འདི་ནི་པེ་ཅིང་པེན་ཁྲི་ཐོག་སྟེང་གི་འོད་ཤུགས་ཡིན་པ། པར་ཚང་མ་པེན་ཁྲི་ཚོགས་པས་མཁོ་འདོན་བྱས།
འདི་ནི་ཧྥུའུ་ཅན་པེན་ཁྲི་བཟོ་གྲྭར་བཟོ་པས་ལས་ཀ་བྱེད་བཞིན་པ།
འདི་ནི་སྒྲིག་སྦྱོར་བྱས་ཟིན་པའི་པེན་ཁྲི་ཚོགས་པའི་ཚོང་དོན་རླངས་འཁོར་ཆུང་གྲས་ཁྲོམ་རར་འདོན་པའི་གྲ་སྒྲིག་བྱེད་པ།
ཉེ་ཆར། པེན་ཁྲི་ཚོགས་པའི་ལས་འཛིན་ལྷན་ཚོགས་ཀྱི་ཀྲུའུ་ཞི་ཁང་ལིན་སུང་གིས་འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་བྱེད་སྐབས“ཀྲུང་གོ་ནི་གོ་ལ་ཧྲིལ་པོའི་གསོན་ཤུགས་ཆེ་ཤོས་ཀྱི་ཁྲོམ་རའི་གྲས་ཤིག་ཡིན་ལ་པེན་ཁྲིའི་གོ་ལ་ཧྲིལ་པོའི་འཐབ་ཇུས་ཀྱི་ཀ་རྟེན་གལ་ཆེན་ཞིག་ཀྱང་ཡིན་ཞིང་། ཀྲུང་གོར་པེན་ཁྲི་ཚོགས་པར་དགའ་འོས་པའི་གྲུབ་འབྲས་ཐོབ་ཡོད། ང་ཚོས་ཐོག་མཐའ་བར་གསུམ་དུ་ཀྲུང་གོར་ཡུན་རིང་མ་འཇོག་བྱས་ནས་ཀྲུང་གོའི་རླངས་འཁོར་ཐོན་ལས་རིམ་སྤོར་ལ་རམ་འདེགས་བྱེད་བཞིན་ཡོད”ཅེས་བརྗོད།
“ཀྲུང་གོའི་རླངས་འཁོར་བཟོ་ལས་དབྱར་མཚོ་རྒྱས་པ་ལྟར་འཕེལ་རྒྱས་སོང་བའི་དཔང་པོ་བྱས་པ་མ་ཟད་དེའི་ནང་ཞུགས་ཡོད”
པེ་ཅིང་དབང་ཅིང་དུ་གནས་པའི་པེན་ཁྲི་ཚོགས་པའི་ཐོག་ཁང་གི་སྒེའུ་ཁུང་ཧ་ཅང་གཙང་ཞིང་གསལ་བ་ཞིག་ཡོད།
ཁང་ལིན་སུང་གིས“ཀྲུང་གོའི་འཕེལ་རྒྱས་ཀྱི་མཐོ་རིམ་གླེང་སྟེགས་ལ་ཞུགས་པ་དང་། འཇར་མན་གྱི་ཙུང་ལི་ཧྲོའར་ཚེ་དང་མཉམ་དུ་ཀྲུང་གོར་འཚམས་འདྲིར་ཡོང་བ། པེ་ཅིང་རྒྱལ་སྤྱིའི་རླངས་འཁོར་འགྲེམས་སྟོན་ནང་ཞུགས་པ། ཀྲུང་གོའི་མཉམ་ལས་རོགས་ཟླ་དང་མཉམ་དུ་ཀྲུང་གོར་མ་འཇོག་འཕར་མ་བྱ་རྒྱུ་ཁྱབ་བསྒྲགས་སོགས་བྱས་ཡོད”ཅེས་གསར་འགོད་པར་བརྗོད། ད་ལོ་ཁོང་གིས་ཀྲུང་གོར་འཚམས་འདྲི་ཐེངས་བཞི་བྱས་ཤིང་། ཁོང་གིས“ཀྲུང་གོ་ནི་ང་ཚོའི་ཁྲོམ་ར་གལ་ཆེ་ཤོས་ཀྱི་གྲས་ཤིག་ཡིན་པ་སྨོས་མེད་རེད”ཅེས་བརྗོད།
