འདི་ནི་ཝུའུ་དབྱིང་ཅེས་ལྕེ་བདེ་ཞོལ་གྲོང་རྡལ་གྱི་ཞིང་ནང་དང་མུ་ཁར་དཔྱིད་རྨོད་དཔྱིད་འདེབས་གྲ་སྒྲིག་བྱ་ཚུལ་མཁྱེན་རྟོགས་གནང་བའི་གནས་ཚུལ་ཡིན་པ།
ཚེས་22ཉིན་གྱི་སྔ་དྲོ་ལྗོངས་ཏང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་ཝུའུ་དབྱིང་ཅེ་གོང་དཀར་རྫོང་ལྕེ་བདེ་ཞོལ་གྲོང་རྡལ་གྱི་ཞིང་ནང་དང་མུ་ཁར་ཕེབས་ནས་ཞིང་འབྲོག་མང་ཚོགས་དང་ཐོན་སྐྱེད་དང་། དམངས་འཚོ། འཕེལ་རྒྱས་བཅས་ཀྱི་སྐོར་གླེང་སྟེ་རང་ལྗོངས་ཀྱི་དཔྱིད་དུས་ཀྱི་ཞིང་འབྲོག་ལས་ཐོན་སྐྱེད་དང་མིག་སྔའི་དཔལ་འབྱོར་དང་སྤྱི་ཚོགས་འཕེལ་རྒྱས་འགྲོ་ཚུལ་ཐད་ས་གནས་ས་ཐོག་ཏུ་བརྟག་ཞིབ་གནང་བ་རེད།
ས་མཐོར་དཔྱིད་ཀ་ཤར་བ་དང་ཡར་ཀླུང་གི་ལུང་གཞུང་དུ་སྐྱེ་སྟོབས་ཀྱི་དཔལ་འབར་བཞིན་ཡོད། ཝུའུ་དབྱིང་ཅེ་ལྕེ་བདེ་ཞོལ་གྲོང་ལྷན་དུ་ཕེབས་སྐབས་མང་ཚོགས་ཚོས་རྨོད་གཉའ་གཅོག་བཞིན་པ་དང་ཏག་ཏག་འཁེལ། ཚང་མས་ལུས་ལ་དུས་ཆེན་གྱི་གཟབ་མཆོར་ལེགས་པར་སྤྲས་པ་དང་ལག་ཏུ་ཕྱེ་མར་དང་གཙོ་འཛིན་ལྔ་པོའི་སྐུ་པར་འཁྱེར་ནས་ལོ་ཧྲིལ་པོར་ཆར་ཆུ་དུས་སུ་འབབ་པའི་སྨོན་ལམ་བརྒྱབ་སྟེ་ཡངས་ཤིང་རྒྱ་ཆེ་བའི་ཞིང་ནང་དུ་ངལ་རྩོལ་གྱི་སྤྲོ་སྣང་དང་ལོ་ལེགས་ཡོང་བའི་རེ་བས་ཁེངས་ཡོད་པ་རེད།
ཞིང་ནང་དུ་ཚ་ཚ་འུར་འུར་ངང་ངལ་རྩོལ་བྱེད་པའི་རྣམ་པས་ཝུའུ་དབྱིང་ཅེའི་ཡིད་དབང་འཕྲོག་སྟེ་ཁོང་གིས་ཞིང་ནང་དུ་གང་མྱུར་ཕེབས་ནས་མང་ཚོགས་དང་བྱམས་བརྩེའི་ངང་གླེང་མོལ་གནང་བ་དང་དཔྱིད་རྨོད་དཔྱིད་འདེབས་བྱ་ཚུལ་མཁྱེན་རྟོགས་གནང་བ་རེད།
