ཀྲུང་གོའི་བོད་ལྗོངས་དྲ་བ།>དབུ་ལྷེ།

ཞི་ཅིན་ཕིན་གྱིས་གསུང་དོན།_སྟེགས་བུའི་སྟེང་འོག་གཉིས་ནས་སྤྱོད་ཚུལ་གཅིག་པ་ཡོང་དགོས།

2015-04-14
ཀ +
    “སྟེགས་བུའི་སྟེང་འོག་གཉིས་ཀྱི་སྤྱོད་ཚུལ་མི་འདྲ་བ་དང་། ཁ་ནས་བཤད་པ་དང་ལག་ནས་ལས་པ་གཉིས་ཀྱང་མི་འདྲ་བ། མིའི་མདུན་དུ་མི་དང་རྒྱབ་ཏུ་འདྲེ་ཡིན་”ཞེས་ཧྲན་ཏུང་ཞིང་ཆེན་ཨུ་ཡོན་ལྷན་ཁང་གི་རྒྱུན་ཨུད་སྔོན་མ་དང་། ཅི་ནན་གྲོང་ཁྱེར་ཨུ་ཡོན་ལྷན་ཁང་གི་ཧྲུའུ་ཅི་སྔོན་མ་ཝང་མིང་གིས་རང་གི་“མི་ཚེ་ངོ་གཉིས་མ་”ལ་འདི་ལྟར་ཞིབ་བརྗོད་བྱས་ཡོད།
   མིག་སྔར།  ཀྲུང་དབྱང་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གི་གཞུང་ཕྱོགས་ཀྱི་དྲ་གནས་སྟེང་དུ་《ཏང་ལ་ངོ་གཉིས་མ་གཏན་ནས་འཁྲབ་མི་རུང་།—ཧྲན་ཏུང་ཞིང་ཆེན་ཨུ་ཡོན་ལྷན་ཁང་གི་རྒྱུན་ཨུད་སྔོན་མ་དང་། ཅི་ནན་གྲོང་ཁྱེར་ཨུ་ཡོན་ལྷན་ཁང་གི་ཧྲུའུ་ཅི་སྔོན་མ་ཝང་མིང་གི་གྱོད་གཞི་ཉེན་ཐོ་》ཞེས་པའི་རྩོམ་ཞིག་བཀོད་པའི་ནང་དུ་ཝང་མིང་གི་དཔོན་ཚོང་ངན་འབྲེལ་དང་ལྐོག་ཧམ་ངན་རུལ་གྱི་ཞིབ་ཕྲའི་བརྒྱུད་རིམ་དག་གསལ་པོར་བཏོན་ཡོད།
   དེས་ན་“སྟེགས་བུའི་སྟེང་འོག་གཉིས་ཀྱི་སྤྱོད་ཚུལ་མི་འདྲ་བའི་”སྣང་ཚུལ་གྱི་ཐད་ཞི་ཅིན་ཕིན་ལ་བཤད་ཚུལ་གང་ཞིག་ཡོད་དམ་ཞེ་ན། སློབ་སྦྱོང་ཚན་ཆུང་གིས་རྒྱུ་ཆ་བསྡུ་སྒྲིག་བྱེད་དུས་སུ་ཞི་ཅིན་ཕིང་གིས་རང་ཞིབ་གླེང་བའི་དུས་སུ་སྔོན་ཆད་གནད་དོན་འདི་གླེང་མྱོང་ཡོད་འདུག 
   “སྟེགས་བུའི་སྟེང་འོག་གཉིས་ཀྱི་སྤྱོད་ཚུལ་མི་འདྲ་བ”ནི་མདོར་ན་གཅིག་པུར་རང་ཞིབ་དང་དོན་ཆུང་ས་ནས་གཟབ་ནན་མ་བྱས་པ་ཡིན། དེ་རིང་ཚན་ཆུང་གིས་ཚོ་མི་དག་དང་མཉམ་དུ་ཞི་ཅིན་ཕིང་གིས་དཔོན་པོའི་རང་ཞིབ་དང་འབྲེལ་བའི་དཔྱད་བརྗོད་ཀྱི་སྐོར་ནས་བསྐྱར་སྦྱོང་ཞིག་བྱེད།

【གཅིག】
“རང་ཞིབ་” ཀྱི་མཐོ་ཚད་ཅིག་ལ་སྙེག་པ། 
(ཉིས་སྟོང་བདུན་ལོའི་ཟླ་གསུམ་པའི་ཚེས་ཉེར་ལྔ་ཉིན།)