ལོ་138ཀྱི་ལོ་རྒྱུས་ལྡན་པའི་རླངས་འཁོར་ཁེ་ལས་ཤིག་ཡིན་པའི་ངོས་ནས་པེན་ཁྲིས་2001ལོར་ཀྲུང་གོར་རང་ས་ཅན་གྱི་འཕེལ་རྒྱས་གཏོང་འགོ་ཚུགས་པ་དང་ལོ་དེར་མེ་སའེ་ཏེ་སི—པེན་ཁྲི(ཀྲུང་གོ)མ་འཇོག་ཚད་ཡོད་ཀུང་སི་པེ་ཅིང་དུ་དངོས་སུ་བཙུགས། 2003ལོར་པེན་ཁྲི་ཚོགས་པ་དང་པེ་ཅིང་རླངས་འཁོར་ཚོགས་པའི་དབར་ཡུན་རིང་གི་འཐབ་ཇུས་མཉམ་ལས་རོགས་ཟླའི་འབྲེལ་བ་བཙུགས་པ། 2005ལོར་པེན་ཁྲི་ཚོགས་པས་ཀྲུང་གོར་རང་ས་ཅན་གྱི་ཞིབ་འཇུག་གསར་སྤེལ་ལག་བསྟར་བྱེད་འགོ་བཙུགས་ནས་སྲིད་འཛིན་རིམ་པའི་འཇིབ་ཆུང་Ｅརིམ་པའི་རླངས་འཁོར་ཀྲུང་གོར་ཐོག་མར་རང་ས་ཅན་གྱི་ཐོན་སྐྱེད་ལེགས་གྲུབ་བྱུང་བ་དང་འབྲེལ་འབོར་མང་པོ་ཐོན་སྐྱེད་བྱེད་འགོ་ཚུགས་ཡོད་པ་རེད།
“ང་ཚོས་ཀྲུང་གོའི་རླངས་འཁོར་བཟོ་ལས་དབྱར་མཚོ་རྒྱས་པ་ལྟར་འཕེལ་རྒྱས་སོང་བའི་དཔང་པོ་བྱས་པ་མ་ཟད་དེའི་ནང་ཞུགས་ཡོད། ཀྲུང་གོར་པེན་ཁྲི་ཚོགས་པར་གྲུབ་འབྲས་ཧ་ཅང་ཆེན་པོ་ཐོབ་ཡོད་དེ། ཕྱིར་ཚོང་དང་ཐོན་སྐྱེད་ཙམ་མ་ཟད། ཞིབ་འཇུག་གསར་སྤེལ་དང་། མཁོ་སྤྲོད་འཁོར་འབྲེལ་གྱི་རོགས་ཟླ། ཚན་རྩལ་མཉམ་ལས་སོགས་ཀྱི་ཐད་ལའང་གྲུབ་འབྲས་ཆེན་པོ་ཐོབ་ཡོད”ཅེས་ཁང་ལིན་སུང་གིས་ངོ་སྤྲོད་བྱས། ཁོང་གིས།2014ལོ་ནས་2023ལོའི་བར་པེན་ཁྲི་རླངས་འཁོར་ཚོགས་པས་མཉམ་ལས་རོགས་ཟླ་དང་ལག་གདང་སྦྲེལ་ནས་ཀྲུང་གོར་མི་དམངས་ཤོག་སྒོར་དུང་ཕྱུར་1000ལྷག་ཙམ་མ་འཇོག་བྱས་ཡོད་ཅེས་བརྗོད་པ་རེད།
“‘ཀྲུང་གོའི་མྱུར་ཚད’ལ་བརྟེན་ནས་རང་ས་ཅན་གྱི་གསར་གཏོད་བྱེད་ཤུགས་ཆེ་རུ་བཏང་སྟེ་གོ་ལ་ཧྲིལ་པོའི་གསར་གཏོད་ལ་སྣེ་ཁྲིད་བྱེད་པ”
