ཀྲུང་གོའི་བོད་ལྗོངས་དྲ་བས་གནས་མཆོག་ལྷ་ས་ནས་བསྒྲགས་པའི་གསར་འགྱུར། ཉིན་འདི་དག་གི་རིང་ལ་མི་སྣ་གལ་ཆེན་ཞིག་ཕེབས་བཞིན་ཡོད་པ་ལ་ཚང་མས་དོ་སྣང་གནང་ཡོད། དེ་ནི་རྒྱལ་ཁབ་ཕྱི་ནང་གི་སྨྱན་ལམ་ཁག་ཏུ་ཀུན་གྱིས་དོ་་སྣང་བྱ་ཆོས་ལུགས་ཀྱི་མི་སྣ་གྲགས་ཅན་དུ་བསྔགས་པའི་པཎ་ཆེན་ཕྱིར་བོད་ལ་ཕེབས་བཞིན་ཡོད་པ་རེད། པཎ་ཆེན་སྐུ་ཕྲེང་བཅུ་གཅིག་པ་ནི་བོད་བརྒྱུད་ནང་བསྟན་གྱི་དབུ་ཁྲིད་ཅིག་ཡིན་པས། ཁོང་ཕེབས་པར་བོད་རང་སྐྱོང་ལྗོངས་ཀྱི་མགོ་ཁྲིད་དང་བོད་ལྗོངས་ཀྱི་སྐྱེས་ཆེན་དམ་པ་ཚོས་མཐོང་ཆེན་ཚད་མཐོན་པོ་བྱེད་བཞིན་ཡོད། ཚང་མས་ཕོ་ལོ་སུམ་ཅུར་ཡང་སླེབས་མེད་པའི་བླ་མ་འདི་ཕེབས་ས་ཚང་མར་འཁྲུག་ཆ་དོད་པོ་འདུག་ཟེར་བཞིན་ཡོད། དེ་ན་འཁྲུག་ཆ་ག་འདྲ་ཡོད་དམ་ཞེ་ན་ཕེབས་བསུའི་གཞི་རྒྱ་དང་ས་གནས། ཕེབས་བསུར་བཅར་མཁན་བཅས་ལས་ཅུང་ཟད་ཤེས་ཐུབ།
པཎ་ཆེན་བཅུ་གཅིག་པ་བཞུགས་གླིང་དུ་ཕེབས་པ།
གནམ་ཐང་གི་བསུ་བ་ལ་ཚད་གཞི་ཤིན་ཏུ་མཐོ།
མི་སྣ་གལ་ཆེན་ཡིན་ན་ཕེབས་བསུའི་མཛད་སྒོ་ནི་ག་ས་གང་དུ་སྤེལ་བཞིན་ཡོད། པཎ་ཆེན་ཀྲུང་གོའི་མཁའ་འགྲུལ་གྱི་གནམ་གྲུར་བཞུགས་ནས་གོང་དཀར་གནམ་ཐང་ལ་མ་སླེབས་གོང་བོད་རང་སྐྱོང་ལྗོངས་ཏང་ཨུའི་རྒྱུན་ལས་ཧྲུའུ་ཅི་གཞོན་པ་ཝུའུ་དབྱིང་ཅེ་ཕེབས་བསུའི་མི་ཚོགས་ཀྱི་མདུན་དུ་འགྲེང་ཞིང་བསྒུག་ཡོད་ལ། ཝུའུ་དབྱིང་ཅེ་ཡི་རྒྱབ་ཕྱོགས་སུ་ཆས་གོས་གང་མཛེས་བཀླུབས་པའི་བོད་རིགས་ན་གཞོན་ཕོ་མོས་ལག་ཏུ་བཀྲ་ཤིས་པའི་བྱེ་མར་དང་དག་གཙང་གི་ཁ་བཏགས་བཟུང་ནས་སྨོན་འདུན་བཟང་བོ་པཎ་ཆེན་མཆོག་ལ་འབུལ་རྒྱུར་བསྒུག་ཡོད།
འཕགས་པ་ལྷ་དགེ་ལེགས་རྣམ་རྒྱལ་དང་པཎ་ཆེན་གཉིས་ཀྱིས་ཕན་ཚུན་ལ་མཇལ་དར་བསྒྲོན་པ།
བཞུགས་གླིང་དུ་ཕེབས་བསུ་མཁན་སྐོར་གསུམ་ཡོད་པ།
གནམ་ཐང་གི་ཕེབས་བསུའི་མཛད་སྒོ་སྒྲིལ་རྗེས་ལྷ་ས་གྲོང་ཁྱེར་གྱི་པཎ་ཆེན་བཞུགས་གླིང་རྡོ་རྗེ་ཕོ་བྲང་དུ་དེ་ལས་ཀྱང་རྒྱ་ཆེ་བའི་ཕེབས་བསུ་ཞིག་སྟ་གོན་བྱས་ཡོད།
