ཟླ་དྲུག་པའི་ཚེས་བཅུ་དྲུག་ཉིན་གསར་འགོད་པས2016ལོའི་མཚོ་སྔོན་ཚོང་གཏམ་གྲོས་ཚོགས་དང་མཚོ་སྐོར་རྒྱལ་སྤྱིའི་གློག་སྒུལ་རླངས་འཁོར་འགྲན་སྡུར་རྩ་འཛུགས་ཨུ་ཡོན་ལྷན་ཁང་ནས་རྒྱུས་ལོན་བྱུང་བ་ལྟར་ན། མཚོ་སྔོན་ཞིང་ཆེན་མི་དམངས་སྲིད་གཞུང་དང་ཚན་རྩལ་པུའུ། བཟོ་ལས་དང་ཆ་འཕྲིན་ཅན་པུའུ། ཀྲུང་གོ་གློག་སྒུལ་རླངས་འཁོར་མི་བརྒྱའི་ཚོགས་པ་བཅས་ཀྱིས་མཉམ་འབྲེལ་སྒོས་སྒྲུབ་པའི2016ལོའི་མཚོ་སྔོན་ཚོང་གཏམ་གྲོས་ཚོགས་དང་མཚོ་སྐོར་རྒྱལ་སྤྱིའི་གློག་སྒུལ་རླངས་འཁོར་འགྲན་སྡུར་སྐབས་གསུམ་པ་ཟླ་དྲུག་པའི་ཚེས་ཉི་ཤུའི་ཉིན་དངོས་སུ་མགོ་རྩོམ་རྒྱུ་རེད།
རྒྱལ་ནང་གི་བཟོ་ཚོང་སོ་སོ་ནས་ཡོང་བའི་གློག་སྒུལ་རླངས་འཁོར་རིགས་སྣ་ཚོགས་ཀྱིས་མཚོ་སྔོན་ནས་འགྲན་སྡུར་ཐེངས་གསུམ་པ་བྱེད་རྒྱུ་ཡིན་ལ། མཚོ་ངོས་ལས་མཐོ་ཚད་རྨིད་ཉིས་སྟོང་ནས་རྨིད་བཞི་སྟོང་ཆིག་བརྒྱ་ལྷག་གི་གྲང་ངར་དང་ཁངས་ཆར། མཚོ་ངོས་ཀྱི་བར་ཁྱད་སོགས་རང་བྱུང་ཁོར་ཡུག་གི་འགྲན་སྡུར་ཆ་རྐྱེན་འོག་ཏུ་གློག་སྒུལ་རླངས་འཁོར་གྱི་སྣ་འཛོམས་རང་བཞིན་ལ་ཉམས་སད་ཐེངས་ཤིག་བྱ་རྒྱུ་རེད། དེ་དང་མཉམ་དུ་ཐེངས་འདིའི་འགྲན་སྡུར་སྟེང་དུ་རྒྱལ་སྤྱིའི་མིང་གྲགས་ཅན་གྱི་གློག་བརྙན་འཁྲབ་སྟོན་པ་ལིག་ཅ་ལིན་དང་མིང་གྲགས་ཅན་གྱི་འཁྲབ་ཁྲིད་པ་ཀྲང་ཅི་ཀྲུང་། ཀྲུང་དབྱང་བརྙན་འཕྲིན་ཁང་གི་མདོ་འཛིན་པ་གྲགས་ཅན། གཞན་ལུས་རྩལ་པ་གྲགས་ཅན་སོགས་མཉམ་དུ་འདུས་ནས་ཐེངས་འདིའི་བྱ་འགུལ་ལ་དངོས་ཤུགས་གང་རུང་ནས་རོགས་འདེགས་ཀྱི་ནུས་པ་འདོན་རྒྱུ་རེད།
