ཀྲུང་དབྱང་གིས་ཉེ་བའི་ལོ་5ཡི་ནང་བོད་ལ་ཆུ་བེད་འཛུགས་སྐྲུན་གྱི་མ་དངུལ་སྒོར་དུང་ཕྱུར་223བཏང་བས་ས་གནས་དེ་གའི་ཞིང་འབྲོག་མང་ཚོགས་ཁྲི་180ལྷག་ཙམ་ལ་ཕན་པ་ཁ་ཡོད་ལག་ཡོད་ཐོབ་པ་དང་འབྲུ་རིགས་ཐོན་སྐྱེད་བརྟན་པོ་དང་ཞིང་འབྲོག་ཁུལ་གྱི་གནོད་མེད་དྭངས་གཙང་གི་འཐུང་ཆུ། ཐག་རིང་ལུག་ཁུག་ས་ཁུལ་གྱི་གློག་བེད་སྤྱོད་བྱེད་པ་སོགས་དམངས་འཚོའི་གནད་དོན་ལ་འགན་ལེན་ཐུབ་པ་བྱུང་།
ཉིན་ཤས་གོང་གསར་འགོད་པས་བོད་རང་སྐྱོང་ལྗོངས་ཆུ་བེད་ཐིང་ནས་གནས་ཚུལ་ཤེས་རྟོགས་བྱུང་གསལ། “ལོ་ལྔ་ཚན་བཅུ་གཉིས་པའི”རིང་། བོད་དུ་ཆུ་མཁོ་འདོན་བྱེད་ནུས་སྨི་རྒྱ་དཔངས་གྲུ་བཞི་དུང་ཕྱུར་7གསར་སྣོན་ཐུབ་པ་བྱུང་བ་དང་། ཞིང་ཆུ་འདྲེན་ཁྱོན་མུའུ་ཁྲི་149.8དང་། ནགས་ཚལ་རྩྭ་སར་ཆུ་འདྲེན་ཁྱོན་མུའུ་ཁྲི་97.9གསར་སྣོན་དང་ལེགས་བཅོས་བྱུང་ནས། འབྲུ་རིགས་ཏུན་ཁྲི་100བརྟན་པོའི་སྒོ་ནས་ཐོན་སྐྱེད་ཡོང་བར་རྨང་གཞི་གདིང་བ་རེད། གཞན་ཡང་། གྲོང་གསེབ་ཀྱི་མི་འབོར་དང་། སློབ་ཞུགས་དགེ་སློབ་དང་དགོན་སྡེའི་མི་འབོར་ཁྲི་77.3གྱིས་གནོད་མེད་དྭངས་གཙང་གི་འཐུང་ཆུ་སྤྱོད་ཐུབ་པ་བྱུང་བ་དང་། མི་ཁྲི་27གྱིས་གྲོང་གསེབ་ཀྱི་ཆུ་གློག་ཆུང་གྲས་ལ་བརྟེན་ནས་གློག་སྤྱོད་དཀའ་བའི་ལོ་རྒྱུས་དང་ཁ་བྲལ་ཐུབ་པ་བྱུང་།
ཟླ་བ་3པའི་སྐབས་ཀྱི་བོད་ནི་དཔྱིད་ཀྱི་རྣམ་པས་ཁེངས་ཞིང་ཞིང་ཆུ་འདྲེན་ཡུལ་གྱི་འགྲམ་དང་ཞིང་ཁའི་མུ་ཁར་དཔྱིད་རྨོད་དཔྱིད་འདེབས་བྱེད་མཁན་གྱི་ཞིང་འབྲོག་མང་ཚོགས་རྣམས་ལོ་འགོའི་བྲེལ་འཚུབ་ཀྱིས་ཁེངས།
