ལོ་ལྔ་ཚན་བཅུ་གཉིས་པའི་རིང་རང་ལྗོངས་ཀྱི་ཞིང་འབྲོག་པའི་ཆེད་ལས་མཉམ་ལས་ཁང་གོང་འཕེལ་ཆེན་པོ་བྱུང་ཞིང་། མཉམ་ལས་ཁང་དེ་དག་གིས་རང་ས་ཁུལ་གྱི་ལེགས་ཆའི་ཐོན་རྫས་ལས་སྣོན་བྱེད་པ་དང་ཁྱད་ལྡན་ཐོན་ལས་འཕེལ་རྒྱས་གཏོང་བ་བརྒྱུད། ཞིང་འབྲོག་མང་ཚོགས་རྣམས་ལས་ཞུགས་འབབ་འཕར་ཐུབ་རྒྱུར་སྐུལ་འདེད་ཆེན་པོ་བཏང་ཡོད། གད་པོ་རྩམ་པ་ལས་སྣོན་ཞིང་པའི་ཆེད་ལས་མཉམ་ལས་ཁང་ནི་སྟོད་ལུང་བདེ་ཆེན་ཆུས་རྒུ་རུམ་ཤང་རྒུ་རུམ་གྲོང་ཚོར་གནས་ཡོད་པ་དང་། སྤྱི་ལོ༡༩༩༢ལོར་རྒུ་རུམ་གྲོང་ཚོའི་ལས་དོན་རུ་ཁག་དང་ལྷ་ས་གྲོང་ཁྱེར་སློབ་གསོ་ཅུད་ཀྱིས་ཤུགས་ཆེའི་རྒྱབ་སྐྱོར་འོགལྷ་ས་གྲོང་ཁྱེར་དུ་རྒུ་རུམ་ཙམ་པ་ཐད་འཚོང་ཁང་ཞིག་བཙུགས་ཡོད་པ་དང་ད་ཆ་མཉམ་ལས་ཁང་དེ་དབུ་བརྙེས་ཏེ་ས་ཆ་དེ་གའི་མང་ཚོགས་འབབ་འཕར་ཕྱུག་འགྱུར་ཡོང་རྒྱུར་ནུས་པ་ཆེན་པོ་ཐོན་ཡོད་པ་རེད།།
གད་པོ་རྩམ་པ་ལས་སྣོན་ཞིང་པའི་ཆེད་ལས་མཉམ་ལས་ཁང་གི་འགན་འཁུར་བ་དབང་འདུས་ལགས་ནས་བོད་ལྗོངས་རླུང་འཕྲིན་ལས་ཁུངས་ཀྱི་གསར་འགོད་པའི་བཅར་འདྲི་དང་ལེན་ཞུ་བཞིན་པ།
དབང་འདུས་ལགས་ནས་རྩམ་པ་ལས་སྣོན་འཕྲུལ་འཁོར་གྱི་འཁོར་སྐྱོད་བརྒྱུད་རིམ་གསལ་འགྲེལ་གནང་བཞིན་པ།
གད་པོ་རྩམ་པ་ལས་སྣོན་ཞིང་པའི་ཆེད་ལས་མཉམ་ལས་ཁང་གི་འགན་འཁུར་བ་དབང་འདུས་ལགས་ནས་ངོ་སྤྲོད་གནང་བར་གཞིགས་ན། མཉམ་ལས་ཁང་དེར་ཁོངས་མི༡༣༠ལྷག་ཙམ་ཡོད་པ་དང་རྒུ་རུམ་གྲོང་ཚོའི་གྲོང་མི་མང་དག་ཞིག་མཉམ་ལས་ཁང་ནང་ལས་ཞུགས་ཐུབ་ཡོད། ལོ་གསུམ་ནང་མཉམ་ལས་ཁང་དེའི་ཡོང་འབབ་སྒོར་ཁྲི ༩༢ཟིན་པ་དང་བསྟུན་ཏེ། ལོ་ལྟར་དཀའ་ངལ་ཡོད་པའི་དུད་ཁྱིམ་དང་སློབ་གྲྭ་སོགས་ལ་དངུལ་སྨར་ཞལ་འདེབས་རྒྱག་གི་ཡོད། ད་ཆ་ནག་ཆུ་དང་ལྷ་སར་རྩམ་པ་ཐད་འཚོང་ཁང་གཉིས་བཙུགས་ཡོད་པ་རེད།།