   《ལུགས་ཀྱི་གཞུང་ལུགས་》ནང་ “ཆེས་ཕྲ་ཞིང་ཞིབ་པའི་བྱ་བ་དང་སྤྱོད་པས་མི་ཞིག་གི་གཤིས་ཀ་མཚོན་ཡོང་། དེ་བས་སྐྱེས་བུ་དམ་པས་ངེས་པར་དུ་རང་ཞིབ་བྱེད་ཤེས་དགོས་”ཞེས་བཀོད་ཡོད།    ཏང་ཡོན་ལས་བྱེད་པས་“རང་ཞིབ་”བྱེད་དགོས། ཏང་ཡོན་དང་ཁྱད་པར་དུ་འགོ་ཁྲིད་ལས་བྱེད་པ་ལ་དུས་རྒྱུན་དབང་ཆ་ངེས་ཅན་ཞིག་ཡོད་པས་རང་འགུལ་ངང་རྩ་འཛུགས་དང་ལམ་ལུགས་ཀྱི་ལྟ་སྐུལ་དང་ལེན་བྱེད་དགོས་པ་མ་ཟད།  ད་དུང་ རང་གཅུན་ལ་རྒྱུན་མི་ཆད་པར་ཤུགས་སྣོན་བརྒྱབ་སྟེ་སྟེགས་བུའི་སྟེང་འོག་དང་མིའི་མདུན་རྒྱབ་ནས་གཅིག་མཚུངས་ཡོང་དགོས་འདུག     ལྷག་པར་དུ་མིའི་ལྐོག་ཏུའམ་མི་མེད་དུས། དོན་ཞིབ་ཕྲ་ལ་ཐུག་དུས་སུ་འཁྱགས་པ་སྲབ་མོའི་སྟེང་དུ་འགྲོ་བ་དང་གཡང་གཟར་གྱི་མདུན་དུ་སླེབས་པ་བཞིན་ཐོག་མཐའ་བར་གསུམ་དུ་བག་མེད་དང་སྲོལ་འགལ་བྱེད་མི་རུང་།
   བློ་མཐུན་ལིའུ་ཧྲའོ་ཆི་ཡིས་《གུང་ཁྲན་ཏང་ཡོན་གྱི་བྱང་ཚད་གླེང་བ་》ཞེས་པའི་ནང་དུ་རང་ཞིབ་ནི་ཏང་གཤིས་བློ་སྦྱོང་གི་རྣམ་པ་ནུས་ལྡན་ཞིག་དང་ཆེས་མཐོའི་རིམ་པ་ཞིག་ཏུ་བརྩིས་ནས་དར་སྤེལ་དུ་བཏང་ཡོད།  ཁོས་“ཁོ་གཅིག་པུས་བྱ་བ་ལས་དུས་སམ་ལྟ་རྟོག་བྱེད་མཁན་མེད་དུས། ལས་ཀ་ངན་པ་སྣ་ཚོགས་ལས་ཐུབ་པའི་དུས་སྐབས་ཡོད་ཀྱང་ཁོས་རང་ཞིབ་བྱེད་ཐུབ་པས་ལས་ངན་པ་གང་ཡང་མ་ལས་”ཞེས་བཤད་ཡོད།  དེ་བས་ཏང་ཡོན་ལས་བྱེད་པ་ཚང་མས་“རང་ཞིབ་”ལ་བརྩོན་དགོས།
   ཐོག་མར། ཕུགས་བསམ་དང་ཡིད་ཆེས་བརྟན་པོ་བྱས་ནས་ཆབ་སྲིད་ཀྱི་ཁ་ཕྱོགས་གསལ་པོ་ཞིག་བསྐྲུན་པ་དང་། ཆབ་སྲིད་ཀྱི་རྩ་དོན་མངོན་གསལ་ཞིག་བརྩི་སྲུང་། སོ་སོའི་ཆབ་སྲིད་ཀྱི་ཚེ་སྲོག་ལ་གཅེས་སྤྲས་བཅས་བྱས་ཏེ་ནང་གནས་ཀྱི་ “ཏིང་ངེ་འཛིན་གྱི་སྟོབས་ཤུགས་” དེ་གྲུབ་པ་བྱེད་དགོས། 
   དེ་ནས། གནའ་མིས་“བདག་གིས་ཉིན་རྒྱུན་རང་ལ་ཐེངས་དུ་མང་ལ་ཞིབ་བཤེར་བྱེད་”ཅེས་བཤད་པ་ནང་བཞིན་དུ་དུས་རྟག་ཏུ་རང་སྐྱོན་རང་བརྟག་བྱས་ཤིང་། རང་རྩིས་དང་རང་བརྟག  རང་ཟོན། རང་སྐུལ། དེ་མིན་རང་ལུས་རང་གཅེས་དང་ཚུལ་མིན་སེལ་ཐབས་བྱས་ཏེ་རང་གཅུན་བློ་སྦྱོང་ལ་དོ་སྣང་སྒོས་རུལ་སུངས་འགོག་རྒོལ་གྱི་“ནད་འགོག་ནུས་པ་”ཇེ་དྲག་ཏུ་གཏོང་དགོས།
   དུས་མཉམ་དུ་ད་དུང་བྱ་བ་སྒྲུབ་པ་དེ་ཕྱི་གསལ་ནང་གསལ་ཡོང་དགོས། ཏང་ཡོན་ལས་བྱེད་པའང་སྐྱེས་བོ་ཕལ་བ་ཡིན་པས་ཁོ་ལ་ཞན་ཆ་སྣ་ཚོགས་མེད་མི་སྲིད་ལ་ནོར་འཁྲུལ་སྣ་ཚོགས་བཟོ་སྲིད། དེའི་རྐྱེན་ཕྱི་གསལ་ནང་གསལ་ནི་རུལ་འགོག་གི་སྨན་ཡག་ཤོས་དེ་ཡིན་ཞིང་། ལས་ཀ་གང་ཞིག་སྒྲུབ་རུང་གཡུ་སྒྱུ་མ་འཁྲབ་པར་དམངས་གཙོ་ལྡན་པ་དང་གོ་རིམ་ལྡན་པ། སྒྲིག་ལམ་ལྡན་པ་ཞིག་བྱས་ཚེ་ད་གཟོད་བསླུ་བྲིད་སྣ་ཚོགས་ཀྱི་“སིམ་ཤུགས་”ཇེ་ཉུང་དུ་འགྲོ་ཞིང་།  རུལ་སུངས་འགོག་རྒོལ་བྱེད་པ་དེ་སྐད་ཆ་སྟོང་བ་ཞིག་ཏུ་འགྱུར་མི་ཡོང་།    
《ཀྲི་ཅང་གཏམ་གསར་》ལས་བཏུས།

【གཉིས།】
དོན་ཆུང་ཆུང་ནི་མེ་ལོང་ཞིག་དང་འདྲ།
(ཉིས་སྟོང་བཞི་ལོའི་ཟླ་གསུམ་པའི་ཚེས་ཉི་ཤུ་ཡིན།)
   དོན་ཞིབ་ཕྲ་ལ་ཐུག་དུས་སུ་གང་དེའི་བསམ་པ་དང་ཀུན་སྤྱོད་ཕྱིར་མངོན་ཡོང་།   ཞིབ་ཅིང་ཕྲ་བའི་དོན་ནི་མེ་ལོང་ངོས་གཅིག་དང་འདྲ་ཞིང་དེས་མི་ཞིག་གི་གཤིས་རྒྱུད་དང་སྤྱོད་ཚུལ་སོགས་ཕྱིར་མངོན་ཡོང་། དོན་ཆུང་ངུའི་ནང་ཏང་གཤིས་དང་རྩ་དོན། མི་གཤིས་བཅས་འདུས་ཡོད། 
   གནའ་མིས་“གྲོག་ཚང་གིས་ཆུ་རགས་བཤིག་ལ། ཁབ་རྩེས་དབུགས་གཏོང་འགྲོ ”ཞེས་པའམ། “དན་རོག་ཆུང་རུང་ཕོ་བ་ན། ཆང་ཕོར་ཆུང་རུང་བསྣུབས་པར་བྱེད།” ཅེས་བཤད་པ་ནང་བཞིན་དུ། འདིས་གྲངས་ཀྱི་འགྱུར་ལྡོག་ནས་ངོ་བོའི་འགྱུར་ལྡོག་ཏུ་འགྲོ་བའི་གནས་ལུགས་ཟབ་མོ་ཕྱིར་མངོན་ཡོད་ལ། རུལ་སུངས་པ་ཁ་ཤས་ཀྱིས་ང་ཚོར་སྤྲད་པའི་བསླབ་བྱ་ཟབ་མོའང་ཡིན། རུལ་སུངས་བ་མང་ཆེ་ཤོས་ནི་དོན་ཆུང་ཆུང་དག་ལ་གཟབ་གཟབ་མ་བྱས་པས་རིམ་བཞིན་ངན་རུལ་གྱི་གནས་སུ་ལྷུང་བ་ཞིག་ཡིན་པ་སྟེ། དུས་རྒྱུན་འབྲེལ་བ་བཟང་བས་དོགས་ཟོན་གློད་ཅིང་ཕན་ཆུང་དྲིན་ཆུང་གི་མདུན་དུ་རང་གི་རྩ་དོན་བོར་བ། ཇ་ཁ་ཆང་ཁ་ནས་མི་གཤིས་ཤོར་བའི་དཔེ་བརྗོད་འདི་ལྟ་བུ་དུས་རྒྱུན་མཐོང་ཐུབ་པ་ཞིག་ཡིན།
