འདི་ལོའི་ཟླ་དགུ་པར་ཀྲུང་དབྱང་མི་རིགས་ལས་དོན་ཚོགས་འདུ་པེ་ཅིང་དུ་འཚོགས་ཤིང་། ཡུན་རིང་མ་སོང་བར་ཀྲུང་གུང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་སླར་ཡང《དུས་བབ་གསར་པའི་འོག་མི་རིགས་ལས་དོན་ལ་ཤུགས་སྣོན་དང་ལེགས་སུ་གཏོང་རྒྱུའི་སྐོར་གྱི་བསམ་འཆར》ཆེད་མངགས་པར་འགྲེམས་བྱས་པ་རེད། ཉེ་དུས་གསར་འགོད་པས་ཀྲུང་དབྱང་གི་མི་རིགས་ལས་དོན་ཚོགས་འདུའི་དགོངས་དོན་ལག་བསྟར་དོན་འཁྱོལ་དང་། དུས་བབ་གསར་པའི་འོག་མི་རིགས་ལས་དོན་ལ་ཤུགས་སྣོན་དང་ལེགས་སུ་གཏོང་བའི་འབྲེལ་ཡོད་གནད་དོན་ལ་དམིགས་ནས་རྒྱལ་ཁབ་མི་རིགས་ལས་དོན་ཨུ་ལྷན་གྱི་ཀྲུའུ་རེན་ཝང་ཀྲེང་ཝུའེ་ལ་བཅར་འདྲི་བྱས་པ་ཡིན།
དྲི་བ། ཀྲུང་དབྱང་མི་རིགས་ལས་དོན་ཚོགས་འདུ་འཚོགས་ནས་ཟླ་བ་གསུམ་ཕྱིན་པ་དང་། སྤྱི་ཚོགས་ལས་རིགས་ཁག་གི་ཚུར་སྣང་ལན་ཆ་བཟང་བ་དང་གདེང་འཇོག་ཧ་ཅང་མཐོ་པོ་ཡོད་པས་ཚོགས་འདུར་རིགས་པའི་གཞུང་ལུགས་ཀྱི་གྲུབ་འབྲས་གལ་ཆེན་གང་དང་གང་ཐོབ་ཡོད་དམ།
ལན། ད་ཐེངས་ཀྱི་ཀྲུང་དབྱང་མི་རིགས་ལས་དོན་ཚོགས་འདུའི་ཐོག་དུས་སྐབས་ཤིག་རིང་གི་མི་རིགས་དང་འབྲེལ་བ་ཡོད་པའི་གནད་དོན་ཐད་ཀྱི་རབ་རིབ་ཀྱི་ངོས་འཛིན་དང་ནོར་འཁྲུལ་གྱི་ལྟ་སྟངས་ཁག་གཅིག་ཞུན་བརྡར་བཅད་པ་དང་། མིག་སྔ་དང་སླད་ཕྱིན་དུས་སྐབས་ཤིག་རིང་གི་མི་རིགས་ལས་དོན་གྱི་སྲིད་དོན་གལ་ཆེན་གྱི་བྱེད་ཕྱོགས་ཁ་གསལ་བྱུང་ཡོད། ལྷག་པར་དུ་སྤྱི་ཁྱབ་ཧྲུའུ་ཅི་ཞིས་ཅིན་ཕིང་གི་གསུང་བཤད་གལ་ཆེན་ནང་ཀྲུང་གོ་དང་ཕྱི་རྒྱལ་དང་གནའ་དེང་ལ་ཁྱབ་པའི་གཟིགས་རྒྱང་ཐོག་ནས་གནད་དོན་ལ་ཐད་ཀར་དམིགས་པ་དང་རྩ་བའི་ཐོག་ནས་སྒྱུར་བཅོས་བྱེད་པའི་རིགས་པའི་གཞུང་ལུགས་ཀྱི་སྙིང་སྟོབས་དང་། སྔ་འཛིན་ཕྱི་གཏོད་དང་རྒྱུན་འཛིན་གསར་གཏོད་ཀྱི་ཆབ་སྲིད་ཀྱི་བློ་གྲོས་ཐོག་ནས་དགོངས་པ་གསར་པ་དང་། ཆོད་སྡོམ་གསར་པ། ངོས་འཛིན་གསར་པ་བཅས་རབ་དང་རིམ་པ་བཏོན་ཁར་ཇུས་ཐག་གསར་པ་བཅད་པ་དང་། བཀོད་སྒྲིག་གསར་པ་བྱས་པ། བླང་བྱ་གསར་པ་བཏོན་ཡོད། དེ་དག་མདོར་བསྡུས་ན་གཙོ་བོ"ཐེངས་དང་པོ་དགུའི"ཐོག་ནས་མངོན་གྱི་ཡོད་པ་སྟེ། རང་རྒྱལ་གཅིག་གྱུར་གྱི་མི་རིགས་མང་བའི་རྒྱལ་ཁབ་ཀྱི་གཞི་རྩའི་གནས་ཚུལ་གཅིག་སྡུད་ཐོག་རྒྱས་བཤད་ཐེངས་དང་པོ་གནང་བ་དང་། ཀྲུང་གོའི་ཁྱད་ཆོས་ཀྱི་མི་རིགས་གནད་དོན་ཐག་གཅོད་བྱེད་པའི་ཡང་དག་པའི་ལམ་བུའི་ཚན་རིག་དང་མཐུན་པའི་ནང་དོན་ལ་གཏིང་ཟབ་པའི་གསལ་བཤད་ཐེངས་དང་པོ་གནང་བ། མི་རིགས་ལས་དོན་གྱི་དུས་མཚམས་རང་བཞིན་གྱི་ཁྱད་ཆོས་གསར་པར་གཏིང་ཟབ་པའི་གསལ་བཤད་ཐེངས་དང་པོ་གནང་བ། ཤེས་དཔལ་དང་རང་རྟོགས་ཀྱི་མཐོ་ཚད་ཐོག་ནས་མི་རིགས་ས་ཁོངས་རང་སྐྱོང་ལམ་ལུགས་རྒྱས་བཤད་ཐེངས་དང་པོ་གནང་བ། དུས་སྐབས་གསར་པར་མི་རིགས་མཐུན་སྒྲིལ་ལས་དོན་ལ་ཤུགས་སྣོན་རྒྱག་པའི་བསམ་ཕྱོགས་གསར་པ་ཆ་ལག་ཚང་བའི་ངང་ཐེངས་དང་པོ་བཏོན་གནང་བ། མི་རིགས་ས་ཁུལ་འབྱོར་འབྲིང་སྤྱི་ཚོགས་སྒོ་ཀུན་ནས་སྐྲུན་ཐུབ་པའི་སྤྱིའི་བསམ་ཕྱོགས་དང་ལས་དོན་གྱི་གཙོ་གནད་གཏིང་ཟབ་པའི་ངང་གསལ་བཤད་ཐེངས་དང་པོ་གནང་བ། མི་རིགས་ཁག་ཐུན་མོང་ལ་དབང་བའི་བསམ་པའི་ཁྱིམ་གཞིས་སྐྲུན་པའི་འཐབ་ཇུས་ཀྱི་ལས་འགན་ཐེངས་དང་པོ་བཏོན་པ། གྲོང་ཁྱེར་གྱི་མི་རིགས་ལས་དོན་ལ་གཅིག་སྡུད་ཐོག་རྒྱས་བཤད་ཐེངས་དང་པོ་གནང་བ། མི་རིགས་ས་ཁུལ་གྱི་ལས་བྱེད་པ་བཟང་པོའི"དམིགས་བསལ་གསུམ"གྱི་ཚད་གཞི་གསར་པ་ཐེངས་དང་པོ་བཏོན་པ་བཅས་རེད། མདོར་བསྡུས་ནས་བཤད་ན། གཅིག་གྱུར་དང་མི་རིགས་མང་བའི་ང་ཚོའི་རྒྱལ་ཁབ་ཆེན་པོས"ཇི་ལྟར་བྱས་ཏེ་མི་རིགས་གནད་དོན་ལ་ཡང་དག་པའི་ལྟ་སྟངས་འཛིན་དགོས་པ་དང་། ཇི་ལྟར་བྱས་ཏེ་མི་རིགས་གནད་དོན་གནད་ལ་འཁེལ་བའི་སྒོ་ནས་ཐག་གཅོད་བྱེད་དགོས་པའི"གནད་དོན་གལ་ཆེན་དེར་གཅིག་སྡུད་ཐོག་ལན་བཏབ་པ་དང་། མར་ཁེ་སི་རིང་ལུགས་ཀྱི་མི་རིགས་རིགས་པའི་གཞུང་ལུགས་ཀྲུང་གོ་ཅན་གྱི་ཡུལ་ཁམས་གསར་པ་བཏོད་ཡོད།
དྲི་བ། "རྒྱུན་རྣམ་གསར་པའི"གནད་དོན་ལ་ཕྱོགས་ཁག་གིས་ཉིན་རེ་བཞིན་དོ་ཁུར་བྱེད་བཞིན་ཡོད། ཁྱེད་ཀྱིས་མིག་སྔའི་མི་རིགས་ལས་དོན་གྱི"རྒྱུན་རྣམ་གསར་པར"ངོས་འཛིན་ཇི་འདྲ་གནང་གི་ཡོད་དམ། དུས་བབ་འགྱུར་ལྡོག་འགྲོ་བ་དང་བསྟུན་ནས་ཇི་ལྟར་བྱས་ཏེ་མི་རིགས་ལས་དོན་གྱི་གསར་གཏོད་དང་འཕེལ་རྒྱས་ལ་སྐུལ་འདེད་གཏོང་དགོས་སམ།
