འདི་ནི་བྱམས་པ་གླིང་གྲོང་ཚོའི་མང་ཚོགས་ཀྱིས་བོད་ཀྱི་ཞིང་བྲན་ཁྲི་ཚོ་བརྒྱར་བཅིངས་འགྲོལ་ཐོབ་ནས་ལོ་57འཁོར་བར་དྲན་གསོ་ཞུ་བའི་བྱེད་སྒོའི་ཐོག་འཁྲབ་སྟོན་བྱེད་པའི་གནས་ཚུལ་ཡིན་པ།
ཟླ་3ཚེས་28ཉིན་གྱི་སྔ་དྲོ། གྲ་ནང་རྫོང་གྲ་ཐང་གྲོང་རྡལ་བྱམས་པ་གླིང་གྲོང་ཚོ་ཨུ་ཡོན་ལྷན་ཁང་གི་སྒོ་རའི་ནང་སྐར་ལྔའི་དར་དམར་ལྷབ་ལྷུབ་ཏུ་གཡོ་བ་དང་ལུས་ལ་གཟབ་སྤྲོས་སྤྲས་པའི་མང་ཚོགས་ཀྱིས་ཁེངས། ལས་དོན་རུ་ཁག་གིས་གྲོང་ཚོ་ཨུ་ལྷན་གཉིས་ལ་གཞོགས་འདེགས་བྱས་ནས་མང་ཚོགས་སྒྲིག་འཛུགས་ཀྱིས“ལོ་རྒྱུས་བློ་ལ་བརྟན་པོ་ངེས་ནས་ད་ཆའི་བདེ་སྐྱིད་འཚོ་བར་གཅེས་སྤྲས་བྱེད”ཅེས་པ་བརྗོད་དོན་གཙོ་བོར་བྱས་པའི“3·28”བོད་ཀྱི་ཞིང་བྲན་ཁྲི་ཚོ་བརྒྱར་བཅིངས་འགྲོལ་ཐོབ་པའི་དྲན་གསོའི་ཉིན་མོར་རྟེན་འབྲེལ་ཞུ་བའི་བྱེད་སྒོ་སྤེལ་བ་རེད།
རྟེན་འབྲེལ་བྱེད་སྒོ་སྤེལ་ཡུལ་དུ་གྲོང་ཚོར་བཅའ་སྡོད་ལས་དོན་རུ་ཁག་གི་འགན་འཁུར་བས་མང་ཚོགས་ཚོར“3·28”བོད་ཀྱི་ཞིང་བྲན་ཁྲི་ཚོ་བརྒྱར་བཅིངས་འགྲོལ་ཐོབ་པའི་དྲན་གསོའི་ཉིན་མོའི་གཏན་འཁེལ་བྱེད་དགོས་དོན་དང་དེ་བཞིན་བོད་ཞི་བའི་བཅིངས་འགྲོལ་དང་དམངས་གཙོའི་བཅོས་སྒྱུར་སོགས་ཀྱི་འབྲེལ་ཡོད་ལོ་རྒྱུས་ངོ་སྤྲོད་བྱས་པ་དང་སྦྲགས་མང་ཚོགས་ཚོར་ད་ཆའི་བདེ་སྐྱིད་འཚོ་བར་གཅེས་སྤྲས་ཀྱིས་ནམ་ཡང་ཏང་གི་བཀའ་ལ་ཉན་པ་དང་ཏང་གི་རྗེས་སུ་འབྲངས་དགོས་པའི་སློབ་གསོ་བརྒྱབ་པ་རེད། དེ་རྗེས་གྲོང་ཚོར་བཅའ་སྡོད་ལས་དོན་རུ་ཁག་དང་གྲོང་ཚོའི“ཨུ་ལྷན་གཉིས”ཀྱིས་གདན་ཞུ་བྱས་པའི་གྲ་ནང་རྫོང་དྲིལ་བསྒྲགས་རུ་ཁག་གིས“ཡར་ལངས་ཞིང་བྲན་གྱིས་དགའ་བའི་གླུ་དབྱངས་ལེན”ཞེས་པའི་བརྗོད་དོན་གཙོ་བོའི་རིག་རྩལ་འཁྲབ་སྟོན་བྱས་པ་དང་ཁོང་ཚོས་མཛེས་སྡུག་ལྡན་པའི་འཚོ་བ་དང་ཞི་མཐུན་སྤྱི་ཚོགས་ལ་བསྟོད་གླུ་བླངས་ནས་བོད་ཀྱི་ཞིང་བྲན་ཁྲི་ཚོ་བརྒྱར་བཅིངས་འགྲོལ་ཐོབ་ནས་ལོ་57འཁོར་བའི་ཉིན་མོ་མཉམ་དུ་དགའ་གཏོང་བྱས་པ་རེད།
