“སྤྲང་རྫུ”ཞ་བོས་དངུལ་གཡོ་ལེན་བྱེད་པའི་ནང་མཚང་གསར་འགོད་པས་ཕྱིར་བསྟན།

　　གཟིགས་མོ་བ་ལྷན་རྒྱས་སྐུ་ཁམས་བཟང་། དེ་རིང་གི《ཀུན་གླེང་བཅར་འདྲི》ལེ་ཚན་ལ་གཟིགས་པར་དགའ་བསུ་ཞུ། ང་ཚོས་གྲོང་ཁྱེར་མང་པོ་ཞིག་གི་ཁྲོམ་སྲང་ནས་དབང་པོ་སྐྱོན་ཡོད་པ། ནད་ལྕི་མོ་ཕོག་ཡོད་པའི་སྣང་ཚུལ་འདི་འདྲ་རྟག་པར་མཐོང་ཡོང་གི་རེད་ལ། མིས་བལྟས་ན་སྙིང་རྗེ་འཆོར་བས་གདུང་སེམས་སྐྱེ་ཡོང་བ་དང་། སེམས་བཟང་དག་གིས་སེམས་ཀྱིས་མ་བཟོད་པར་རྟག་པར་དངུལ་སྦྱིན་གཏོང་གི་ཡོད་པ་རེད། དངུལ་མང་པོ་མེད་ཀྱང་། མ་སྦྱིན་ན་ལག་པ་དེས་སེམས་ལ་བསྙབས་ཡོང་བ་འདྲ་བར་བདེ་པོ་ཡོང་གི་མ་རེད། ཁྱད་པར་དུ་ལོ་གསར་ལ་ཉེ་སྐབས་སྲང་ལམ་གྱི་སྤྲང་པོའང་དུས་རྒྱུན་ལས་མང་པ་ཡོད། འོན་ཀྱང་སྣང་ཚུལ་འདི་ལྟ་བུ་མཐོང་དུས་ཁྱེད་ཀྱིས་དངུལ་སྟེར་རྒྱུར་བྲེལ་བ་མ་བྱེད་དང་། དོན་འདི་ལ་ད་དུང་གཟབ་གཟབ་གནང་དགོས་ཀྱི་འདུག

　　 ཁྲོམ་སྲང་ན་སློང་མོ་བྱེད་པའི་སྣང་ཚུལ་འདི་གསར་འགོད་པས་ག་ས་ག་ལ་མཐོང་ཐུབ་སྟེ། མེ་འཁོར་འབབ་ཚུགས་དང་དོང་འཁོར་ཁ་དང་། ས་འོག་འགྲོ་ལམ། སྨན་ཁང་གི་སྒོ་ཁ། ཚོང་ལས་ཁུལ་སོགས་མི་ཚོགས་མང་ས་ནས་མི་ཁ་ཤས་ཀྱིས་རྟག་པར་རྒྱུ་མཚན་སྣ་ཚོགས་ལ་བརྟེན་ནས་སློང་མོ་བྱེད་པ་མཐོང་གི་རེད། དེ་ལས་མི་འདི་ཚོ་ཕལ་ཆེ་བས་ཁྱིམ་མིར་ནད་ལྕི་མོ་ཕོག་ནས་སྐྱོབ་བྱེད་ཀྱི་དངུལ་འཕྲལ་མཁོ་ཆེ་ཞེས་བརྗོད་ཀྱི་ཡོད།

　　 ད་ལོའི་ཟླ ༡ པོའི་ཚེས ༥ ཉིན། ནན་ཁྲང་གྲོང་ཁྱེར་གྱི་ཞིང་ཚོང་ཁྲོམ་རར་ཕོ ༣ དང་མོ ༡ མི་ཚོགས་ཀྱི་ཁྲོད་དུ་པུས་མོ་སར་བཙུགས་ནས་རིམ་པར་བསྒྲིགས་ཡོད་ཅིང་། དཀྱིལ་དུ་བྱང་བུ་ཞིག་གི་སྟེང་བཞག སྟེང་དུ་སློབ་ཆེན་འགྲིམ་བཞིན་པའི་ནུ་མོར་ཁྲག་དཀར་ནད་ཕོག་ཡོད་པས་གཤག་བཅོས་གླ་ཆ་འབོར་ཆེན་འཕྲལ་མཁོ་ཆེ་ཚུལ་བྲིས་ཡོད་པ་དང་། ས་ཐོག་ཏུ་སྨན་ཁང་དང་སློབ་གྲྭས་སྤྲད་པའི“བདེན་དཔང་རྒྱུ་ཆ”བཀྲམས་འདུག་པ་མ་ཟད། ཆབས་ཅིག་ཏུ“སེམས་བཟང་ཚེ་གཅིག་ཁ་དྲོ”ཞེས་པའི་གླུ་གཞས་གཏོང་གིན་ཅུང་མ་འགོར་བར་ལམ་འགྲོ་བ་ཁ་ཤས་ཀྱི་རོགས་དངུལ་སྒོར་སྟོང་ཕྲག་ཁ་ཤས་འབྱོར་བྱུང་། མཐར་གསར་འགོད་པས་རྫུན་བཟོ་ཤ་སྟག་ཡིན་པ་ར་སྤྲོད་བྱས་པ་རེད།

　　 ཧྲན་ཞི་རུ། གཞོན་ནུ་སློང་མ་བ་འདིས་ལམ་འགྲོ་བར་མགོ་བོས་ཕྱག་ཅི་ནུས་ཀྱིས་འཚལ་ཞོར་འཁྲིས་ཀྱི་ཨ་མ་སར་ཉལ་བ་དེའི་ནད་ལྕི་ཚུལ་བརྗོད་ཀྱི་འདུག་པ་དང་། དྲོས་ཇའི་དུས་སུ་སྒམ་ཆུང་ནང་དངུལ་གྱིས་གང་རྗེས། དེ་གཉིས་སྤམ་མདོག་ཁ་པོས་ཡར་ལངས་ཏེ་ཕྱིན་སོང་ལ། མ་གཞི་ཨ་མ་ནད་ཀྱིས་མནར་བ་དེའང་ན་རྫུ་བྱས་པ་རེད་འདུག