ལན། རང་ཉིད་ཀྱིས་མི་རིགས་ལས་དོན་གྱི"རྒྱུན་རྣམ་གསར་པ"ནི་ཀྲུང་དབྱང་མི་རིགས་ལས་དོན་ཚོགས་འདུའི་ཐོག་སྤྱི་ཁྱབ་ཧྲུའུ་ཅིས་གསུངས་པའི"མཉམ་གནས་ལྔ"ལ་ངོས་འཛིན་བྱེད་ཀྱི་ཡོད་པ་སྟེ། མི་རིགས་ལས་དོན་གྱི་ཁོར་ཡུག་དང་ཆ་རྐྱེན་ཐོག་ནས་བལྟས་ཚེ། དེ་ནི"སྒྱུར་བཅོས་སྒོ་དབྱེ་དང་སྤྱི་ཚོགས་རིང་ལུགས་ཀྱི་ཁྲོམ་རའི་དཔལ་འབྱོར་ལས་བྱུང་བའི་གོ་སྐབས་དང་འགྲན་སློང་མཉམ་གནས"ཡིན་པ་དང་། དཔལ་འབྱོར་འཕེལ་རྒྱས་ཀྱི་ཆུ་ཚད་ཐོག་ནས་བལྟས་ཚེ། དེ་ནི"མི་རིགས་ས་ཁུལ་གྱི་དཔལ་འབྱོར་མགྱོགས་མྱུར་འཕེལ་རྒྱས་འགྲོ་བའི་རྣམ་པ་དང་འཕེལ་རྒྱས་ཀྱི་ཆུ་ཚད་དམའ་པོ་མཉམ་གནས"ཡིན་པ། སྤྱི་ཚོགས་བྱ་གཞག་ཡར་རྒྱས་འགྲོ་བའི་ཐོག་ནས་བལྟས་ཚེ། དེ་ནི"རྒྱལ་ཁབ་ཀྱིས་མི་རིགས་ས་ཁུལ་ལ་རྒྱབ་སྐྱོར་བྱེད་ཤུགས་རྒྱུན་མཐུད་ངང་ཆེ་རུ་བཏང་བ་དང་མི་རིགས་ས་ཁུལ་གྱི་གཞི་རྩའི་སྤྱི་པའི་ཞབས་ཞུའི་ནུས་པ་འཛུགས་སྐྱོང་སྔར་བཞིན་ཉམས་ཞན་མཉམ་གནས"ཡིན་པ། མི་རིགས་ཁག་ཕན་ཚུན་དབར་གྱི་འབྲེལ་བའི་ཐོག་ནས་བལྟས་ཚེ་དེ་ནི"མི་རིགས་ཁག་འགྲོ་འོང་སྤེལ་རེས་དང་མཉམ་འདྲེས་ཀྱི་རྣམ་པ་ཟབ་ཏུ་འགྲོ་བ་དང་མི་རིགས་ཀྱི་རྒྱུ་རྐྱེན་དང་འབྲེལ་བ་ཡོད་པའི་འགལ་ཟླ་དང་རྩོད་གླེང་མང་དུ་འགྲོ་བ་མཉམ་གནས"ཡིན་པ། མཐུན་སྒྲིལ་དང་གཅིག་གྱུར་སྲུང་སྐྱོང་བྱེད་པའི་ཐོག་ནས་བལྟས་ཚེ་དེ་ནི"མི་རིགས་ཁ་ཕྲལ་དང་། ཆོས་ལུགས་ཐལ་སྐྱོད། གཏུམ་སྤྱོད་འཇིགས་སྐུལ་བཅས་ལ་ངོ་རྒོལ་བྱེད་པའི་འཐབ་རྩོད་ལ་གྲུབ་འབྲས་མངོན་གསལ་དོད་པོ་ཐོབ་པ་དང་ས་ཁུལ་ཆ་ཤས་སུ་གཏུམ་སྤྱོད་འཇིགས་སྐུལ་གྱི་བྱེད་སྤྱོད་མང་པོ་ཐོན་པ་མཉམ་གནས"ཡིན་པ་བཅས་རེད། "མཉམ་གནས་ལྔ"ཡི་ནང་དུས་བབ་གསར་པའི་འོག་གི་མི་རིགས་ལས་དོན་གྱི་དུས་མཚམས་རང་བཞིན་གྱི་ཁྱད་ཆོས་གནད་ལ་འཕིགས་པའི་སྒོ་ནས་རགས་བསྡུས་བྱས་པ་དང་ད་ཆའི་དུས་མཚམས་ཀྱི་རང