ཟླ6པའི་ཚེས14ཉིན་གསར་འགོད་པས་ཞིང་ཆེན་ཏང་ཨུ་དྲིལ་བསྒྲགས་པུའུ་ནས་རྒྱུས་ལོན་བྱས་པ་ལྟར་ན། མཚོ་སྔོན་དང་ཨན་ཧུའེ་ཞིང་ཆེན་གྱི་དྲིལ་བསྒྲགས་པུའུ་གཉིས་ཀྱིས་མཉམ་སྦྲེལ་ཇུས་འདོན་བྱས་ཤིང་། མཚོ་སྔོན་ཞིང་ཆེན་ཡུལ་ཤུལ་བོད་རིགས་རང་སྐྱོང་ཁུལ་གླུ་གར་ཚོགས་པ་དང་ཨན་ཧུའེ་ཞིང་ཆེན་རྩལ་རྩེད་ཚོགས་པ་གཉིས་ཀྱིས་མཉམ་དུ་འཁྲབ་སྟོན་བྱས་པའི་རྒྱལ་ཁབ་སྒྱུ་རྩལ་ཐེབས་རྩའི་རྣམ་གྲངས་སྟེ། གླུ་གར་དང་རྩལ་རྩེད་ཀྱི་ཟློས་གར་ཆེན་མོ་རྒྱལ་སྲས་གངས་གཟིག་ཞེས་པ་དེ་ཟླ6པའི་ཚེས16ཉིན་ཟི་ལིང་ལུས་རྩལ་ཁང་ནུབ་རྒྱུད་བརྩེ་བའི་འཁྲབ་སྟོན་ལྟེ་གནས་ནས་ཐོག་མར་འཁྲབ་སྟོན་བྱ་རྒྱུ་རེད།
རྒྱལ་སྲས་གངས་གཟིག་ནི་རྒྱལ་ཁབ་སྒྱུ་རྩལ་ཐེབས་རྩ་ཚོགས་པས2015ལོའི་གླུ་གར་སྟེགས་བུའི་སྒྱུ་རྩལ་གསར་གཏོད་ཀྱི་རོགས་སྒྲུབ་རྣམ་གྲངས་ཤིག་ཡིན། འཁྲབ་སྟོན་དེ་ཐོག་མར་མདོ་དབུས་གངས་ལྗོངས་ཀྱི་ཁྱད་འཕགས་ཁོར་ཡུག་གི་རྣམ་པ་དང་གནའ་བོའི་བབ་ཆགས་ཀྱི་དམངས་སྲོལ་གོམས་གཤིས་རྒྱབ་ལྗོངས་སུ་བྱས་ཤིང་། རྩལ་རྩེད་སྒྱུ་རྩལ་གྱི་སྐད་བརྡ་སྤྱད་ཡོད། བརྗོད་དོན་ནི་བོད་རིགས་ཨ་མ་ཞིག་གིས་ངོ་གདོང་ལ་ངོ་མཚར་གཟིག་གི་ཐིག་ལེ་ཅན་གྱི་བྱིས་པ་ཞིག་ཏེ་མིང་ལ་བྱམས་པ་ཟེར་བ་ཞིག་བྱམས་ཀྱིས་བསྐྱངས་བ་དང་། ཁོ་ཚོ་ཆག་སྒོ་ལ་འཕྲད་དུས་བྱམས་པས་དཔའ་ངར་ཞུམ་མེད་ཀྱིས་དཀའ་ངལ་རེ་རེ་ཁྱད་དུ་བསད་ནས་ཚོ་བའི་མི་དག་གི་སྲོག་བསྐྱབ་ཆེད་ལ་མེ་ཏོག་གངས་ལྷ་འཐུ་སྐབས། སེམས་ཆུང་མ་བྱས་པར་གཡང་ལ་ལྷུང་བའི་སྐད་ཅིག་དེ་ཉིད་ལ་རྒྱལ་སྲས་གངས་གཟིག་དུ་གྱུར་བ་དང་། རྒྱལ་སྲས་སུ་གྱུར་རྗེས་ཚོ་བའི་མི་རྣམས་ལ་གངས་ལྗོངས་ལྷ་ལམ་དུ་བགྲོད་པར་ལམ་སྟོན་མཛད་པའི་གཏམ་རྒྱུད་རེད། ཐེངས་འདིའི་འཁྲབ་སྟོན་ནི་སྲོལ་རྒྱུན་གྱི