འདི་ནི་མི་རིང་བའི་གོང་ཀྲུང་གོ་འབྲུ་སྣུམ་ཚོགས་པས་ནང་འདྲེན་བྱས་པའི“ནགས་ཚལ་ལ་གཏོར་སྐྱོན་མི་ཕོག་པའི”པར་ཙིར་སྲན་ཆེན་གྱི་མངགས་ཐོ་ཐོག་མ་ཀྲུང་གོའི་ཐེན་ཅིན་གྲུ་ཁར་འབྱོར་བའི་གནས་ཚུལ་ཡིན་པ།
པར་ཙིར་གྱི་པ་ཁཱ་ལེ་ན་གྲུ་ཁ་ནས་ཐོན་ཏེ་ཟླ་བ་གཅིག་ལྷག་ཙམ་འགྲུལ་བཞུད་བྱས་པ་བརྒྱུད་ཀྲུང་གོ་འབྲུ་སྣུམ་ཚོགས་པས་ནང་འདྲེན་བྱས་པའི“ནགས་ཚལ་དང་སྔོ་ཁེབས་ལ་གཏོར་སྐྱོན་མི་ཕོག་པའི”(གཤམ་དུ“ནགས་ཚལ་ལ་གཏོར་སྐྱོན་མི་ཕོག་པ”ཞེས་བརྗོད་རྒྱུ)པར་ཙིར་གྱི་སྲན་ཆེན་བླུགས་པའི་ཟོག་འདྲེན་གྲུ་གཟིངས་ཀྲུང་གོའི་ཐེན་ཅིན་གྲུ་ཁར་འབྱོར་པ་རེད། པར་ཙིར་གྱི“ནགས་ཚལ་ལ་གཏོར་སྐྱོན་མི་ཕོག་པའི”སྲན་ཆེན་ཀྲུང་གོར་ཕྱིར་གཏོང་བྱས་པ་དེ་ཐོག་ནས་གོ་ལ་ཧྲིལ་པོའི་ཁྲོམ་རར་ཀྲུང་གོ་དང་པར་ཙིར་གྱིས་རྒྱུན་མཐུད་ཆོག་པའི་ཞིང་ལས་མཉམ་ལས་ལ་ཤུགས་སྣོན་རྒྱག་པའི་གསོན་ཉམས་དོད་པའི་ལག་ལེན་མངོན་ཡོད།
“ནགས་ཚལ་ལ་གཏོར་སྐྱོན་མི་ཕོག་པའི”སྲན་ཆེན་གྱིས་སྲན་ཆེན་འདེབས་འཛུགས་བྱ་ཡུལ་ནགས་ཚལ་ལ་གཏོར་སྐྱོན་ཕོག་པའམ་ཡང་ན་སྔོ་ཁེབས་ལ་གཏོར་སྐྱོན་ཕོག་པའི་གནས་ཚུལ་དང་འབྲེལ་བ་མེད་པ་མཚོན་གྱི་ཡོད། 2021ལོར《མཉམ་འབྲེལ་རྒྱལ་ཚོགས་ཀྱི་གནམ་གཤིས་འགྱུར་ལྡོག་སྒྲོམ་གཞིའི་སྤྱི་ཆིངས》ཀྱི་ཆིངས་ཡིག་འཇོག་མཁན་ཕྱོགས་ཀྱི་ཚོགས་ཆེན་ཐེངས་ཉེར་དྲུག་པའི་ཐོག《ནགས་ཚལ་དང་ས་ཆ་བེད་སྤྱོད་སྐོར་གྱི་ཀེ་ལ་སི་ཀོའི་འགོ་ཁྲིད་པའི་བསྒྲགས་གཏམ》ལ་གྲོས་འཆམ་བྱུང་བ་དང་། 2030ལོར་སླེབས་སྐབས་ཤིང་རྐང་གཅིག་ཀྱང་མི་གཅོད་པའི་ཁས་ལེན་དམ་བཅའ་བཞག་ཅིང་། ཀྲུང་གོ་དང་པར་ཙིར་སོགས་ཀྱིས་བསྒྲགས་གཏམ་དེར་མིང་རྟགས་བཀོད་པ་རེད། 2023ལོའི་ཀྲུང་གོའི་རྒྱལ་སྤྱིའི་ནང་འདྲེན་དངོས་མང་སྟོན་ཚོགས་སྐབས་དྲུག་པར་ཀྲུང་གོ་འབྲུ་སྣུམ་ཚོགས་པའི་ཁོངས་གཏོགས་ཀྱི་ཀྲུང་གོ་འབྲུ་སྣུམ་རྒྱལ་སྤྱི་དང་མོང་ཉིའུ་ཚོགས་པའི་ཁོངས་གཏོགས་ཀྱི་དེང་རབས་འབྲོག་ལས་ཀྱིས“ནགས་ཚལ་ལ་གཏོར་སྐྱོན་མི་ཕོག་པའི”པར་ཙིར་གྱི