གསར་གཏོད་བཞིའི་ལས་དོན་ཁྲོད་ཀྱི་བོད་ལྗོངས་གཞོན་ནུའི་སྟོབས་ཤུགས།

     གསར་གཏོད་བཞིས་ཇི་ལྟར་བྱས་ནས་བོད་ཀྱི་སྤྱི་ཚོགས་བརྟན་ལྷིང་སྲུང་སྐྱོང་དང་། དཔལ་འབྱོར་སྤྱི་ཚོགས་འཕེལ་རྒྱས། སྣོད་བཅུད་ཤེས་དཔལ་འཛུགས་སྐྱོང་། མཐའ་བརྟན་མཐའ་དར་ཡོང་བ་བྱེད་པ་བཅས་ཀྱི་དུས་རབས་ཀྱི་ཞིབ་འཇུག་བྱ་གཞིར་ཚན་རིག་དང་མཐུན་པའི་སྒོ་ནས་ལན་བརྒྱབ་ཡོད། དེའི་ནང་འཐབ་ཇུས་ཐད་ཀྱི་བཀོད་སྒྲིག་ཡོད་ལ་འགག་རྩའི་གནད་དོན་ཡང་ཡོད་ཅིང་དེས་སྲིད་ཇུས་ཀྱི་རྒྱུན་མཐུད་རང་བཞིན་མཚོན་པ་མ་ཟད། བོད་ཀྱི་ལས་དོན་ལ་དམིགས་པའི་དུས་བབ་གསར་པ་དང་ལས་འགན་གསར་པའང་མཚོན་ཡོད། གཞོན་ནུ་རྣམས་ཀྱིས་གསར་གཏོད་བཞི་ཡི་ཁྲོད་དུ་ནུས་པ་གལ་ཆེན་འདོན་བཞིན་ཡོད། ཁོང་ཚོས་རྣམ་གྲངས་དང་བྱེད་སྒོ་སྣ་ཚོགས་ལ་ཞུགས་པར་བརྟེན་ནས་རང་ཉིད་ཀྱི་སྟོབས་ཤུགས་ལེགས་སྐྱེས་སུ་ཧུར་ཐག་ཕུལ་ཡོད། དཔེར་ན། ས་མཐོའི་དཔལ་འབྱོར་སྤུས་ཚད་མཐོ་བའི་ངང་འཕེལ་རྒྱས་འགྲོ་བའི་ཁྲོད་གཞོན་ནུ་ཚོས་ནུས་རྒྱུ་གཙང་མའི་ཐོན་ལས་སོགས་རྣམ་གྲངས་ནང་ཞུགས་ནས་ས་མཐོའི་དཔལ་འབྱོར་རྒྱུན་མཐུད་འཕེལ་རྒྱས་ལ་སྐུལ་འདེད་གཏོང་བ་དང་། རྒྱལ་ཁབ་ཀྱི་སྣོད་བཅུད་ཤེས་དཔལ་མཐོ་ས་འཛུགས་སྐྲུན་བྱེད་པ། སྣོད་བཅུད་སྲུང་སྐྱོང་དང་ཁོར་ཡུག་སྲུང་སྐྱོང་གི་བྱེད་སྒོའི་ནང་ཞུགས་ནས་སྣོད་བཅུད་སྲུང་སྐྱོང་གི་འདུ་ཤེས་ཁྱབ་གདལ་གཏོང་རྒྱུར་སྐུལ་འདེད་གཏོང་བ། རྒྱལ་ཡོངས་ཀྱི་མི་རིགས་མཐུན་སྒྲིལ་དང་ཡར་ཐོན་གྱི་དཔེ་སྟོན་ཁུལ་འཛུགས་སྐྲུན་བྱེད་པ། རིག་གནས་སྤེལ་རེས་དང་སྡེ་ཁུལ་ཞབས་ཞུ་སོགས་ཀྱི་བྱེད་སྒོ་བརྒྱུད་ནས་མི་རིགས་མཐུན་སྒྲིལ་ལ་སྐུལ་འདེད་གཏོང་བ། མཐའ་དར་དམངས་ཕྱུག་བྱ་སྤྱོད་ཀྱི་དཔེ་སྟོན་ཁུལ་འཛུགས་སྐྲུན་བྱེད་པ། རྩལ་ནུས་གསོ་སྦྱོང་དང་ལས་གཏོད་རྒྱབ་སྐྱོར་བྱས་པ་བརྒྱུད་མཐའ་མཚམས་ས་ཁུལ་གྱི་དཔལ་འབྱོར་འཕེལ་རྒྱས་དང་སྤྱི་ཚོགས་ཡར་ཐོན་ཡོང་བར་རོགས་རམ་བྱེད་པ་སོགས་ཀྱི་ཐད་ནུས་པ་གལ་ཆེན་འདོན་སྤེལ་བྱེད་བཞིན་ཡོད།

     གསར་འགོད་པར་ཤེས་རྟོགས་བྱུང་བར། བོད་རང་སྐྱོང་ལྗོངས་ཀྱིས་སྤྱི་ལོ་2018ལོ་ནས་2025ལོའི་བར་གྱི་དུས་ཡུན་རིང་འབྲིང་གི་གཞོན་ནུའི་འཕེལ་རྒྱས་འཆར་འགོད་ལ་སྐུལ་འདེད་གཏིང་ཟབ་བཏང་ནས་ལག་བསྟར་བྱས་པ་དང་། བོད་ལྗོངས་ཀྱི་སློབ་ཆེན་སློབ་མ་ལྗོངས་ཕྱིར་ལས་ཞུགས་ལས་གཏོད་ཀྱི་སྣེ་ཁྲིད་འཆར་གཞིའི་ནང་བོད་ཀྱི་སློབ་ཆེན་སློབ་མ་2855ལྗོངས་ཕྱིའི་ཞིང་ཆེན་དང་གྲོང་ཁྱེར་ཁག་གི་ཁ་གཏད་ཆེད་ལས་ལས་གནས་སུ་དངོས་སྦྱོང་དང་ལྟ་སྦྱོང་ལ་ཞུགས་པ་དང་། དཀའ་ངལ་ཡོད་པའི་ཁྱིམ་ཚང་གི་སློབ་མར་ལས་ཞུགས་རོགས་སྐྱོར་བྱེད་པའི་འཆར་གཞི་ལག་བསྟར་བྱས་ནས་བོད་ལྗོངས་ཡོངས་ཀྱི་ལས་བྱེད་པས་ལས་ཞུགས་དཀའ་ངལ་ཡོད་པའི་མཐོ་སློབ་སློབ་ཐོན་སློབ་མ་842ཙམ་ལ་ཆ་སྒྲིག་རོགས་སྐྱོར་བྱས་ཡོད་ཅིང་དེའི་ནང་ནས་མི་གྲངས་411ལ་གནད་སྨིན་རོགས་སྐྱོར་བྱས་ནས་ལས་ཞུགས་མངོན་འགྱུར་བྱུང་བ་རེད།

     སྤྱི་ལོ་2021ལོར་བོད་ལྗོངས་ཀྱིས་འོས་སྦྱོར་བྱས་པའི་བརྩམས་ཆོས་ལ་འགྲན་སློང་བུམ་པའི་རྒྱལ་ཡོངས་ཀྱི་སློབ་ཆེན་སློབ་མའི་སློབ་གསེང་རིག་གཞུང་ཚན་རྩལ་བརྩམས་ཆོས་འགྲན་བསྡུར་གྱི་དམིགས་བསལ་བྱ་དགའ་ཐོབ་ནས་བོད་ལྗོངས་ཀྱི་འགྲན་བསྡུར་རྣམ་གྲངས་དེའི་བྱ་དགའི་གྲུབ་འབྲས་ལ་ལོ་རྒྱུས་རང་བཞིན་གྱི་ཚད་བརྒལ་བྱུང་ཡོད་པ་རེད། སྤྱི་ལོ་2023ལོར་བོད་ལྗོངས་ཀྱིས་འོས་སྦྱོར་བྱས་པའི་བརྩམས་ཆོས་ལ་འགྲན་སློང་བུམ་པའི་མཐའ་བསྡུར་ཁྲོད་བྱ་དགའ་རིམ་པ་དང་པོ་1དང་། བྱ་དགའ་རིམ་པ་གཉིས་པ་1 