ཟླ ༢ ཚེས ༢ ཉིན་རྒྱལ་ཁབ་དྲ་སྦྲེལ་ཆ་འཕྲིན་གཞུང་དོན་ཁང་གི་འབྲེལ་ཡོད་ལས་སྒོ་ཅུས་དང་པེ་ཅིན་གྲོང་ཁྱེར་དྲ་སྦྲེལ་ཆ་འཕྲིན་གཞུང་དོན་ཁང་གི་འགན་འཁུར་མི་སྣས ༢༠༡༤ ལོའི་དྲ་སྦྲེལ་གསར་འགྱུར་ཆ་འཕྲིན་ཞབས་ཞུའི་ལས་ཁུངས་ཀྱི་ལོ་འཁོར་ཞིབ་བཤེར་ཁྲོད་ཤེས་རྟོགས་བྱུང་བའི་གནད་དོན་ཐད་ཝང་དབྱི་ཀུང་སིའི་འགན་འཁུར་མི་སྣ་དང་ཁ་ཆད་གླེང་མོལ་བྱས་པ་རེད།
རྒྱལ་ཁབ་དྲ་སྦྲེལ་ཆ་འཕྲིན་གཞུང་དོན་ཁང་གི་འབྲེལ་ཡོད་ལས་སྒོ་ཅུས་ཀྱི་འགན་འཁུར་མི་སྣས་དྲ་སྦྲེལ་དྲ་བའི་གསར་འགྱུར་ཆ་འཕྲིན་ཞབས་ཞུ་མཁོ་འདོན་བྱེད་པའི་བརྒྱུད་རིམ་ཁྲོད། ཝང་དབྱི་ཀུང་སིར་ཁྲིད་སྟོན་ཐད་ཀྱི་གནད་དོན་ཚབས་ཆེན་གནས་ཡོད་པ་མ་ཟད་ཁྲིམས་འགལ་ངང་གསར་འགྱུར་ཆ་འཕྲིན་བརྒྱུད་འགོད་དང་ཆགས་སྲེད་ཀྱི་ཆ་འཕྲིན་ཁྱབ་སྤེལ། དཀྲོག་གཏམ་ཁྱབ་སྤེལ་སོགས་ཀྱི་གནད་དོན་གནས་ཡོད་པ་བསྟན་པ་རེད། ཝང་དབྱི་ཀུང་སིས《དྲ་སྦྲེལ་ཆ་འཕྲིན་ཞབས་ཞུའི་དོ་དམ་བྱ་ཐབས》དང《དྲ་སྦྲེལ་གསར་འགྱུར་ཆ་འཕྲིན་ཞབས་ཞུའི་དོ་དམ་གྱི་གཏན་འབེབས》གཞིར་བཟུང་དག་ཐེར་ལེགས་བཅོས་བྱ་དགོས་པ་དང་ནང་ཁུལ་གྱི་དོ་དམ་ལ་ཤུགས་སྣོན་རྒྱག་དགོས་པའི་རེ་བ་སྟོན་པ་རེད། གལ་ཏེ་དག་ཐེར་ལེགས་བཅོས་བྱ་རྒྱུ་རེ་བ་དང་མི་མཐུན་པའམ་དག་ཐེར་ལེགས་བཅོས་བྱེད་རིང་མུ་མཐུད་ཁྲིམས་འགལ་གྱི་བྱ་ཐབས་ཐོན་ཚེ་ཁྲིམས་ལུགས་གཞིར་བཟུང་རྩད་ཞིབ་ཐག་གཅོད་ནན་པོ་བྱ་རྒྱུ་དང་། གནས་ཚུལ་ཚབས་ཆེ་བ་ཁྲིམས་ལུགས་གཞིར་བཟུང་དྲ་སྦྲེལ་གསར་འགྱུར་ཆ་འཕྲིན་གྱི་ཞབས་ཞུ་མཚམས་འཇོག་བྱ་རྒྱུ་ཡིན་པ་རེད། ཝང་དབྱི་ཀུང་སིའི་འགན་འཁུར་མི་སྣས་ལྷག་པའི་གནད་དོན་ལ་ཚད་མཐོའི་མཐོང་ཆེན་བྱས་ཏེ་ནུས་ལྡན་གྱི་བྱ་ཐབས་ཏན་ཏིག་སྤྱད་ནས་དག་ཐེར་ལེགས་བཅོས་བྱ་རྒྱུ་དང་། དྲང་ནུས་བརྒྱུད་སྤེལ་ཧུར་ཐག་བྱས་ཏེ་ནན་ཏན་དང་ཁྲིམས་ལུགས་གཞིར་བཟུང་གསར་འགྱུར་ཆ་འཕྲིན་གྱི་ཞབས་ཞུ་མཁོ་འདོན་བྱ་རྒྱུ་ཡིན་པ་སྟོན་པ་རེད།
ཉེ་དུས། ལོ་འཁོར་གྱི་ཞིབ་བཤེར་ཁྲོད་ཤེས་རྟོགས་བྱུང་བའི་གནད་དོན་ལ་དམིགས་ནས་པེ་ཅིན་གྲོང་ཁྱེར་དྲ་སྦྲེལ་ཆ་འཕྲིན་གཞུང་དོན་ཁང་གིས་སྔ་ཕྱིར་ཤིན་ལང་དང་སོའུ་ཧུའུ། པའེ་ཏུའུ། ཧོ་ཞུན། ཐེན་ཐེན་སྐུད་ཐོག་དྲ་བ་བཅས་ཀྱི་འགན་འཁུར་མི་སྣ་དང་ཁ་ཆད་གྲོས་མོལ་བྱས་པ་དང་། ལྷག་པའི་གནད་དོན་བརྡ་ཁྱབ་བཏང་བ་མ་ཟད་ འགན་འཁྲིའི་ལམ་ལུགས་ཤུགས་ཆེར་བཏང་ནས་ཁྱོན་ཡོངས་ནས་ནུས་ལྡན་ངང་དག་ཐེར་ལེགས་སྒྲིག་བྱ་རྒྱུའི་བྱ་ཐབས་ཏན་ཏིག་སྤྱོད་དགོས་པའི་བཀའ་བཏང་བ་རེད།
དྲ་སྦྲེལ་མགྱོགས་མྱུར་འཕེལ་རྒྱས་འགྲོ་བ་དང་བསྟུན་ནས་གཙོ་ཆེའི་དྲ་བ་ཚུད་པའི་དྲ་རྒྱའི་སྨྱན་སྦྱོར་ཟམ་མི་ཆད་པར་སྟོབས་ཆེར་འགྲོ་བས་རྒྱ་ཆེའི་དྲ་གྲོགས་རྣམས་ལ་ཕུན་སུམ་ཚོགས་ལ་སྟབས་བདེ་བའི་གསར་འགྱུར་ཆ་འཕྲིན་ཞབས་ཞུ་མཁོ་འདོན་བྱས་ཡོད། འོན་ཀྱང་དུས་མཚུངས་སུ་དྲ་ཚུགས་འགའ་རེས་ཚོང་ལས་ཀྱི་ཁེ་ཕན་ལ་བསམ་གཞིགས་ཀྱིས་ཞིབ་བཤེར་གཏན་འབེབས་བྱ་རྒྱུ་ནན་ཏན་མིན་པ་དང་། དུས་ངེས་མེད་དུ་ཆགས་སྲེད་ཀྱི་ཆ་འཕྲིན་ཁྱབ་སྤེལ་དང་ཚུལ་མིན་གྱི་ཆ་འཕྲིན་སོགས་ཁྲིམས་འགལ་དང་མི་ལེགས་པའི་ཆ་འཕྲིན་ཁྱབ་སྤེལ་བྱེད་པ། དཀྲོག་གཏམ་བརྒྱུད་བཤད་དང་བསྙད་འདོགས་རྒྱུ་ལེན་སོགས་ཁྲིམས་འགལ་གྱི་བྱ་ཐབས་ཟམ་མི་ཆད་པར་ཐོན་པས་རྒྱུན་ལྡན་གྱི་དྲ་རྒྱའི་ཁྱབ་སྤེལ་སྒྲིག་ལམ་ལ་གཏོར་སྐྱོན་བཏང་བ་མ་ཟད་སྤྱི་པའི་ཁེ་ཕན་ལ་ཡང་གནོད་འཚེ་བཏང་ཡོད། མི་དམངས་མང་ཚོགས་ཀྱིས་ཁྲིམས་འགལ་གྱི་བྱ་ཐབས་འདི་དག་ལ་སེམས་གཏིང་ནས་འཁོན་འཛིན་བྱས་ཏེ་ཐེར་འདོན་ཟམ་མི་ཆད་པ་བྱས་ཡོད་པ་རེད།
རྒྱལ་ཁབ་དྲ་སྦྲེལ་ཆ་འཕྲིན་གཞུང་དོན་ཁང་གི་འབྲེལ་ཡོད་ལས་སྒོ་ཅུས་ཀྱི་འགན་འཁུར་མི་སྣས་དྲ་སྦྲེལ་གསར་འགྱུར་ཆ་འཕྲིན་ཞབས་ཞུ་སྒྲུབ་མཁན་གྱིས་མི་དམངས་ལ་ཞབས་ཞུ་མཐའ་འཁྱོངས་དང་སྤྱི་ཚོགས་རིང་ལུགས་ཀྱི་ཞབས་ཞུའི་ཁ་ཕྱོགས་མཐའ་འཁྱོངས། ཡང་དག་པའི་གླེང་ཕྱོགས་ཀྱི་ཁྲིད་ཕྱོགས་མཐའ་འཁྱོངས་བཅས་བྱས་ཏེ་རྒྱལ་ཁབ་ཀྱི་ཁེ་ཕན་དང་སྤྱི་པའི་ཁེ་ཕན་ལ་སྲུང་སྐྱོང་བྱས་ནས་ནན་ཏན་ངང་ཁྲིམས་ལུགས་གཞིར་བཟུང་ཞབས་ཞུ་སྒྲུབ་པ་དང་དྲང་ནུས་ཁྱབ་སྤེལ་ཧུར་ཐག་བྱས་ཏེ་དྲ་རྒྱའི་སྨྱན་སྦྱོར་གྱི་སྤྱི་ཚོགས་ཀྱི་འགན་འཁྲི་དངོས་སུ་འཁྱེར་དགོས་པའི་ནན་བཤད་གནང་བ་རེད།
རྒྱལ་ཁབ་དྲ་སྦྲེལ་ཆ་འཕྲིན་གཞུང་དོན་ཁང་གི་འབྲེལ་ཡོད་ལས་སྒོ་ཅུས་ཀྱི་འགན་འཁུར་མི་སྣས་གཙོ་ཆེའི་གསར་འགྱུར་དྲ་ཚུགས་ནི་ཉེ་དུས་དོ་དམ་བྱེད་པའི་གཙོ་གནད་ཡིན་པས་རྒྱ་ཆེའི་དྲ་གྲོགས་རྣམས་ནས་མུ་མཐུད་ཤིན་ལང་དང་སོའུ་ཧུའུ། ཝང་དབྱི། ཐེང་ཞུན། ཧྥེང་ཧོང་སོགས་དྲ་ཚུགས་ལ་ལྟ་སྐུལ་དང་ཐེར་འདོན་བྱ་རྒྱུར་དགའ་བསུ་ཞུ་རྒྱུ་ཡིན་པ་སྟོན་གནང་བ་རེད། དྲ་སྦྲེལ་གྱི་ཁྲིམས་འགལ་དང་མི་ལེགས་པའི་ཆ་འཕྲིན་ཐེར་འདོན་ལྟེ་གནས་ཀྱི་དྲ་ཚུགས་ནི། www.12377.cn ཐེར་འདོན་ཁ་པར་ཨང་གྲངས 12377 ཐེར་འདོན་ཡིག་སྒམ jubao@12377.cnབཅས་ཡིན།(རྩོམ་འགན་པ། རྟ་མགྲིན)
