ཟླ་དྲུག་པའི་ཚེས་ཉེར་གཉིས་ཉིན། རྒྱལ་ཁབ་ཀྱི་ཀྲུའུ་ཞི་ཞིས་ཅིན་ཕིང་གིས་ཐ་ཧྲི་ཀན་ཁུའུ་ཁི་ས་ལེ་རྒྱལ་མགྲོན་ཁང་དུ་བུའུ་ཙི་པེད་ཁི་སི་ཐན་གྱི་ཙུང་ཐུང་ཁ་ལེ་མོ་ཧྥུའུ་དང་གྲོས་མོལ་མཛད།
ཟླ་དྲུག་པའི་ཚེས་ཉེར་གཉིས་ཉིན། རྒྱལ་ཁབ་ཀྱི་ཀྲུའུ་ཞི་ཞིས་ཅིན་ཕིང་གིས་ཐ་ཧྲི་ཀན་ཁུའུ་ཁི་ས་ལེ་རྒྱལ་མགྲོན་ཁང་དུ་བུའུ་ཙི་པེད་ཁི་སི་ཐན་གྱི་ཙུང་ཐུང་ཁ་ལེ་མོ་ཧྥུའུ་དང་གྲོས་མོལ་མཛད། རྒྱལ་ཁབ་གཉིས་ཀྱི་མགོ་གཙོས་ཀྲུང་གོ་དང་བུའུ་ཙི་པེད་ཁི་སི་ཐན་བར་གྱི་སྲོལ་རྒྱུན་མཛའ་མཐུན་དང་ཕྱོགས་གཉིས་ཀྱི་འབྲེལ་བའི་འཕེལ་རྒྱས་ཐད་ནས་གཡུར་དུ་ཟ་བའི་གྲུབ་འབྲས་ཐོབ་པར་གདེང་འཇོག་ཆེན་པོ་བྱས་པ་དང་། ཀྲུང་གོ་དང་བུའུ་ཙི་པེད་ཁི་སི་ཐན་བར་དུ་ཁྱོན་ཡོངས་ཀྱི་འཐབ་ཇུས་གྲོགས་པོའི་འབྲེལ་བ་བཙུགས་ཏེ་རྒྱལ་ཁབ་གཉིས་ཀྱི་མཉམ་ལས་སྔར་ལས་ཇེ་མང་དུ་འགྲོ་བར་སྐུལ་འདེད་གཏོང་རྒྱུའི་ཐག་བཅད།
ཞིས་ཅིན་ཕིང་གིས་གསུངས་རྒྱུར། ཉིས་སྟོང་བཅུ་གཉིས་ལོར་ཀྲུང་གོ་དང་བུའུ་ཙི་པེད་ཁི་སི་ཐན་བར་དུ་འཐབ་ཇུས་གྲོགས་པོའི་འབྲེལ་བ་བཙུགས་རྗེས། ཕྱོགས་གཉིས་ཀྱི་མཉམ་ལས་མགྱོགས་མྱུར་སྒོས་འཕེལ་རྒྱས་སུ་འགྲོ་བའི་དུས་སྐབས་སུ་སླེབ་པ་དང་། ཆབ་སྲིད་ཡིད་ཆེས་དང་གཉིས་ཕན་མཉམ་ལས། འཐབ་ཇུས་མཐུན་སྦྱོར་བཅས་ཁྱོན་ཡོངས་ནས་ལག་བསྟར་བྱས་པས་གྲུབ་འབྲས་བཟང་བོ་ཐོབ། ཀྲུང་གོ་ཕྱོགས་ཀྱིས་བུའུ་ཙི་པེད་ཁི་སི་ཐན་ཕྱོགས་དང་མཉམ་དུ་གཞོགས་འདེགས་དམ་པོ་བྱེད་པ་དང་། རྒྱལ་ཁབ་གཉིས་ཀྱི་འབྲེལ་བའི་འཕེལ་རྒྱས་ལ་སྐུལ་འདེད་བཏང་ནས་དོན་དངོས་ཀྱི་གྲུབ་འབྲས་གང་མང་ལེན་འདོད་ཡོད། ཕྱོགས་གཉིས་ཀྱིས་ཕན་ཚུན་ལ་རྒྱབ་སྐྱོར་བྱེད་པར་ཤུགས་བསྣན་ནས་ཕྱོགས་གཉིས་ཀྱི་ཁེ་ཕན་སྲུང་སྐྱོབ་བྱེད་དགོས། དཔལ་འབྱོར་ཉོ་ཚོང་དང་ཐོན་ནུས། ནུས་ཁུངས། ཞིང་ལས། དངུལ་ལོར། རྨང་གཞིའི་སྒྲིག་ཆས་སོགས་ཁྱབ་ཁོངས་ཀྱི་དངོས་གཉེར་མཉམ་ལས་གཏིང་ཟབ་ཏུ་སྤེལ་ནས་རྒྱལ་ཁབ་གཉིས་ཀྱི་ཐུན་མོང་གི་འཕེལ་རྒྱས་ལ་སྐུལ་འདེད་གཏོང་བ་དང་། སྔར་ལས་མང་པོའི་དངོས་གཉེར་མཉམ་ལས་གྲུབ་འབྲས་ལ་བརྟེན་ནས་ཁྱོན་ཡོངས་ཀྱི་འཐབ་ཇུས་གྲོགས་པོའི་འབྲེལ་བའི་ནང་དོན་ཕུན་སུམ་ཚོགས་པར་གཏོང་དགོས་ཟེར།
ཁ་ལེ་མོ་ཧྥུའུ་ཡིས་བཤད་རྒྱུར། བུའུ་ཙི་པེད་ཁི་སི་ཐན་ཕྱོགས་ཀྱིས་ཀྲུང་གོ་རྒྱལ་ཁབ་ཀྱི་གཅིག་གྱུར་ལས་དོན་ཆེན་པོར་རྒྱབ་སྐྱོར་བྱེད་པ་དང་། ཀྲུང་གོ་ཕྱོགས་ཀྱིས་ཐེ་ཝན་དང་བོད་ལྗོངས་སོགས་ཀྱི་གནད་དོན་ཐད་འཛིན་པའི་རྩ་དོན་དང་ལངས་ཕྱོགས་ལ་རྒྱབ་སྐྱོར་བྱེད་པར་མ་ཟད། ཀྲུང་གོ་ཕྱོགས་དང་མཉམ་དུ་དཔལ་འབྱོར་ཉོ་ཚོང་དང་དམངས་ཚིས། མི་གཞུང་། བདེ་འཇགས། རྨང་གཞིའི་སྒྲིག་ཆས་སོགས་ཁྱབ་ཁོངས་ཀྱི་མཉམ་ལས་གཏིང་ཟབ་ཏུ་སྤེལ་འདོད་ཡོད་པ་དང་། རྒྱལ་སྤྱི་དང་ས་གནས་ཀྱི་ལས་དོན་ཐད་ནས་ཀྲུང་གོ་ཕྱོགས་དང་འབྲེལ་འདྲིས་དང་མཐུན་སྦྱོར་དམ་པོ་བྱས་ནས། ཧྲང་ཧེ་མཉམ་ལས་རྩ་འཛུགས་ཀྱི་སྤྱི་ཁོག་ནང་དུ་མཉམ་ལས་བཟང་བོ་བྱེད་འདོད་ཡོད་ཟེར།
གྲོས་མོལ་མཛད་རྗེས། རྒྱལ་ཁབ་གཉིས་ཀྱི་མགོ་གཙོས་མཉམ་དུ་གསར་འགོད་པར་ཐུག་འཕྲད་བྱས།
