ཀྲུང་དབྱང་རླུང་འཕྲིན་ཁང་ནས་གནས་ཚུལ་སྤེལ་གསལ། ང་ཚོས་ལོ་ལྔ་ཚན་གྱི་འཆར་ཀོད་༡༣པ་ལག་ལེན་བསྟར་རྒྱུ་རེ་འགུག་བྱེད་པ་དང་། ཁྲོན་བོད་ལྕགས་ལམ་གང་མགྱོགས་ལས་འགོ་འཛུགས་རྒྱུའི་རེ་བ་བཅངས་བཞིན་པ། དེས་བོད་ལྗོངས་ནུབ་རྒྱུད་ཀྱི་གསར་སྤེལ་དང་བོད་ལྗོངས་ཀྱི་གོང་འཕེལ། མཐའ་འཚམས་སྲ་བརྟནབཅས་ཡོང་རྒྱུར་དོན་དངོས་ཀྱི་དོན་སྙིང་གལ་ཆེན་ལྡན་ཡོད་ཅེས་རྒྱལ་ཡོངས་ཚོགས་ཆེན་གཉིས་ལ་བཞུགས་བཞིན་པའི་རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི། བོད་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་གཞོན་པ། རང་སྐྱོང་ལྗོངས་ཀྱི་ཀྲུའུ་ཞི་བློ་བཟང་རྒྱན་མཚན་གྱིས་གསུངས་གནང་བ་རེད།
རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི། བོད་རང་སྐྱོང་ལྗོངས་ཡུལ་སྐོར་གོང་འཕེལ་ཨུ་ཡོན་ལྷན་ཁང་གི་ཀྲུའུ་རིན་གཞོན་པ་ཧུང་ཝེའི་ཡིས། མཚོ་བོད་ལྕགས་ལམ་བསྐྲུན་པ་དེས་བོད་ལྗོངས་ས་ཁུལ་གྱི་དཔལ་འབྱོར་གོང་འཕེལ་དང་། མཐའ་འཚམས་སྲ་བརྟན་ཡོང་རྒྱུར་ནུས་པ་གལ་ཆེན་འདོན་སྤེལ་ཐུབ་ཡོད། ད་ལོ་ནི་ལོ་ལྔ་ཚན་གྱི་འཆར་བཀོད་༡༣པ་འགོ་བཙམས་པའི་ལོ་ཡིན་པས། ཁྱབ་ཁོངས་འབྲེལ་མཐུད་དང་ལྷག་དོན་དུ་རྒྱལ་ཁབ་ཀྱི་རྒྱུད་གཅིག་ལམ་གཅིག་གོང་འཕེལ་གྱི་འཐབ་ཇུས་ཁྲོད། ཁྲོན་བོད་ལྕགས་ལམ་གྱིས་བོད་ལྗོངས་ཀྱི་གོང་འཕེལ་ལ་སུས་ཀྱང་ཚབ་བྱེད་ཐབས་བྲལ་བའི་ནུས་པ་འདོན་སྤེལ་ཐུབ་ཡོད་ཅེས་གསུངས་པ་རེད།
མིག་སྔར་ཡུལ་སྐོར་ལས་རིགས་ཀྱི་བོད་ལྗོངས་ཀྱི་ཐོན་སྐྱེས་སྤྱིའི་རིན་ཐང་གི་བརྒྱ་ཆ་༢༧དང་གྲངས་ཆུང་༥ཟིན་པས། བོད་ལྗོངས་ཀྱི་གཙོ་ཁྲིད་ཐོན་ལས་སུ་འགྱུར་བ་དང་། ལྕགས་ལམ་དེས་ཡུལ་སྐོར་ལས་རིགས་ལ་ཐོན་པའི་ནུས་པ་ནི་སྨོས་མེད་ཡིན། དེ་དང་ཆབས་གཅིག་ཏུ་ཁྲོན་བོད་ལྕགས་ལམ་བསྐྲུན་རྒྱུ་དེས་བོད་ལྗོངས་ལྷོ་རྒྱུད་ས་ཁུལ་གྱི་རྒྱལ་སྲུང་འཛུགས་བསྐྲུན་ལའང་དགེ་མཚན་ལྡན་པའི་ནུས་པ་འདོན་ཐུབ་ངེས་ཡིན།
