བྱིས་པ་དག་ལོ་གཉིས་ལྷག་ལ་སོན་དུས་སྐད་ཆ་ཅུང་ཡག་པོ་ཞིག་འཆད་ཐུབ་ཀྱི་ཡོད་ནའང་། ལས་སླ་མོས་ངང་རང་གིས་གང་ལ་བསམ་བློ་གཏོང་བ་དེ་གནད་ལ་ཁེལ་བའི་ངང་ཤོད་ཐུབ་ཀྱི་མེད། ཁོ་ཚོ་ཅི་ཞིག་ལ་བསམ་བློ་འཁོར་གྱི་ཡོད་པ་རེད། ང་ཚོས་ག་འདྲ་བྱས་ནས་ཁོ་ཚོ་དང་འབྲེལ་བ་བྱ་དགོས་པ་རེད། བྱིས་པ་གསུམ་གྱི་ཨ་མར་གྱུར་པའི་པརྣ་དི་སློབ་གླིང་གི་བྱིས་སྐྱོང་ལྟེ་གནས་ཀྱི་འགོ་འཛིན་ཏེ་འབུམ་རམས་པTovah Kleinལགས་ཀྱིས་ལོ་ངོ་ཉི་ཤུ་ལྷག་གི་རིང་ལ་བྱིས་པའི་སྤྱོད་པ་ལ་ཡང་ཡང་བརྟག་པ་དང་། ཉེ་བའི་ཆར“བྱིས་པ་ཇི་ལྟར་ནར་སོན་པ་སྟེ་ཕ་མ་དག་གིས་བྱིས་པ་ལོ་གཉིས་ནས་ལྔ་ཅན་ལ་ཚེ་གང་པོར་སྨན་པའི་ལས་ཀ་ཅི་ཞིག་བསྒྲུབ་དགོས་ཚུལ”ཞེས་པའི་འཇུག་ཡུལ་ལ་ཉམས་ཞིབ་མཛད་ཡོད་པ་རེད། གལ་སྲིད་ཁྱེད་རང་བྱིས་པ་ལོ་གཉིས་ནས་ལྔ་ཅན་གྱི་ཕ་མ་ཡིན་ཚེ་གཤམ་གྱི་བྱིས་སྐྱོང་གདམས་ངག་ཚན་པ་ལྔ་ལ་ཅིས་ཀྱང་གཟིགས་པར་འཚལ་ལོ། །
རྩོམ་འདིའི་བརྗོད་དོན་ཉུང་ངུར་བསྡུས་ནས་བསྒྱུར་བའོ། །
རི་མོ།
ཁོ་ཚོའི་དུས་ཀྱི་འདུ་ཤེས་སྐོར་གྱི་ཀླད་པའི་གྲུབ་ཆ་ཁག་ད་ལྟ་ཆགས་བཞིན་པའི་སྒང་ཡིན་པས་དེའི་སྐོར་གྱི་ལྟ་བ་མེད།
ཁྱིམ་བདག་ཕལ་མོ་ཆེ་ནི་བྱིས་པ་དག་གིས“ཁྱོད་ད་ལྟ་ལམ་སེང་ཐོན་ཅིག”ལྟ་བུའི་རེ་བ་ལ་ཡ་མི་བྱེད་པའི་ཚུལ་ལ་ཚིག་པ་ཟོས་ཏེ་བྱིས་པ་ཚོར་དུས་ཀྱི་འདུ་ཤེས་མི་འདུག་སྙམ་གྱི་ཡོད་ནའང་། དོན་ལ་ནི་བྱིས་པ་དག་གི་དུས་ཀྱི་འདུ་ཤེས་སྐོར་གྱི་ཀླད་པའི་གྲུབ་ཆ་ཁག་ད་ལྟ་ཆགས་བཞིན་པའི་སྒང་ཡིན་པས་སོ། །འབུམ་རམས་པTovah