ཚེས25ཉིན་ཀྲུང་དབྱང་སྒྲིག་ཨུད་ལྟ་ཞིབ་པུའི་དྲ་ཚིགས་ཀྱིས“2014ལོར་ཀྲུང་དབྱང་སྐོར་ཞིབ་ཚོགས་ཆུང་གིས་རེས་སྐོར་གཉིས་པའི་སྐོར་ཞིབ་དག་ཐེར་བྱས་ཚུལ་ཡོངས་བསྒྲགས་བྱ་རྒྱུའི་ཆེད་བསྒྲིགས་ལེ་ཚན”ཞེས་པ་བཏོད་དེ་2014ལོར་ཀྲུང་དབྱང་སྐོར་ཞིབ་ཚོགས་ཆུང་གིས་རེས་སྐོར་གཉིས་པར་སྐོར་ཞིབ་བྱས་པའི་ལས་ཁུངས་13གྱི་དག་ཐེར་བྱས་ཚུལ་ཡོངས་བསྒྲགས་བྱས་ནས་རྒྱ་ཆེའི་ལས་བྱེད་མང་ཚོགས་ལ་ལྟ་སྐུལ་བྱ་རྒྱུར་བསྟན་ཡོད་པ་རེད། ལེ་ཚན་དེའི་ཐོག་ཡོངས་བསྒྲགས་བྱེད་སྔ་ཤོས་ནི་སྐོར་ཞིབ་དག་ཐེར་བྱས་ཚུལ་སྐོར་གྱི་མཚོ་སྔོན་ཞིང་ཆེན་གྱི་བརྡ་ཁྱབ་དེ་རེད།
ཀྲུང་དབྱང་གི་སྐོར་ཞིབ་ལས་དོན་གྱི་གཅིག་གྱུར་བཀོད་སྒྲིག་བྱས་པར་གཞིགས་ན། 2014ལོར་ཀྲུང་དབྱང་གིས་རེས་སྐོར་གཉིས་པའི་སྐོར་ཞིབ་ལས་དོན་སྤེལ་ནས་ཀོང་ཤིས་དང་། ཧྲང་ཧའེ། མཚོ་སྔོན། བོད། ཀྲེ་ཅང་། ཧོ་པེ། ཧྲའན་ཤིས། ཧེ་ལུང་ཅང་། སི་ཁྲོན། ཅང་སུའུ་བཅས་ཞིང་ཆེན་དང་། རང་སྐྱོང་ལྗོངས། གྲོང་ཁྱེར་བཅས་10རུ་རྒྱུན་གཏན་སྐོར་ཞིབ་བྱས་པ་དང་དེ་བཞིན་རྒྱལ་ཁབ་ལུས་རྩལ་སྤྱི་ཁྱབ་ཅུས་དང་། ཀྲུང་གོ་ཚན་རིག་ཁང་། རླངས་འཁོར་བཟོ་གྲྭ་དང་པོའི་ཚོགས་པ་བཅས་ལས་ཁུངས་3ལ་ཆེད་དོན་སྐོར་ཞིབ་བྱས་ཡོད། ཉེ་ཆར་ས་ཁུལ་དང་ལས་ཁུངས་ཀྱི་ཏང་ཨུད（ཏང་ཙུའུ）ལ་སྐོར་ཞིབ་དང་དག་ཐེར་བྱས་ཚུལ་སྔ་རྗེས་སུ་ཡོངས་བསྒྲགས་བྱ་རྒྱུ་རེད།
