མཚོ་སྔོན་གསར་འགྱུར་དྲ་བའི་འཕྲིན་ལྟར་ན། ལོ་ལྔའི་འཆར་གཞི་བཅུ་གཉིས་པའི་སྐབས། སྟོང་སྐོར་རྫོང་འཆར་ལྡན་བུ་སྐྱེས་འཕྲོད་བསྟེན་ཁང་གི་བྱ་གཞག་དེ་རྫོང་ཏང་ཨུ་དང་རྫོང་སྲིད་གཞུང་གི་ཡང་དག་པའི་མགོ་ཁྲིད་འོག རྫོང་ཡོངས་ཀྱི་འཕྲོད་བསྟེན་དང་འཆར་ལྡན་བུ་སྐྱེས་ཁང་འཐབ་ཕྱོགས་ཀྱིས་ཚན་རིག་དང་མཐུན་པའི་འཕེལ་རྒྱས་ཀྱི་ལྟ་བ་སློབ་སྟོན་དུ་བཟུང་ནས། འཕྲོད་བསྟེན་དང་འཆར་ལྡན་བུ་སྐྱེས་ཞབས་ཞུའི་མ་ལག་འཛུགས་སྐྲུན་དང་། སྨན་བཅོས་འཕྲོད་བསྟེན་གྱི་སྒྲིག་སྲོལ་བསྒྱུར་བཅོས། ནད་ཡམས་འགོག་བཅོས་ཚོད་འཛིན་ནུས་པ། མ་བུའི་བདེ་ཐང་ཞབས་ཞུའི་ནུས་པ། མི་གྲངས་བདེ་ཐང་གི་ཆུ་ཚད་མཐོར་འདེགས་སོགས་ཀྱི་ཕྱོགས་ནས་གྲུབ་འབྲས་མངོན་གསལ་བླངས་པ་དང་། གཞི་རིམ་གྱི་རྨང་གཞི་སྒྲིག་ཆས་ཇེ་བརྟན་དུ་བཏང་ཡོད་པས། ལོ་ལྔའི་འཆར་གཞི་བཅུ་གཉིས་པའི་འཆར་འགོད་དམིགས་འབེན་དང་འོས་འགན་གཙོ་བོ་དག་ཕྱོགས་ཡོངས་ནས་ལེགས་འགྲུབ་བྱུང་ཡོད་པ་རེད།