Kleinལགས་ཀྱི་གཞུང་བཞིན། “བྱིས་པ་དག་གི་དུས་ཀྱི་འདུ་ཤེས་སྐོར་གྱི་ཀླད་པའི་གྲུབ་ཆ་ཁག་ད་ལྟ་ཆགས་བཞིན་པའི་སྒང་ཡིན་པས། སྐྱེ་བོ་དར་མ་དག་དང་འདྲ་བར་དུས་ལ་གོ་སྒྲིག་པ་དང་། དགའ་སྐྱོ་ཆགས་སྡང་ལ་ཚོད་འཛིན་པ། ཅི་དྲན་རེ་བ་འདོན་པ། ཞིབ་འདང་བརྒྱབ་ནས་ལས་ཀ་བྱེད་པ། སེམས་ཀྱི་གནོན་པ་དག་སེལ་ཐུབ་པ་སོགས་བྱེད་ཐུབ་ཀྱི་མེད།” བྱིས་པ་དག་ནི་ད་ལྟ་བའི་གནས་སྐབས་དེ་ཉིད་དུ་འཚོ་བས། གལ་སྲིད་ཁྱོད་ཀྱིས“ང་ཚོ་སྐར་མ་ལྔའི་རྗེས་ནས་ཐོན་འགྲོ”ཞེས་ལབ་ཚེ། ཁོ་ཚོས་ད་ལྟ་ཉིད་ལ་འགྲོ་མི་དགོས་པ་ཚོར་གྱི་ཡོད། བྱིས་པ་དག་ལ་དུས་ཀྱི་འདུ་ཤེས་ཆགས་སུ་འཇུག་པར། ཉིན་གཅིག་གི་ལས་རིམ་གང་དེ་དུས་རྟག་ཏུ་བཟློས་ནས་སྤྱོད་པ་དང་། གོ་རིམ་སྟོན་པའི་ཚིག་གང་སྟེ“ཐོག་མར”དང་། “བར་དུ”། “རྗེས་སུ”ལ་སོགས་པ་དག་སྤྱད་ན་ལེགས་པར་མཐོང་།
བྱིས་པའི་མིག་ཏུ“དབང་ཆ”དང“བདག་འཛིན”གྱིས་ཁེངས་ཡོད་པས་ཁོ་ཚོར་གདམ་ག་བྱེད་པའི་རང་དབང་ཅུང་ཙམ་སྟེར་རོགས།
ཁྱེད་ཀྱིས་རང་ཉིད་ཞོ་འཐུང་བྱིས་པ་ཡིན་དུས་ཀྱི་ཁོར་ཡུག་ཇི་འདྲ་ཞིག་ཡིན་པར་བསམ་བློ་ཞིག་ཐོངས་དང་། བྱིས་པ་དག་གིས་སྒྲུབ་བྱའི་ལས་དང་། བཟའ་བྱའི་ཟས། འགྲོ་སའི་གནས་གང་ཡང་རང་གིས་ཐག་གཅད་མི་ཐུབ་པར། ཐམས་ཅད་ཕ་མ་དག་གིས་བདག་བྱེད་ཀྱི་ཡོད། དེས་ན་བྱིས་པ་དག་གིས་ཅི་ཞིག་བདག་གིར་བྱ་ཐུབ་བམ་ཞེ་ན། གོན་བྱའི་གོས་དང་། ཁ་ལ་འཇོག་རྒྱུའི་ཟས། གསང་ཆབ་དོར་དགོས་མིན། གཉིད་ཉལ་བའི་དུས། ད་དུང་སྐད་ཆ་ད་མ་ཏིག་གིས་བཤད་སྙམ་པ་དེ་དག་གོ །འདི་དག་ནི་ཏག་ཏག་ཁྱིམ་བདག་མང་པོ་མགོ་ན་བར་བྱེད་པའི་རྒྱུ་རེད། འབུམ་རམས་པTovah