ཉེ་ཆར། མཉམ་འབྲེལ་རྒྱལ་ཚོགས་འབྲུ་རིགས་དང་ཞིང་ལས་རྩ་འཛུགས་དང་འཛམ་གླིང་འབྲུ་རིགས་འཆར་གཞི་ཧྲུའུ་ཡིས་མཉམ་འབྲེལ་ཐོག་འདོན་ཐེངས་གསར་པའི་《བཀྲེས་ལྟོགས་ཁྱབ་ཆེ་བའི་ས་ཁུལ་གྱི་འབྲུ་རིགས་བདེ་འཇགས་མིན་པའི་གནས་ཚུལ་ཚབས་ཆེན་གྱི་སྔོན་ཚུད་ཉེན་བརྡའི་སྙན་ཞུ་》ཞེས་པ་ཁྱབ་བསྒྲགས་བྱས་པ་ལས་མངོན་པར། སྔོན་དཔག་བྱས་ན། སྤྱི་ལོ་2024ལོའི་ཟླ་11ནས་སྤྱི་ལོ་2025ལོའི་ཟླ་5པ་བར་དུས་ཡུན་ཟླ་བ་དྲུག་ནང་གོ་ལ་ཧྲིལ་པོའི་རྒྱལ་ཁབ་དང་ས་ཁུལ་22ཀྱི་འབྲུ་རིགས་བདེ་འཇགས་མིན་པའི་གནས་ཚུལ་མུ་མཐུད་ཇེ་སྡུག་ཏུ་འགྲོ་བཟོ་ཡོད་པ་བསྟན་ཡོད།
སྙན་ཞུའི་ནང་། རྒྱལ་ཁབ་དང་ས་ཁུལ་ཁྱོན་22བཀྲེས་ལྟོགས་ཁྱབ་ཆེ་སར་བརྩིས་ཡོད། འབྱུང་འགྱུར་ཟླ་བ་དྲུག་ནང་། དམག་འཁྲུག་དང་དཔལ་འབྱོར་བརྟན་པོ་མེད་པ། གནམ་གཤིས་ཀྱི་ཕོག་ཐུག་སོགས་རྒྱུ་རྐྱེན་མང་པོའི་དབང་གིས་ས་ཁུལ་དེ་དག་གི་འབྲུ་རིགས་བདེ་འཇགས་མིན་པའི་གནས་ཚུལ་ཚབས་ཆེན་དེ་སྔོན་དཔག་བྱས་ན་ཇེ་སྡུག་ཏུ་འགྲོ་རྒྱུ་རེད་ལ། ཕ་ལི་སི་ཐན་དང་། སུའུ་ཏན། སུའུ་ཏན་ལྷོ་མ། ཧེ་ཐི། མ་ལི་བཅས་ཀྱི་མི་ཚོགས་བཀྲེས་ལྟོགས་ཀྱི་གནས་སུ་གྱར་བཞིན་པའམ་ཡང་ན་བཀྲེས་ལྟོགས་ཀྱི་གནས་སུ་ལྷུང་རྒྱུ་རེད། གལ་ཏེ་མི་ཆོས་རིང་ལུགས་ཀྱི་བྱ་སྤྱོད་འཕྲལ་དུ་མ་སྤེལ་བ་དང་། ཐུན་མོང་ཐོག་འབད་བརྩོན་བྱས་ནས་གནད་དོན་ཚབས་ཆེན་ཁྱད་བསད་དང་རྒྱུན་མཐུད་དམག་འཁྲུག་ཐག་གཅོད་མ་བྱས་ན་ས་གནས་དེ་དག་ལ་བྱུང་བའི་མུ་གེ་སྔར་བས་ཚབས་ཇེ་ཆེར་འགྲོ་སྲིད་པ་བསྟན་ཡོད། འབྲུ་རིགས་དང་ཞིང་ལས་རྩ་འཛུགས་ཀྱི་སྤྱི་ཁྱབ་ལས་འཛིན་པ་ཆུས་ཏུང་ཡུས་ཀྱིས། དམག་འཁྲུག་བྱུང་བའི་ས་ཁུལ་དུ་ཞི་བདེ་སླར་གསོ་བྱེད