ཟླ5པའི་ཚེས13ཉིན། ཀྲུང་གོའི་བོད་བརྒྱུད་མཐོ་རིམ་ནང་བསྟན་སློབ་གླིང་གི་བོན་པོའི་གྲུབ་མཐའི་རྒྱུགས་རའི་ནང་། ཆོས་རྩོད་པས་རྒྱུགས་ལེན་སློབ་མར་དྲི་བ་འཕེན་པ།
2016ལོའི་ཟླ5པའི་ཚེས13ཉིན། པེ་ཅིང་ནུབ་ཀྱི་དགོན་སེར་ཆེན་མོར་ཡོད་པའི་ཀྲུང་གོའི་བོད་བརྒྱུད་མཐོ་རིམ་ནང་བསྟན་སློབ་གླིངདུ་། བོད་བརྒྱུད་ནང་བསྟན་ཆོས་ལུགས་ཀྱི་བླ་མ་སྐྱེས་ཆེན་མང་པོས་ལག་པས་ཕྱག་རྒྱ་འཕེན་ཞོར་ཆོས་རྩོད་བྱེད་བཞིན་ཡོད། གསར་འགོད་པས་རྒྱུས་ལོན་བྱུང་བ་ལྟར་ན། བོད་བརྒྱུད་ནང་བསྟན་གྱི་གྲྭ་བཙུན་རྣམས་ཀྱིས་འབད་འབུངས་ལྷུར་ལེན་གྱིས་སློབ་གཉེར་གནང་བཞིན་པ་མ་ཟད། དེང་རབས་སྤྱི་ཚོགས་ཀྱི་འཕེལ་ཕྱོགས་དང་བསྟུན་ནས་རང་ཉིད་ཀྱི་ཕྱོགས་ཡོངས་མཐོར་འདེགས་གཏོང་གིན་ཡོད་ལ། ལངས་ཕྱོགས་གསལ་བོ་ཡིན་པ་མ་ཟད། བླ་སྤྲུལ་རྫུན་མར་མཐའ་གཅིག་ཏུ་ངོ་རྒོལ་དང་ཁ་རྡུང་དྲག་པོ་གཏོང་བཞིན་མཆིས།
བསྟན་འཛིན་མཚོ་རྒྱལ་གྱིས་བོད་བརྒྱུད་ནང་བསྟན་ཆོས་ལུགས་ལ་བརྟེན་ནས་གཞན་ལ་མགོ་བསྐོར་གཏོང་བར་ངོ་རྒོལ་བྱེད་དགོས་ཞེས་བསྟན།
ད་ལོ་ལོ་ན28ལ་སོན་པའི་བསྟན་འཛིན་མཚོ་རྒྱལ་རིན་པོ་ཆེ་ནི་སི་ཁྲོན་ཞིང་ཆེན་དཀར་མཛེས་ཁུལ་སྡེ་དགེ་རྫོང་ནས་ཕེབས་ཤིང་། དགུང་ལོ10ཡི་སྟེང་དུ་ས་སྐྱ་པའི་བླ་སྤྲུལ་ཞིག་ལ་ངོས་བཟུང་། ཁོང་གིས་མིག་སྔར་ཀྲུང་གོའི་བོད་བརྒྱུད་མཐོ་རིམ་ནང་བསྟན་སློབ་གླིང་དུ་སློབ་གཉེར་བྱེད་བཞིན་མཆིས་ཤིང་། ཡར་སྔོན་ཁོང་གིས་སྡེ་དགེའི་རྫོང་སར་ནང་བསྟན་སློབ་གླིང་དུ་ལོ་ངོ10རིང་སློབ་གཉེར་གནང་བ་མ་ཟད། ཡུལ་དེའི་དགོན་པ་ཞིག་གི་དགོན་བདག་ཏུ་གྱུར་ཡོད།
བསྟན་འཛིན་མཚོ་རྒྱལ་གྱིས “བདག་གིས་ནང་བསྟན་ལ་སློབ་སྦྱོང་མང་དུ་བྱས་མྱོང་མོད། ནང་བསྟན་ཆོས་ལུགས་ཀྱི་གཏིང་ཟབ་པས་འདི་འདྲས་ཙམ་གྱིས་སྦྱངས་པ་མཐར་ཕྱིན་པ་ཞིག་ཡོང་མི་སྲིད”ཅེས་གསུང་ཞིང་། ཁོང་གིས་ཀྲུང་གོའི་བོད་བརྒྱུད་མཐོ་རིམ་ནང་བསྟན་སློབ་གླིང་དང་ཡར་སྔོན་ཁོང་གིས་སློབ་སྦྱོང་གནང་བའི་ནང་བསྟན་སློབ་གླིང་གི་མི་འདྲ་ས་ནི། སྔ་མས་ནང་བསྟན་སློབ་སྦྱོང་ལ་དང་དོད་བྱེད་པའི་མཚུངས་སུ། ད་དུང་རྒྱའི་སྐད་ཡིག་དང་རྩིས་འཁོར་སོགས་སློབ་ཁྲིད་ཀྱང་བཀོད་སྒྲིག་བྱས་ཡོད་པས། དེ་དག་ལ་སྦྱོང་བ་བྱས་ཚེ་ཁོས་རྗེས་ཕྱོགས་དགོན་པའི་ལས་དོན་ལ་དོ་དམ་བྱེད་པར་རོགས་འདེགས་བྱ་ཐུབ་ངེས་སྙམ་བཞིན་ཡོད།
