གསར་འགོད་པས་འབྲེལ་ཡོད་ཚན་པ་ནས་ཤེས་རྟོགས་བྱུང་བར། ལྷ་ས་གྲོང་ཁྱེར་རྫོང（ཆུས）གསུམ་གྱི་འགན་ལེན་ལྔར་གཅིག་སྡུད་བསྙེན་བཀུར་གྱི་ཞབས་ཞུའི་ལྟེ་གནས་དེ་ད་ཆ་སྙེ་མོ་རྫོང་དང་འདམ་གཞུང་རྫོང་། སྟོད་ལུང་བདེ་ཆེན་ཆུས་བཅས་ནས་ཡོང་བའི་འགན་ལེན་ལྔའི་རྒན་རྒོན་ཚོའི་ཐུན་མོང་གི་ “ཁྱིམ་ཚང་གསར་པར”གྱུར་ཡོད། ས་ཆ་འདིར་རྒན་རྒོན་ཚོས་བདེ་བགྲོད་ལམ་བུ་དང་སྨན་སྤྱོད་གློག་སྐས་སོགས་རྒན་རྒོན་གྱི་ཆེད་སྤྱོད་སྒྲིག་བཀོད་བཀོལ་སྤྱོད་ཐུབ་ནས་འཚོ་བར་སྟབས་བདེ་བསྐྲུན་ཡོད་པ་མ་ཟད་རྒན་རྒོན་ཚོའི་འཚོ་བར་ལྟ་རྟོག་བྱེད་མཁན་ཡོད།
མིག་སྔར་འདི་ལྟ་བུའི་ཚད་གཞི་གཅིག་པ་ཡིན་པའི་འགན་ལེན་ལྔར་གཅིག་སྡུད་བསྙེན་བཀུར་བྱེད་པའི་ཞབས་ཞུའི་ལྟེ་གནས་བོད་ཀྱི་ས་ཕྱོགས་གང་སར་མཆིས་པ་དང་། འགན་ལེན་ལྔར་གཅིག་སྡུད་བསྙེན་བཀུར་བྱེད་པའི་ཞབས་ཞུའི་ལྟེ་གནས་ནི་ལྗོངས་ཡོངས་ཀྱི“གཅིག་སྡུད་གཉིས”ཀྱི་ལས་དོན་གྱི་དམངས་འཚོའི་འགན་ལེན་རྣམ་གྲངས་ཀྱི་གྲས་ཤིག་ཡིན། དེ་དང་ཆབས་ཅིག་ལས་མཇུག་འགྲིལ་ནས་བེད་སྤྱོད་བྱེད་པའི་ནང་ད་དུང་དྭ་ཕྲུག་གཅིག་སྡུད་ཐོག་གསོ་ཉར་བྱེད་པའི་བྱིས་པའི་ཕན་བདེ་ཁང་ཡང་ཡོད།
“དམངས་འཚོ་སྔོན་ལ་སྤེལ་བའི”བླང་བྱ་དོན་འཁྱོལ་བྱེད་པའི་ཞིབ་ཕྲའི་བྱ་ཐབས་ཡིན་པའི་ངོས་ནས། འགན་ལེན་ལྔར་གཅིག་སྡུད་བསྙེན་བཀུར་དང་དྭ་ཕྲུག་གཅིག་སྡུད་ཐོག་གསོ་ཉར་བྱེད་པའི་ལས་དོན་དེ་ནི་བོད་ཀྱི་གལ་ཆེའི་དམངས་འཚོ་དང་དམངས་སེམས། སྲིད་བཟང་འདུ་འགོད་ཅིག་ཡིན།“གཅིག་སྡུད་གཉིས”ཀྱི་ལས་དོན་སྤེལ་བའི་ཁྲོད། ལྷ་ས་གྲོང་ཁྱེར་གྱིས་དོན་འཁྱོལ་ཏན་ཏིག་ཡོང་བར་དམ་འཛིན་བྱས་པ་དང་བྱ་ཐབས་སྣ་མང་མཉམ་དུ་སྤྱད་ནས་གྲོང་ཁྱེར་ཡོངས་ཀྱི“གཅིག་སྡུད་གཉིས”ཀྱི་ལས་དོན་གྱི་བརྒྱ་གཉིས་དམིགས་ཚད་ཀྱི་འོས་འགན་ལེགས་གྲུབ་གང་ལེགས་བྱུང་བ་རེད།
“གཅིག་སྡུད་གཉིས”ཀྱི་ལས་དོན་བདེ་བླག་ངང་ལག་བསྟར་ཡོང་བར་འགན་ལེན་ཐུབ་ཆེད། ལྷ་ས་གྲོང་ཁྱེར་གྱིས་འདུ་འགོད་ལ་མ་དངུལ་གཏོང་ཤུགས་ཟམ་མི་ཆད་པར་ཆེ་རུ་བཏང་བ་དང་། གྲོང་ཁྱེར་ཡོངས་ལ་ཁྱོན་རྣམ་གྲངས་5བཀོད་སྒྲིག་བྱས་པ་ཁག་སོ་སོར། ལྷ་ས་གྲོང་ཁྱེར་བྱིས་པའི་ཕན་བདེ་ཁང་རྒྱས་སྐྲུན་གྱི་འདུ་འགོད་དང་། རྫོང་གསུམ（ཆུས）གྱི་སྤྱི་ཚོགས་ཕན་བདེ་ཁང་ཟླ་སྒྲིལ་གཏོང་བའི་འཛུགས་སྐྲུན་འདུ་འགོད། “འོད་ཟེར་ལྟེ་གནས”ཆུ་ཤུར་རྫོང་འགན་ལེན་ལྔར་གཅིག་སྡུད་བསྙེན་བཀུར་བྱེད་པའི་ཞབས་ཞུའི་ལྟེ་གནས་སྒྱུར་སྐྲུན་རྒྱས་སྐྲུན་བྱེད་པའི་འདུ་འགོད། ལྷུན་གྲུབ་རྫོང་དང་མལ་དྲོ་གུང་དཀར་རྫོང་གི་འགན་ལེན་ལྔར་གཅིག་སྡུད་བསྙེན་བཀུར་བྱེད་པའི་ཞབས་ཞུའི་ལྟེ་གནས་གསར་སྐྲུན་བྱེད་པའི་འདུ་འགོད་བཅས་རེད། དེའི་ནང་ནས་དྭ་ཕྲུག་གི་མལ་ཁྲི་560དང་། འགན་ལེན་ལྔར་གཅིག་སྡུད་བསྙེན་བཀུར་བྱེད་པའི་མལ་ཁྲི་1057གསར་སྐྲུན་བྱས་ནས་ཁྱོན་བསྡོམས་མ་དངུལ་སྒོར་ཁྲི་26286.68བཏང་ཡོད།
ངོ་སྤྲོད་བྱས་པར་གཞིགས་ན།“གཅིག་སྡུད་གཉིས”ཀྱི་ལས་དོན་སྤེལ་ཚུན། ལྷ་ས་གྲོང་ཁྱེར་དམངས་སྲིད་ཅུས་ཀྱིས་གྲོང་ཁྱེར་ཡོངས་ཀྱི་འགན་ལེན་ལྔར་བསྙེན་བཀུར་བྱེད་ཡུལ་དང་དྭ་ཕྲུག་བཅས་ལ་ས་གནས་དངོས་ཀྱི་རྟོག་ཞིབ་བྱས་ནས། མི་གཅིག་ལ་ཡིག་ཚགས་གཅིག་དང་།མི་དང་ཡིག་ཚགས་གཅིག་གྱུར་ཡོང་བ་བྱས་པ་མ་ཟད། གཅིག་སྡུད་ཐོག་བསྙེན་བཀུར་དང་གསོ་ཉར་བྱེད་འདོད་ཡོད་མཁན་ཚོར་འཕྲལ་དུ་འགྲོ་ལུགས་གཉེར་བ་དང་ཆབས་ཅིག་ལྟ་སྐོར་དང་གནས་སྐབས་ཚོད་ལྟ་བྱས་ནས་སྡོད་པ། གནས་ཚང་གཡར་ནས་སྡོད་པ་སོགས་ཀྱི་རྣམ་པ་ལག་བསྟར་བྱས་པ་དང་། གྲོང་ཚོར་བཅའ་སྡོད་ལས་དོན་རུ་ཁག་གིས་གྲོང་ཚོ་དང་དུད་ཁྱིམ་ཁག་ལ་བསྐྱོད་ནས་དྲིལ་བསྒྲགས་བྱས་པའི་སྲིད་ཇུས་དང་ཟུང་འབྲེལ་བྱས་ཏེ། ནུས་ཤུགས་ཡོད་དགུས་འགན་ལེན་ལྔའི་བསྙེན་བཀུར་བྱ་ཡུལ་དང་དྭ་ཕྲུག་ཚོས་གནས་སྡོད་བྱེད་པའི་སྤྲོ་བ་འཕེལ་གང་ཐུབ་བྱས་ཡོད།
ཤེས་རྟོགས་བྱུང་བར་གཞིགས་ན། མིག་སྔར། ལྷ་ས་གྲོང་ཁྱེར་གྱི་འགན་ལེན་ལྔའི་གཅིག་སྡུད་བསྙེན་བཀུར་བྱ་མི་1066ཡོད་པ་དང་། གཅིག་སྡུད་བསྙེན་བཀུར་བྱེད་ཚད་100%ཟིན་གྱི་ཡོད། འགན་ལེན་ལྔའི་བསྙེན་བཀུར་ཚད་གཞི་ལོ་གཅིག་ལ་མི་རེར་སྒོར་5370ཟིན་པ་དང་དེ་ལྗོངས་ཡོངས་ཀྱི་བསྙེན་བཀུར་ཚད་གཞི་སྒོར་970ལས་མཐོ་བ་ཡོད། གྲོང་ཁྱེར་ཡོངས་ཀྱི་དྭ་ཕྲུག་གཅིག་སྡུད་གསོ་ཉར་མི་གྲངས་645ཡོད་པ་དང་གཅིག་སྡུད་གསོ་ཉར་བྱེད་ཚད་100%ཟིན་གྱི་ཡོད། དྭ་ཕྲུག་འགན་ལེན་གྱི་མ་དངུལ་ཟླ་བ་གཅིག་ལ་མི་རེར་སྒོར་1100ཟིན་པ་དང་དེ་ལྗོངས་ཡོངས་ཀྱི་འགན་ལེན་ཚད་གཞི་སྒོར་100ལས་མཐོ་བ་ཡོད།