འདིར་བཅར་བའི་ཕེབས་བསུ་མཁན་སྐོར་དང་པོ་ནི་གྲྭ་བཙུན་ཡིན་ལ། པཎ་ཆེན་བཞུགས་གླིང་གི་ཉེ་སར་བཅར་རྗེས་རླངས་འཁོར་ནས་བབས་པ་ན། ཁོང་ཚོས་ལག་ཏུ་སྤོས་ཕོར་དང་རྒྱལ་མཚན། གདུགས་སོགས་བཟུང་ཞིང་། རོལ་སྙན་གྱིས་སྣ་དྲངས་ནས་བོད་བརྒྱུད་ནང་བསྟན་གྱི་ཕེབས་བསུའི་མཛད་སྒོའི་གུས་ལུགས་ཆེས་རྒྱས་ཤོས་ཀྱིས་པཎ་ཆེན་མཆོག་ལ་ཕེབས་བསུ་ཞུས་ཡོད། ཁོང་ཚོའི་ཁྱད་ཆོས་ནི་རོལ་མོའི་སྒྲ་སྙན་ལ། མི་ཚོགས་གཞི་རྒྱ་ཆེ།
སྐོར་གཉིས་པ་ནི་བོད་རང་སྐྱོང་ལྗོངས་ཀྱི་མགོ་ཁྲིད་དང་སྐྱེས་ཆེན་དམ་པ་ཁག་ཡིན་ལ། དགུངས་གྲངས76སོན་པའི་རྒྱལ་ཡོངས་སྲིད་གྲོས་ཀྱི་ཀྲུའུ་ཞི་གཞོན་པ་དང་ཆོས་ལུགས་པའི་སྡེ་ཡི་རྒྱལ་གཅེས་མི་སྣ་སྐད་གྲགས་ཅན་འཕགས་པ་ལྷ་དགེ་ལེགས་རྣམ་རྒྱལ་པཎ་ཆེན་བསུ་བར་བཅར་ཞིང་ཕན་ཚུན་ལ་འཚམ་འདྲི་དང་མཇལ་དར་ཕུལ་ཡོད། བོད་རང་སྐྱོང་ལྗོངས་ཏང་ཨུའི་ཧྲུའུ་ཅི་གཞོན་པ་དང་རང་སྐྱོང་ལྗོངས་དམངས་འཐུས་རྒྱུན་ཨུ་ཚོགས་པའི་ཀྲུའུ་རེན་པད་མ་འཕྲིན་ལས་དང་། བོད་རང་སྐྱོང་ལྗོངས་ཏང་ཨུའི་ཧྲུའུ་ཅི་གཞོན་པ་དང་རང་སྐྱོང་ལྗོངས་སྲིད་གཞུང་གི་ཀྲུའུ་ཞི་བློ་བཟང་རྒྱལ་མཚན་སོགས་མགོ་ཁྲིད་ཁག་དང་། བཀྲ་ཤིས་ལྷུན་པོ་དགོན་གྱི་བླ་སྤྲུལ་སྐྱེས་ཆེན་ཁག་ཀྱང་འདིར་ཕེབས་ནས་པཎ་ཆེན་ལ་ཕེབས་བསུ་རྒྱ་ཆེན་པོ་བྱས་ཡོད།
དད་ལྡན་སྐྱ་སེར་ཕོ་མོ་མང་པོས་ཁ་པར་སྤྱད་ནས་པཎ་ཆེན་པར་དུ་ལེན་བཞིན་པ།
སྐོར་གསུམ་པ་ནི་དད་ལྡན་མང་ཚོགས་ཡིན་ཞིང་། འདིར་ཡོང་ནས་ཕྱག་མཇལ་ཞུ་བར་བསྒུག་པའི་མི་ཚོགས་ཀྱི་གྲལ་རིང་བོ་བཞུགས་གླིང་གི་ཕྱི་རུ་བསྲིངས་ཡོད། དད་ལྡན་སྐྱ་སེར་ཕོ་མོ་མང་པོས་ལག་ཏུ་ཁ་བཏགས་བཟུང་ཞིང་མགོ་བོ་དུད་ནས་པཎ་ཆེན་ཕེབས་པར་བསྒུགས་ཡོད། པཎ་ཆེན་མཆོག་གིས་གདན་སེར་བོ་བརྒྱུད་ནས་ཕེབས་ཡོང་བ་མཐོང་འཕྲལ་ཁོང་གིས་ཁ་པར་བླངས་ནས་པར་ལེན་དུ་བྲེལ་བཞིན་ཡོད། བོད་ཀྱི་དད་ལྡན་པ་ཚོས་པཎ་ཆེན་རིན་པོ་ཆེ་ནི་འོད་དཔག་མེད་ཀྱི་སྤྲུལ་བ་རུ་འདོད་ཅིང་། ཁོང་གི་སྐུ་བརྙན་ཁ་པར་དུ་བླངས་ན་བྱིན་རླབས་ཐོབ་པར་འདོད་བཞིན་ཡོད།
ཕེབས་བསུའི་ཡར་སྔོན་གྱི་ཉིན་འགའི་རིང་ལ་ལྷ་སའི་གནམ་ངོ་ནི་དྭངས་ཤིང་སྤྲིན་དང་བྲལ་མོད། པཎ་ཆེན་ཕེབས་རྗེས་སྦྲང་ཆར་ཟིམ་བུར་བབས་བྱུང་། དད་ལྡན་པ་ཚོས་སྦྲང་ཆར་འདི་ནི་ཉིན་འདི་དག་ལ་སྐམ་ཐན་གྱིས་གདུང་བའི་མཐོ་སྒང་གི་གསོས་སྨན་ལྟ་བུ་རེད་ཅེས་བསྟོད་ཅིང་བསྔག་བཞིན་འདུག
