དངུལ་རྩའི་སྲིད་ཇུས་ལེགས། དཔལ་འབྱོར་འཕེལ་ཁ་བཟང་།

     ཤེས་རྟོགས་བྱུང་བར་གཞིགས་ན། འདི་ལོ་ཚུན་དུ་བོད་ལྗོངས་ཀྱི་དངུལ་རྩའི་སྤྱི་འབོར་རྒྱུན་མཐུད་དང་མགྱོགས་མྱུར་ངང་འཕར་ནས་དངུལ་རྩའི་འདེགས་སྐྱོར་ནུས་པ་སྔར་བས་མངོན་གསལ་དོད་དུ་ཕྱིན་ཡོད། སྤྱི་ཟླ་དགུ་པའི་ཟླ་མཇུག་བར་བོད་ལྗོངས་ཡོངས་ཀྱི་སྤྱི་ཚོགས་མ་དངུལ་བསྡུ་སྒྲིལ་གྱི་གཞི་ཁྱོན་སྒོར་དུང་ཕྱུར་9429.41ཟིན་པ་དེ་དུས་མཚུངས་ལས་20.78%འཕར་བ་དེ་རྒྱལ་ཡོངས་ཀྱི་ཆ་སྙོམས་ཆུ་ཚད་ལས་མཐོ་བ་ཡོད་པ་རེད། ཡིད་རྟོན་དངུལ་བུན་གྱི་སྤྱི་འབོར་ཡང་མངོན་གསལ་དོད་པོས་འཕར་ནས་མི་དམངས་ཤོག་སྒོར་དང་ཕྱི་དངུལ་གྱི་དངུལ་བུན་ཁག་གི་ལྷག་གྲངས་སྒོར་དུང་ཕྱུར་6781.45ཟིན་པ་དེ་དུས་མཚུངས་ལས་13.83%འཕར་ནས་བོད་ལྗོངས་ཀྱི་དཔལ་འབྱོར་འཕར་རྒྱུར་དངུལ་རྩའི་འདེགས་སྐྱོར་ནུས་ལྡན་བྱས་ཡོད།

     དངུལ་རྩའི་ཞབས་ཞུའི་སྤུས་ཚད་དང་ཕན་འབྲས་ཐད་བོད་ལྗོངས་ཀྱི་དངུལ་རྩའི་ཁོངས་གཏོགས་ཀྱིས་གཙོ་གནད་ཁྱབ་ཁོངས་ཀྱི་དངུལ་རྩའི་ཞབས་ཞུ་གསར་གཏོད་ཟམ་མི་ཆད་པར་གཏིང་ཟབ་ཏུ་བཏང་ནས་དངུལ་རྩའི་“ལས་དོན་ཆེན་པོ་ལྔ་”ནུས་ཤུགས་ཡོད་རྒུས་ཡག་པོ་བསྒྲུབས་པ་རེད། གྲོང་གསེབ་དར་རྒྱས་དང་། དམངས་གཉེར། ཁེ་ལས་ཆུང་གྲས་དང་ཆེས་ཆུང་གྲས། ཀུན་ཕན་དངུལ་རྩ། ལྗང་མདོག་ཡིད་རྟོན་དངུལ་བུན། དེ་བཞིན་རྨང་གཞིའི་སྒྲིག་བཀོད་འཛུགས་སྐྲུན་སོགས་ཁྱབ་ཁོངས་ཀྱི་ཡིད་རྟོན་དངུལ་བུན་གཏོང་ཚད་ཚང་མ་ཆེས་ཆེར་འཕར་ནས་དངུལ་རྩའི་ཞབས་ཞུའི་ཁྱབ་རྒྱ་དང་གནད་སྨིན་ཡོང་ཚད་ཆེ་རུ་ནུས་ལྡན་ཕྱིན་ཡོད།

     དེ་དང་ཆབས་ཅིག་ས་ཁང་བདག་ཁོངས་ཀྱི་ཁྲོམ་རའི་ཐད་བོད་ལྗོངས་ཀྱི་དངུལ་རྩའི་ཁོངས་གཏོགས་ཀྱིས་ཀྱང་སྲིད་ཇུས་དང་བྱེད་ཐབས་རབ་དང་རིམ་པ་ཧུར་ཐག་བཏོན་ནས་ས་ཁང་བདག་ཁོངས་ཀྱི་ཁྲོམ་ར་སྐྱོན་བྲལ་ངང་འཕེལ་རྒྱས་འགྲོ་རྒྱུར་རྒྱབ་སྐྱོར་བྱས་ཡོད་དེ། མི་སྒེར་གྱི་སྡོད་ཁང་དངུལ་བུན་གྱི་ཐོག་མའི་སྤྲོད་ཚད་དམའ་ཤོས་དམའ་རུ་གཏོང་བ་དང་། སྤྱི་གསོག་མ་དངུལ་གྱི་དངུལ་བུན་སྐྱེད་ཚད་དམའ་རུ་གཏོང་བ། མི་སྒེར་གྱི་སྡོད་ཁང་གི་དངུལ་བུན་གྱི་སྐྱེད་ཚད་དམའ་རུ་གཏོང་བའི་སྲིད་ཇུས་ཀྱི་ཚད་གཞི་དམའ་རུ་གཏོང་བ་སོགས་ཀྱི་བྱེད་ཐབས་བརྒྱུད་སྡོད་ཁང་གི་ཉོ་སྒྲུབ་ཀྱི་དགོས་མཁོ་བསྐངས་ཡོད།

     གཞན་ཡང་བོད་ལྗོངས་ཀྱི་ཕྱི་དངུལ་སྟབས་བདེ་ཅན་གྱི་སྲིད་ཇུས་ཕན་འབྲས་ཀྱང་རིམ་བཞིན་མངོན་གསལ་དོད་དུ་ཕྱིན་ནས་བོད་ལྗོངས་ཡོངས་ཀྱི་ཞབས་ཞུའི་ཚོང་དོན་གྱི་ཕྱི་ཕྱོགས་དང་འབྲེལ་བའི་གཏོང་ཡོང་ཆེས་ཆེར་འཕར་ཡོད་པ་རེད། མ་རྩ་དང་དངུལ་རྩའི་ཁྲོམ་ར་རིམ་གྱིས་སླར་གསོ་བྱུང་བ་དང་དེ་བཞིན་ཕྱི་དངུལ་སྟབས་བདེ་ཅན་གྱི་སྲིད་ཇུས་བྱ་ཐབས་དོན་འཁྱོལ་ནུས་ལྡན་བྱུང་བ་དང་བསྟུན་ནས་བོད་ལྗོངས་ཡོངས་ཀྱི་ཕྱི་ཕྱོགས་དང་འབྲེལ་བ་ཡོད་པའི་གཏོང་ཡོང་གི་ཧེ་བག་སྔར་བས་ཆུང་དུ་ཕྱིན་ནས་ཞབས་ཞུའི་ཚོང་དོན་རྣམ་གྲངས་འོག་གི་ཕྱི་ཕྱོགས་དང་འབྲེལ་བ་ཡོད་པའི་གཏོང་ཡོང་གི་གྲངས་འབོར་དུས་མཚུངས་ལས་ལྡབ་1.08འཕར་ཡོད།