2016ལོའི་མཚོ་སྐོར་རྒྱལ་སྤྱིའི་གློག་སྒུལ་རླངས་འཁོར་འགྲན་སྡུར་གྱི་བརྗོད་དོན་གཙོ་བོ་ནི་ལྷད་མེད་ཀྱི་འགྲུལ་བཞུད་ཅེས་པ་དེ་ཡིན་ལ། ཐེངས་འདིའི་འགྲན་སྡུར་ལ་ཁྱད་པར་ཅན་གྱི་ལག་རྩལ་འགྲན་སྡུར་དང་བྱེད་ནུས་ཚད་འཇལ་འགྲན་སྡུར། མཚོ་སྐོར་ཚད་འཇལ་འགྲན་སྡུར། བྱ་དགའི་དགོང་ཚོགས་བཅས་རིགས་བཞི་རུ་བགར་ཡོད། འགྲན་སྡུར་གྱི་བཀོད་སྒྲིག་གཞིར་བཟུང་ནས་ཟླ་དྲུག་པའི་ཚེས་བཅུ་དགུའི་ཉིན་འགྲན་ཞུགས་རླངས་འཁོར་ཡོད་ཚད་མཉམ་གཅིག་ཏུ་སྐུ་འབུམ་བྱམས་པ་གླིང་དུ་འཛོམས་ནས་མི་དང་རང་བྱུང་ཁམས། རྟག་བརྟན་གྱི་ཁོར་སྲུང་ཞེས་པའི་བརྗོད་དོན་སྐོར་སྐྱོད་ཀྱི་སྨོན་ལམ་བྱ་འགུལ་ལ་ཞུགས་རྒྱུ་རེད།
ཟླ་དྲུག་པའི་ཚེས་ཉི་ཤུ་ཉིན་ནས་ཚེས་ཉེར་གཉིས་ཉིན་བར་ཐེངས་འདིའི་འགྲན་སྡུར་བྱ་འགུལ་དངོས་སུ་མགོ་རྩོམ་རྒྱུ་ཡིན་ལ། ད་ལོའི་འགྲན་སྡུར་གྱི་སྤྱིའི་རིང་ཚད་ལ་སྤྱི་ལེ་དགུ་བརྒྱ་དང་གྱ་གཅིག་ལྷག་ཡོད་ལ། ཁྱོན་བསྡོམས་པས་འགྲན་རིམ་བཅུ་གཉིས་ཡོད། འགྲན་སྡུར་རླངས་འཁོར་རུ་ཁག་ཚེས་ཉི་ཤུ་ཉིན་ཟི་ལིང་གྲོས་ཚོགས་ལྟེ་གནས་ནས་ལམ་ལ་ཆས་ཏེ། ན་ལ་ཐན་དང་མིན་ཡོན། མཁར་དམར། ཆི་ལེན། ཏ་ཏུང་ཧྲུའུ་ཧྲན་ཡ་ཁུག ལུང་རྒན་སྡེ་བ། ཉིང་རྡུལ་མཁར། མཚོ་ནུ་ལྕེ། བྱ་གླིང་། རྐང་ཚ་བཅས་བརྒྱུད་དེ་ཚེས་ཉེར་གཉིས་ཉིན་ཕྱིར་ཟི་ལིང་ལ་ཡོང་ནས་མཚོ་སྔོན་ཟློས་གར་ཁང་ཆེན་མོའི་ནང་བསྡུ་རྒྱུ་ཡིན་པའི་ཀྲུང་གོའི་དངུལ་ཁང་ལྗང་མདོག་གི་ཕུགས་འདུན་ཏེ།2016ལོའི་མཚོ་སྔོན་གྲོས་གཏམ་གྲོས་ཚོགས་ཀྱི་མཇུག་བསྡུའི་མཛད་སྒོ་དང་མཚོ་སྐོར་གློག་སྒུལ་རླངས་འཁོར་འགྲན་སྡུར་གྱི་བྱ་དགའི་དགོང་ཚོགས་ལ་ཞུགས་རྒྱུ་རེད། །
