ཉིན་འདི་གར་ཕྱི་རྒྱལ་གྱི་གསར་ལམ་ཁག་ནས་དོན་དངོས་འཁྱོག་བརྗོད་ཀྱི་གསར་འཕྲིན་བསྟུད་མར་སྤེལ་བར་བརྟེན་ཐུར་ཀེའི་རྒྱལ་ནང་དུ་ཀྲུང་གོ་སྲིད་གཞུང་ལ་རྒོལ་བའི་རྔམ་སྟོན་ཁྲོམ་སྐོར་གཅིག་མཇུག་གཉིས་མཐུད་དུ་བྱས་ཡོད་འདུག ཐུར་ཀེ་སྤྱི་མཐུན་རྒྱལ་ཁབ་ཏུ་བཅའ་སྡོད་བྱས་པའི་ཀྲུང་གོའི་གཞུང་ཚབ་ཁང་གི་གཞུང་ཕྱོགས་དྲ་ཚིགས་སུ་ཟླ ༧ པའི་ཚེས ༥ ཉིན་བདེ་འཇགས་ཉེན་བརྡ་བཏང་སྟེ། ཐུར་ཀེ་རྒྱལ་ཁབ་ཏུ་ལྷགས་པའི་ཀྲུང་གོ་བའི་བདེ་འཇགས་ལ་དོགས་ཟོན་ཆེར་སྐྱེད་བྱེད་དགོས་པའི་དྲན་སྐུལ་བྱས།
གཞུང་ཚབ་ཁང་གི་དྲ་ཚིགས་སུ་བསྒྲགས་པའི་འཕྲིན་བརྡ་ནི་འདི་ལྟར་ཏེ། ཉེ་ལམ་ཐུར་ཀེའི་རྒྱལ་ཁོངས་སུ་ཀྲུང་གོ་སྲིད་གཞུང་ལ་རྒོལ་བའི་རྔམ་སྟོན་ཁྲོམ་སྐོར་གཅིག་མིན་ཐེངས་འགར་བྱས་པའི་ཁྲོད། ཐུར་ཀེར་གནས་བཅའ་བའི་ཀྲུང་གོ་བ་འགའ་ཤས་ལ་མཐོ་འཚམ་རྒོལ་རྡུང་ཕོག་ཡོད་འདུག ཐུར་ཀེར་བཅའ་སྡོད་ཀྲུང་གོའི་གཞུང་ཚབ་ཁང་ནས་གནས་དེའི་ཀྲུང་གོ་བའི་བདེ་འཇགས་ལ་གཟབ་ནན་བྱེད་དགོས་པའི་དྲན་བརྡ་བཏང་བ་དང་ལྷག་པར་ཁྲོམ་སྐོར་བའི་དཀྱིལ་དུ་ཉེ་བར་བཅར་བ་དང་། པར་ལེན་པ་སོགས་ཀྱི་བྱ་སྤྱོད་དག་མི་རིགས་ཤིང་ལྗོངས་རྒྱུ་བ་མི་ཧྲེང་ཕྱི་ལོགས་སུ་འགྲོ་འོང་བྱེད་པའི་བྱ་འགུལ་ཉུང་དུ་གཏོང་དགོས། ཞེས་ནན་བརྗོད་བྱས་འདུག
གསར་ལམ་ཁག་ཏུ་སྤེལ་བའི་གནས་ཚུལ་ལ་གཞིགས་ན། ཐུར་ཀེའི་གྲོང་ཁྱེར་ཆེ་ཤོས་ཨི་སེ་ཐཱན་བྷོ་དང་དེའི་གྲུ་ཁ་སྟེ། ཐུར་ཀེ་ཡོངས་ནས་གཞི་ཁྱོན་ཆེ་ཤོས་དང་དཔལ་འབྱོར་དང་ཚོང་དོན། དངུལ་རྩ། གསར་འགྱུར། རིག་གནས། འགྲིམ་འགྲུལ་སོགས་