   དེ་བས་“དོན་ཆུང་ལ་གཟབ་དགོས་པ་”ནི་འགོ་ཁྲིད་ལས་བྱེད་པ་ལ་མཚོན་ན་ལེགས་བཤད་ལྟ་བུ་ཡིན། འགོ་ཁྲིད་ལས་བྱེད་པ་ཚང་མས་རང་ཞིབ་དང་དོན་ཆུང་ས་ནས་གཟབ་པ་དང་། དོན་ཆུང་ངུའི་སྟེང་ནས་རང་གི་བྱང་ཚད་ཤུགས་སྣོན་རྒྱག་དགོས་ཤིང་། རྒྱུན་ལྡན་གྱི་དོན་ཙག་ཙིག་གི་ཁྲོད་ནས་རང་ཉིད་འཐུས་ཚང་དུ་བཏང་སྟེ། སློབ་སྦྱོང་གིས་ལེགས་མིན་དབྱེ་འབྱེད་ཐུབ་པ་དང་རང་བརྟག་བྱས་ན་མཐོ་ཚད་ཅིག་ཏུ་སླེབས་པ། བྱང་ཚད་ཀྱིས་ལ་རྒྱ་བྱུང་འཇུག་ཅིང་རུལ་སུངས་ནི་སྤྱོད་བཟང་གིས་འགོག་ཐུབ་པའི་གནས་ལུགས་རྟོགས་བཅུག་སྟེ་ཐོག་མཐའ་བར་གསུམ་དུ་གུང་ཁྲན་ཏང་ཡོན་གྱི་རང་བཞིན་རྒྱུན་འཛིན་བྱེད་དགོས།
   ཀྲེ་ཅང་གི་དམངས་གཉེར་དཔལ་འབྱོར་ནི་འཕེལ་རྒྱས་ཅུང་ཆེ་བས། རིམ་པ་ཁག་གི་འགོ་ཁྲིད་ལས་བྱེད་མི་སྣས་ངེས་པར་དུ་ཕྱོགས་གཅིག་ནས་དམངས་གཉེར་ཁེ་ལས་ཀྱི་འཕེལ་རྒྱས་ལ་རྒྱབ་སྐྱོར་བྱས་ཏེ། ཚོང་བར་བྱམས་པ་དང་་ཚོང་བ་ཕྱུག་པོ་གཏོང་བ།  ཚོང་བའི་སེམས་བདེ་འཁོད་བྱེད་དགོས། ཕྱོགས་གཞན་ཞིག་ནས་ཁེ་ལས་པ་དང་འབྲེལ་འདྲིས་བྱེད་ཚོད་བཟུང་ནས་སྒེར་གཞུང་བར་གྱི་དབྱེ་མཚམས་གསལ་བོར་ཕྱེས་ནས་སྐྱེས་བུ་དམ་པའི་ཚུལ་བཟུང་དགོས་པ་ལས་གནད་འདིའི་སྟེང་ནས་གནད་དོན་བྱུང་མི་རུང་། འདིའི་ཕྱོགས་ཀྱི་བཀའ་སློབ་ཧ་ཅང་མང་པོ་ཡོད། 
   དེ་བས། རིམ་པ་ཁག་གི་འགོ་ཁྲིད་ལས་བྱེད་པས་དོན་ཆུང་ལ་གཟབ་ཅིང་ཕྲན་ཚེགས་ལ་ལྟོས་ཏེ་རང་ངོས་ཀྱི་བྱང་ཚད་མཐོར་འདེགས་ལ་དོ་སྣང་བྱེད་དགོས་པ་དང་། རྐྱེན་ཆུང་ཐོག་ནས་སེལ་བ་དང་རྒྱུ་ནོར་ཟས་གནོང་མེད་པར་བསམ་བློ་ཀུན་སྤྱོད་དང་ཏང་སྲོལ་རྒྱལ་ཁྲིམས་གཉིས་ཀྱི་སྲུང་རགས་བརྟན་པོར་གཏོང་དགོས།  
《ཀྲི་ཅང་གཏམ་གསར།》ལས་བཏུས། 

【གསུམ།】
བློ་རྩེ་གཅིག་སྒྲིམ་གྱིས་ “རང་ཞིབ་”མ་བྱས་ན་ཁ་སུག་ལོག་རྒྱུ་ལས་མེད།
