ཀྲུང་གོའི་བོད་ལྗོངས་དྲ་བའི་གསར་འགོད་པ་ལིའུ་ཡན་ལིན་གྱིས་མི་དམངས་ཚོགས་ཁང་ཆེན་མོའི་ནང་དུ་རྒྱལ་ཡོངས་སྲིད་གྲོས་སྐབས་བཅུ་གཉིས་པའི་ཚོགས་འདུ་ཐེངས་བཞི་པའི་དབུ་ཚུགས་མཛད་སྒོའི་བཅར་འདྲི་བྱ་འགུལ་དུ་ཞུགས་པ།
ང་ཕོད་འཇིགས་ཡོན་ནི་སྔར་རྒྱལ་ཡོངས་སྲིད་གྲོས་ཀྱི་ཀྲུའུ་ཞི་གཞོན་པ་ང་ཕོད་ངག་དབང་འཇིགས་མེད་ཀྱི་སྐུ་སྲས་ཡིན་ཞིང་། བོད་རང་སྐྱོང་ལྗོངས་སྲིད་གྲོས་ཀྱི་ཀྲུའུ་ཞི་གཞོན་པ་དང་། རང་སྐྱོང་ཁུལ་བཟོ་ཚོང་ལས་རིགས་མཉམ་འབྲེལ་ལྷན་ཚོགས་ཀྱི་ཀྲུའུ་ཞི། སྤྱི་ཁྱབ་ཚོང་ཚོགས་ཀྱི་ཚོགས་གཙོ་བཅས་ཡིན། བཟོ་ཚོང་ལས་རིགས་མཉམ་འབྲེལ་ལྷན་ཚོགས་ཀྱི་ལས་དོན་ནི་འཐབ་ཕྱོགས་གཅིག་གྱུར་བྱ་བའི་གྲུབ་ཆ་གལ་ཆེན་ཞིག་ཡིན་ཞིང་། དེ་བོད་ལྗོངས་ཡོངས་དང་ལྷག་པར་དུ་དཔལ་འབྱོར་གྱི་འཕེལ་རྒྱས་དང་རག་ལས་པས། ངས་ཐེངས་འདིར་ཨུ་ཡོན་ང་ཕོད་ལ་བཅར་འདྲི་བྱ་རྒྱུའི་གྲ་སྒྲིག་བྱས་པ་ཡིན། དེ་སྔོན་བོད་ལྗོངས་ནས་ཕེབས་པའི་རྒྱལ་ཡོངས་སྲིད་གྲོས་ཨུ་ཡོན་གྱི་ཡིག་ཆ་ལེན་མ་ཐུབ་པའི་དབང་གིས། ཚོགས་འདུའི་དབུ་ཚུགས་མཛད་སྒོ་མ་སྤེལ་བའི་སྔོན་དུ། ངས་མི་ཚོགས་ཆེ་བའི་འཐུས་ཚབ་པའི་ཁྲོད་ནས་ཨུ་ཡོན་ང་ཕོད་ལགས་ཀྱི་ཞབས་རྗེས་བཙལ་མོད། མི་མང་བ་དང་དུས་ཚོད་མེད་པའི་དབང་གིས་རྙེད་ཐུབ་མ་སོང་། ཉིན་དང་པོར་འཐུས་ཚབ་པའི་སྡོད་གནས་སུ་སོང་སྟེ་བཅར་འདྲི་བྱེད་དུས། ངས་ད་གཟོད་ཨུ་ཡོན་ང་ཕོད་བཞུགས་སའི་བཟོ་ཚོང་ལས་རིགས་ཕྱོགས་ཀྱི་འཐུས་ཚབ་པ་རྣམས་ས་ཆ་གཞན་ཞིག་ཏུ་ཡོད་པ་གོ་བྱུང་། བཅར་འདྲིའི་སྔོན་དུ། ངས་དྲ་ཐོག་ནས་ཨུ་ཡོན་ང་ཕོད་ཀྱི་ཆ་འཕྲིན་གནས་ཚུལ་འགའ་དང་། ལྷག་པར་དུ་ཁོ་དང་འབྲེལ་ཡོད་ཀྱི་གསར་འགྱུར་བཙལ་མོད། ཁོར་གྲོས་ཞིབ་ཀྱི་གནད་དོན་སྐོར་འདྲི་བ་ལས་གཞན་ཅི་ཞིག་འདྲིའམ། གློ་བུར་དུ་ངས་རྒྱལ་ཡོངས་སྲིད་གྲོས་ཀྱི་ཉིན་དང་པོའི་ཚོགས་ཆུང་གྲོས་བསྡུར་བྱ་བའི་ཉིན་མོ་དེའི་ཕྱི་དྲོར་སྤྱི་ཁྱབ་ཧྲུའུ་ཅི་ཞིས་ཅིན་ཕིང་གིས་བཟོ་ཚོང་ལས་རིགས་མཉམ་འབྲེལ་ལྷན་ཚོགས་ཀྱི་ཨུ་ཡོན་གཞན་རྣམས་ལ་ཆེད་དུ་གཟིགས་ཞིབ་ཏུ་ཕེབས་པ་དྲན་ཏེ། རང་གིས་ལོ་གང་མང་རིང་སྦྱོང་བརྡར་བྱས་པའི་ཆབ་སྲིད་དང་གསར་འགྱུར་གྱི་ཚོར་སྣང་སྐྱེན་པོར་བརྟེན་ནས་འཕྲལ་མར་བཅར་འདྲིའི་གཙོ་གནད་གང་ཡིན་པ་རྙེད་བྱུང་།
རྒྱལ་ཡོངས་སྲིད་གྲོས་ཀྱི་ཨུ་ཡོན་དང་། བོད་ལྗོངས་བཟོ་ཚོང་ལས་རིགས་མཉམ་འབྲེལ་ལྷན་ཚོགས་ཀྱི་ཀྲུའུ་ཞི་ང་ཕོད་འཇིགས་ཡོན་གྱིས་ཀྲུང་གོའི་བོད་ལྗོངས་དྲ་བའི་ཆེད་དམིགས་བཅར་འདྲི་དང་ལེན་བྱེད་བཞིན་པའི་རྣམ་པ།
ང་རང་བཟོ་ཚོང་ལས་རིགས་མཉམ་འབྲེལ་ལྷན་ཚོགས་ཀྱི་སྡོད་གནས་སུ་ཡོང་སྟེ་ཚོགས་ཞུགས་འཐུས་ཚབ་པའི་ཁྲོད་ནས་ལམ་སེང་ང་ཕོད་འཇིགས་ཡོན་གྱི་ངོ་ཤེས་ཏེ་ཚོགས་འདུ་འཚོག་བཞིན་པའི་པར་འགའ་བརྒྱབ་པ་ཡིན། འོན་ཀྱང་ཚོགས་ཆེན་གྱིས་ཚོགས་འདུའི་སྐབས་སུ་ཨུ་ཡོན་ཕྱི་རོལ་ཏུ་དུས་ཆད་བྱེད་མི་ཆོག་པའི་རེ་བ་ཁ་གསལ་བཏོན་ཡོད་པའི་དབང་གིས་བཅར་འདྲི་བྱ་རྒྱུ་གནད་དོན་ཞིག་ཏུ་གྱུར་སོང་། ང་རང་ཅི་བྱ་གཏོལ་མེད་དུ་གྱུར་སྐབས་གློ་བུར་དུ་སེམས་སུ་ང་ཕོད་ལགས་ལ་ཡིག་ཆུང་ཞིག་བྲིས་ཏེ་སྟེར་ཆོག་པ་དྲན་ཞིང་། བློ་ཡུལ་ལས་འདས་པ་ཞིག་ལ་ཨུ་ཡོན་ང་ཕོད་ལགས་ཀྱིས་དེ་མ་ཐག་ཚོགས་འདུའི་རྗེས་སུ་བཅར་འདྲི་དང་ལེན་བྱ་རྒྱུར་མོས་མཐུན་བྱུང་བས། སྐབས་དེར་ང་ནི་དགའ་སྤྲོ་ཆེན་པོས་མྱོས་ཡོད།
ཚོགས་འདུའི་རྗེས་སུ། ང་ཕོད་འཇིགས་ཡོན་ལགས་ཀྱིས་ངལ་གསོའི་དུས་ཚོད་བེད་སྤྱད་དེ་འཕྲལ་མར་ངའི་ཆེད་དམིགས་བཅར་འདྲི་དང་ལེན་བྱས་ཤིང་། ཁོང་གིས་གསུང་བཤད་གནང་དུས་སྐད་ཀྱི་འགྲོས་ནི་བརྟན་ཞིང་བརླིང་ལ་སྒྲ་གདངས་བབ་ཆགས་པ་དང་ཤུགས་ལྡན་པར་མ་ཟད། རྒྱ་སྐད་བཤད་པ་ཧ་ཅང་བཟང་། ངས“སྤྱི་ཁྱབ་ཧྲུའུ་ཅི་ཞིས་ཅིན་ཕིང་གིས་སྲིད་གྲོས་བཟོ་ཚོང་ལས་རིགས་མཉམ་འབྲེལ་ལྷན་ཚོགས་ལ་གཟིགས་ཞིབ་ཏུ་ཕེབས་ནས་གསུང་བཤད་གནང་བ་དེས་ཐུན་མོང་མ་ཡིན་པའི་དཔལ་འབྱོར་གྱི་འཕེལ་རྒྱས་ལ་སྐུལ་སྤེལ་གྱི་ནུས་པ་ཅི་འདྲ་ཞིག་བཏོན་ཡོད་དམ”ཞེས་དྲི་བ་འདྲི་དུས། ཁོས་སྐད་གདངས་གློ་བུར་དུ་ཇེ་མཐོར་བཏང་སྟེ་གནད་དོན་འདིར་མྱོང་ཚོར་ཟབ་མོ་ཡོད་པ་བསྟན་པར་མ་ཟད། སྤྱི་ཁྱབ་ཧྲུའུ་ཅི་ཞིས་ཅིན་ཕིང་