2016ལོའི་ཟླ་4ཚེས་1ཉིན། ཀྲུང་དབྱང་མི་རིགས་སློབ་ཆེན་གྱི་ར་སྐོར་ཕྱི་ནང་ཀུན་ཏུ་མེ་ཏོག་སྣ་མང་ཁྲ་ཆིལ་ལེར་བཞད་ཅིང་དཔྱིད་དཔལ་གྱི་གསོན་ཤུགས་ཀྱིས་ཀུན་ནས་ཁེངས། སློབ་ཆེན་གྱི་ལུས་རྩལ་ར་བར་འདུ་འཛི་ཧ་ཅང་འཁྲུག་པོ་ཡོད། རྒྱལ་སའི་སློབ་ཆེན་ཁག་ནས་ཡོང་བའི་སློབ་ཆེན་སློབ་མ་དང་འབྲེལ་ཡོད་སྡེ་ཚན་གྱི་ལས་བྱེད་མི་སྣ་སོགས་བོད་རིགས་སྤུན་ཟླ་ཕོ་མོ་ལྔ་བརྒྱ་ལྷག་གཅིག་ཏུ་འཛོམས་ནས། “སྲོང་བཙན་བུམ་པའི་”གཟེབ་གྲུག་འགྲན་བསྡུར་གྱི་འགོ་ཚུགས་པར་བསུ་བ་བྱས།
འགྲན་སྡུར་སྒྲིག་འཛུགས་ཨུ་ལྷན་གྱི་ཀྲུའུ་ཞི་འཕགས་མོ་ཚེ་རིང་གིས་ངོ་སྤྲོད་བྱས་པ་ལྟར་ན། སྐབས་འདིའི་གསེབ་གྲུག་འགྲན་སྡུར་ལ་སྐྱེས་པ་དང་བུད་མེད་སྤོ་ལོ་རུ་ཁག་39ཞུགས་ཡོད། ཀྲུང་གོའི་བོད་རིག་པ་ཞིབ་འཇུག་ལྟེ་གནས། མི་རིགས་དཔེ་སྐྲུན་ཁང་། རྒྱལ་ཁབ་མི་རིགས་ཡིག་སྒྱུར་ལྟེ་གནས་སོགས་ལས་ཁུངས་ཚོགས་ཆུང་དང་། སློབ་མའི་རུ་ཁག་ལ་སྐྱེས་པ་དང་སྐྱེས་མའི་ཚོགས་ཆུང་གཉིས་སུ་བགར་ཡོད། ཀྲུང་དབྱང་མི་རིགས་སློབ་ཆེན་བོད་རིག་པའི་སློབ་གླིང་། པེ་ཅིང་ལུས་རྩལ་སློབ་ཆེན། ཀྲུང་དབྱང་ནོར་སྲིད་དཔལ་འབྱོར་སློབ་ཆེན། པེ་ཅིན་འགྲིམ་འགྲུལ་སློབ་ཆེན་སོགས་སྐྱེས་པའི་རུ་ཁག་དང་། སྐྱེས་མའི་རུ་ཁག་ལ་ཀྲུང་དབྱང་མི་རིགས་སློབ་ཆེན། པེ་ཅིང་སློབ་ཆེན། པེ་ཅིང་བོད་ལྗོངས་སློབ་འབྲིང་། རྒྱལ་ས་དགེ་ཐོན་སློབ་ཆེན་བཅས་ཀྱི་རུ་ཁག་ཡོད། ཁོ་ཚོས་དུས་ཡུན་ཟླ་བ་གཅིག་གི་ནང་འགྲན་བསྡུར་བྱ་རྒྱུ་རེད།
སྲོང་བཙན་སྒམ་པོ་ནི་བོད་ཀྱི་རྒྱལ་རབས་ལོ་རྒྱུས་སྟེང་ཆེས་རླབས་ཆེ་བའི་བཙན་པོ་ཞིག་ཡིན། ཁོས་བོད་ཁམས་གཅིག་གྱུར་བྱས་ཅིང་། རྒྱ་བཟའ་ཀོང་ཇོ་ཁབ་ཏུ་བཞེས་ཏེ་རྒྱ་བོད་བར་གྱི་འབྲེལ་ལམ་ལ་འོད་སྟོང་འབར་བའི་བྱས་རྗེས་ལོ་རྒྱུས་ཀྱི་དེབ་ཐེར་བཀོད་ཡོད། སྲོང་བཙན་སྒམ་པོ་མིང་དུ་བཏགས་པའི་འགྲན་བསྡུར་འདི་ནི་1991ལོར་གཉེར་འགོ་ཚུགས་པ་དང་ད་ལོའི་བར་ལོ་ངོ་ཉི་ཤུ་ལྷག་འགོར། འགྲན་བསྡུར་ལ་ཀྲུང་དབྱང་འཐབ་ཕྱོགས་གཅིག་གྱུར་པུའུ་དང་རྒྱལ་ཁབ་མི་རིགས་དོན་གཅོད་ཨུ་ལྷན་སོགས་སྡེ་ཚན་གྱིས་རྒྱབ་སྐྱོར་ཐོབ། ལྷག་པར་ཏུ་འདས་ཟིན་པའི་རྒྱལ་ཡོངས་མི་དམངས་འཐུས་ཚོགས་ཀྱི་དེ་སྔའི་ཨུ་ཡོན་ཀྲང་གཞོན་པ་དང་རྒྱལ་ཡོངས་སྲིད་གྲོས་ཀྱི་དེ་སྔའི་ཀྲུའུ་ཞི་གཞོན་པ་ང་ཕོད་ངག་དབང་འཇིགས་མེད་ཀྱིས་ཐུགས་ཁུར་རྒྱབ་སྐྱོར་བྱས་པ་མ་ཟད། “སྲོང་བཙན་བུམ་པའི་”ཕྱག་བྲིས་སྩོལ་གནང་མཛད། ད་ལྟ་སྲོང་བཙན་བུམ་པ་ནི་པེ་ཅིང་གི་བོད་རིགས་སྤུན་ཟླ་ཕན་ཚུན་དབར་འབྲེལ་འདྲིས་དང་མཛའ་གཤིས་ཟབ་ཏུ་གཏོང་བའི་སྟེགས་བུ་གལ་ཆེན་ཞིག་ཏུ་གྱུར་ཡོད།