ཧྲང་ཧའེ་གྲོང་ཁྱེར་ཕུའུ་ཏུང་ཁུལ་གསར་ཁེ་ཆའོ་ལམ་དུ་གནས་ཤིང་། ད་ལོའི་ཟླ་4པར་སྤྱོད་འགོ་ཚུགས་མ་ཐག་པའི་པེན་ཁྲིའི་ཧྲང་ཧའེ་ཞིབ་འཇུག་གསར་སྤེལ་ལྟེ་གནས་ཀྱི་ཐོག་ཁང་གསར་པའི་ནང་སྐྱོད་སྐབས། དེར་གློག་སྒུལ་ཕྱིར་སྐྱོད་དང་། རིག་ནུས་དྲ་སྦྲེལ། རང་འགུལ་འཁོར་གཏོང་སོགས་ཁྱབ་ཁོངས་ཀྱི་མཉེན་ཆས་དང་མཁྲེགས་ཆས་གསར་སྤེལ་དང་རྣམ་པ་ཧྲིལ་པོའི་འདྲ་བཟོའི་ལས་དོན་ཚ་ཚ་འུར་འུར་ངང་སྤེལ་བཞིན་འདུག
2021ལོར་པེན་ཁྲི་ཀྲུང་གོ་ཞིབ་འཇུག་གསར་སྤེལ་ལག་རྩལ་ལྟེ་གནས་པེ་ཅིང་དུ་སྤྱོད་འགོ་ཚུགས་པ་དང་། 2022ལོར་པེན་ཁྲི་ཧྲང་ཧའེ་ཞིབ་འཇུག་གསར་སྤེལ་ལྟེ་གནས་བཙུགས་པ། 2023ལོར་པེན་ཁྲི(ཧྲང་ཧའེ)གྲངས་འཛིན་ལག་རྩལ་ཚད་ཡོད་ཀུང་སི་བཙུགས་པ། 2024ལོར་པེན་ཁྲི་ཧྲང་ཧའེ་ཞིབ་འཇུག་གསར་སྤེལ་ལྟེ་གནས་ཀྱི་ཐོག་ཁང་གསར་པ་བསྐྲུན་ནས་སྤྱོད་འགོ་ཚུགས་པ་རེད།
འདས་ཟིན་པའི་ལོ་5ཡི་ནང་པེན་ཁྲི་ཚོགས་པས་ཀྲུང་གོར་ཞིབ་འཇུག་གསར་སྤེལ་ཐད་མ་དངུལ་བསྡོམས་མི་དམངས་ཤོག་སྒོར་དུང་ཕྱུར་105བཏང་བ་དང་ས་གནས་དེ་གའི་ཞིབ་འཇུག་གསར་སྤེལ་ཚོགས་པའི་མི་གྲངས་2000ལས་བརྒལ་ཡོད་པ་རེད། ཐང་ཧྲི་ཁའེ་ཡིས“ང་ཚོས་འཇར་མན་ཕུད་པའི་ཀྲུང་གོར་ཁྱབ་ཁོངས་རྒྱ་ཆེ་ཤོས་ཀྱི་ཞིབ་འཇུག་གསར་སྤེལ་ཚོགས་པ་བཙུགས་ཡོད། དེའི་ནང་ཀྲུང་གོའི་གྲངས་འཛིན་ཅན་གྱི་ཞིབ་འཇུག་གསར་སྤེལ་ཚོགས་པ་ནི་གོ་ལ་ཧྲིལ་པོའི་འཕེལ་རྒྱས་འགྲོ་མགྱོགས་ཤོས་ཀྱི་ཚོགས་པ་ཞིག་ཡིན”ཞེས་བརྗོད།
“ཀྲུང་གོའི་རོགས་ཟླ་དང་ལག་གདང་སྦྲེལ་ནས་ཡུན་རིང་འཕེལ་རྒྱས་ཀྱི་གོ་སྐབས་མཉམ་སྤྱོད་བྱེད་པ”
ད་ལོའི་ཟླ་9པར་པེན་ཁྲི་ཚོགས་པས་ཀྲུང་གོའི་མཉམ་ལས་རོགས་ཟླ་དང་མཉམ་དུ་ཁྱིམ་སྤྱོད་རླངས་འཁོར་དང་ཚོང་དོན་རླངས་འཁོར་ཆུང་གྲས་ཀྱི་ལས་སྒོར་མ་དངུལ་མི་དམངས་ཤོག་སྒོར་དུང་ཕྱུར་100དང་མི་དམངས་ཤོག་སྒོར་དུང་ཕྱུར་40ལྷག་ཙམ་སོ་སོར་བཏང་ནས་ཀྲུང་གོའི“རིག་ནུས་བཟོ་སྐྲུན”ཐོན་རྫས་ཀྱི་གྲུབ་ཆ་སྔར་བས་ཕུན་སུམ་ཚོགས་སུ་གཏོང་རྩིས་ཡོད་ཅེས་ཁྱབ་བསྒྲགས་བྱས་པ་རེད།