   དཔོན་པོ་བྱེད་པའི་ཀུན་སྤྱོད་ནི་དེའི་གཙང་སྤྱོད་ལས་མངོན་ཐུབ། དཔོན་པོ་ཐེངས་གཅིག་ལ་བྱས་པ་མ་མཐར་ཡང་བཟང་མིང་ཞིག་ཡོད་དགོས། རང་གཅུན་ལ་ངེས་པར་དུ་གཙང་སྤྱོད་ཚད་ཐིག་བྱེད་དགོས་ཤིང་། ཁེ་གྲགས་ཐམས་ཅད་“རང་གི་མིན་པའི་དངོས་པོ་དེ། ཞོ་གང་ཡིན་ཡང་ལེན་མི་ཡོང་། ”དཔོན་པོ་དང་འགོ་ཁྲིད་བྱས་ན་ལག་ཏུ་དབང་ཆ་ངེས་ཅན་ཡོད་པས་སྤྱིར་བཏང་གི་མི་དང་བསྡུར་ན་རྒྱུ་ནོར་དང་ཁེ་གྲགས་ཀྱི་གནད་དོན་སྟེང་ནས་ནོར་འཁྲུལ་བཟོ་སླ།  གལ་སྲིད་དུས་རྒྱུན་བསམ་གཟས་ནས་“རང་ཞིབ་”མ་བྱས་པ་དང་། “ བཙལ་ནས་འོང་བའི་ནོར་འཁྲུལ་” དག་གི་འགོག་སྲུང་ལ་དོ་སྣང་མ་བྱས་པར། ནམ་ཡང་སྟེས་དབང་གི་བསམ་པ་བཅངས་ཏེ་མི་རུང་བའི་ལས་སུ་ཞུགས་པ་ཡིན་ན་ཁ་སུག་ལོག་རྒྱུ་ལས་མེད་དོ།། 
《དབུལ་ཕོངས་ལས་ཐར་བ་》  ཞེས་པའི་ 《སྲིད་ཞུགས་ཀུན་གླེང་》ཞེས་པ་ལས་བཏུས།  (གཅིག་དགུ་དགུ་བཅུ་ལོའི་ཟླ་གསུམ་པར།)

【བཞི། 】
དབང་ཆ་བཀོལ་ཤེས་དང་རང་ཞིབ་སྒོས་རང་ཉེན་རང་སྐུལ་བྱེད་དགོས།
   ཁེངས་སྐྱུང་ནི་སྲོལ་རྒྱུན་གྱི་སྤྱོད་བཟང་ཞིག་དང་མིའི་བློ་ཁོག་ཞིག   དངོས་པོ་གསར་པ་དང་ལེན་དང་འཕེལ་རྒྱས་ལ་སྙེག་པའི་བསམ་བློའི་འཁྱེར་ཕྱོགས་ཤིག་ཡིན།  ཡིད་གཟབ་ནི་སྲིད་སྒྲུབ་པའི་ལམ་བུའི་སྟེང་གི་གནད་འགག་ཅིག་ཡིན།   གནའ་མིས་དཔོན་པོ་བྱེད་ལུགས་དོན་གསུམ་ཁོ་ན་ཡོད་པར་སྨྲ་སྟེ། “སྤྱོད་གཙང་དང་ཡིད་གཟབ། བརྩོན་སེམས་”བཅས་ཡིན། གུང་ཁྲན་ཏང་ཡོན་ལ་མཚོན་ན་ཡིད་གཟབ་རྒྱུ་ནི་འགན་འཁྲིའི་སེམས་པ་ཞིག་ཡིན་ཏེ་དབང་ཆ་བཀོལ་དུས་སུ་གཟབ་གཟབ་བྱེད་དགོས་པ་དང་། སྤྱོད་ཚུལ་ཞིག་ཡིན་ཏེ་ཁ་ནས་བཤད་རྒྱུ་ལས་ལག་ནས་ལས་དགོས་པ། ནུས་པ་ཞིག་ཡིན་ཏེ་ཕྲ་མཐོང་ཆེ་ཤེས་དང་རྐྱེན་རྩ་ཆུང་ཟློག་བྱེད་དགོས། དེ་མིན་ད་དུང་ཀུན་སྤྱོད་ཅིག་ཀྱང་ཡིན་ཏེ་དབང་ཆ་བཀོལ་ཤེས་དང་རང་ཞིབ་སྒོས་རང་ཉེན་རང་སྐུལ་བྱེད་དགོས། ཡིད་གཟབ་རྒྱུ་སྲུང་འཛིན་བྱེད་པ་ནི་རྙིང་ཞེན་བག་འཁུམས་དང་ཕྲ་དོགས་ཆུང་ཟོན་བྱེད་པ་གཏན་ནས་མ་ཡིན་པར་ཐོག་མཐའ་བར་གསུམ་རིག་པ་གསལ་པོ་བྱས་ནས་གཏམ་སྤྱོད་ལ་གཟབ་ནན་བྱེད་རྒྱུ་དེ་ཡིན།
