ཉིན་མཚན་9ཡི་རིང་མེ་བསད་པ་བརྒྱུད། ཚེས་2ཉིན་ཐོན་པའི་ཀན་ལྷོ་ཐེ་བོའི་ནགས་ཚལ་མེ་སྐྱོན་གྱི་མེ་ཆེ་བ་ཚང་མ་བསད་ཐུབ་པ་བྱུང་བ་དང་། ཚེས་12ཉིན་ལྟ་སྲུང་གི་དུས་མཚམས་སུ་ཕྱོགས་ཡོངས་ནས་འགྱུར་འགོ་ཚུགས་པ་རེད།
ཚེས་2ཉིན། ཀན་ལྷོ་ཐེ་བོའི་སྟག་ར་ནགས་རར་ནགས་ཚལ་མེ་སྐྱོན་ཐོན་པ་དང་། ནུས་ཤུགས་ཡོད་རྒུས་མེ་བསད་པ་བརྒྱུད། ཚེས་3ཉིན་གྱི་ཉིན་དགུང་ཐོག་མར་ཚོད་འཛིན་ཐུབ་ནས་མེ་ཆེ་བ་སྤྱིའི་ཆ་ནས་བསད་ཐུབ་པ་བྱུང་བ་དང་། མེ་རོ་གཙང་སེལ་བྱེད་པར་འགྱུར་འགོ་ཚུགས། ཚེས་3ཉིན་གྱི་ཕྱི་དྲོ། མེ་སྐྱོན་བྱུང་སར་ལྷགས་པ་ཆེན་པོ་བརྒྱབ་པའི་རྐྱེན་གྱིས་མེ་འབར་ཤུགས་ཆེ་རུ་ཕྱིན་ཏེ་མེ་གང་སར་མཆེད་པ་རེད།
སྟག་ར་ནགས་ར་ནི་གདོད་མའི་ནགས་ར་ཞིག་ཡིན་པ་དང་། དེའི་རྒྱ་ཁྱོན་ལ་སྤྱི་ཆིང་ཁྲི་7དང་ལྔ་སྟོང་ཙམ་ཡོད་པ་དང་མཛོད་དགེ་དང་འབྲེལ་ཡོད། སྟག་ར་ནགས་ར་ནི་རི་མཐོ་བ་དང་། གཡང་གཟར་བ། གྲོག་ཤུར་གཏིང་རིང་བ་བཅས་ཡོད་པ་དང་། ས་བབ་རྒྱ་མཚོའི་ངོས་ལས་མཐོ་ཚད་སྨི་2400ནས་སྨི་4300བར་ཟིན་ཞིང་། མེ་ཤོར་སའི་གཟར་ཚད་མང་ཆེ་བ་ཏུའུ་70ཙམ་ཡིན་པ་དང་འགའ་ཤས་ཏུའུ་90རུ་སླེབས་ཀྱི་ཡོད་ཅིང་། གྲོག་རོང་ཡིན་སྟབས་ཉིན་ལྟར་ཕྱི་དྲོའི་ཆུ་ཚོད་12དང་སྐར་མ་30ནས་ཆུ་ཚོད་13གྱི་གཡས་གཡོན་དུ་རླུང་ཤུགས་རིམ་བཞིན་ཆེ་རུ་འགྲོ་གི་ཡོད་པས་མེ་ཤུགས་ཀྱང་རིམ་གྱིས་ཆེ་རུ་འགྲོ་བ་མ་ཟད། མེ་ཡང་བསྐྱར་འབར་སླ་པོ་ཡོད། གཞན་ཡང་། རི་ཉིལ་བ་དང་། རྦབ་རྡོ་རིལ་བ། ས་རྡིབ་པ་སོགས་ཀྱི་གནོད་འཚེས་ཀྱང་མེ་གསོད་པར་འགོག་རྐྱེན་ངེས་ཅན་བཟོ་གི་ཡོད།