བསྟན་འཛིན་རྒྱ་མཚོ་ལགས་ནི“གཞུང་བཀའ་པོད་ལྔ”ལ་སྦྱངས་པ་མཛད་མཁན་ཞིག་ཡིན་ལ། ཁོང་གིས་ནང་བསྟན་ལ་སྦྱོང་བ་བྱེད་པ་ནི་སྤྲོ་སྐྱིད་ལྡན་པའི་ལས་དོན་ཞིག་ཡིན་ལ། དེར་སྦྱོང་བ་བྱས་པས་ཐ་ན་སུན་སྣང་དང་སྡུག་བསྔལ་ཡང་མེད་པར་འགྱུར་བ་རེད་ཅེས་གསུང་། ཁོང་གིས་ད་དུང་བོད་བརྒྱུད་ནང་བསྟན་ཆོས་ལུགས་ལ་རྒྱུས་ལོན་བྱེད་འདོད་ན་སྔོན་ལ་བོད་ཡིག་སྦྱངས་ནས་བོད་ཡིག་གི་ལམ་ནས་རྒྱུས་ལོན་བྱེད་པ་ལས། འགྱུར་རྩོམ་ལ་བལྟས་ནས་བོད་བརྒྱུད་ནང་བསྟན་གྱི་གསུང་རབ་ལ་སློབ་སྦྱོང་བྱེད་ན་རྒྱུས་ལོན་ཟབ་མོ་ཡོང་མི་ཐུབ་ཅེས་མི་རྣམས་ལ་རང་གི་བསམ་ཚུལ་བཏོན། གཞན་ཡང་། ཁོང་གིས་མི་ལ་ལས་བོད་བརྒྱུད་ནང་བསྟན་ཆོས་ལུགས་ལ་བརྟེན་ནས་གཞན་ལ་མགོ་བསྐོར་གཏོང་བཞིན་པའི་སྤྱོད་ཚུལ་ཐ་ཤལ་དེར་སེམས་ན་བའི་བསམ་ཚུལ་བརྗོད་ཅིང་། ཁོང་རང་ཉིད་ཀྱིས་བསམ་ན། བོད་བརྒྱུད་ནང་བསྟན་ཆོས་ལུགས་ནི་ཧ་ཅང་བླ་ན་མེད་པ་ཞིག་ཡིན་ཕྱིན། དེ་ལྟར་བེད་སྤྱོད་བཏང་ན་མི་འགྲིག་སྙམ།
གསང་སྔགས་ཉི་མས་ནང་བསྟན་ལ་སྦྱོང་བ་བྱེད་ན་གཞན་ཕན་དོན་ལ་གཉེར་དགོས་ཞེས་བཤད།
ད་ལོ་ལོ་ན23ལ་སོན་པའི་གསང་སྔགས་ཉི་མ་ནི་ཉིང་ཁྲི་གྲོང་ཁྱེར་བྲག་ཡིབ་ཁུལ་བུ་ཆུ་གཏེར་གྱི་ལྷ་ཁང་གི་དགོན་བདག་ཡིན་ལ། ཡར་སྔོན་ལྷ་ས་ནང་བསྟན་སློབ་གླིང་ནས་ལོ་གསུམ་རིང་སློབ་གཉེར་གནང་།
གསང་སྔགས་ཉི་མས་གསུང་དོན། ལྷ་སའི་ནང་བསྟན་སློབ་གླིང་དང་ཀྲུང་གོའི་བོད་བརྒྱུད་མཐོ་རིམ་ནང་བསྟན་སློབ་གླིང་གཉིས་ཀྱི་སློབ་ཁྲིད་ཀྱི་རྣམ་པའི་ཐད་ནས་ཁྱད་པར་ཆེན་པོ་མེད་མོད། འོན་ཀྱང་ཕྱི་མས་རྒྱའི་སྐད་ཡིག་དང་ཆ་འཕྲིན་ལག་རྩལ་གྱི་སློབ་ཁྲིད་ཀྱང་བཀོད་སྒྲིག་བྱས་ཡོད། འདིས་ང་ཚོར་ཕན་ཁེ་མི་ཉུང་བ་བསྐྲུན་བྱུང་།“བོད་དུ་རྒྱ་མི་མང་པོ་ཡོད་ལ། རྒྱ་མིའི་དད་ལྡན་མང་ཚོགས་ཀྱང་ཡོད་པས། དགོན་བདག་ཅིག་ཡིན་པའི་ཆ་ནས་རྒྱ་སྐད་འཆད་ཤེས་ཚེ། དད་ལྡན་མང་ཚོགས་ལ་སྔར་ལས་བཟང་བོའི་སྒོ་ནས་ཞབས་འདེགས་ཞུ་ཐུབ་ངེས”