༢༠༠༣ལོའི་ཟླ་༧པའི་ཚེས་༡༠ཉིན་ཞི་ཅིན་ཕིང་གིས་ཀྲེ་ཅང་ཞིང་ཆེན་ཨུ་ཡོན་ལྷན་ཁང་གི་སྐབས་བཅུ་བདུན་པའི་ཚོགས་འདུ་ཐེངས་བཞི་བའི་སྙན་ཞུ་ཕུལ་དུས་ཀྱི་གསུང་བཤད།

【ལྔ།】
གཅིག་པུར་རང་ཞིབ་དང་དོན་ཆུང་ས་ནས་གཟབ་སྟེ་རྒྱུན་པར་རང་བརྟག་བྱེད་དགོས།
   རིམ་པ་ཁག་གི་འགོ་ཁྲིད་ལས་བྱེད་པས་སྤྱོད་ཚུལ་ལེགས་པོ་འཛུགས་སྐྱོང་དང་དར་སྤེལ་བྱེད་དགོས་ཏེ། གཟབ་ནན་གྱིས་རང་གཅུན་དང་། གཟབ་ནན་སྒོས་དབང་ཆ་སྤྱོད་པ། རང་སྟེང་ལ་ནན་མོ་བྱེད་དགོས་པ་མ་ཟད། ད་དུང་དངོས་ཐོག་བདེན་འཚོལ་གྱིས་ཇུས་ཐབས་དང་ལས་ཀ་གསར་བསྐྲུན། མི་གཞུང་དྲང་བཅས་བྱེད་དགོས།
   གཟབ་ནན་གྱིས་རང་གཅུན་བྱེད་པ་ནི་ཏང་གཤིས་ཀྱི་བློ་སྦྱོང་ཇེ་མཐོར་གཏོང་བ་དང་། ཕུགས་བསམ་དང་ཡིད་ཆེས་སྲ་བརྟན། ཀུན་སྤྱོད་མཐོར་འདེགས། བླ་ན་མེད་པའི་བསམ་བློའི་འཁྱེར་སོ་རེ་སྙེག་བྱས་ཏེ་རང་རྟོག་ངང་མ་རབས་ཐ་ཤལ་དང་ཁ་འབྲལ་བ་དང་རང་རྟོག་སྒོས་བྱ་ངན་སྤྱོད་ངན་དག་ལ་འགོག་རྒོལ་བྱེད་པ་དེ་ཡིན།
   གཟབ་ནན་སྒོས་དབང་ཆ་སྤྱོད་པ་ནི་མི་དམངས་ཀྱི་ཆེད་དུ་དབང་ཆ་སྤྱོད་པ་རྒྱུན་འཁྱོངས་དང་། སྒྲིག་སྲོལ་དང་ལམ་ལུགས་ལྟར་དུ་དབང་ཆ་བཀོལ་སྤྱོད། དབང་ཆ་དེ་ལམ་ལུགས་ཀྱི་རྒྱའི་ནང་བཅུག་སྟེ་ག་དུས་ཡིན་ཡང་ཁྱད་དབང་མི་འབྱེད་པ་དང་། དབང་ཆ་སྤྱད་ནས་སྒེར་དོན་མི་སྒྲུབ་པ་དེ་ཡིན།
   རང་སྟེང་ལ་ནན་མོ་བྱེད་པ་ནི་སེམས་ལ་གུས་པ་བཅངས་ཤིང་ལག་ཏུ་ཤིང་ལྕུག་ཐོགས་ནས་གཅིག་པུར་རང་ཞིབ་དང་དོན་ཆུང་ས་ནས་ཡིད་གཟབ་སྟེ་དུས་རྒྱུན་རང་བརྟག་བྱེད་དགོས་ལ། ཏང་སྲོལ་རྒྱལ་ཁྲིམས་ནན་སྲུང་བྱས་ཏེ་སྲིད་སྒྲུབ་པ་ལ་སྤྱོད་ཚུལ་གཙང་མ་ཡོང་བ་དེ་ཡིན། 
   དངོས་ཐོག་བདེན་འཚོལ་གྱིས་ཐབས་ཇུས་འགོད་པ་ནི་དོན་དངོས་ནས་འགོ་བརྩམས་ཏེ་རང་གི་བྱ་བ་ལ་འཆར་འགོད་བྱས་ཏེ། ཐབས་དང་སྲིད་ཇུས། བྱེད་ཐབས་བཅས་དོན་དངོས་ཀྱི་གནས་ཚུལ་དང་མཐུན་ཞིང་། ཕྱི་རོལ་ཡུལ་གྱི་ཆོས་ཉིད་དང་མཐུན་པ། ཚན་རིག་གི་དགོངས་པ་དང་མཐུན་པར་བྱས་ཏེ་རེ་བསམ་ཆེན་པོ་མི་བྱེད་པ་དང་། དངོས་ཡོད་དང་ཁ་མི་འབྲལ་བ་དེ་ཡིན།