གི་གསུང་བཤད་ལ་གསན་རྗེས་ང་ཚོ“སེམས་འགུལ་དང་དགའ་སྤྲོ”ཆེན་པོ་སྐྱེས་ཤིང་། དེ་ནི་བོད་ལྗོངས་བཟོ་ཚོང་ལས་རིགས་མཉམ་འབྲེལ་ལྷན་ཚོགས་དང་དམངས་གཉེར་ཁེ་ལས་པར“བློ་བདེའི་སྨན་རིལ”ཞིག་བཞེས་སུ་བཅུག་པ་དང་མཚུངས་ལ། ལྷག་པར་དུ་སྤྱི་ཁྱབ་ཧྲུའུ་ཅིས་གླེང་བའི་“ཉེ་བ”དང“དྭངས་བ”ཞེས་པའི་ཡི་གེས་ཁོར་གནས་བབ་གསར་པའི་འོག“སྲིད་ཚོང་འབྲེལ་བ”ཇི་ལྟར་ཐག་གཅོད་ལེགས་པོ་བྱ་བར་གོ་རྟོགས་ཟབ་མོ་སྐྱེས་སུ་བཅུག་པ་དང་། བཟོ་ཚོང་ལས་རིགས་མཉམ་འབྲེལ་ལྷན་ཚོགས་ཀྱི་བྱ་བའི“ཁ་ཕྱོགས་སྔར་ལས་ཁ་གསལ་དང་མ་གཞི”ཡོད་དུ་བཅུག་ཅེས་གསུངས།
རྒྱལ་ཡོངས་སྲིད་གྲོས་ཀྱི་ཨུ་ཡོན་དང་། བོད་ལྗོངས་བཟོ་ཚོང་ལས་རིགས་མཉམ་འབྲེལ་ལྷན་ཚོགས་ཀྱི་ཀྲུའུ་ཞི་ང་ཕོད་འཇིགས་ཡོན་བཟོ་ཚོང་ལས་རིགས་མཉམ་འབྲེལ་ལྷན་ཚོགས་སོ་སོའི་ཚོགས་ཆུང་གྲོས་བསྡུར་གྱི་ཚོགས་འདུའི་སྟེང་ཞུགས་པའི་རྣམ་པ།
ང་ཕོད་འཇིགས་ཡོན་དང་གྱེས་ཕྱག་ཕུལ་རྗེས། ཁོས་སྤྱི་ཁྱབ་ཧྲུའུ་ཅི་ཞིས་ཅིན་ཕིང་གི་གསུང་བཤད་ཀྱི་གོ་རྟོགས་དང་། བོད་ལྗོངས་བཟོ་ཚོང་ལས་རིགས་མཉམ་འབྲེལ་ལྷན་ཚོགས་དང་དམངས་གཉེར་ཁེ་ལས་འཕེལ་རྒྱས་ཐད་ཀྱི་ཡང་དག་གནད་འཕིགས་ཀྱི་ལྟ་ཚུལ་སོགས་ངའི་རྣ་འགྲམ་དུ་ད་རུང་འཁོར་གྱི་ཡོད། ཇུས་འགོད་བྱས་པ་བརྒྱུད། ངས《ཞིས་ཅིན་ཕིང་གིས“འགྱུར་བ་མེད་པ་གསུམ”ནན་བཤད་དང་།“ཆེས་བརྡར་ཤ་མི་ཆོད་པའི་གནད་དོན”ལ་ཨ་ལན་སློག་པ》དང་།《ང་ཕོད་ངག་དབང་འཇིགས་མེད་ཀྱི་སྐུ་སྲས་ཀྱིས། དམངས་གཉེར་ཁེ་ལས་ཀྱིས་དབུལ་སྐྱོར་གནང་རྒྱུ་ནི་སྤྱི་ཚོགས་ལ་དྲིན་ལན་འཇལ་བའི་གོ་སྐབས་བཟང་པོ་ཞིག་ཡིན》ཞེས་པའི་རྩོམ་ཡིག་གཉིས་བྲིས་པ་ཡིན།
རྩོམ་ཡིག་འདི་གཉིས་ཀྱིས་ཨུ་ཡོན་ང་ཕོད་ཀྱིས་སྤྱི་དབང་མིན་པའི་དཔལ་འབྱོར་འཕེལ་རྒྱས་ཀྱི་བསམ་གཞིགས་དང་ཆོད་སེམས་མཚོན་ཐུབ་པ་དང་། སྤྱི་ཁྱབ་ཧྲུའུ་ཅི་ཞིས་ཅིན་ཕིང་གིས་“ཁྱོན་ཡོངས་འབྱོར་འབྲིང་དུ་བསྐྱོད་པར་གཅིག་ཀྱང་ཆད་མི་ཉན”ཞེས་གསུངས་པ་ཇི་བཞིན་ཀློག་པ་པོ་གང་མང་མང་གིས་བོད་ལྗོངས་ལ་སེམས་ཁུར་དང་རྒྱབ་སྐྱོར་གནང་བར་སྨོན་འདུན་ཞུའོ། །
