ས་གནས་དེ་གའི་གསར་འགྱུར་ལས་རིགས་ཀྱིས་གནས་ཚུལ་སྤེལ་བར་གཞིགས་ན། མིག་སྔར་མཚོ་སྔོན་ཞིང་ཆེན་གྱི་མང་ཚོགས་ནས་རྒྱལ་ཡོངས་ཀྱི་གྲོང་ཁྱེར་༢༨༠ལྷག་ཙམ་ལ་འཐེན་ཐུག་ཟ་ཁང་ཉིས་ཁྲི་དགུ་སྟོང་ལྷག་ཁེ་གཉེར་བྱེད་ཀྱི་ཡོད་པ་དང་། ལོ་ཧྲིལ་པོའི་ཁེ་གཉེར་ཡོང་འབབ་སྒོར་དུང་ཕྱུར་༡༨༠ལྷག་ཟིན་པ་དང་། ལོ་ཧྲིལ་པོའི་ཡོང་འབབ་གཙང་མ་སྒོར་དུང་ཕྱུར་༤༥ཟིན་ཡོད་ལ། ལོ་ཧྲིལ་པོའི་ཟླ་ཕོགས་རང་བཞིན་གྱི་ཡོང་འབབ་སྒོར་དུང་ཕྱུར་༤༠ཙམ་ཟིན་ཡོད། ལོ་ཧྲིལ་པོར་གྲོང་གསེབ་ཀྱི་ངལ་རྩོལ་ནུས་ཤུགས་ལྷག་མ་མིའི་ཐེངས་གྲངས་ཆིག་འབུམ་བརྒྱད་ཁྲི་ལས་ཞུགས་སྤོ་སྒྱུར་བྱས་ཡོད། འཐེན་ཐུག་གི་དཔལ་འབྱོར་གོང་འཕེལ་མྱུར་པོ་ཕྱིན་ནས། མཚོ་སྔོན་གྱི་དམིགས་གསལ་ཁྱད་ཆོས་ལྡན་པའི་དབུལ་སྐྱོར་ལམ་བུ་ཞིག་གཏོད་ཡོད། གྲངས་གཞི་ལས་མངོན་པར། འཐེན་ཐུག་དཔལ་འབྱོར་གྱི་ཡོང་འབབ་དེས་མཚོ་སྔོན་ཞིང་ཆེན་གྱི་ངལ་རྩོལ་ཡོང་འབབ་ཀྱི་གསུམ་ཆ་གཅིག་ཟིན་གྱི་ཡོད་པ་དང་། ལྷག་པར་དུ་ངལ་རྩོལ་ཡོང་འབབ་ཀྱིས་གཙོ་བོ་བྱེད་པའི་མཚོ་ཤར་གྲོང་ཁྱེར་བ་ཡན་ཧུད་རིགས་རང་སྐྱོང་རྫོང་དང་ཡ་རྫི་སྰ་ལ་རིགས་རང་སྐྱོང་རྫོང་དུ་འཐེན་ཐུག་གི་དཔལ་འབྱོར་ཡོང་འབབ་དེས་ཞིང་པའི་མི་རེའི་ཡོང་འབབ་གཙང་མའི་བརྒྱ་ཆ་༧༠ཡན་ཟིན་གྱི་ཡོད་པས། འཐེན་ཐུག་གི་དཔལ་འབྱོར་ཡོང་འབབ་དེ་ཞིང་ཆེན་དེ་གའི་ཞིང་པའི་ཡོང་འབབ་ཀྱི་གྲུབ་ཆ་གཙོ་བོ་ཞིག་ལ་འགྱུར་ཡོད་ཅེས་བཤད་ཆོག བསྡོམས་རྩིས་ལ་གཞིགས་ན། མཚོ་སྔོན་ཞིང་ཆེན་གྱི་ཕྱི་ཕྱོགས་སུ་འཐེན་ཐུག་དཔལ་འབྱོར་ཐད་ལས་ཀ་བྱེད་མཁན་གྱི་ལས་མིའི་བུ་ཕྲུག་ས་གནས་དེ་གར་སློབ་གྲྭར་ཞུགས་ཚད་མི་༦༥༠༠ལྷག་ཟིན་གྱི་ཡོད་པ་རེད།