་དགོས་པའི་འབོད་སྐུལ་གནང་བ་དང་། ཁོང་གིས། ཞི་བདེ་ནི་འབྲུ་རིགས་བདེ་འཇགས་ཀྱི་སྔོན་འགྲོའི་ཆ་རྐྱེན་ཞིག་རེད། འཚོ་བཅུད་ལྡན་པའི་བཟའ་བཅའ་ཐོབ་པ་བྱ་རྒྱུ་ནི་གཞི་རྩའི་དགོས་མཁོ་ཡིན་ལ། དེ་བས་ཀྱང་གཞི་རྩའི་འགྲོ་བ་མིའི་ཐོབ་ཐང་ཞིག་རེད་ཅེས་གསུངས་པ་རེད།
འབྲུ་རིགས་འཆར་གཞི་ཧྲུའུ་ཡི་ལག་བསྟར་ལས་འཛིན་པ་མའེ་ཁེ་ཨེན་གྱིས། འཛམ་གླིང་ས་གནས་ཁག་གི་དམག་འཁྲུག་རྒྱུན་ཆད་མེད་པར་ཛ་དྲག་ཏུ་ཕྱིན་པ་དང་དཔལ་འབྱོར་བརྟན་པོ་མེད་པའི་རང་བཞིན་ཤུགས་ཆེར་ཕྱིན་པ། གནམ་གཤིས་ཀྱི་གནོད་འཚེ་རྒྱུན་རྣམ་གསར་པར་འགྱུར་བཞིན་ཡོད། ཆབ་སྲིད་དང་ནོར་སྲིད་ཀྱི་རྒྱབ་སྐྱོར་དེ་བས་ནུས་ལྡན་ཡོད་ཚེ་མི་ཆོས་རིང་ལུགས་ཀྱི་བྱ་སྤྱོད་ཀྱིས་བཀྲེས་ལྟོགས་ཀྱི་གནད་དོན་ཐག་གཅོད་བྱ་རྒྱུར་ཡུན་རིང་རོགས་སྐྱོར་བྱེད་ཐུབ་ཅེས་གསུངས་པ་རེད།
གཞན་ཡང་སྙན་ཞུའི་ནང་། སྔོན་དཔག་བྱས་པར་ལ་ཉི་ནའི་སྣང་ཚུལ་དེས་སྤྱི་ལོ་2024
ལོའི་ཟླ་11ནས་སྤྱི་ལོ་2025ལོའི་ཟླ་3པ་བར། གོ་ལ་ཧྲིལ་པོའི་གནམ་གཤིས་ལ་ཤུགས་རྐྱེན་ཐེབས་རྒྱུ་རེད། ས་ཁུལ་ཁག་གཅིག་གི་ཞིང་ལས་ཐོན་སྐྱེད་ཆ་རྐྱེན་གནམ་གཤིས་ཀྱི་རྐྱེན་པས་ལེགས་སུ་འགྲོ་སྲིད་མོད། འོན་ཀྱང་ལ་ཉི་ནའི་སྣང་ཚུལ་གྱིས་ནི་ཀྲེ་རི་ཡ་དང་སུའུ་ཏན་ལྷོ་མ་སོགས་རྒྱལ་ཁབ་ཁག་ཅིག་ལ་རྩ་མེད་རང་བཞིན་གྱི་ཆུ་ལོག་ཐོན་སྲིད་པ་མ་ཟད་དེ་དང་ཆབས་ཅིག སོ་མ་ལི་དང་། ཁེན་ནི་ཡ། ཨེ་ཙེ་ཨོ་ཕི་ཡ་བཅས་ལ་ཐན་སྐྱོན་ཐོན་སྲིད། སྡུག་རྩུབ་ཆེ་བའི་གནམ་གཤིས་དོན་རྐྱེན་གྱིས་མ་གཞི་ནས་ཉམས་ཞན་ཡིན་པའི་འབྲུ་རིགས་མ་ལག་ལ་ཉེན་ཁ་བཟོས་ནས་མི་ཁྲི་བརྒྱ་ཕྲག་ཁ་ཤས་བཀྲེས་ལྟོགས་ཀྱི་ཉེན་ཁའི་གནས་སུ་ལྷུང་ཉེན་ཡོད།