་སྲན་ཆེན་ཉོ་རྒྱུའི་མཉམ་ལས་གྲོས་མཐུན་བཞག་ཡོད། ད་ཐེངས་ཀྱི་མཉམ་ལས་ལ་སྐུལ་འདེད་གཏོང་བའི་འཛམ་གླིང་དཔལ་འབྱོར་གླེང་སྟེགས་ཀྱི་ཆར་ཆུ་མང་བའི་ཚ་ཁུལ་ནགས་ཚལ་མནའ་འབྲེལ་གྱིས་སྲན་ཆེན་གྱི་མངགས་ཐོ་དེར་ལམ་ཚད་རྡོ་རིང་གི་དོན་སྙིང་ལྡན་ཡོད་ཅེས་བཤད།
ཉེ་བའི་ལོ་ཤས་རིང་། ཀྲུང་གོ་དང་པར་ཙིར་གྱིས་རྒྱུན་མཐུད་ཆོག་པའི་ཞིང་ལས་མཉམ་ལས་ལ་ཤུགས་སྣོན་བརྒྱབ་ཅིང་། པར་ཙིར་གྱི་སྲན་ཆེན་ཐོན་སྐྱེད་བརྒྱུད་རིམ་ཁྲོད་ནགས་ཚལ་ལ་གཏོར་སྐྱོན་ཕོག་པའི་སྣང་ཚུལ་འགོག་རོགས་བྱ་ཆེད། 2019ལོ་ནས་བཟུང་ཀྲུང་གོ་འབྲུ་སྣུམ་རྒྱལ་སྤྱིས་པར་ཙིར་གྱི་ཞིང་ར་ཁག་གཅིག་གི་ས་ཆར་ལྟ་ཞིབ་ཚད་ལེན་བྱས་ཏེ་ས་བཀྲ་བཀོད་པ་དང་འབྲེལ་མཁོ་འདོན་ཚོང་པས་མཁོ་འདོན་བྱས་པའི་ཆ་འཕྲིན་ལ་གཞིགས་ནས“སྲན་ཆེན་ཁུངས་འདེད་ཆོག་པའི་མ་ལག”བཙུགས་པ་མ་ཟད། ས་གནས་དེ་གའི་ཞིང་པར་འབྲེལ་ཡོད་གསོ་སྦྱོང་ཡང་བྱས་པ་རེད། མིག་སྔར་ཀྲུང་གོ་འབྲུ་སྣུམ་རྒྱལ་སྤྱིའི་ཀུང་སིས་པར་ཙིར་ནས་ཐད་ཀར་ཉོས་པའི་སྲན་ཆེན་གྱི་ཁུངས་འདེད་ཐུབ་ཚད་100%མངོན་འགྱུར་བྱུང་ཡོད།
“ཀྲུང་གོའི་ཁྲོམ་རས་གོ་ལ་ཧྲིལ་པོའི་ཞིང་ལས་ཐོན་རྫས་ཉོ་ཚོང་ཁྲོད་ནུས་པ་གལ་ཆེན་བཏོན་ཡོད་པས་གོ་ལ་ཧྲིལ་པོའི་ཞིང་ལས་ཀྱི་རིན་ཐང་འཁོར་འབྲེལ་གྱི་ལྗང་མདོག་ཕྱོགས་སྒྱུར་ལ་སྐུལ་འདེད་ནུས་ལྡན་གཏོང་ཐུབ” འཛམ་གླིང་དཔལ་འབྱོར་གླེང་སྟེགས་ཀྱི་ཆར་ཆུ་མང་བའི་ཚ་ཁུལ་ནགས་ཚལ་མནའ་འབྲེལ་གྱི་ལག་བསྟར་སྤྱི་ཁྱབ་ལྟ་ཞིབ་པ་ཅེ་ཁེ·ཧོ་ཏེས་རྒྱུན་མཐུད་ཆོག་པའི་འཛད་སྤྱོད་དང་དེ་བཞིན་འབྲུ་རིགས་དང་ཞིང་ལས་ལས་རིགས་ཀྱི་སྤུས་ཚད་མཐོ་བའི་འཕེལ་རྒྱས་ནི་དུས་ཀྱི་འཕེལ་ཕྱོགས་ཤིག་ཡིན། “ནགས་ཚལ་ལ་གཏོར་སྐྱོན་མི་ཕོག་པའི”པར་ཙིར་གྱི་སྲན་ཆེན་མངགས་ཐོ་དེས་ཀྲུང་གོའི་ཁྲོམ་རའི་རྒྱུན་མཐུད་ཆོག་པའི་ཐོན་རྫས་ཀྱི་དགོས་མཁོ་སྔར་བས་ཆེ་རུ་འགྲོ་རྒྱུ་ཡིན་པ་དང“ཁེ་ལས་དེ་བས་མང་བ་དེ་ལྟ་བུའི་བྱ་སྤྱོད་ནང་ཞུགས་རྒྱུའི་རེ་བའང་བྱེད་ཀྱི་ཡོད”ཅེས་བཤད།