Kleinལགས་ཀྱིས་གསུངས་པ། འདི་ནི་བྱིས་པ་དག་གིས་རང་གིས་ཐག་གཅད་རྒྱུ་སྦྱོང་བའི་སྐབས་ཡིན་པས་ཕ་མ་དག་གིས་ཁོ་ཚོར་རང་དབང་ཅུང་ཙམ་སྟེར་འོས། གལ་ཏེ་བྱིས་པ་དག་གིས་གོས་གོན་པར་མི་བྱེད་ན། སྔོན་ལ་རྐང་པ་གཡས་པ་གོན་ནམ་གཡོན་པ་གོན་ཞེས་འདྲི་བར་བྱ། གལ་ཏེ་བཟའ་བྱ་གདམ་པར་བྱེད་ན། བྱིས་པའི་སྡེར་མ་རུ་ཁོ་བཟའ་རྒྱུར་མོས་པའི་བཟའ་བཅའ་རིགས་གཅིག་གཞག་པར་བྱ། ཚད་ཡོད་པའི་ངང་བྱིས་པར་གདམ་ག་བྱིན་པ་དེས་ཁོ་ཚོར་རང་ཉིད་ལ་དབང་ཆ་ཡོད་པའི་འདུ་ཤེས་སྐྱེ་རུ་འཇུག “གལ་སྲིད་ཉིད་ཀྱིས་ཕ་མར་འགྱུར་བ་ནི་དབང་ཆའི་རྩེད་མོ་ཞིག་ཡིན་པར་དགོངས་ནས་བྱིས་པའི་ཐམས་ཅད་བདག་གིར་བྱེད་འདོད་ཚེ། སྡུག་ཐང་ནས་བླངས་ཏེ་རུམ་ལ་བཅུག་པ་ཉིད་ལས་མ་འདས་ཏེ། བྱིས་པ་ཅི་ཙམ་ནར་སོན་པ་དེ་ཙམ་གྱིས་འགལ་བ་དང་བཟློག་པའི་ལམ་དུ་ཞུགས་ནས། རང་རྐྱ་འཕེར་བའི་མི་ཞིག་ཡིན་པར་བསྒྲུབ་ངེས་པ་ཏན་ཏན་ལགས་སོ། །”
དགོད་ཁ་སློང་བས་བྱིས་པ་དག་ཞེ་ནས་དགའ་རུ་འཇུག་མི་ཐུབ་པས། ཁོ་ཚོར་དེ་བས་ཀྱང་སེམས་ཞིབ་མོའི་ཉན་པ་པོ་ཞིག་དང་སྙིང་རྗེ་སྐྱེ་མཁན་ཞིག་མཁོ་སྲིད།
བྱིས་པ་དག་གིས་རང་ལ་ཉེན་ཁ་མེད་པའི་དུས་ནི་ཆེས་སྐྱིད་པའི་དུས་ཡིན་པར་འདོད་པ་ནི་མངོན་གསལ་དོད་པོ་རེད། “བདག་གཞན་མཉམ་བརྗེ་དང་ཤེས་པ་ཅུང་ཟད་ཙམ་གྱིས་ཀྱང་བྱིས་པ་དག་གིས་ཚོར་བ་མི་འདྲ་བ་རྟོགས་ཤིང་ངོས་ཟིན་པ་ལ་རོགས་ཆེན་པོ་བྱ་ཐུབ།” གལ་སྲིད་བྱིས་པ་དག་གིས་ཀ་ར་མངར་མོ་ཟོས་ཚར་དུས། ཁྱེད་རང་ནི་ཧ་ལམ་ལམ་སེང་ཉོ་རུ་འགྲོ་སྲིད་མོད། གལ་ཏེ་ཁྱེད་ཀྱིས་ཀ་ར་མངར་མོ་ཟོས་ཚར་བར་ཕངས་སེམས་དང་སྙིང་རྗེ་སྐྱེ་བའི་བློ་བསྟན་ཚེ། བྱིས་པ་དག་གིས་ཁྱེད་ལས་ཀ་ར་མངར་མོ་མེད་