ཐབ་ཚང་གི་ཐབ་ལས་བྱེད་ས་དང་དུག་སེལ་བྱེད་ཁུལ་དུ་པར་ལེན་འཕྲུལ་ཆས་སྒྲིག་སྦྱོར་བྱས་ཏེ། ཐབ་ཚང་དེ་ཁ་གསལ་གཏིང་གསལ་དུ་འགྱུར་བ་བྱས་ཡོད། ཉེ་དུས། མཚོ་སྔོན་གྱི་ཟ་འཐུང་ཞབས་ཞུའི་ཚན་པ་ཆེ་འབྲིང་ཁག་གིས་ཐབ་ཚང་ཁ་གསལ་གཏིང་གསལ་དུ་འགྱུར་བ་བྱས་ནས། ཟ་རིགས་བཟོ་བའི་བརྒྱུད་རིམ་ཚང་མ་མཛད་སྤྱོད་པས་མཐོང་ཐུབ་པ་བྱས་ཡོད། ཁ་གསལ་གཏིང་གསལ་གྱི་ཐབ་ཚང་དེ་རིགས་སྔོན་དཔགས་བྱས་ན་ལོ་མཇུག་གོང་ཞིང་ཆེན་དེ་ཡོངས་ཀྱི་ཟ་འཐུང་ཞབས་ཞུའི་ཚན་པ་ཆེ་འབྲིང་བརྒྱ་ཆ་80ཁྱབ་པ་བྱ་རྒྱུ་ཡིན་པ་རེད།
ངོ་སྤྲོད་བྱུང་བར་གཞིགས་ན། སྤྱི་ལོ་2015ལོའི་ལོ་མཇུག་བར་སླེབས་དུས། མཚོ་སྔོན་ལ་ཟ་འཐུང་ཞབས་ཞུའི་ཚན་པ་ཆེ་འབྲིང་9170ཚང་མས་ཁ་གསལ་གཏིང་གསལ་གྱི་ཐབ་ཚང་ལས་གཉེར་བྱེད་པ་དེས། ཞིང་ཆེན་དེའི་ཟ་འཐུང་ཞབས་ཞུའི་ཚན་པ་ཆེ་འབྲིང་བསྡོམས་འབོར་གྱི་བརྒྱ་ཆ་63.3ཟིན་ཡོད། བུ་བཅོལ་ཁང་ཚུད་པའི་སློབ་གྲྭ་1064ཟ་ཁང་ནང་དུའང་ཁ་གསལ་གཏིང་གསལ་གྱི་ཐབ་ཚང་སྤྱད་པ་དེ་ཞིང་ཆེན་དེའི་བུ་བཅོལ་ཁང་ཚུད་པའི་སློབ་གྲྭའི་བསྡོམས་འབོར་གྱི་བརྒྱ་ཆ་65.5ཟིན་ཡོད། སྤྱི་ལོ་2016ལོར་མཚོ་སྔོན་གྱིས་མུ་མཐུད་ཟ་འཐུང་ཞབས་ཞུའི་ཚན་པ་ཆེ་འབྲིང་ནང་ཁ་གསལ་གཏིང་གསལ་གྱི་ཐབ་ཚང་བྱེད་སྒོར་སྐུལ་འདེད་གཏོང་རྒྱུ་ཡིན་པ་རེད།
གཞན་ཡང་། ཟ་རིགས་བདེ་འཇགས་འགན་སྲུང་བྱེད་ཆེད། མཚོ་སྔོན་གྱིས་སྤྱི་དམངས་ནས་ཐེར་འདོན་ཁ་པར་ཨང་གྲངས་12331བརྒྱབ་ནས། ཞིང་ཆེན་དེའི་ཟ་རིགས་དང་སྨན་རྫས། བདེ་སྲུང་དངོས་རྫས་སོགས་ཐོན་སྐྱེད་ལས་གཉེར་བྱེད་རིང་གི་ཁྲིམས་འགལ་བྱ་སྤྱོད་ཐེར་འདོན་བྱ་རྒྱུར་སྐུལ་མ་བཏང་བ་དང་། དོན་དངོས་ཡིན་པ་བརྟག་དཔྱད་བྱས་རྗེས་ཐེར་འདོན་བྱེད་མཁན་ལ་བྱ་དགའ་སྤྲོད་རྒྱུ་ཡིན་པ་རེད།