ཀྱི་ལྟེ་བའི་གྲོང་ཁྱེར་དེར་ཉེ་ལམ“ཀྲུང་གོའི་གྲངས་ཉུང་མི་རིགས་ཀྱི་ཐོབ་ཐང་གནད་དོན”ཐད་ནས་རྔམ་སྟོན་ཁྲོམ་སྐོར་གྱི་ལས་འགུལ་སྤེལ་བ་དང་། དོན་དེར་དམིགས་ནས་ཐུར་ཀེར་བཅའ་སྡོད་ཀྲུང་གོའི་གཞུང་ཚབ་ཁང་ནས་ཐ་ཚིག་ནན་པོ་སྒྲོག་པ་འདི་ལྟར། ཕྱི་ལོགས་ཀྱི་འབྲེལ་ཡོད་སྨྱན་སྦྱོར་ཁང་དང་མི་སྣས་ཤིན་ཅང་དུ་མུའུ་སི་ལིན་གྱི་སྨྱུང་གནས་ཟླ་བར་སྨྱུང་གནས་སྲུང་བ་འགོག་པ་དང་ཆོས་ལུགས་ཀྱི་ཆོ་ག་སྲུང་བརྩི་བྱེད་པར་ཚོད་འཛིན་བྱས་པའི་བཤད་ཡམས་ནི་དོན་དངོས་དང་ཡོངས་སུ་འགལ་བའི་ངག་འཁྱལ་འབའ་ཞིག་ཏུ་ཟད་དོ། ཞེས་གསལ་བསྒྲགས་སྤེལ།
ཀྲུང་གོའི་མི་རིགས་སྲིད་ཇུས་དང་གྲངས་ཉུང་མི་རིགས་ས་ཁུལ་གྱི་འཚོ་གནས་གནས་བབ་ལ་དུས་ཡུན་རིང་པོའི་སྔོན་ནས་ནུབ་ཕྱོགས་དགྲར་འཛིན་སྟོབས་ཤུགས་དང་སྨྱན་ལམ་ཁག་གིས་འཁྱོག་བརྗོད་ཀྱིས་ལོག་འགྲེལ་བྱེད་པ་དང་། དེ་དང་དུས་མཚུངས་སུ་འཁོན་སློང་བ་ཉུང་ཤས་ཀྱིས་མི་དམངས་ལ་ངན་སྐུལ་བྱས་པ་ཉེར་ལེན་དུ་གྲུབ་ནས་ཉེ་ལམ་ཐུར་ཀེའི་རྒྱལ་ནང་དུ་ཀྲུང་གོར་རྒོལ་བའི་རྔམ་སྟོན་ཁྲོམ་སྐོར་གྱི་དོན་རྐྱེན་འདི་ལྷག་པ་རེད། ཧྥ་རན་སི་གསར་ཁང་ནས་ཟླ ༧ པའི་ཚེས ༤ ཉིན་སྤེལ་བའི་འཕྲིན་ལས། ཐུར་ཀེའི་ཨི་སེ་ཐཱན་བྷོའི་གྲོང་ཁུལ་རྙིང་པར་ཉིན་ཤས་སྔོན“ཀྲུང་གོའི་གྲངས་ཉུང་མི་རིགས་ཀྱི་ཐོབ་ཐང་གནད་དོན”སྐོར་ནས་རྔམ་སྟོན་ཁྲོམ་སྐོར་བྱས་ཤིང་ལྷོ་ཁོ་རེ་ཡའི་ཡུལ་སྐོར་བ་ཞིག་ལ་དོན་རྐྱེན་ཁྲོད་དུ་རྒོལ་རྡུང་ཕོག་པ་དང་རྒྱུ་རྐྱེན་ནི་རྔམ་སྟོན་པས་ཁོ་པ་ཀྲུང་གོ་བ་དང་ནོར་བས་རེད།(རྩོམ་འགན་པ། རྟ་མགྲིན)