“ཁྱིམ་དུ་ས་ཞིང་མུའུ་ག་ཚོད་ཡོད་དམ”“ན་ནིང་མུའུ་རེ་ནས་རྒྱ་མ་ག་ཚོད་བྱུང་ངམ”“མིག་སྔར་ནས་བསྡུ་ཉོའི་རིན་གོང་ག་ཚོད་ཡིན་ནམ”“རྫས་ལུད་སྤྱོད་ཚུལ་གང་འདྲ་ཡོད་དམ”ཞེས་ཝུའུ་དབྱིང་ཅེས་བཀའ་འདྲི་ཞིབ་ཕྲ་གནང་བ་རེད། ལྕེ་བདེ་ཞོལ་གྲོང་རྡལ་ཏང་ཨུད་ཀྱི་ཧྲུའུ་ཅི་ཕུན་ཚོགས་ཀྱིས་ཝུའུ་དབྱིང་ཅེར་འདི་ལོ་གྲོང་རྡལ་ཡོངས་ཀྱི་ཁྱབ་ཁོངས་སུ“བོད་ནས་ཨང་2000”གི་སོན་བཟང་མུའུ་3000ཁྱབ་གདལ་བཏང་བ་དང་ཆབས་ཅིག་ཞིང་སྨན་དང་། རྫས་ལུད། ཞིང་འབྲེལ་ཁ་གསབ་བཅས་དུས་ཐོག་ཏུ་སྤྲད་པས་ནས་ཀྱི་སྣ་ཁ་གསར་པ་འདེམས་སྤྱོད་བྱེད་པའི་མང་ཚོགས་ཀྱི་ཧུར་སེམས་ཆེན་པོ་འདུག་ཅེས་ཞུས་པ་རེད། ཝུའུ་དབྱིང་ཅེས་གསན་རྗེས་ཐུགས་དགྱེས་ཚོར་ཆེན་པོ་བྱུང་ཞིང་ཁོང་གིས་རིམ་ཁག་འབྲེལ་ཡོད་སྡེ་ཚན་ལ་ཞིང་ལས་ལག་རྩལ་ཁྱབ་གདལ་གྱི་ཞབས་ཞུའི་ལས་དོན་མུ་མཐུད་ཏན་ཏིག་ངང་ཡག་པོ་སྒྲུབ་པ་དང་གཡོག་བྱེད་ཞིབ་ཚགས་བྱེད་པ་དང་སྦྲགས་མཐུན་སྦྱོར་འབྲེལ་གཏུག་ལ་ཤུགས་སྣོན་བརྒྱབ་ནས་ལྗོངས་ནང་ཁུལ་གྱི་ས་མཐོའི་ཁྱད་ལྡན་ཞིང་ལས་ཐོན་རྫས་ལས་སྣོན་ཁེ་ལས་དང་འབྲེལ་མཐུད་བྱེད་ཤུགས་ཆེ་རུ་གཏོང་བ་དང་ཐོན་ཚོང་འབྲེལ་མཐུད་ལ་སྐུལ་མ་བཏང་སྟེ་ཞིང་ལས་ཐོན་རྫས་ཀྱི་མི་མངོན་པའི་སྟོབས་ཤུགས་ཟམ་མི་ཆད་པར་སྔོག་འདོན་གྱིས་ཞིང་པར་འབབ་འཕར་ཕྱུག་འགྱུར་ཡོང་བའི་སྣེ་ཁྲིད་བྱེད་དགོས་ཞེས་མངགས་བཅོལ་ཟབ་མོ་གནང་བ་རེད།
དེ་རྗེས་ཝུའུ་དབྱིང་ཅེ་དང་བཅས་པས་ལྷོ་ཁ་ས་ཁུལ་དང་གོང་དཀར་རྫོང་གི་འགན་འཁུར་བློ་མཐུན་གཙོ་བོ་དང་གཞི་རིམ་གྱི་ལས་བྱེད་པ་དང་བཞུགས་མོལ་གནང་བ་རེད། ལྷོ་ཁ་ས་ཁུལ་གྱི་མིག་སྔའི་དཔལ་འབྱོར་དང་སྤྱི་ཚོགས་འཕེལ་རྒྱས་སྐོར་གྱི་གནས་ཚུལ་གྱི་སྙན་སེང་གསན་རྗེས་ཝུའུ་དབྱིང་ཅེས་2016ལོ་ནི“ལོ་ལྔ་ཚན་བཅུ་གསུམ་པའི”འཆར་འགོད་ལག་བསྟར་དང་འབྱོར་འབྲིང་སྤྱི་ཚོགས་ཕྱོགས