   དངོས་ཐོག་བདེན་འཚོལ་གྱིས་ལས་བསྐྲུན་བྱེད་པ་ནི་ཏན་ཏན་ཏིག་ཏིག་དང་དམ་པ་དོན་གཉེར། འགན་འཁུར་ཕོད་པ་དང་འགལ་བ་གདོང་གིས་བསུ་ཕོད་པ། གནད་དོན་ཐག་གིས་གཅོད་མཁས་པ། ལག་ལེན་དང་མི་དམངས། ལོ་རྒྱུས་བཅས་ཀྱིས་ཞིབ་བཤེར་བྱེད་ཐུབ་པའི་དངོས་ཡོད་གྲུབ་འབྲས་ཤིག་བསྐྲུན་པར་འབད་རྒྱུ་དེ་ཡིན།
   མི་གཞུང་དྲང་ཞིག་བྱེད་པ་ནི་ཏང་དང་རྩ་འཛུགས། མི་དམངས། བློ་མཐུན་བཅས་ལ་བློ་དཀར་སེམས་དཀར་བྱས་ཏེ། མི་དྲང་མོ་ཞིག་བྱེད་པ་དང་སྐད་ཆ་དྲང་མོ་བཤད་པ། བྱ་བ་དྲང་མོ་ལས་ནས་མི་ཁ་གསལ་གཏིང་གསལ་དང་ཚུལ་ལྡན་གཞུང་དྲང་ཞིག་བྱེད་པ་དེ་ཡིན། གཟེར་འདེབས་པ་ལྟར་དུ་སེམས་ཤུགས་བརྟན་པོ་རྒྱུན་འཁྱོངས་དང་། བྱ་བར་མགོ་སྔ་ཡོད་པ་བྱས་ཏེ་རྒྱུན་ཆད་མེད་པར་སྤྱོད་ལམ་འཛུགས་སྐྲུན་ཐད་ཀྱི་གྲུབ་འབྲས་གསར་པ་ལེན་རྒྱུ་དེ་ཡིན།  
༢༠༡༤ལོའི་ཟླ་༣ པའི་ཚེས་༡༠ 《མི་དམངས་ཉིན་ཚགས་》པར་ངོས་དང་པོ་ནས་བཏུས། ཞི་ཅིན་ཕིན་རྒྱལ་ཡོངས་མི་དམངས་འཐུས་མིའི་ཚོགས་ཆེན་སྟེང་གི་ཨན་ཧུའེ་འཐུས་མི་ཚོགས་པའི་གྲོས་ཞིབ་ལ་ཞུགས་དུས་སུ་རིམ་པ་ཁག་གི་འགོ་ཁྲིད་ལས་བྱེད་པས་སྤྱོད་ལམ་ལེགས་པོ་བཞེངས་བསྐྲུན་དང་དར་སྤེལ་གཏོང་དགོས་པ་ནན་གྱིས་བསྟན་ཡོད།

【དྲུག】
གཅིག་པུར་རང་ཞིབ་དང་དོན་ཆུང་ས་ནས་གཟབ་སྟེ་རྐྱེན་ཆུང་ཐོག་ནས་སེལ་དགོས།
   སྤྱོད་ལམ་གྱི་གནད་དོན་ནི་ངོ་བོའི་ཐོག་ནས་ཏང་གཤིས་ཀྱི་གནད་དོན་ཡིན།  སྤྱོད་ལམ་བཞེངས་བསྐྲུན་བྱེད་དགོས་ན་གདོད་མ་ཇི་བཞིན་དུ་གྱུར་ནས་གཙོ་བོར་ཕུགས་བསམ་དང་ཡིད་ཆེས་སྲ་བརྟན་དང་། གཞི་རྩའི་དགོངས་དོན་ལག་ལེན། ཀུན་སྤྱོད་དང་བློ་སྦྱོང་ཤུགས་སྣོན་བཅས་འབུར་དུ་ཐོན་དགོས།
   ཞི་ཅིན་ཕིང་གིས་འདི་ལ་རེ་བ ༤ བཏོན་ཡོད་དེ། གཅིག་ནི་མི་དང་མིའི་བར་གྱི་འབྲེལ་བ་ལ་ངོས་ཟིན་ཡང་དག་དང་ཐག་གཅོད་ཡང་དག་བྱས་ཏེ་མི་ཆོས་དང་ཡང་ལྡན་ལ་རྩ་དོན་ལྟར་ཡང་སྒྲུབ་དགོས་ཤིང་། ཁྱད་པར་དུ་སོ་སོའི་བརྩེ་བ་དེ་ཏང་གཤིས་ཀྱི་རྩ་དོན་དང་འགལ་བ་ཡོད་པའམ། མི་སྒེར་གྱི་འབྲེལ་བ་དང་མི་དམངས་ཀྱི་ཁེ་ཕན་བར་དུ་འགལ་བ་ཡོད་དུས། ངེས་པར་དུ་ཐེ་ཚོམ་ཅི་ཡང་མེད་པར་ཏང་གཤིས་ཀྱི་ལང་ཕྱོགས་བཟུང་སྟེ་བློ་བརྟན་འགྱུར་མེད་ཀྱིས་མི་དམངས་ཀྱི་ཁེ་ཕན་སྲུང་སྐྱོབ་བྱེད་དགོས།