དམིགས་བསལ་གྱི་ས་དབྱིབས་དང་གནམ་གཤིས་ཀྱི་ཆ་རྐྱེན་སོགས་ཀྱིས་བོད་ཀྱི་ཞིང་ལས་ཐོན་སྐྱེད་ལ་ཤུགས་རྐྱེན་ཐེབས་ཀྱི་ཡོད།ཆུའི་ཐོན་ཁུངས་ཀྱི་གནས་སྟངས་དོ་མི་སྙོམས་པ་དང་60%ཡི་ས་ཁུལ་ནི་ཐན་པ་དང་ཐན་སྐྱོན་ཕྱེད་ཕོག་ཁུལ་གྱི་ས་ཆར་གནས་ཡོད་པས། དུས་ཚིགས་རང་བཞིན་དང་ས་གནས་རང་བཞིན། འདུ་འགོད་རང་བཞིན་ལ་ཆུ་མི་འདང་བའི་སྣང་ཚུལ་མངོན་གསལ་དོད་པོ་ཡོད།
ཆུ་བེད་འཛུགས་སྐྲུན་བྱས་པར་བརྟེན་ནས“བོད་ཀྱི་འབྲུ་མཛོད”དུ་འབོད་པའི་གཞིས་རྩེ་གྲོང་ཁྱེར་གྱི་འབྲུ་རིགས་ཐོན་འབབ་ལོ་ལྟར་འཕར་སྣོན་འགྲོ་ཡི་ཡོད། གཞིས་རྩེ་གྲོང་ཁྱེར་རྒྱལ་རྩེ་རྫོང་མཁར་སྨད་ཤང་གི་བསོད་ནམས་རྒྱལ་པོས་གསར་འགོད་པར“ངའི་ཞིང་ཁ་གསུམ་ཆ་གཉིས་ཡན་ལ་ཆུ་ཡུར་འཁྲིད་ཡོད་པས་ཐན་པ་བསྟན་སྐབས་ཆར་ཆུ་མེད་པའི་སེམས་ཁྲལ་བྱེད་དགོས་དོན་མི་འདུག ན་ནིང་མུའུ་གཅིག་ནས་འབྲུ་རིགས་ནས་ལོ་གོང་མ་ལས་རྒྱ་མ་60ལྷག་ཙམ་གྱིས་མང་བ་བརྔ་བསྡུ་བྱེད་ཐུབ་བྱུང”ཞེས་བརྗོད།
“འདི་ལོ་ང་ཚོས་ཆུ་བེད་མ་དངུལ་སྒོར་དུང་ཕྱུར་50དོན་འཁྱོལ་ཐུབ་པ་དང་ལེགས་གྲུབ་ཡོང་བར་བརྩོན་ལེན་བྱ་རྒྱུ་ཡིན་པ་དང། གྲོང་གསེབ་ཀྱི་འཐུང་ཆུ་སྲ་བརྟན་དང་མཐོར་འདེགས་ཀྱི་འདུ་འགོད་ལག་བསྟར་བྱ་རྒྱུ་དང་། མུ་མཐུད་དེ་ལ་ལྷོ་ཆུ་བེད་ལྟེ་བའི་ཁུལ་དང་ཆུ་འདྲེན་ཁུལ་གྱི་གཙོ་བོའི་ལས་གྲྭར་སྐུལ་འདེད་བྱ་རྒྱུ། ཤང་ཧེ་ཆུ་བེད་ལྟེ་བའི་ལས་གྲྭ་འཛུགས་སྐྲུན་བྱེད་འགོ་ཚུགས་པ་དང་། འབྲོང་པ་དང་བྲག་གཡབ།ཨ་མདོ་བཅས་རྫོང་གསུམ་གྱི་ཆུའི་སྣོད་བཅུད་ཁ་གསབ་བྱེད་པའི་ཚོད་ལྟ་ཁུལ་དང་ནག་ཆུ་ཆུའི་སྣོད་བཅུད་ཤེས་དཔལ་གྲོང་ཁྱེར་འཛུགས་སྐྱོང་གི་ཚོད་ལྟ་ཁུལ་བསྐྲུན་མགྱོགས་སུ་གཏོང་རྒྱུ་རེད ”ཅེས་བོད་རང་སྐྱོང་ལྗོངས་ཆུ་བེད་ཐིང་གི་ཐིང་ཀྲང་བཀྲ་ཤིས་ཟླ་བས་བརྗོད།