་ཡོངས་ནས་སྐྲུན་ཐུབ་པ་བྱེད་པའི་རྒྱལ་ཁ་ཕུ་ཐག་གཅོད་པའི་དུས་མཚམས་ཀྱི་འགོ་ཚུགས་ལོ་ཡིན་པས་འདི་ལོའི་དཔལ་འབྱོར་དང་སྤྱི་ཚོགས་འཕེལ་རྒྱས་དང་བརྟན་ལྷིང་གི་ལས་དོན་ཁག་ཏན་ཏིག་ངང་ཡག་པོ་སྒྲུབ་པའི་འགན་འཁྲི་ཧ་ཅང་ལྕི་པོ་ཡོད། མིག་སྔར་ལྗོངས་ཡོངས་ཀྱི་རིམ་ཁག་ཏང་སྲིད་རྩ་འཛུགས་ཀྱིས་ལྗོངས་ཏང་ཨུད་དང་སྲིད་གཞུང་གི་བརྟན་ལྷིང་སྲུང་སྐྱོང་གི་བྱ་ཐབས་ཁག་བཅུ་ཕྱོགས་ཡོངས་ནས་དོན་འཁྱོལ་བྱས་ཏེ་ལྗོངས་ཡོངས་ཀྱི་སྤྱི་ཚོགས་དུས་བབ་བརྟན་ལྷིང་ཡོང་རྒྱུ་འགན་ལེན་བྱེད་པ་དང་དུས་མཚུངས་ཕྱོགས་གསུམ་ཐད་ཀྱི་ལས་དོན་གཙོ་གནད་ཐོག་ཡག་པོ་སྒྲུབ་དགོས་པ་སྟེ། གཅིག་ནས་རྒྱལ་ཡོངས་ཀྱི་ཚོགས་འདུ་གཉིས་ཀྱི་དགོངས་དོན་སློབ་སྦྱོང་དང་། དྲིལ་བསྒྲགས། ལག་བསྟར། དོན་འཁྱོལ་བཅས་བྱ་རྒྱུ་དེ་ཆབ་སྲིད་ཀྱི་ལས་འགན་གལ་ཆེན་ཞིག་ཏུ་བརྩིས་ནས་དམ་འཛིན་ཡག་པོ་བྱེད་དགོས་ཤིང་། གོ་བདེ་ཤེས་སླའི་རྣམ་པའི་ཐོག་ནས་རྒྱལ་ཡོངས་ཀྱི་ཚོགས་འདུ་གཉིས་ཀྱི་དགོངས་དོན་དྲིལ་བསྒྲགས་དང་སློབ་སྦྱོང་ཡག་པོ་བྱས་ནས་རྒྱ་ཆེའི་ཏང་ཡོན་ལས་བྱེད་མང་ཚོགས་ལ་ཚོགས་འདུའི་དགོངས་དོན་སྔར་བས་གོ་བ་གཏིང་ཟབ་ལེན་རྒྱུའི་ཁྲིད་སྟོན་བྱས་ཏེ་བརྟན་ལྷིང་སྲུང་སྐྱོང་དང་འཕེལ་རྒྱས་མགྱོགས་སུ་གཏོང་བའི་ཡིད་ཆེས་དང་ཆོད་སེམས་འཕེལ་བ་བྱེད་དགོས་པ་དང་། གཉིས་ནས་དཔྱིད་དུས་ཀྱི་ཞིང་འབྲོག་ལས་ཐོན་སྐྱེད་ལས་དོན་ཏན་ཏིག་ངང་ཡག་པོ་སྒྲུབ་དགོས་ཤིང་། འཕེལ་རྒྱས་ཀྱི་འདུ་ཤེས་ཆེན་པོ་ལྔ་ལག་བསྟར་དོན་འཁྱོལ་དང་གནད་སྨིན་དབུལ་སྒྲོལ་འགག་སྒྲོལ་དང་ཟུང་འབྲེལ་དམ་ཟབ་བྱས་ནས་ཞིང་ལས་ཐོན་ལས་ཅན་གྱི་ཆུ་ཚད་གོང་མཐོར་གཏོང་རྒྱུར་དམིགས་ཏེ་ས་ཞིང་གོ་རིམ་ལྡན