་རྩལ་རྩེད་ཟློས་གར་དང་མི་འདྲ་ཞིང་། ལྷག་པར་རྒྱལ་སྲས་གངས་གཟིག་ཅེས་པ་འདིར་མདོ་དབུས་མཐོ་སྒང་དུ་མཐོང་དཀོན་པའི་སྲོག་ཆགས་གངས་གཟིག་བརྗོད་གཞིར་བཟུང་བ་དང་། བོད་མི་རིགས་ཀྱི་ཁྱད་ཆོས་ལྡན་པའི་རོལ་དབྱངས་དང་ཞབས་བྲོ་སོགས་མི་རིགས་ཀྱི་རྒྱུ་ཆ་ཟུང་འབྲེལ་བྱས་ཡོད་པས། འདི་ལྟའི་མི་རིགས་རིག་གནས་དང་སྲོལ་རྒྱུན་རྩལ་རྩེད་གཉིས་མཉམ་བསྲེས་ཀྱི་འཁྲབ་སྟོན་ནི་རྒྱལ་ནང་རྩལ་རྩེད་ཟློས་གར་གྱི་ཆེས་ཐོག་མའི་ཚོད་ལྟ་ཐེངས་ཤིག་ཀྱང་ཡིན། ཟློས་གར་ཁྲོད་དུ་གསལ་བོ་དང་མག་མོག་གི་གཏམ་རྒྱུད་ཁུངས་སྣེ་གཉིས་བསྣོལ་བ་བརྒྱུད་ཁུ་ནུ་རི་འདབས་ཀྱི་གཞིས་སྡོད་པ་དང་གངས་གཟིག་དབར་གྱི་ལྷ་སྒྲུང་དང་ངག་རྒྱུན་ལས་སྐྱེ་ཁམས་རིག་གནས་དར་སྤེལ་བྱས་སྟེ་མི་དང་ཁོར་ཡུག མི་དང་རང་བྱུང་ཁམས་དབར་ལ་འཆམ་མཐུན་མཉམ་གནས་ཡོང་དགོས་པའི་འབོད་སྐད་བཏང་ཡོད།
རྩལ་རྩེད་ཟློས་གར་རྒྱལ་སྲས་གངས་གཟིག་ནི་མི་རིགས་རིག་གནས་དང་རྩལ་རྩེད་སྒྱུ་རྩལ་མཉམ་བསྲེས་ཀྱི་ཆེས་ཐོག་མའི་གསར་གཏོད་ཡིན་པ་མ་ཟད། དེས་མདོ་དབུས་མཐོ་སྒང་གི་རང་བྱུང་མཛེས་ལྗོངས་དང་མི་རིགས་གོམས་གཤིས་ཚུར་སྣང་བྱས་ཡོད། འཁྲབ་སྟོན་ལ་ཟབ་ཞུགས་བྱས་པའི་ཨན་ཧུའེ་ཞིང་ཆེན་གྱི་རྩལ་རྩེད་ཚོགས་པ་དང་ཡུལ་ཤུལ་བོད་རིགས་རང་སྐྱོང་ཁུལ་མི་རིགས་གླུ་གར་ཚོགས་པ་གཉིས་ཀྱིས་མཉམ་དུ་འཁྲབ་སྟོན་ཐེངས་མང་བྱས་མྱོང་བས། རྒྱལ་ནང་དུ་ཡང་མཚན་སྙན་ངེས་ཅན་ཞིག་ཡོད། ཟླ6པའི་ཚེས17ནས་ཟླ7པའི་ཚེས3དབར་རྒྱལ་སྲས་གངས་གཟིག་དེ་ནུབ་རྒྱུད་བརྩེ་བའི་འཁྲབ་སྟོན་ལྟེ་གནས་ནས་ཐེངས14ལ་འཁྲབ་སྟོན་བྱ་རྒྱུ་རེད།
ཟླ6པའི་ཚེས17ནས་ཟླ7པའི་ཚེས3དབར་རྒྱལ་སྲས་གངས་གཟིག་དེ་ནུབ་རྒྱུད་བརྩེ་བའི་འཁྲབ་སྟོན་ལྟེ་གནས་ནས་ཐེངས14ལ་འཁྲབ་སྟོན་བྱ་རྒྱུ་རེད།
