གསར་འགོད་པས་བོད་ལྗོངས་ཀྱི་སྤྱི་དམངས་འཛད་སྤྱོད་ལས་དོན་ལ་སྐུལ་འདེད་གཏོང་ཚུལ་སྐོར་གྱི་གསར་འགྱུར་ཡོངས་བསྒྲགས་ཚོགས་འདུའི་ཐོག་ནས་ཤེས་རྟོགས་བྱས་པར་གཞིགས་ན། བོད་རང་སྐྱོང་ལྗོངས་ཚོང་དོན་ཁོངས་གཏོགས་ཀྱིས་འཛད་སྤྱོད་རྣམ་པ་གསར་གཏོད་དང་། འཛད་སྤྱོད་ཆ་རྐྱེན་ལེགས་བཅོས། འཛད་སྤྱོད་ཀྱི་མི་མངོན་པའི་སྟོབས་ཤུགས་འདོན་སྤེལ་སོགས་ཀྱི་བྱ་ཐབས་མང་པོ་སྤྱད་དེ་འཛད་སྤྱོད་ཁྲོམ་ར་རྒྱུན་མཐུད་ངང་བསྐྱར་འཕར་ཡོང་རྒྱུར་སྐུལ་འདེད་ནུས་ལྡན་བཏང་ཡོད།
དུས་ཚིགས་དང་པོ་ནས་གསུམ་པའི་བར་བོད་ལྗོངས་ཀྱི་སྤྱི་ཚོགས་འཛད་རྫས་སིལ་ཚོང་བསྡོམས་འབོར་སྒོར་དུང་ཕྱུར་671.06ཟིན་པ་དེ་དུས་མཚུངས་ལས་6.2%འཕར་ནས་འཕར་ཚད་རྒྱལ་ཡོངས་ཀྱི་ཨང་དང་པོར་སླེབས་ཡོད།
སྲིད་ཇུས་ཀྱི་འདེགས་སྐྱོར་ཐད་བོད་ལྗོངས་ཀྱིས་འཛད་སྤྱོད་ལ་སྐུལ་མ་གཏོང་བའི་སྲིད་ཇུས་དང་བྱ་ཐབས་རབ་དང་རིམ་པ་བཏོན་པ་དཔེར་ན༼འཛད་སྤྱོད་ལ་སྐུལ་མ་གཏོང་བའི་ལོའི༽ལས་ཀའི་ཇུས་གཞི་དང་འཛད་སྤྱོད་ལ་སྐུལ་མ་གཏོང་བའི༼དོན་ཚན་བརྒྱད༽སོགས་བཏོན་པ་མ་ཟད། འཛད་རྫས་རྙིང་ཚབ་གསར་བརྗེས་སྲིད་ཇུས་གསར་པ་དོན་འཁྱོལ་དང་ལག་བསྟར་བྱ་རྒྱུར་སྐུལ་མ་ཡང་བཏང་ཡོད་པ་རེད། གཞན་ཡང་ད་དུང༼བོད་རང་སྐྱོང་ལྗོངས་ཀྱིས་ཞབས་ཞུའི་འཛད་སྤྱོད་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་བྱེད་ཐབས་འགའ་ཞིག༽ཅེས་པ་བཟོས་ནས་ཞབས་ཞུའི་འཛད་སྤྱོད་མཁོ་སྤྲོད་བྱེད་ཤུགས་ཆེ་རུ་གཏོང་བ་དང་ཞབས་ཞུའི་འཛད་སྤྱོད་ཆུ་ཚད་མཐོ་རུ་གཏོང་བ་སོགས་ཀྱི་ཐད་ཞིབ་ཕྲའི་བྱེད་ཐབས་བཏོན་ཏེ་འཛད་སྤྱོད་ཁྲོམ་ར་འཕེལ་རྒྱས་ལ་སྔར་བས་སྐུལ་འདེད་གཏོང་བཞིན་ཡོད།
བྱེད་སྒོར་སྐུལ་འདེད་གཏོང་བའི་ཐད་རང་སྐྱོང་ལྗོངས་དང་། ས་ཁུལ(གྲོང་ཁྱེར)རྫོང(ཆུས)བཅས་རིམ་གསུམ་ནོར་སྲིད་ཀྱིས་རིམ་རྩིས་བྱས་ན་འཛད་སྤྱོད་ལ་སྐུལ་འདེད་གཏོང་བའི་མ་དངུལ་སྒོར་དུང་ཕྱུར་5.76ལྷག་ཙམ་བཀོད་སྒྲིག་བྱས་པ་དང་རླངས་འཁོར་དང་། ཁྱིམ་སྤྱོད་གློག་ཆས། བཟའ་བཏུང་སོགས་གཙོ་གནད་འཛད་སྤྱོད་ཁྱབ་ཁོངས་ལ་དམིགས་ནས་འཛད་སྤྱོད་ལ་སྐུལ་འདེད་གཏོང་བའི་བྱེད་སྒོ་རབ་དང་རིམ་པ་མུ་མཐུད་སྤེལ་བཞིན་ཡོད་པ་རེད། མིག་སྔའི་བར་རིམ་རྩིས་བྱས་ན། མ་དངུལ་སྒོར་དུང་ཕྱུར་4.3སྤྱད་པ་དང་འཛད་སྤྱོད་སྒོར་དུང་ཕྱུར་35.52འཕར་རྒྱུར་ཐད་ཀར་སྐུལ་ཁྲིད་བྱས་ཡོད་པ་རེད། འཛད་རྫས་རྙིང་ཚབ་གསར་བརྗེས་བྱས་པར་ཕན་འབྲས་མངོན་གསལ་དོད་པོ་ཐོན་ནས་འཛད་རྫས་རྙིང་ཚབ་གསར་བརྗེ་ཐེངས་ཁྲི་7.06བྱས་པར་ཕྱིར་ཚོང་ཡོང་འབབ་སྒོར་དུང་ཕྱུར་12.03ཟིན་ཡོད།
གཙོ་གཟུགས་སྐྱེད་སྲིང་ཐད་བོད་ལྗོངས་ཀྱིས་སྤུས་རྟགས་ཚོང་ཁང་འཛུགས་རྒྱུར་སྐུལ་འདེད་ཧུར་ཐག་གཏོང་བ་དང་བཅད་གྲངས་ཡན་གྱི་ཚོང་དོན་འཁོར་རྒྱུག་ཁེ་ལས་སྐྱེད་སྲིང་བྱེད་ཤུགས་ཆེ་རུ་བཏང་ཡོད། མིག་སྔའི་བར་ལྗོངས་ཡོངས་སུ་མཛོད་འཇུག་གི་ཚད་བཀག་ཡན་གྱི་ཚོང་དོན་འཁོར་རྒྱུག་ཁེ་ལས་800ལྷག་ཙམ་ཡོད་པ་དང་། ཚད་བཀག་ཡན་གྱི་ཚན་པའི་འཛད་སྤྱོད་དངོས་ཟོག་སིལ་འཚོང་དངུལ་འབོར་དུས་མཚུངས་ལས་7.0%འཕར་ཡོད་པ་རེད། གཞན་ཡང་ད་དུང་ཁྲོམ་རའི་བྱེད་པོ་200ཙམ་ལ་བྱ་དགའ་སྤྲད་ནས་ཁེ་ལས་འཕེལ་རྒྱས་ཀྱི་ནང་གནས་སྒུལ་ཤུགས་ནུས་ལྡན་ངང་འཕེལ་བར་བྱས་ཡོད།
གོམ་སྟབས་རྗེས་མར་བོད་ལྗོངས་ཀྱིས་མུ་མཐུད་འཛད་སྤྱོད་ཆེ་རུ་གཏོང་རྒྱུ་དེ་ནང་མཁོ་རྒྱ་ཆེར་གཏོང་བའི་གཙོ་གནད་དུ་བརྩིས་ནས་འཛད་སྤྱོད་ཀྱི་རྣམ་པ་གསར་པ་གཏོད་རྒྱུ་དང་དཔལ་འབྱོར་འཕེལ་རྒྱས་ལ་ཐོག་མར་སྐུལ་འདེད་གཏོང་བ་སོགས་ཀྱི་སྲིད་ཇུས་བྱ་ཐབས་ཞིབ་འཇུག་བྱས་ནས་བཟོས་ཏེ་ཚོང་དོན་དང་། ལུས་རྩལ་བཅས་ཀྱི་འཛད་སྤྱོད་མཉམ་འདྲེས་གཏིང་ཟབ་ངང་འཕེལ་རྒྱས་འགྲོ་རྒྱུར་སྐུལ་འདེད་གཏོང་རྒྱུ་ཡིན་པ་རེད། དེ་དང་ཆབས་ཅིག་འཆར་ཉེར་ཡོད་པའི་བཅུ་གཅིག་པའི་ཚེས་བཅུ་གཅིག་ཉིན་དང་གནམ་ལོ་གསར་ཚེས་སོགས་གལ་ཆེའི་མཚམས་ཚིགས་ལ་དམིགས་ཏེ་བོད་ལྗོངས་ཀྱིས་ད་དུང་ས་ཁུལ（གྲོང་ཁྱེར）ཁག་གིས་འཛད་སྤྱོད་སྐུལ་སྤེལ་བྱེད་སྒོ་རབ་དང་རིམ་པ་མུ་མཐུད་སྤེལ་རྒྱུར་མཛུབ་ཁྲིད་བྱས་ནས་གྲོང་མིའི་འཛད་སྤྱོད་དགོས་མཁོ་རྒྱུན་ཆད་མེད་པར་སྐོང་ཐུབ་པ་དང་འཛད་སྤྱོད་ཀྱི་ཡིད་ཆེས་ཆེ་རུ་གཏོང་རྒྱུ་ཡིན།