་པའི་ངང་གཞན་བསྒྱུར་བྱ་རྒྱུར་ཁྲིད་སྟོན་དང་སྐུལ་སྤེལ་གཏོང་བ་དང་། ས་ཞིང་སྤྱོད་ཚད་ཆེ་རུ་གཏོང་བ། ཞིང་འབྲོག་ཁུལ་གྱི་ཐོན་སྐྱེད་ནུས་ཤུགས་ལ་བཅིངས་འགྲོལ་གཏོང་བ་བཅས་ཀྱི་ཐོག་ནས་རང་ལྗོངས་ཀྱི་ཁྱད་ཆོས་དང་འཚམ་པའི་དེང་རབས་ཀྱི་ཞིང་འབྲོག་ལས་གསར་གཏོད་འཕེལ་རྒྱས་ཀྱི་ལམ་བུ་ཞིག་གཏོད་དགོས། འདེབས་འཛུགས་ལས་རིགས་ཀྱི་གྲུབ་ཆ་ཟམ་མི་ཆད་པར་བཟང་སྒྲིག་བྱས་ནས་ཞིང་ལས་ལ་ཚན་རྩལ་གྱི་ལེགས་སྐྱེས་འབུལ་ཚད་མཐོ་རུ་གཏོང་རྒྱུར་དམིགས་ཏེ“བོད་ནས་ཨང་2000”སོགས་སོན་བཟང་དཔེ་སྟོན་ཁྱབ་གདལ་ལས་དོན་མུ་མཐུད་ཏན་ཏིག་ངང་ཡག་པོ་སྒྲུབ་པ་དང་ཞིང་འབྲོག་ལས་ཀྱི་ཚན་རྩལ་ཞབས་ཞུའི་འདེགས་སྐྱོར་ལ་ཤུགས་སྣོན་རྒྱག་པ། ལྗོངས་ཡོངས་ཀྱི་ཞིང་འབྲོག་ལས་ཐོན་སྐྱེད་བྱེད་སྟངས་བསྒྱུར་མགྱོགས་སུ་གཏོང་བས་ཞིང་འབྲོག་ལས་བརྟན་པོ་དང་། ནུས་ཆེ། རྒྱུན་སྲིང་བཅས་ཀྱི་སྒོ་ནས་འཕེལ་རྒྱས་ཡོང་བ་བྱེད་དགོས་པ། གསུམ་ནས“སློབ་སྦྱོང་གཉིས་དང་ཚད་ལོན་གཅིག”གི་བྱེད་སྒོ་སྒྲིག་འཛུགས་དང་འཆར་འགོད་ཡག་པོ་བྱས་ནས་རྒྱ་ཆེའི་ཏང་ཡོན་ལས་བྱེད་པར་སློབ་སྦྱོང་ཐད་འབད་བརྩོན་ཧུར་ཐག་བྱེད་པ་དང་ལས་སྒྲུབ་ཐད་ཕན་འབྲས་ཐོན་པའི་སློབ་གསོ་གཏོང་བ་དང་ཁྲིད་སྟོན་བྱས་ཏེ“ནན་གསུམ་དྲང་གསུམ”དཔེ་སྟོན་ལག་ལེན་བྱེད་པ་དང་། “བོད་སྐྱོད་པ་རྒན་གྲས་ཀྱི་སྙིང་སྟོབས”རྒྱུན་འཛིན་དང་དར་སྤེལ་གཏོང་བ། “ཡོད་པ་གསུམ་དང་མི་སྐྲག་པ་བཞི”དར་སྤེལ་གཏོང་བ་བཅས་ཀྱི་ཐོག་ནས་ལས་གཅེས་ལས་བཀུར་དང་སྒེར་སེམས་མེད་པའི་ལེགས་སྐྱེས་ཕུལ་ཏེ་བོད་འཕེལ་རྒྱས་མྱུར་པོ་དང་ཡུན་རིང་བདེ་འཁོད་ཆེད་ལེགས་སྐྱེས་གསར་པ་སྔར་བས་ཆེ་བ་འབུལ་དགོས་པའི་ནན་བཤད་གནང་བ་རེད།
