་ཚོགས་ལ་ཞིང་ཕན་སྟོན་བསྡུའི་དང་བླངས་ཞབས་ཞུའི་བྱེད་སྒོ་སྤེལ་རོགས་ཧུར་ཐག་བྱས་ནས་ངལ་ནུས་མེད་པའི་དུད་ཚང་གི་སྟོན་བསྡུའི་དཀའ་གནད་བསལ་ནས་འབྲུ་རིགས་ཚང་མ་དུས་ཐོག་ཏུ་མཛོད་འཇུག་ཐུབ་པའི་འགན་ལེན་བྱས།  ཟླ9པའི་ཐོན་འབབ་ལ་ཚོད་རྩིས་བྱས་པར་གཞིགས་ན།  ནས“ཧི་མ་ལ་ཨང23པ”མུའུ520ཡི་ནང་ནས་སྔོན་དཔག་བྱས་ན་ཐོན་འབབ་རྒྱ་མ་ཁྲི29དང་མུའུ་རེའི་ཐོན་འབབ་རྒྱ་མ560ཟིན་པ་དེ་ན་ནིང་གི་མུའུ་རེའི་ཐོན་འབབ་དང་བསྡུར་ན་རྒྱ་མ80ལྷག་ཙམ་འཕར་ཡོད།