   གཉིས་ནི་བློ་ཐག་རྦད་ཆོད་ཀྱིས་ཕན་ཚུན་སྣེ་ལེན་གྱི་བྱེད་སྒོ་ཇེ་ཉུང་དུ་བཏང་སྟེ་བྱ་བ་དང་འཚོ་བའི་བྱེད་ཐབས་བདེ་ཐང་ཞིག་རྒྱུན་འཁྱོངས་བྱེད་དགོས་ཤིང་། སྲིད་ཇུས་ཀྱི་སྐོར་ལ་སློབ་སྦྱོང་མང་ཙམ་བྱེད་པ་དང་། གཞི་རིམ་དུ་བརྟག་དཔྱད་ཞིབ་འཇུག་ལ་བསྐྱོད་དེ་གནས་ཚུལ་ངོ་མ་ལ་རྒྱུས་ཡོད་པ་བྱས་ནས་བསམ་བློ་མང་ཙམ་གཏོང་བ་དང་འབུར་དུ་ཐོན་པའི་གནད་དོན་མང་དུ་ཐག་བཅད་དེ་རང་འགུལ་ངང་བྱ་དངོས་ཐ་ཤལ་བ་དང་ཁ་འབྲལ་དགོས། 
   གསུམ་ནི་མི་གཞུང་དྲང་བྱེད་པ་དང་བྱ་བ་ཏན་ཏིག་གིས་སྒྲུབ་ནས་གཟབ་ནན་གྱིས་རང་གཅུན་དང་། གཟབ་ནན་སྒོས་དབང་ཆ་སྤྱོད་པ། རང་སྟེང་ལ་ནན་མོ་བཅས་ཡོང་བ་བྱེད་པ་དང་། དངོས་ཐོག་བདེན་འཚོལ་གྱིས་ཇུས་ཐབས་འགོད་པ་དང་ལས་ཀ་གསར་བསྐྲུན། མི་གཞུང་དྲང་ཞིག་བྱེད་པ།  ཟོལ་མེད་གཞུང་དྲང་དང་ངོ་ལྐོག་མེད་པའི་མི་ཞིག་བྱས་ནས་འགན་འཁུར་ཕོད་པ་དང་། འགལ་བ་གདོང་གིས་བསུ་ཕོད་པ། གནད་དོན་ཐག་གཅོད་བྱེད་མཁས་པ་བཅས་བྱས་ནས་“རྫུན་ཆེ་སྟོང་ “གསུམ་མི་ཡོང་བ་བྱེད་དགོས།
   བཞི་ནི་རུལ་སུངས་དང་བསླུ་བྲིད་ཡོངས་ལ་དོགས་ཟོན་ཚད་མཐོན་པོ་དང་། གཅིག་པུར་རང་ཞིབ་དང་དོན་ཆུང་ས་ནས་གཟབ་སྟེ་རྐྱེན་ཆུང་ཐོག་ནས་སེལ་དགོས།
༢༠༡༤ལོའི་ཟླ་༣ པའི་ཚེས་༡༩ ཉིན་《མི་དམངས་ཉིན་ཚགས་》པར་ངོས་དང་པོ་ནས་བཏུས། ཞི་ཅིན་ཕིང་གིས་ལན་ཁའོ་རྫོང་དུ་ཏང་གི་མང་ཚོགས་ལམ་ཕྱོགས་ཀྱི་སློབ་གསོ་ལག་ལེན་བྱེད་སྒོ་ལ་མཛུབ་སྟོན་གནང་དུས་སུ། ཅའོ་ཡུས་ལུའུ་ཡི་སྙིང་སྟོབས་ལ་སློབ་སྦྱོང་དང་དར་སྤེལ་རྒྱ་ཆེན་དང་སློབ་གསོ་ལག་ལེན་གྱི་བྱེད་སྒོ་མུ་མཐུད་དུ་སྐུལ་འདེད་བྱས་ཏེ་ཕན་འབྲས་ལེན་པ་ལ་ནན་བཤད་བྱས་ཡོད།(རྩོམ་འགན་པ། རྟ་མགྲིན)
འབྲེལ་ཡོད་རྩོམ་ཡིག