ཨ་རིའི་ཙུང་ཐུང་ཨོ་པ་མས་སྤྱི་ཚེས་25ཉིན་སི་རི་ཡར་དམག་དོན་མི་སྣ་250སྣོན་གཏོང་བྱས་ནས། སི་རི་ཡའི་ཞི་འཇམ་ཤོག་ཁག་སྲིད་གཞུང་ལ་ངོ་རྒོལ་དྲག་ཆས་པས་ཐལ་སྐྱོད་སྒྲིག་འཛུགས་དབྱི་སི་ལན་རྒྱལ་ཁབ་ཟེར་བར་རྡུང་རྡེག་གཏོང་རོགས་བྱ་རྒྱུའི་ཁྱབ་བསྒྲགས་བྱས་འདུག
འབྱར་མན་གྱི་བྱང་རྒྱུད་གྲོང་ཁྱེར་ཧན་ནོ་ཝེར་འཚམས་འདྲི་གནང་བཞིན་པའི་ཨོ་པ་མས་ཉིན་དེ་རང་དུ་གཏམ་བཤད་སྤེལ་སྐབས་གཏན་འབེབས་དེ་ཁྱབ་བསྒྲགས་གནང་བ་དང་། ཁོང་གིས། ཨ་རིས་དེའི་གོང་དུ་སི་རི་ཡར་མི་50ཡོད་པའི་དམིགས་བསལ་དཔུང་སྡེ་ཞིག་མངགས་སྡོད་བྱས་ནས་སི་རི་ཡའི་ཞི་འཇམ་ཤོག་ཁག་སྲིད་གཞུང་ལ་ངོ་རྒོལ་དྲག་ཆས་པས་ཐལ་སྐྱོད་པའི་ལག་ནས་གལ་ཆེའི་ས་ཆ་ཚུར་ལེན་རྒྱུར་རོགས་རམ་བྱས་པ་དང་འགག་རྩའི་ནུས་པ་འདོན་སྤེལ་བྱས་ཡོད། གྲུབ་འབྲས་དེའི་རྨང་གཞིའི་ཐོག ཁོང་ནས་དམིགས་བསལ་དཔུང་སྡེ་ཚུད་པའི་དམག་དོན་མི་སྣ་250སྣོན་གཏོང་བྱས་ནས། མིག་སྔར་དབྱི་སི་ལན་རྒྱལ་ཁབ་ཟེར་བར་རྡུང་རྡེག་གཏོང་བའི་རྣམ་པ་རྒྱུན་མཐུད་བྱ་རྒྱུར་ཆོག་མཆན་སྤྲད་ཡོད་ཅེས་བསྟན་འདུག
ཨོ་པ་མས་ཡོ་རོབ་རྒྱལ་ཁབ་དང་བྱང་ཆིངས་སྒྲིག་འཛུགས་ཁོངས་གཏོགས་རྒྱལ་ཁབ་ཁག་ནས་དབྱི་སི་ལན་རྒྱལ་ཁབ་ཟེར་བར་རྡུང་རྡེག་གཏོང་རྒྱུའི་ཐད་སྟོབས་ཤུགས་སྔར་བས་མང་བ་ལེགས་སྐྱེས་འབུལ་དགོས་པའི་རེ་འབོད་གནང་འདུག
ཉིན་དེའི་དགོང་དྲོ། ཨོ་པ་མས་ད་དུང་འབྱར་མན་གྱི་ཙུང་ལི་མོ་ཁེར་དང་དབྱིན་ཇིའི་དབུ་ཞུགས་བློན་ཆེན་ཁ་མེ་ལུན། ཧྥ་རན་སིའི་ཙུང་ཐུང་ཨོ་ལང་ཏེ། དབྱི་ཊ་ལིའི་ཙུང་ལི་ལུན་ཆི་བཅས་དང་མཇལ་འཛོམས་གནང་བ་དང་། ཨོ་པ་མས། ད་རེས་ཀྱི་་དབྱི་སི་ལན་རྒྱལ་ཁབ་ཟེར་བར་རྡུང་རྡེག་གཏོང་རྒྱུའི་གནད་དོན་ཐད་རྒྱལ་ཁབ་ཁག་གི་འགོ་ཁྲིད་པ་དང་གྲོས་ཞིབ་བྱ་རྒྱུ་ཡིན་ཞེས་བསྟན་འདུག
