ཟླ་བཞི་བའི་ཚེས་སུམ་ཅུ་ཉིན་སི་ཁྲོན་ཞིང་ཆེན་ཏང་ཨུའི་རྒྱུན་ཨུ་དང་ཞིང་ཆེན་འཐབ་ཕྱོགས་གཅིག་གྱུར་པུའུ་ཡི་པུའུ་ཀྲང་ཚའེ་པའོ་ཧྭ་ཁྲིན་ཏུའུ་ཡི་ཕེ་ཞན་རྫོང་དུ་ཕྱིན་ནས་སི་ཁྲོན་བོད་བརྒྱུད་ནང་བསྟན་སློབ་གླིང་སྤོར་འཛུགས་ཀྱི་བྱ་བ་ལ་རྟོག་ཞིབ་བྱས་ཡོད།
སི་ཁྲོན་བོད་བརྒྱུད་ནང་བསྟན་སློབ་གླིང་ནི་དེ་སྔ་དཀར་མཛེས་ཁུལ་གྱི་དཀར་མཛེས་རྫོང་སྲིབ་ངོ་ཞང་དུ་ཡོད། འདི་ནི་རྒྱལ་སྲིད་སྤྱི་ཁྱབ་ཁང་གིས་ཆོག་མཆན་ཐོབ་ཅིང་ལོ་ངོ་ཉི་ཤུ་ལྷག་གི་ལོ་རྒྱུས་ཡོད་པའི་ཆེད་ལས་ཀྱི་སློབ་གླིང་ཞིག་ཡིན་ལ། སི་ཁྲོན་བོད་བརྒྱུད་ནང་བསྟན་གྱི་གྲྭ་བཙུན་སློབ་གཉེར་བ་དག་འགྲིམ་སའི་སློབ་གླིང་མཐོ་ཤོས་ཡིན། སློབ་གླིང་སྤོར་འཛུག་གི་ལས་ཀ་མགོ་བརྩམས་པ་ནས་བཟུང་། ཀྲུང་དབྱང་དང་སི་ཁྲོན་ཞིང་ཆེན་ཏང་ཨུ། བོད་བརྒྱུད་ནང་བསྟན་གྱི་སྡེ་སོགས་ནས་མཐོང་ཆེན་ཚད་མཐོན་པོ་བྱས་ཤིང་། སི་ཁྲོན་ཞིང་ཆེན་གྱི་ཏང་ཨུའི་ཧྲུའུ་ཅི་ཝང་ཏུང་མེན་གྱིས་ཐེངས་མང་པོར་མཆན་བཀོད་མཛུབ་སྟོན་གལ་ཆེན་པོ་བྱས་ཡོད།
ཚའེ་པའོ་ཧྭ་ཡིས་སི་ཁྲོན་བོད་བརྒྱུད་ནང་བསྟན་སློབ་གླིང་ནི་བོད་བརྒྱུད་ནང་བསྟན་གྱི་ཚབ་མཚོན་མི་སྣ་གསོ་སྐྱོང་གི་རྟེན་གཞི་གལ་ཆེན་པོ་ཞིག་ཡིན་ལ། བོད་བརྒྱུད་ནང་བསྟན་སློབ་གླིང་ལེགས་པོར་བསྒྲུབ་པའི་ལས་དོན་འདི་ཉིད་བོད་བརྒྱུད་ནང་བསྟན་སྤྱི་ཚོགས་རང་ལུགས་ཀྱི་སྤྱི་ཚོགས་དང་མཐུན་པ་དང་། བོད་ཁུལ་རྒྱུན་རང་རིང་བརྟན་འཇགས་ཡོང་བ་བཅས་ཀྱི་ཐད་དོན་སྙིང་གལ་ཆེན་པོ་ཡོད། ཞིང་ཆེན་གྱི་འབྲེལ་ཡོད་སྡེ་ཁག་དང་ཨར་ལས་སྡེ་ཁག་གིས་ཆབ་སྲིད་འདུ་ཤེས་དང་སྤྱི་ཡོངས་ཀྱི་འདུ་ཤེས་ཇེ་མཐོར་བཏང་ནས། ཕན་ཚུན་མཉམ་ལས་དམ་པོ་བྱས་ཏེ། བརྩོན་པ་ཆེན་པོས་སི་ཁྲོན་བོད་བརྒྱུད་ནང་བསྟན་སློབ་གླིང་འདི་ཉིད་སྤུས་ཀ་ལེགས་ཤིང་བྱེད་ནུས་ཚང་པའི་བཟོ་སྐྲུན་སྤུས་དག་ཅིག་དང་། བོད་ཀྱི་རིག་གནས་མངོན་ཞིང་བོད་རྒྱ་འཆམ་མཐུན་ངང་འདྲེས་པའི་བཟོ་སྐྲུན་ཁྱད་ཆོས་དང་ལྡན་པ་ཞིག