ཞིན་ཧྭ་དྲ་བས་བཏང་བའི་གསར་འཕྲིན་ལྟར་ན། ཁ་སང་། རྒྱལ་ཁབ་ཀྱི་ཀྲུའུ་ཞི་ཞིས་ཅིན་ཕིང་གིས་མི་དམངས་ཚོགས་ཁང་ཆེན་མོ་ནས་ཨ་རིའི་རྒྱལ་དོན་བློན་ཆེན་ཁེ་རེ་ལ་ཐུག་འཕྲད་གནང་བ་དང་། ཞིས་ཅིན་ཕིང་གིས་བཤད་རྒྱུར། འདས་པའི་ལོ་ངོ་གཅིག་གི་རིང་ལ། ཀྲུང་གོའི་སྲིད་གཞུང་དང་ཨ་རིའི་སྲིད་གཞུང་གཉིས་ཀྱིས་ཐུན་མོང་དུ་འབད་བརྩོན་བྱས་འོག ཀྲུང་གོ་དང་ཨ་རིའི་ཕྱི་འབྲེལ་གྱི་འབྲེལ་བར་འཕེལ་རྒྱས་གལ་ཆེན་བྱུང་ཡོད། ང་རང་གིས་ཨ་རིའི་ཙུང་ཐུང་ཨོ་བྷ་མའི་གདན་འབོད་ལྟར་ཨ་རིར་རྒྱལ་དོན་འཚམས་འདྲི་ལེགས་འགྲུབ་བྱུང་ཡོད་པ་དང་། ཕྱོགས་གཉིས་ཀྱིས་ཀྲུང་གོ་དང་ཨ་རིའི་བར་གྱི་རྒྱལ་ཁབ་ཆེ་གྲས་ཁག་གི་ཕྱི་འབྲེལ་གྱི་འབྲེལ་བ་གསར་བ་ཞིག་འཛུགས་རྒྱུར་མོས་མཐུན་བྱུང་ཡོད། སྤྱིའི་ཆ་ནས་བལྟས་ན། ད་ལྟ་ཀྲུང་གོའི་སྲིད་གཞུང་དང་ཨ་རིའི་སྲིད་གཞུང་བར་གྱི་ཚོང་དོན་དཔལ་འབྱོར་དང་རྒྱལ་ཁབ་གཉིས་ཀྱི་དམག་དོན། སྤྱི་ཚོགས་ཚན་རིག དྲ་རྒྱའི་བདེ་འཇགས་སོགས་ཀྱི་ཁྱབ་ཁོངས་ཐད་དང་གཞན་ད་དུང་གོ་ལའི་ནམ་ཟླའི་འགྱུར་ལྡོག དབྱིག་རག་གི་ཉིང་རྡུལ་གནད་དོན་སོགས་རྒྱལ་སྤྱི་དང་ས་ཁུལ་གྱི་གནད་དོན་ཐད་ནས། ཀྲུང་གོ་དང་ཨ་རིའི་བར་གྱི་གྲོས་དོན་གཅིག་གྱུར་འོག་གི་མཉམ་འབྲེལ་ལ་གྲུབ་འབྲས་ཆེན་པོ་ཐོན་ཡོད།
ཞིས་ཅིན་ཕིང་གིས་ནན་གྱིས་བསྟན་དོན། ཀྲུང་གོ་དང་ཨ་རི་རྒྱལ་ཁབ་གཉིས་ཀྱི་ཕྱི་འབྲེལ་གྱི་འབྲེལ་བ་མུ་མཐུད་དུ་བརྟན་བརླིང་བདེ་འཇགས་ངང་འཕེལ་རྒྱས་སུ་ཕྱིན་ན། ཀྲུང་གོའི་སྲིད་གཞུང་དང་ཨ་རིའི་སྲིད་གཞུང་གཉིས་ཀྱི་ཁེ་ཕན་ལ་ཕན་ཐོགས་པར་མ་ཟད། དེ་ནི་རྒྱལ་སྤྱིའི་དོ་ཁུར་བྱ་ཡུལ་ཞིག་ཏུའང་གྱུར་ཡོད་སྟབས་ཕྱོགས་གཉིས་ཀྱི་སྲིད་གཞུང་ནས་དེར་མུ་མཐུད་དུ་སྲུང་སྐྱོང་བྱེད་དགོས། ང་རང་གིས་མུ་མཐུད་དུ་ཙུང་ཐུང་ཨོ་བྷ་མ་དང་མཉམ་དུ་སྤྱི་མཐུན་དུ་སེམས་ཁུར་བྱེད་བཞིན་ཡོད་པའི་རྒྱལ་སྤྱི་དང་ས་ཁུལ་གནད་དོན་ཆེ་ཁག་གི་ཐད་དུ་ཕན་ཚུན་ལ་འབྲེལ་ལམ་དམ་ཟབ་བྱེད་སྲིད། ཕྱོགས་གཉིས་ཀྱི་སྲིད་གཞུང་ནས་མུ་མཐུད་དུ་འབད་བརྩོན་བྱེད་དགོས་པ་དང་གཏན་འཁེལ་བྱས་ཟིན་པའི་མཉམ་འབྲེལ་ལས་