་རྒྱལ་མི་རིགས་ལས་དོན་གྱི་ལོ་རྒྱུས་ཀྱི་ཁ་ཕྱོགས་གནད་ལ་འཁེལ་བའི་སྒོ་ནས་གཏན་འཁེལ་བྱས་ཡོད། "མཉམ་གནས་ལྔ"ཡི"རྒྱུན་རྣམ་གསར་པ"སྟངས་འཛིན་ཐུབ་ཚེ། མི་རིགས་ལས་དོན་གྱི"དུས་བབ་ཆེ་མོ"སྟངས་འཛིན་ཐུབ་ཡོད། རྒྱུན་རྣམ་གསར་པའི་འོག་མི་རིགས་ལས་དོན་དེ་སྔ་དང་བསྡུར་ཚེ། འཕྲད་པའི་འགྲན་སློང་དེ་བས་མང་བ་དང་ཕྲག་ཐོག་གི་འགན་འཁྲི་དེ་བས་ལྕི་རུ་ཕྱིན་ཡོད་ལ་ལས་ཀའི་བླང་བྱ་ཡང་དེ་བས་མཐོ་རུ་ཕྱིན་ཡོད། བཅོས་སྐྱོང་སྐབས་ཟིང་ཆ་བརྗེད་མི་རུང་། བདེ་སྡོད་སྐབས་ཉེན་བསམ་བྱེད་དགོས། རྒྱུན་རྣམ་གསར་པར་ཕྱོགས་ནས་ང་ཚོས་ཡིད་ཆེས་བརྟན་དུ་གཏོང་དགོས་ལ་ཉེན་ཁའི་འདུ་ཤེས་ཟབ་ཏུ་བཏང་སྟེ་ལྟ་བ་མཐུན་པ་དང་། ངོས་འཛིན་གནད་ལ་འཁེལ་བ། བྱ་ཐབས་དགོས་མཁོ་དང་མཐུན་པ། ལས་དོན་ནུས་པ་ཐོན་པ་བཅས་བྱེད་ཐུབ་པ་བྱས་ནས་མི་རིགས་ལས་དོན་གྱི་གསར་གཏོད་དང་འཕེལ་རྒྱས་ལ་སྐུལ་འདེད་བཏང་ཐོག་མི་རིགས་ཁག་གི་མང་ཚོགས་ཀྱིས་རླབས་ཆེན་མེས་རྒྱལ་དང་། ཀྲུང་ཧྭ་མི་རིགས། ཀྲུང་ཧྭ་ཡི་རིག་གནས། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་འགྲོ་ལམ་བཅས་ལ་འཛིན་པའི་ངོས་འཛིན་རྒྱུན་ཆད་མེད་པར་ཟབ་ཏུ་གཏོང་དགོས། མིག་སྔར་ཀྲུང་དབྱང་གི་བཀོད་སྒྲིག་ལྟར་ཁྲིམས་སྐྱོང་འཛུགས་སྐྱོང་ལ་ཤུགས་སྣོན་རྒྱག་རྒྱུ་དེ་མི་རིགས་ལས་དོན་གྱི་མངོན་གསལ་དོད་པའི་གནས་བབ་ཐོག་བཞག་ནས་ཁྲིམས་སྐྱོང་གི་དགོངས་དོན་སྤྱད་དེ་ཁྲིད་སྟོན་དང་། ཁྲིམས་སྐྱོང་གི་བསམ་གཞིག་སྤྱད་དེ་ཇུས་འགོད། ཁྲིམས་སྐྱོང་གི་བྱེད་སྟངས་སྤྱད་དེ་ལས་དོན་ཁག་ལག་བསྟར་དང་སྐུལ་འདེད་གཏོང་བ་བཅས་བྱས་ཏེ་མི་རིགས་ལས་དོན་བཅོས་སྐྱོང་གི་ཁྲིམས་སྐྱོང་ཅན་ལ་སྐུལ་འདེད་ཤུགས་ཆེན་གཏོང་དགོས།
དྲི་བ། འཕེལ་རྒྱས་ནི་མི་རིགས་ས་ཁུལ་གྱི་གནད་དོན་སྣ་ཚོགས་ཐག་གཅོད་བྱེད་པའི་ལྡེ་མིག་ལྟ་བུ་ཡིན་ཞེས་པ་དེ་ནི་ཀྲུང་དབྱང་མི་རིགས་ལས་དོན་ཚོགས་འདུའི་ཐོག་གཏན་འབེབས་བྱས་པའི་ཆོད་སྡོམ་དང་བཀོད་སྒྲིག་གལ་ཆེན་ཞིག་ཡིན་པས་ཇི་ལྟར་བྱས་ཏེ་འཕེལ་རྒྱས་ལ་སྔར་བས་སྐུལ་འདེད་བཏང་ནས་མི་རིགས་ས་ཁུལ་དུས་བཀག་བཞིན་འབྱོར་འབྲིང་སྤྱི་ཚོགས་སྒོ་ཀུན་ནས་བསྐྲུན་ཐུབ་པའི་འགན་ལེན་བྱེད་དགོས་སམ།
ལན། འབྱོར་འབྲིང་སྤྱི་ཚོགས་སྒོ་ཀུན་ནས་བསྐྲུན་ཐུབ་པའི་རྒྱང་སྐྱོད་ལམ་བུའི་ཐོག་སྤུན་ཟླའི་མི་རིགས་གཅིག་ཀྱང་རྗེས་སུ་མ་ལུས་པ་དང་མི་རིགས་ས་ཁུལ་གཅིག་ཀྱང་རྗེས་ལུས་མ་ཐེབས་པ་བྱ་རྒྱུ་ནི་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་བརྗིད་ཆེའི་ཁས་ལེན་ཡིན་ཞིང་། མི་རིགས་ས་ཁུལ་དུས་བཀག་བཞིན་འབྱོར་འབྲིང་སྤྱི་ཚོགས་སྒོ་ཀུན་ནས་བསྐྲུན་ཐུབ་རྒྱུ་འགན་ལེན་བྱེད་པའི་སྤྱི་ཡོངས་ཀྱི་བྱེད་ཕྱོགས་ནི་སྤྱི་ཁྱབ་ཧྲུའུ་ཅི་ཞིས་ཅིན་ཕིང་གིས་བཏོན་གནང་བའི"ཕྱོགས་བཞི་དང་གཙོ་གནད་བརྒྱད"ལ་གཞིགས་དགོས་པ་སྟེ། དམངས་འཚོར་དམ་པོར་དམིགས་པ་དང་འཕེལ་རྒྱས་ལ་དམ་འཛིན་བྱས་ཏེ་ལས་ཞུགས་དང་སློབ་གསོར་གཙོ་གནད་ཐོག་དམ་འཛིན་ཡག་པོ་བྱེད་དགོས་པ་དང་། ཐོན་ཁུངས་ལེགས་ཆ་འདོན་སྤེལ་བྱས་ཏེ་ཡུལ་དེར་ཕན་འདོགས་པ་དང་སྣོད་བཅུད་སྲུང་སྐྱོང་བྱ་རྒྱུར་གཙོ་གནད་ཐོག་དམ་འཛིན་ཡག་པོ་བྱེད་དགོས་པ། དབུལ་སྐྱོར་གསར་སྤེལ་ཡག་པོ་བྱས་ནས་དམིགས་བསལ་དཀའ་ངལ་ཡོད་པའི་ས་ཁུལ་དང་ཚོགས་སྤྱི་དབུལ་སྒྲོལ་ཐུབ་རྒྱུར་གཙོ་གནད་ཐོག་དམ་འཛིན་ཡག་པོ་བྱེད་དགོས་པ། མཐའ་མཚམས་འཛུགས་སྐྲུན་ལ་ཤུགས་སྣོན་བརྒྱབ་སྟེ་རྨང་གཞིའི་སྒྲིག་བཀོད་དང་ཕྱི་ཕྱོགས་ལ་སྒོ་དབྱེ་བྱ་རྒྱུར་གཙོ་གནད་ཐོག་དམ་འཛིན་ཡག་པོ་བྱེད་དགོས་པ་བཅས་རེད། བརྒྱུད་རིམ་དེའི་ནང་ཀྲུང་དབྱང་དང་། དར་རྒྱས་ཆེ་བའི་ས་ཁུལ། མི་རིགས་ས་ཁུལ་བཅས་ཀྱི"ཧུར་བརྩོན་རང་བཞིན་གསུམ"འདོན་སྤེལ་གང་ལེགས་བྱས་ནས་སྲིད་ཇུས་ཀྱི་སྒུལ་ཤུགས་དང་ནང་ངོས་ཀྱི་མི་མངོན་པའི་སྟོབས་ཤུགས་ཟུང་འབྲེལ་དམ་ཟབ་བྱེད་དགོས། ཀྲུང་དབྱང་གིས་མཐའ་མཚམས་ས་ཁུལ་དང་། ས་ཁུལ་དབུལ་པོ། སྣོད་བཅུད་སྲུང་སྐྱོང་ཁུལ་བཅས་ལ་དབྱེ་བ་ཡོད་པའི་ས་ཁོངས་སྲིད་ཇུས་ལག་བསྟར་དང་སྤོ་སྒྱུར་གཏོང་སྤྲོད་དང་ཁ་གཏད་རོགས་སྐྱོར་གྱི་སྒྲིག་སྲོལ་དང་ལམ་སྲོལ་ལེགས་སུ་བཏང་སྟེ་སྲིད་ཇུས་ཐོག་ནས་རྒྱབ་སྐྱོར་བྱེད་ཤུགས་ཆེ་རུ་གཏོང་དགོས། དར་རྒྱས་ཆེ་བའི་ས་ཁུལ་གྱིས་རོགས་སྐྱོར་བྱེད་ཐབས་གསར་གཏོད་དང་། རོགས་སྐྱོར་ཁྱབ་ཁོངས་རྒྱ་ཆེར་གཏོང་བ། རོགས་སྐྱོར་གྱི་དངོས་ཕན་ཆེ་རུ་གཏོང་བ། རོགས་སྐྱོར་བྱེད་ཤུགས་ཆེ་རུ་གཏོང་བ་བཅས་བྱས་ཏེ་ཁ་གཏད་རོགས་སྐྱོར་བྱེད་པའི་བརྒྱུད་རིམ་དེ་མི་རིགས་ཁག་འགྲོ་འོང་སྤེལ་རེས་མཉམ་འདྲེས་དང་ས་ཁོངས་མཉམ་ལས་གཉིས་ཕན་ཡོང་བར་སྐུལ་འདེད་གཏོང་བའི་བརྒྱུད་རིམ་དུ་འགྱུར་བ་བྱེད་དགོས། མི་རིགས་ས་ཁུལ་གྱིས་དངོས་ཐོག་བདེན་འཚོལ་ངང་འཕེལ་རྒྱས་ཀྱི་དམིགས་ཚད་གཏན་འཁེལ་བྱེད་པ་དང་ཡུལ་བབ་དང་བསྟུན་ནས་འཕེལ་རྒྱས་གཏོང་སྟངས་གཏན་འཁེལ་བྱས་ཐོག་ནང་ངོས་ཀྱི་མི་མངོན་པའི་སྟོབས་ཤུགས་འཕེལ་བ་དང་རང་བརྟེན་འཕེལ་རྒྱས་གཏོང་ནུས་ཆེ་རུ་བཏང་སྟེ་ཀྲུང་དབྱང་གི་རྒྱབ་སྐྱོར་དང་དར་རྒྱས་ཆེ་བའི་ས་ཁུལ་གྱི་རོགས་སྐྱོར་དེ་མཆོང་སྐྱོད་ལྟ་བུའི་འཕེལ་རྒྱས་མངོན་འགྱུར་བྱེད་པའི་སྒུལ་ཤུགས་ཆེན་པོ་དང་བྱ་སྤྱོད་དངོས་སུ་བསྒྱུར་བ་བྱེད་དགོས།
དྲི་བ། མི་རིགས་མཐུན་སྒྲིལ་ནི་རང་རྒྱལ་མི་རིགས་ཁག་གི་མི་དམངས་ཀྱི་སྲོག་རྩ་ཡིན་པས་དུས་བབ་གསར་པའི་འོག་ཇི་ལྟར་བྱས་ཏེ་མི་རིགས་མཐུན་སྒྲིལ་ལ་སྔར་བས་ཤུགས་སྣོན་རྒྱག་དགོས་སམ།
ལན། སྤྱི་ཁྱབ་ཧྲུའུ་ཅི་ཞིས་ཅིན་ཕིང་གིས"མི་རིགས་ལས་དོན་ཡག་པོ་སྒྲུབ་པའི་ཆེས་འགག་རྩ་ནི་མི་རིགས་མཐུན་སྒྲིལ་ལས་དོན་ཡག་པོ་བསྒྲུབ་རྒྱུ་དེ་ཡིན་པ་དང་ཆེས་སྤྱོད་གོ་ཆོད་པ་ནི་མི་སེམས་ཐོབ་པ་བྱ་རྒྱུ་དེ་རེད"ཅེས་ནན་བཤད་གནང་བ་མ་ཟད། སྤུན་ཟླའི་བརྩེ་དུང་དང་ཕན་ཚུན་རོགས་རེས་ཀྱི་འདུ་ཤེས་གསར་པ་བཏོན་གནང་བས་ང་ཚོས་མི་རིགས་མཐུན་སྒྲིལ་ལས་དོན་ལ་ཤུགས་སྣོན་རྒྱག་པའི་ཐད་བསམ་ཕྱོགས་གསར་པ་མཁོ་འདོན་གནང་ཡོད། ང་ཚོས་ངེས་པར་དུ་ལོ་བརྒྱའི་རིང་རྨང་གཞི་བཏིང་བའི་མི་སེམས་འདུ་འགོད་ལ་གཞིགས་ཏེ་མི་རིགས་མཐུན་སྒྲིལ་ལས་དོན་སྤེལ་དགོས་པ་དེ་ཉི་འོད་ས་གཞི་ཀུན་ཏུ་འཕྲོ་བ་ལྟར་སྤྱི་ཚོགས་ཡོངས་ལ་ཁུག་མ་ལུས་པར་མི་རིགས་མཐུན་སྒྲིལ་གྱི་དྲིལ་བསྒྲགས་སློབ་གསོ་ཡག་པོ་རྒྱག་དགོས་པ་དང་། མཁའ་རླུང་གཙང་སེལ་བྱེད་པ་ལྟར་མི་རིགས་མཐུན་སྒྲིལ་ལ་གནོད་པའི་གཏམ་སྤྱོད་མཐའ་དག་ལ་མཐའ་གཅིག་ཏུ་ངོ་རྒོལ་བྱེད་དགོས་པ། ཆུ་འགོར་སྲུང་སྐྱོང་བྱེད་པ་ལྟར་ཀྲུང་ཧྭ་མི་རིགས་ཀྱི་མཐུན་སྒྲིལ་ཆེ་མོའི་གཞི་རྩར་སྲུང་སྐྱོང་བྱེད་དགོས། ཚན་རིག་དང་མཐུན་པའི་ངང་མི་རིགས་འབྲེལ་བའི་འཕེལ་རྒྱས་དང་འགྱུར་ལྡོག་གི་འཕེལ་ཕྱོགས་གསར་པ་ཁོང་དུ་ཆུད་པ་བྱེད་པ་དང་ལས་བྱེད་མང་ཚོགས་ཀྱིས་རང་རྒྱལ་གྱི་མི་རིགས་འབྲེལ་བའི་གཙོ་རྒྱུན་ལ་ཡང་དག་པའི་ངོས་འཛིན་བྱ་རྒྱུར་ཁྲིད་སྟོན་བྱས་ཏེ་མི་རིགས་མཐུན་སྒྲིལ་གྱི་འོད་གསལ་གྱི་ཕྱོགས་དེར་མང་ཙམ་ལྟ་དགོས། མི་རིགས་ལས་དོན་གྱི་སྲོལ་རྒྱུན་བཟང་པོ་འདོན་སྤེལ་གང་ལེགས་བྱེད་པར་དུས་རྒྱུན་དུ་དང་སྙིང་གཏམ་ཤོད་རེས་བྱ་རྒྱུ་གལ་ཆེ་བ་དང་དངོས་པོ་དང་བསམ་པ་གཉིས་ཀར་མཉམ་དུ་དམ་འཛིན་བྱ་རྒྱུ་མཐའ་འཁྱོངས་བྱས་ཏེ་དངོས་པོ་དང་སྲིད་དབང་སྒེར་འཛིན་ལ་དམ་འཛིན་ནན་པོ་བྱེད་པ་དང་བསམ་པ་དང་མཐུན་སྒྲིལ་ལ་སྣང་ཆུང་བྱེད་པའི་གནད་དོན་ཐག་གཅོད་ཏན་ཏིག་བྱེད་དགོས། ཁྱད་པར་ལ་བརྩི་འཇོག་དང་། སྣ་མང་བསྟུན་མཁས། ཐུན་མོང་རང་བཞིན་ཟབ་ཏུ་གཏོང་བ་བཅས་བྱེད་པ་དང་འཕྲལ་མར་འགྲུབ་རེ་བྱ་རྒྱུ་གཏན་འགོག་བྱས་ཐོག་མི་རིགས་ཁག་དབར་འགྲོ་འོང་སྤེལ་རེས་མཉམ་འདྲེས་ལ་ཤུགས་སྣོན་བརྒྱབ་ནས་མི་རིགས་ཁག་འཆམ་མཐུན་མཉམ་གནས་དང་། ཕྱར་བ་གྲུ་འདེགས། ཞི་མཐུན་འཕེལ་རྒྱས་བཅས་མངོན་འགྱུར་ཐུབ་པ་བྱེད་དགོས། དེང་གི་དུས་རབས་སུ་སྨྱན་སྦྱོར་ལག་རྩལ་འཕེལ་རྒྱས་མྱུར་པོ་འགྲོ་བ་དང་མི་རྣམས་ཀྱིས་ཆ་འཕྲིན་དང་ལེན་བྱེད་པའི་བྱ་ཐབས་ལའང་འགྱུར་ལྡོག་མང་པོ་འགྲོ་བཞིན་ཡོད། འདུ་ཤེས་དང་། བྱེད་སྟངས། གཞི་རྟེན། བྱ་ཐབས་བཅས་གསར་གཏོད་བྱ་རྒྱུར་སྐུལ་འདེད་ཤུགས་ཆེན་གཏོང་བ་དང་སྤྱི་ཚོགས་ཀྱི་རིག་གནས་སྣང་ཚུལ་སྣ་ཚོགས་ཅན་དང་། སྤྱི་དམངས་ཅན། དངོས་ཚན་ཅན་བཅས་ལ་མཐོང་ཆེན་བྱས་ཏེ་མི་ཚོས་ལྟ་འདོད་ཅིང་ཉན་སྤྲོ་བའི་བྱ་ཐབས་ཐོག་ནས་མི་རིགས་མཐུན་སྒྲིལ་གྱི་དྲིལ་བསྒྲགས་སློབ་གསོ་དང་མི་རིགས་མཐུན་སྒྲིལ་ཡར་ཐོན་གཏོད་པའི་བྱེད་སྒོར་སྐུལ་འདེད་གཏོང་དགོས། རིག་གནས་ཀྱི་མོས་སེམས་ནི་གཏིང་ཟབ་ཤོས་ཀྱི་མོས་སེམས་ཤིག་ཡིན་པ་དང་རིག་གནས་ཀྱི་མོས་སེམས་དམག་འཐབ་ནི་དུས་རབས་21གི་མི་སེམས་བརྩོན་ལེན་བྱེད་པའི་དམག་འཐབ་ཅིག་རེད། རིག་གནས་ཀྱི་མོས་སེམས་ཆེ་རུ་གཏོང་རྒྱུ་དེ་སྔར་བས་གལ་འགངས་ཆེ་བའི་གནས་བབ་ཐོག་བཞག་སྟེ་མི་རིགས་ཁག་གི་རིག་གནས་དར་རྒྱས་གོང་འཕེལ་གཏོང་བ་དང་། མི་རིགས་ཁག་ལ་ཐུན་མོང་དུ་དབང་བའི་བསམ་པའི་ཁྱིམ་གཞིས་བསྐྲུན་པ། ཀྲུང་ཧྭ་མི་རིགས་ཀྱི་ཐུན་མོང་སྒྲིག་གཞིའི་འདུ་ཤེས་སྐྱེད་སྲིང་ཧུར་ཐག་བྱེད་པ་བཅས་བྱས་ནས་འཛམ་གླིང་ཁྱབ་ཁོངས་ནང་གི་མི་སེམས་བརྩོན་ལེན་གྱི་དམག་འཐབ་དེར་རྒྱལ་ཁ་ཐོབ་པ་བྱེད་དགོས། 2015ལོ་ནི་ཀྲུང་དབྱང་མི་རིགས་ལས་དོན་ཚོགས་འདུའི་དགོངས་དོན་ལག་བསྟར་དོན་འཁྱོལ་བྱེད་པའི་འགག་རྩའི་ལོ་དང་འགོ་ཚུགས་ལོ་ཡིན། ང་ཚོས་བློ་མཐུན་ཞིས་ཅིན་ཕིང་གིས་སྤྱི་ཁྱབ་ཧྲུའུ་ཅི་གནང་བའི་ཏང་ཀྲུང་དབྱང་གི་མཐའ་འཁོར་དུ་མཐུན་སྒྲིལ་དམ་ཟབ་བྱེད་པ་དང་གྲངས་ཉུང་མི་རིགས་ཀྱི་མང་ཚོགས་ལ་ལྷག་བསམ་ཟོལ་མེད་ཀྱི་བརྩེ་སེམས་འཆང་བ་དང་། མི་རིགས་ས་ཁུལ་ལ་བརྩེ་དུང་འཆང་བ། མི་རིགས་ལས་དོན་ལ་བརྩེ་སེམས་ཟབ་མོ་འཆང་བ་བཅས་བྱས་ཐོག་འགན་འཁྲི་ཁུར་ཕོད་པ་དང་། འཆར་འགོད་བྱེད་མཁས་པ། གསར་འབྱེད་བྱེད་ཕོད་པ། བློ་ཐག་ཆོད་པོས་ལག་ལེན་བསྟར་བ། གཞོགས་འདེགས་བྱེད་མཁས་པ་བཅས་བྱས་ཏེ་ཀྲུང་དབྱང་མི་རིགས་ལས་དོན་ཚོགས་འདུའི་དགོངས་དོན་དོན་ཐོག་ཏུ་ཏན་ཏིག་འཁྱོལ་བ་དང་ཀྲུང་གུང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི《བསམ་འཆར》དོན་ཐོག་ཏུ་འཁྱོལ་བ་བྱས་ནས་མི་རིགས་མཐུན་སྒྲིལ་ཡར་ཐོན་བྱ་གཞག་གི་རྣམ་པ་གསར་པ་ནུས་ཤུགས་ཡོད་རྒུས་གསར་འབྱེད་བྱས་ཏེ་རླབས་ཆེན་གྱི་ཀྲུང་གོའི་ཕུགས་འདུན་མངོན་འགྱུར་བྱ་ཆེད་ལེགས་སྐྱེས་དེ་བས་ཆེ་བ་འབུལ་དགོས།(རྩོམ་འགན་པ། རྟ་མགྲིན)