གོ་ལ་ཧྲིལ་པོའི་རླངས་འཁོར་ཁྲོམ་ར་དང་ནུས་རྒྱུ་གསར་པའི་རླངས་འཁོར་ཁྲོམ་ར་ཆེ་ཤོས་ཡིན་པའི་ཀྲུང་གོའི་རླངས་འཁོར་ཐོན་སྐྱེད་དང་ཕྱིར་ཚོང་བྱེད་ཚད་ལོ་15བསྟུད་མར་འཛམ་གླིང་གི་ཨང་དང་པོ་ཡིན་པ་རེད། ཁང་ལིན་སུང་གིས“ཀྲུང་གོ་ནི་གོ་ལ་ཧྲིལ་པོའི་རླངས་འཁོར་ཁྲོམ་ར་ཆེ་ཤོས་ཡིན་པ་མ་ཟད། གསོན་ཤུགས་ཆེ་ཤོས་ཀྱི་ཁྲོམ་རའི་གྲས་ཤིག་ཀྱང་ཡིན་ལ། ལྷག་པར་དུ་གསར་གཏོད་མྱུར་ཚད་དང་། ནུས་རྒྱུ་གསར་པའི་རླངས་འཁོར། རིག་ནུས་ཅན་གྱི་ཕྱོགས་སྒྱུར་བཅས་ཀྱི་ཐད་ཀྲུང་གོས་གོ་ལ་ཧྲིལ་པོའི་རླངས་འཁོར་ལས་རིགས་འཕེལ་རྒྱས་མྱུར་པོ་འགྲོ་བར་སྣེ་ཁྲིད་བྱེད་བཞིན་ཡོད་པས། ཀྲུང་གོར་མ་འཇོག་བྱེད་པ་ནི་འབྱུང་འགྱུར་ལ་མ་འཇོག་བྱས་པ་ཞིག་ཡིན་པ་དང་དེ་ནི་ང་ཚོའི་རང་མོས་ཀྱི་གདམ་ག་ཞིག་ཡིན”ཞེས་བརྗོད།
འཇར་མན་ཀྲུང་དབྱང་དངུལ་ཁང་གི་བསྡོམས་རྩིས་གྲངས་གཞི་ལས་མངོན་པར། 2024ལོའི་ལོ་སྟོད་དུ་འཇར་མན་གྱིས་ཀྲུང་གོར་མ་འཇོག་བྱེད་ཚད་ལོ་རྒྱུས་ཀྱི་ཟིན་ཐོ་གསར་པ་བཏོད་ནས་ཡོ་སྒོར་དུང་ཕྱུར་73ཟིན་ཡོད། པེན་ཁྲི་ཚོགས་པའི་ལྟ་བཤེར་ཚོགས་པའི་ཀྲུའུ་ཞི་པོ་མུའུ་ལེས། ཡོ་ཀྲུང་དང་འཇར་ཀྲུང་ཕྱོགས་གཉིས་པོར་ཡུན་རིང་མཉམ་ལས་ཀྱི་སྲོལ་རྒྱུན་བཟང་པོ་ཡོད། ཀྲུང་གོའི་ཐོན་ལས་ཀྱི་ལེགས་ཆ་དང་འཕེལ་རྒྱས་ཀྱི་མྱུར་ཚད་ཀྱིས་པེན་ཁྲིས་ཀྲུང་གོའི་ཁྲོམ་ར་རྒྱ་སྐྱེད་གཏོང་བར་རྒྱབ་སྐྱོར་གལ་ཆེན་བྱས་པ་མ་ཟད། གོ་ལ་ཧྲིལ་པོའི་གཉེར་སྐྱོང་ལ་གོ་སྐབས་གལ་ཆེན་ཡང་སྦྱིན་ཡོད། འཛམ་གླིང་ལ་ཀྲུང་གོ་མཁོ་བ་དང་ཀྲུང་གོར་ཡང་འཛམ་གླིང་མཁོ་པོ་ཡོད་ཅེས་བརྗོད།