གསང་སྔགས་ཉི་མས་ནང་བསྟན་ལ་སློབ་སྦྱོང་བྱེད་པའི་ཁྲོད་ཆེས་དཀའ་བ་ནི་ཆོས་རྩོད་ཡིན། ལོ་རེའི་ཟླ་ལྔ་པར་མཐར་ཕྱིན་དམ་བཅའ་འཇོག་པའི་སྐབས་སུ། ཀྲུང་གོའི་བོད་བརྒྱུད་མཐོ་རིམ་ནང་བསྟན་སློབ་གླིང་གིས་བོད་ནས་བླ་མ་སྐྱེས་ཆེན70གདན་ཞུ་བྱས་ཏེ་གཟའ་འཁོར་གཅིག་རིང་མཐར་ཕྱིན་སློབ་མར་ཆོས་རྩོད་རྒྱག་པ་རེད།“རྒྱུགས་སྤྲོད་སྟངས་དེ་ནི་ཧ་ཅང་དཀའ་ཚད་ཆེ་བ་ཞིག་ཡིན་པས། མི་ལ་བྲེལ་འཚབ་ཆེན་པོ་བསླང་ངེས”ཞེས་གསུང་།
གསང་སྔགས་ཉི་མས་ནང་བསྟན་ལ་སློབ་སྦྱོང་བྱེད་ན་བདག་ཁོ་ན་མི་བསམ་པར། མར་གྱུར་སེམས་ཅན་ཐམས་ཅད་དང་གཞན་ཕན་དོན་དུ་གཉེར་བའི་སེམས་ལྡན་དགོས་ཞེས་བཤད།
ཁོའི་མ་འོངས་པ་གླེང་སྐབས། གསང་སྔགས་ཉི་མས་མཐར་ཕྱིན་དམ་བཅའ་བཞག་རྗེས་རང་ཉིད་ཀྱི་དགོན་པར་ཕྱིར་ལོག་སྟེ། དགོན་པ་ཉམས་གསོ་བྱ་རྒྱུ་ཡིན་ཟེར།
བོད་བརྒྱུད་ནང་བསྟན་ཆོས་ལུགས་ཀྱི་ཆེས་མཐོ་བའི་སློབ་གླིང་ཡིན་པའི་ཆ་ནས། ཀྲུང་གོའི་བོད་བརྒྱུད་མཐོ་རིམ་ནང་བསྟན་སློབ་གླིང་གིས་ཉེ་ཆར《ལོ་ལྔའི་བྱ་བའི་འཆར་གཞི》བཟོས་ཤིང་། མ་འོངས་པར་སློབ་མ་བསྡུ་བའི་གཞི་ཁྱོན་ཇེ་ཆེར་གཏོང་རྒྱུ་དང་། སྔོན་དཔག་ལྟར་ན2017ལོར་ད་ལྟའི་མི80ལྷག་ནས120ལ་ཇེ་མང་དུ་གཏོང་རྒྱུ་མ་ཟད། 2020ལོར་ཐོན་དུས150ལ་ཇེ་མང་དུ་གཏོང་རྒྱུ་རེད། དུས་མཚུངས་སུ། ས་གནས་སོ་སོའི་ནང་བསྟན་སློབ་གླིང་དུ་སློབ་ཁུལ་གསར་པ་འཛུགས་རྒྱུ་རེད། ཀྲུང་གོའི་བོད་བརྒྱུད་མཐོ་རིམ་ནང་བསྟན་སློབ་གླིང་གི་ཡོན་ཀྲང་གཞོན་པ་ལིའུ་ཕིང་གིས་ངོ་སྤྲོད་པ་ལྟར་ན། ད་ལྟ་བོད་ལྗོངས་དང་མཚོ་སྔོན། ཀན་སུའུ་བཅས་ཀྱི་བོད་སྐད་ཡིག་སྡེ་ཁག་གི་མཐོ་རིམ་ནང་བསྟན་སློབ་གླིང་བཞི་ནས་ལྔ་ཡི་སློབ་ཁུལ་གསར་པ་འཛུགས་གྲུབ་བྱུང་ནས་སྤྱོད་ཀྱིན་ཡོད་པ་མ་ཟད། ད་དུང་སློབ་ཁུལ་གཉིས་འཛུགས་སྐྲུན་བྱེད་སྒང་རེད། “ང་ཚོའི་རེ་བར་མ་འོངས་པར་ནང་བསྟན་སློབ་གླིང་གི་སློབ་མ་བསྡུ་བ་དེ་མིག་སྔའི་དགོན་སྡེ་གཙོ་ཡིན་པ་ནས་ས་གནས་ཀྱི་ནང་བསྟན་སློབ་གླིང་དང་དགོན་སྡེ་གཉིས་ཀ་ནས་བསྡུ་བར་རྒྱ་བསྐྱེད་རྒྱུ་དེ་ཡིན”ཞེས་བཤད།
