བོད་རབ་བྱུང་བཅོ་བདུན་པའི་མེ་སྤྲེལ་ལོ་ཡི་གནམ་ལོའི་རང་ཞལ་གསར་དུ་འཆར་ལ་ཉེ་བའི་སྐབས་སུ། པཎ་ཆེན་ཨེར་ཏེ་ནི་སྐུ་ཕྲེང་བཅུ་གཅིག་པ་ཆོས་ཀྱི་རྒྱལ་པོ་མཆོག་ནས་ཀྲུང་དབྱང་མི་དམངས་ཀུན་ཁྱབ་རླུང་འཕྲིན་ལས་ཁུངས་བོད་སྐད་འཕྲིན་ལམ་བརྒྱུད། རྒྱལ་ཁབ་ཕྱི་ནང་དུ་བཞུགས་པའི་བོད་རིགས་སྤུན་ཟླ་རྣམས་ལ་བོད་ཀྱི་ཡུལ་སྐད་ཆེན་པོ་གསུམ་གྱི་ཐོག་ནས་ལོ་གསར་གྱི་འཚམས་འདྲི་དང་བསྔོ་སྨོན་ཤིས་ཚིག་བསྩལ་ཡོད།
པཎ་ཆེན་རིན་པོ་ཆེས་ཤིས་ཚིག་ནང་། བོད་རབ་བྱུང་བཅུ་བདུན་པའི་མེ་སྤྲེལ་ལོའི་གནམ་ལོ་གསར་ཚེས་ཤར་ཉེར་ཡོད་པའི་སྐབས་འདིར། རྒྱལ་ཁབ་ཕྱི་ནང་དུ་བཞུགས་པའི་བོད་རིགས་སྤུན་ཟླ་རྣམས་ལ་ལོ་གསར་གྱི་འཚམས་འདྲི་དང་། བསམ་དོན་ཆོས་བཞིན་གྲུབ་པའི་སྨོན་འདུན་ཞུ་རྒྱུ་ཡིན་ཞེས་གསུངས་པ་དང་། ཆབས་ཅིག་ཚང་མས་ལོ་གསར་པའི་ནང་བློ་ཁ་ཆོས་ལ་ཕྱོགས་པ་དང་། བྱ་བ་ཅི་ཞིག་སྒྲུབ་ཀྱང་ལས་རྒྱུ་འབྲས་དཔང་པོར་འཇོག་རྒྱུ་དང་། རྣམ་དཀར་དགེ་བའི་ལས་ལ་སྔར་ལྟར་འབད་པ་ཆེར་བསྐྱེད་གནང་རྒྱུའི་བཀའ་སློབ་ཀྱང་བསྩལ་གནང་འདུག
ཁོང་ནས་ད་དུང་ཚིགས་སུ་བཅད་པའི་ཤིས་ཚིག་ཅིག་བསྩལ་བ་འདི་ལྟ་སྟེ།
འཇིག་རྟེན་ཡངས་པའི་རྒྱལ་ཁམས་ཐམས་ཅད་དུ། །
མི་ནད་ཕྱུགས་ནད་སད་སེར་ཐན་པ་དང་། །
དམག་འཁྲུག་མུ་གེ་རྒུད་པ་ཀུན་ཞི་ནས། །
ཚེ་རིང་ནད་མེད་བདེ་སྐྱིད་ལྡན་པར་ཤོག ། ཅེས་པའོ།།