མེ་སྐྱོན་གྱི་གནས་ཚུལ་ཤེས་རྗེས། ཀན་སུའུ་ཞིང་ཆེན་གྱི་འབྲེལ་ཡོད་སྡེ་ཚན་ཁག་གིས་འཕྲལ་མར་མི་སྐུལ་སློང་བྱས་ཏེ། ཀན་ལྷོ་ཀྲོའུ་ཨུད་དང་ཀྲོའུ་སྲིད་གཞུང་གི་འབྲེལ་ཡོད་འགོ་ཁྲིད་འཕྲལ་མར་མེ་སྐྱོན་བྱུང་ཡུལ་དུ་བསྐྱོད་པ་རེད། ཀན་སུའུ་ཞིང་ཆེན་གྱི་མེ་ཟོན་དང་། དྲག་ཆས་ཉེན་རྟོག་ཀན་སུའུ་ཞིང་ཆེན་ནགས་ཚལ་སྤྱི་ཁྱབ་རུ་ཁག ཐེ་བོ་རྫོང་གི་ལས་བྱེད་མང་ཚོགས་བཅས་ཚང་མས་རང་ནུས་ཡོད་རྒུས་མེ་གསོད་པའི་ནང་ཞུགས་པ་རེད། རྒྱལ་ཁབ་ནགས་ཚལ་མེ་ཟོན་བཀོད་འདོམས་པུའུ་དང་རྒྱལ་ཁབ་ནགས་ལས་ཅུས་ཀྱིས་ཆེད་དམིགས་ལས་དོན་ཚོགས་ཆུང་རུ་ཁག་གཉིས་ས་གནས་ས་ཐོག་ཏུ་བཀོད་འདོམས་དང་བརྟག་དཔྱད་བྱེད་པར་མངགས་གཏོང་བྱས་པ་མ་ཟད། པའོ་ཅི་སོགས་ཀྱིས་ཐད་འཕུར་གནམ་གྲུ་བཏང་ནས་མེ་གསོད་པར་གཞོགས་འདེགས་བྱས་ཡོད། སི་ཁྲོན་སོགས་ཀྱི་ནགས་ཚལ་དྲག་ཆས་ཉེན་རྟོག་པས་ཀྱང་རོགས་སྐྱོབ་མི་སྣ་དུས་ཐོག་ཏུ་བསྣན་གཏོང་བྱས་ཡོད།
ཀན་སུའུ་ཞིང་ཆེན་ནགས་ཚལ་མེ་ཟོན་བཀོད་འདོམས་པུའུ་ཡིས་ངོ་སྤྲོད་བྱས་པར། ནགས་ཚལ་དྲག་ཆས་ཉེན་རྟོག་དཔོན་དམག་དང་། དྲག་ཆས་ཉེན་རྟོག་དཔོན་དམག སྤྱི་བདེ་ལས་བྱེད་ཉེན་རྟོག མེ་ཟོན་དཔུང་སྡེ། ས་གནས་ཆེད་ལས་རུ་ཁག ནགས་ལས་ལས་བཟོ་དང་ལས་བྱེད་མང་ཚོགས་བཅས་ཁྱོན་མི་4000ལྷག་ཙམ་གྱིས་མེ་ཧུར་ཐག་བསད་པ་དང་མཁའ་འགྲུལ་ནགས་སྲུང་ཐད་འཕུར་གནམ་གྲུའི་ནུས་པ་གང་ཡོད་ཀྱི་གཞོགས་འདེགས་འོག ཉིན་མཚན་9བརྒྱུད་རྗེས་ཐག་གཅོད་རང་བཞིན་གྱི་རྒྱལ་ཁ་ཐོབ་ནས་མེ་ཆེ་བ་ཚང་མ་བསད་ཐུབ་པ་བྱུང་བ་དང་མེ་རོ་ཡང་སྤྱིའི་ཆ་ནས་གཙང་སེལ་ཐུབ་པས་ཚེས་12ཉིན་ལྟ་སྲུང་གི་དུས་མཚམས་སུ་ཕྱོགས་ཡོངས་ནས་གྱུར་པ་རེད།