འཆར་ཁག་ལའང་མུ་མཐུད་དུ་སྐུལ་འདེད་གཏོང་དགོས། ཀྲུང་གོའི་སྲིད་གཞུང་དང་ཨ་རིའི་སྲིད་གཞུང་གཉིས་ཀྱིས་རྒྱལ་སྤྱི་དང་ས་ཁུལ་གྱི་བདེ་འཇགས་དང་བཅས་པའི་གོ་ལ་ཡོངས་ཀྱི་གནད་དོན་ཆེ་ཁག་ཐད་ཕན་ཚུན་ལ་འབྲེལ་མཐུད་དམ་ཟབ་བྱེད་དགོས་པ་དང་། རྒྱལ་སྤྱི་དང་ས་ཁུལ་གྱི་གནད་དོན་མང་པོ་ཞིག་ཐག་གཅོད་བྱ་རྒྱུར་སྐུལ་འདེད་གང་ལེགས་བྱེད་དགོས།
ཞིས་ཅིན་ཕིང་གིས་བཤད་རྒྱུར། ངས་ཐེངས་མང་པོར་བཤད་མྱོང་ལ། ཀྲུང་གོ་དང་ཨ་རིའི་མཉམ་འབྲེལ་ལ་ཤུགས་སྣོན་བྱས་ན་འཛམ་གླིང་ཡོངས་ལ་ཕན་པའི་བྱ་གཞག་བསྒྲུབ་ཐུབ་པ་དང་། རྒྱལ་ཁབ་གཉིས་ཀྱིས་ཕྱོགས་གཉིས་ཀྱི་དབུ་ཁྲིད་པ་དག་གིས་གྲོས་མཐུན་བྱས་ཟིན་པ་དག་ལག་ལེན་དོན་འཁྱོལ་བྱ་དགོས་པར་མ་ཟད། ཕན་ཚུན་ལ་འགལ་རྐྱེན་མི་སློང་བ་དང་འགྲན་རྒོལ་མི་བྱེད་པ་རྒྱུན་འཁྱོངས་བྱེད་དགོས་ལ། ཕན་ཚུན་ལ་བརྩི་བཀུར་བྱེད་པ་དང་མཉམ་འབྲེལ་སྤྱི་ཕན་གྱི་སྔོན་འགྲོའི་རྨང་གཞིའི་སྟེང་། ཕྱོགས་གཉིས་ཀྱི་ཕྱི་འབྲེལ། རྒྱལ་སྤྱི་དང་ས་ཁུལ་གྱི་གནད་དོན་ཆེ་ཁག་གི་ཁྱབ་ཁོངས་ཐད་དུ་མཉམ་འབྲེལ་བྱས་ནས་ཀྲུང་གོ་དང་ཨ་རི་བར་གྱི་ཕྱི་འབྲེལ་གྱི་འབྲེལ་བ་གསར་བ་འཕེལ་རྒྱས་སུ་འགྲོ་རྒྱུར་སྐུལ་འདེད་གཏོང་དགོས།
ཨ་རིའི་རྒྱལ་དོན་བློན་ཆེན་ཁེ་རེ་ལགས་ཀྱིས་བཤད་རྒྱུར། ཨ་རི་དང་ཀྲུང་གོའི་བར་གྱི་འབྲེལ་བ་ནི་ཆེས་གལ་ཆེ་བ་ཞིག་ཡིན་པ་དང་། ཕྱོགས་གཉིས་ཀྱི་སྲིད་གཞུང་ནས་འབྲེལ་མཐུད་དམ་ཟབ་བྱས་འོག གོ་ལའི་ནམ་ཟླའི་འགྱུར་ལྡོག་ཐད་ཀྱི་ཕ་རི་སིའི་ཆོད་དོན་དང་དབྱི་རག་གི་ཉིང་རྡུལ་གྲོས་མོལ་ཆ་ཚང་བཅས་ཀྱི་གནད་དོན་ཐག་གཅོད་བྱ་རྒྱུར་སྐུལ་འདེད་དང་ནུས་ཤུགས་གལ་ཆེན་བཏོན་ཡོད། ཙུང་ཐུང་ཨོ་བྷ་མ་ལགས་ཀྱིས་ཀྲུང་གོའི་ཀྲུའུ་ཞི་ཞིས་ཅིན་ཕིང་དང་མཉམ་དུ་འབྲེལ་མཐུད་དམ་ཟབ་བྱ་རྒྱུར་རེ་བ་བྱེད་བཞིན་ཡོད་ལ། གོམ་གང་མདུན་སྤོས་སྒོས་ཨ་རི་དང་ཀྲུང་གོའི་སྲིད་གཞུང་བར་གྱི་ཕྱི་འབྲེལ་གྱི་འབྲེལ་བར་སྐུལ་འདེད་བྱས་ནས། ཕྱོགས་གཉིས་ཀྱི་སྲིད་གཞུང་ནས་རྒྱལ་སྤྱིའི་ལས་དོན་ཁག་གི་ཁྲོད་དུ་མཉམ་འབྲེལ་བྱ་རྒྱུར་ཤུགས་སྣོན་དང་སྐུལ་འདེད་གཏོང་བཞིན་ཡོད།