ཀྱང་སྔར་བཞིན་འཚོ་ཐུབ་པའི་གནས་ལུགས་ཤེས་ཐུབ། ཁྱིམ་བདག་དག་གིས་བྱིས་པ་དག་ཕམ་ཁ་ལས་རྣམ་པར་རྒྱལ་ཐུབ་པར་སྨྲས་ནས་དཀའ་བ་ལས་རྒྱལ་རྒྱུར་རོགས་བྱས་ཚེ། ཁོ་ཚོར་ཞུམ་པ་མེད་པའི་སེམས་ཤུགས་ཀྱང་སློབ་ཐུབ།
ནར་སོན་པའི་སྐབས་སུ་དཀའ་ཁག་མང་ཙམ་མྱངས་ན་ལེགས།
ཁྱིམ་བདག་དག་གིས་ནི་བྱིས་པ་དག་དཀའ་ཁག་དང་ཕམ་ཁ་ལ་ཡོངས་སུ་བྲལ་བར་འདོད་ནའང་། དཀའ་ཁག་གིས་བྱིས་པ་ནར་སོན་དུ་འཇུག་ཐུབ། ཕམ་ཁ་ཡིས་བྱིས་པ་དག་ཕམ་ཁ་ལས་རྣམ་པར་རྒྱལ་ཞིང་། བློ་རྒྱ་ཆེན་པོ་དང་། སེམས་རྩ་འཁོལ་པོ་ཞིག་ཡོང་དུ་འཇུག་ཐུབ། འབུམ་རམས་པTovah Kleinལགས་ཀྱིས་དེབ་ཏུ་གསུངས་པ། “ནར་སོན་པ་ནི་སྐྱོན་ལས་པའི་གོ་རིམ་ཞིག་ཡིན་སྟབས། ཚོད་ལྟ་དང་ཕམ་ཁ་གང་མང་མང་ཞིག་ནི་མ་བརྒྱུད་ཐབས་མེད་ཡིན། འཚོ་བ་རང་ནི་རྣམ་པ་ཀུན་ཏུ་ཉེན་པའི་ལམ་ཁ་ཞིག་ཡིན་པས། ཕམ་ཁ་མྱངས་རྒྱུའི་སྤོབས་པའང་མེད་ཚེ་དེ་དག་ལས་ཇི་ལྟ་བུར་རྣམ་པར་རྒྱལ་ལམ།”
བྱིས་པའི་ད་ལྟའི་གཤིས་ཀ་ནི་ཕྱིས་སུ་ཉིད་ཀྱིས་སྐྱོང་འདོད་པ་དེའོ། །
ཕ་མ་དག་ནི་བྱིས་པའི་རང་གིས་བདག་ཅིང་། ཡ་མཚར་ཆེ་བ། བརྩེ་བ་ཁོལ་བ། ངང་རྒྱུད་རིང་བ། ཐ་ན་མགོ་མཁྲེགས་པོའི་ངང་ཚུལ་དེའི་དབང་དུ་གྱུར་ཏེ། ཁྱེད་རང་དུས་ཆད་ལ་འཕྱི་པོ་ཆགས་པར་བྱེད་པའམ། བྱིས་པས་ཁྱེད་ཀྱི་ཁ་ལ་མི་ཉན་པའི་ཚོར་བ་སྟེར་གྱི་ཡོད། ཡིན་ནའང་འབུམ་རམས་པTovah Kleinལགས་ཀྱིས། གཤིས་ཀ་འདི་དག་གིས་བྱིས་པ་དག་ལུས་པོ་ནར་སོན་ཞིང་རིག་པ་རྒྱས་པར་བྱེད་ཅིང་། དེ་དག་ནི་ཏན་ཏན་ཕ་མ་ཁྱེད་ཅག་གིས་བྱིས་པ་སྐྱོང་འདོད་པ་དེ་ལགས་སོ་ཞེས་གསུངས་སོ། །(རྩོམ་འགན་པ། རྟ་མགྲིན)