ཐཱན་ཉུང་ཞིང་ཁོར་ཡུག་དང་མཐུན་པ་དང་། རང་བྱུང་ཁམས་དང་གཞི་གཅིག་ཏུ་འདྲེས་པའི་བཟོ་སྐྲུན་གཙང་མ་ཞིག ལྟ་སྐུལ་དོ་དམ་ཚད་ལྡན་དང་གོ་རིམ་ཁྲིམས་མཐུན་གྱི་བཟོ་སྐྲུན་སྲིད་གཙང་ཞིག་བཅས་ཡོང་བ་བྱ་དགོས་ལ། བསམ་བློ་སྣེ་འདྲེན་དང་རིག་གནས་རྒྱུད་འཛིན་རྨང་གཞིར་བཟུང་ནས། མིག་རྒྱང་རིང་བོའི་སྒོ་ནས་སློབ་གླིང་གི་མི་སྣ་གསོ་སྐྱོང་གི་ལས་དོན་ལ་འཆར་གཞི་འཐེན་དགོས་ཤིང་། བརྒྱུད་ལམ་མི་འདྲ་བ་དང་རྣམ་པ་མི་འདྲ་བ་སྤྱད་ནས་ཕུལ་དུ་བྱུང་པའི་བཤེས་གཉེན་སྐོར་ཞིག་གདན་དྲངས་ནས། བོད་བརྒྱུད་ནང་བསྟན་གྱི་འཐུས་ཚབ་མི་སྣ་སྐོར་གསར་བ་ཞིག་གསོ་སྐྱོང་བྱ་བར་རྨང་གཞི་འདིང་དགོས་ཞེས་བསྟན་ཡོད།
སི་ཁྲོན་ཞིང་ཆེན་འཐབ་ཕྱོགས་གཅིག་གྱུར་པུའུ་ཡི་པུའུ་ཀྲང་གཞོན་པ་ཀྲང་ཀའོ་ཧྥུ་དང་ཞིང་ཆེན་ལས་ཁུངས་ལས་དོན་དོ་དམ་ཅུའུ་ཡི་འབྲེལ་ཡོད་མགོ་ཁྲིད་བཅས་རྟོག་ཞིབ་བྱ་རོགས་སུ་ཕྱིན་ཡོད།
ཤེས་རྟོག་བྱུང་བ་ལྟར་ན་སྤོ་སྐྲུན་བྱ་བཞིན་པའི་སི་ཁྲོན་བོད་བརྒྱུད་ནང་བསྟན་གྱི་སློབ་ཁུལ་གསར་བ་ནི་ཕེ་ཞན་རྫོང་གི་ཐང་ཁྲང་གྲོང་བརྡལ་གྱི་ཧེང་ཧྲན་གྲོང་ཚོ་རུ་ཡོད་ཅིང་། འཆར་གཞིའི་ས་ཁྱོན་ལ་སྤྱི་ཆིང་7.8དང་། བཟོ་སྐྲུན་ལས་རིམ་དང་པོའི་འཛུག་སྐྲུན་རྒྱ་ཁྱོན་ལ་རྨིད་གྲུ་བཞི་མ26372ཡོད། བཟོ་སྐྲུན་འདི་ཉིད་ན་ནིང་ལོའི་ཟླ་བརྒྱད་པར་ལས་མགོ་བརྩམས་ཤིང་། ད་ལྟ་སྒྲིག་གཞི་གཙོ་བོ་ཁག་འགྲུབ་ཡོད་ལ་ད་ལོའི་སྟོན་ཁ་རིམ་པ་བཞིན་བེད་སྤྱོད་མགོ་རྩོམ་རྒྱུ་རེད། སློབ་གླིང་འདི་ལ་འབྲིང་རམས་པ་དང་། མཐོ་རམས་པ། སྤྲུལ་སྐུའི་འཛིན་གྲྭ ཆེད་དོན་གསོ་སྦྱོང་འཛིན་གྲྭ གཞུང་ལུགས་ཉམས་ཞིབ་འཛིན་གྲྭ་བཅས་གཟུག་འཆར་ཡོད་ཅིང་། སྐབས་དང་པོར་སློབ་མ་བཞི་བརྒྱ་བསྡུ་འཆར་ཡོད་འདུག