བྱ་དགའ་རིམ་པ་གསུམ་པ་9བཅས་ཐོབ་ཡོད། གཞན་ད་དུང་དར་རྒྱས་བུམ་པའི་རྒྱལ་ཡོངས་ཀྱི་གཞོན་ནུའི་ལས་རིགས་རྩལ་ནུས་འགྲན་བསྡུར་ཆེ་མོའི་ཁྲོད་བོད་ལྗོངས་ཀྱིས་འོས་སྦྱོར་བྱས་པའི་རྣམ་གྲངས་ལ་དངུལ་གྱི་རྟགས་མ་ཐོབ་ནས་འགྲན་བསྡུར་དེའི་ཁྲོད་ཀྱི་བོད་ལྗོངས་ཀྱི་གྲུབ་འབྲས་གསར་པ་བཏོད་ཡོད་པ་རེད། འགྲན་བསྡུར་གཉེར་བའི་རྨང་གཞིའི་ཐོག་ལས་གཏོད་གསོ་སྦྱོང་སྒར་ས་སོགས་ཀྱི་ལེ་ལག་ཚང་བའི་བྱེད་སྒོ་སྤེལ་ནས་ལས་གཏོད་གཞོན་ནུར་ཕྱོགས་ཡོངས་ནས་ཞབས་འདེགས་ཞུས་ཡོད་པ་རེད།

     དེ་མིན་ད་དུང་སྤྱི་ལོ་2022ལོ་ནས་སྤྱི་ལོ་2024ལོའི་བར་ཁྱོན་ནུབ་རྒྱུད་འཆར་གཞི་དང་བོད་ཀྱི་ཆེད་དོན་དང་བླངས་པ་མི་གྲངས་3000བསྡུས་ནས་བོད་ཀྱི་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་གཞོན་ནུ་ཤེས་ལྡན་པ་རྒྱུན་ཆད་མེད་པར་མངགས་གཏོང་བྱས་པ་དང་། ལོ་ལྟར་30%ཡས་མས་ཀྱི་གཞོན་ནུ་དང་བླངས་པས་བོད་དུ་མུ་མཐུད་སྡོད་རྒྱུའི་གདམ་ག་བྱེད་ཀྱི་ཡོད།

     ལོ་གསུམ་རིང་སྡེ་ཁུལ་གྱི་སློབ་གྲྭར་བསྐྱོད་དེ་ནུས་རྒྱུ་བསྲི་ཚགས་དང་བཙོག་འབུད་ཉུང་གཏོང་། གད་སྙིགས་རིགས་དབྱེ་དང་ལྗང་མདོག་འགྲུལ་བཞུད་དར་སྤེལ་སོགས་ནུས་རྒྱུ་གྲོན་ཆུང་དང་ཐཱན་རྒྱུ་ཉུང་བའི་དང་བླངས་ཞབས་ཞུའི་བྱེད་སྒོ་ཐེངས་240ལྷག་ཙམ་སྤེལ་བའི་ནང་གཞོན་ནུ་དང་བླངས་པ་མི་ཐེངས་1200ལྷག་ཙམ་སྒྲིག་འཛུགས་དང་སྐུལ་སློང་བྱས་ཡོད་པ་མ་ཟད་རྒྱ་ཆེའི་གཞོན་ནུ་ཚོར་འབྲུ་རིགས་གྲོན་ཆུང་དང་ཆུད་ཟོས་ལ་ངོ་རྒོལ་བྱེད་པའི་གོམས་གཤིས་བཟང་པོ་འཇགས་རྒྱུར་ཁྲིད་སྟོན་ཡང་བྱས་པ་རེད། མཛེས་སྡུག་ལྡན་པའི་ཀྲུང་གོའི་ལང་ཚོའི་བྱ་སྤྱོད་དང་། མ་ཡུམ་གཙང་པོ་སྲུང་སྐྱོང་། བོད་ཀྱི་གཞོན་ནུ་དང་བླངས་པའི་ནགས་གླིང་སོགས་ཀྱི་བྱེད་སྒོ་སྤེལ་བ་བརྒྱུད་དྭངས་ཤིང་གཙང་བའི་རི་ཆུ་ཀླུང་གསུམ་དང་གངས་འཁྱགས་ཀྱིས་བསྡམས་པའི་ས་གཞི་ཚང་མ་གསེར་རི་དངུལ་རི་ཡིན་པ་གཞོན་ནུ་ལོ་ཆུང་གི་སེམས་ནང་ཟབ་མོར་ཟུག་ཐུབ་པ་བྱུང་ཡོད། ལོ་གསུམ་རིང་བོད་ལྗོངས་ཡོངས་ཀྱི་གཞོན་ནུ་དང་བླངས་པ་མི་ཐེངས་ཁྲི་3ལྷག་ཙམ་སྒྲིག་འཛུགས་དང་སྐུལ་སློང་བྱས་ཏེ་སྣོད་བཅུད་ཁོར་ཡུག་སྲུང་སྐྱོང་རིགས་ཀྱི་དང་བླངས་ཞབས་ཞུའི་བྱེད་སྒོ་ཐེངས་3000ཙམ་སྤེལ་བ་དང་། བོད་ལྗོངས་ཡོངས་ཀྱི་གཞོན་ནུ་དང་བླངས་པའི་ནགས་གླིང་དུ་ཁྱོན་ཤིང་རྐང་ཁྲི་10ལྷག་ཙམ་བཙུགས་པ་དང་། ཆུ་ལམ་སོགས་ཀྱི་གད་སྙིགས་ཁུག་མ་ཁྲི་2ལྷག་ཙམ་གཙང་སེལ་བྱས་ཡོད།

     མ་འོངས་པར་གསར་གཏོད་བཞིས་བོད་ལྗོངས་ས་ཁུལ་གྱི་ཁྱོན་ཡོངས་ཀྱི་འཕེལ་རྒྱས་ལ་མུ་མཐུད་སྐུལ་འདེད་ཐེབས་རྒྱུ་ཡིན་ཞིང་། གཞོན་ནུ་ཚོས་མུ་མཐུད་དེའི་གསར་གཏོད་དང་གསོན་ཤུགས་འདོན་སྤེལ་བྱས་ཏེ་རྣམ་གྲངས་དང་བྱེད་སྒོ་དེ་བས་མང་བའི་ནང་ཞུགས་ནས་བོད་ལྗོངས་ས་ཁུལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་དང་སྣོད་བཅུད་ཤེས་དཔལ་འཛུགས་སྐྱོང་ལ་སྐུལ་འདེད་གཏོང་རྒྱུ་དང་། སྲིད་གཞུང་དང་སྤྱི་ཚོགས་ལས་རིགས་ཁག་གིས་ཀྱང་གཞོན་ནུ་གསར་གཏོད་བྱེད་སྒོ་དེ་དག་ནང་ཞུགས་རྒྱུར་མུ་མཐུད་རྒྱབ་སྐྱོར་དང་སྐུལ་ལྕག་བྱས་ཏེ་ཁོང་ཚོར་གོ་སྐབས་དང་ཐོན་ཁུངས་དེ་བས་མང་བ་མཁོ་འདོན་བྱས་ནས་བོད་ཀྱི་དར་རྒྱས་དང་ཡར་ཐོན་ལ་ཐུན་མོང་ཐོག་སྐུལ་འདེད་གཏོང་རྒྱུ་ཡིན།