མཚོ་སྔོན་ཞིང་ཨུད་ཀྱིས་སྐོར་ཞིབ་དག་ཐེར་བྱས་ཚུལ་སྐོར་དང་ཐོག་བརྡ་ཁྱབ་བྱས་པའི་ནང་2014ལོའི་ཟླ་7ཚེས་26ཉིན་ནས་ཟླ་9ཚེས་29ཉིན་བར་ཀྲུང་དབྱང་གི་སྐོར་ཞིབ་ཚོགས་ཆུང་གསུམ་པས་མཚོ་སྔོན་ཞིང་ཆེན་ལ་སྐོར་ཞིབ་བྱས་པ་དང་ཟླ10ཚེས28ཉིན་སྐོར་ཞིབ་བསམ་འཆར་ཚུར་ལན་བྱས་ཡོད་ཅེས་ངོ་སྤྲོད་བྱས་ཡོད། ཏང་དོན་ཡོངས་བསྒྲགས་ཀྱི་རྩ་དོན་དང་སྐོར་ཞིབ་ལས་དོན་གྱི་འབྲེལ་ཡོད་བླང་བྱ་གཞིར་བཟུང་ཞིང་ཆེན་དེས་སྐོར་ཞིབ་དག་ཐེར་བྱས་ཚུལ་ཁྱབ་བསྒྲགས་བྱས་པའི་ནང་ཏང་སྲོལ་སྲིད་གཙང་འཛུགས་སྐྱོང་དང་རུལ་སུངས་ལ་ངོ་རྒོལ་ལས་དོན་གྱི་ཕྱོགས་དང་། ཀྲུང་དབྱང་གི་གཏན་འབེབས་དོན་ཚན་བརྒྱད་ཀྱི་དགོངས་དོན་དོན་འཁྱོལ་དང་སྤྱོད་ཚུལ་འཛུགས་སྐྱོང་གི་ཕྱོགས། ཆབ་སྲིད་སྒྲིག་ལམ་ལག་བསྟར་གྱི་ཕྱོགས་སོགས་ཀྱི་གནད་དོན་10དག་ཐེར་བྱས་པ་ཚུད་ཅིང་། དེའི་ཁྲོད་སྐོར་ཞིབ་ཚུར་ལན་བྱས་པའི་ནང་གཅིག་སྡུད་ཐོག་ཞུ་གླེང་བྱེད་མང་བའི་གཏེར་ཁའི་ཐོན་ཁུངས་གསར་སྤེལ་གྱི་ཞིབ་བཤེར་མཆན་འགོད་དང་ལྟ་སྐུལ་དོ་དམ་ཁྲོད་ཀྱི་སྒྲིག་འགལ་དང་ཁྲིམས་འགལ་གྱི་གནད་དོན་དང་། འགོ་ཁྲིད་ལས་བྱེད་པ་འགའ་ཞིག་གིས་སྒྲིག་སྲོལ་ལས་འགལ་ནས་ས་ཞིང་ནང་བཤུག་དང་ལས་གྲྭ་འཛུགས་སྐྲུན་སོགས་ལ་ཐེ་ཇུས་བྱས་ཏེ་དབང་བརྟེན་སྒེར་སྒྲུབ་བྱས་པའི་གནད་དོན། ནོར་སྲིད་མ་དངུལ་དོ་དམ་དང་བེད་སྤྱོད་བྱས་ཚུལ་སྒྲིག་ཁྲིམས་ལས་འགལ་བའི་གནད་དོན་ལ་སོགས་གནད་དོན་མངོན་གསལ་དོད་རིགས་དག་ཐེར་བྱས་ཚུལ་ཡོངས་བསྒྲགས་བྱས་ཡོད། བརྡ་ཁྱབ་ནང་ད་དུང་འབྲེལ་གཏུག་ཁ་པར་ཨང་གྲངས་དང་། སྦྲག་སྲིད་ཡིག་སྒམ། གློག་རྡུལ་ཡིག་སྒམ་བཅས་ཡོངས་བསྒྲགས་བྱས་ནས་རྒྱ་ཆེའི་ལས་བྱེད་པ་དང་མང་ཚོགས་ཀྱིས་སྐོར་ཞིབ་དག་ཐེར་དོན་འཁྱོལ་བྱས་ཚུལ་ལ་ལྟ་སྐུལ་བྱ་རྒྱུར་དགའ་བསུ་ཞུ་རྒྱུ་ཡིན་ཞེས་འཁོད་ཡོད་པ་རེད།(རྩོམ་འགན་པ། རྟ་མགྲིན)