ཁ་ས་ཁེ་ཉིན་བགྲེས་མོ་ཞིག་འདུག ད་གཞོན་པ་ཞིག་ལ་བརྗེས་འདུག

བགྲེས་མོ་དེ་ཐང་པོ་འདུག་གམ།

ཐང་པོ་འདུག ནད་ག་པར་འདུག

གཟུགས་པོ་ཐང་པོ་འདུག་གཱ

ད་ལྟ་ཡག་པོ་འདུག

ད་ཡག་པོ་འདུག་ཨེ? ཉལ་བསྡད་ན་ཡག་པོ་མི་འདུག་གམ?

ཁྱོད་ལ་སྐྱག་པའི་ཇུས་གཏོགས་འདུག་གམ? ངས་ཧ་གོ་གི་མི་འདུག

ངས་ཁྱོད་དངུལ་སྦྱིན་ཚར་ཡོད་དཱ།

ཁྱོད་ཀྱིས་དངུལ་ག་ཚོད་བཞག་ཡོད། སྟེང་ལ་མིང་ཨེ་བྲིས། དངུལ་མང་པོ་བླུགས་པ་རེད་མ་རེད། གཞན་ཚང་མ་ཁྱོད་འདྲ་བ་ཡིན་ཚེ་ཆོ་མེད་མ་རེད་དམ། གསར་འགོད་པ།

ཆོ་ག་འདྲ་ཟེ་མི་འདུག ཁྱོད་འདྲ་ཡིན་ཚེ་ཆོ་མེད་རང་རེད།

ཁྱོད་ཀྱིས་ཅིག་སྒྲུབས་དང་གཞན་གྱིས་དངུལ་སྦྱིན་གྱི་རེད། སྐད་ཆ་བཤད་པས་ཕན་ཐོགས་ག་རེ་འདུག གསར་འགོད་པ།

ཁྱོད་ཀྱིས་ཕྱག་འཚལ་ནས་དངུལ་སྦྱིན་རོགས་ཟེར་བ་རེད་པ།

སློང་མ་བ།

འདི་ང་འཇོན་པོ་ཡོད་ཙང་རེད། འདི་ངའི་དོན་དག་ཡིན། ཁྱོད་ལ་ཇུས་གཏོགས་ག་རེ་འདུག

　　ཡང་གཞན་ཞིག་ནི། སློང་མ་བ་ཁ་ཤས་ཕར་བལྟས་ན་དབང་པོ་སྐྱོན་ཅན་ཡིན་པ་ལྟར་ཡོད་ལ། མི་རྣམས་ཀྱང་གདུང་བ་སྐྱེས་ནས་དངུལ་ཕངས་མེད་སྟེར་གྱི་ཡོད། མི་རིང་བའི་གོང་དུ། མི་ཞིག་གིས་ཀྲེ་ཅང་ཝིན་ལིན་ནས་སྣང་ཚུལ་འདི་ལྟ་བུ་ཞིག་མཐོང་། བལྟས་ཚོད་ཀྱིས་རྐང་པ་རྩ་ནས་ཞ་བོ་ཡིན་པའི་དབང་པོ་སྐྱོན་ཅན་ཞིག་གིས་ལག་ཏུ་སློང་སྒམ་བཟུང་ཞིང་། ལྭ་བ་རྩབ་རལ་ཏུ་གྱུར་བ་གྱོན་ནས་ས་རུ་བསྣར་ཐོག གཟུགས་པོ་ལག་ཟུང་གིས་དྲུད་བཞིན་སློང་མོ་བྱེད་བཞིན་ཡོད་མོད། མི་ཚོགས་ཉུང་ས་ཞིག་ཏུ་སླེབས་རྗེས་ཧོབ་སྟེ་སར་ཙོག་ནས། རྒྱབ་ཀྱི་གྱོན་གོས་རལ་པོ་ཕུད། མགོ་ནས་རྐང་པའི་བར་གྱི་རྫུན་ཆས་ཕྱིས་རྗེས་མི་དཀྱུས་མ་ནང་བཞིན་ཡར་ལངས་ཏེ་ལྡེམ་མྱུར་དོད་པས་ཕྱིན་སོང་ལ། གོ་རིམ་ཆ་ཚང་མཐོང་མཁན་དེའང་ཧ་ལས་ཧང་སངས་སུ་བཅུག་འདུག

　　 ཡང་སློང་མཁན་ཁ་ཅིག་གིས་ཁྲག་དང་མིག་ཆུའི་གཏམ་རྒྱུད་དེ་འདྲ་བརྗོད་ཀྱི་མེད་པར། གནས་སྐབས་དཀའ་ངལ་དང་འཕྲད་པས་ལམ་གླ་ཙམ་སོགས་དགོས་རབས་བཤད་ཡོད་ཀྱི་ཡོད་ལ། རྒྱུ་མཚན་འདི་འདྲ་བར་ཡང་ཏག་ཏག་མི་རྣམས་ཀྱིས་གདུང་སེམས་བཅངས་སླ་པོ་ཡོད། ཞན་ཐོའུ་གྲོང་ཁྱེར་དུ། རྐང་འཁོར་ལ་མོས་མཁན་ཡིན་ཟེར་མཁན་གཞོན་ནུ ༣ གྱིས། ཡུན་ནན་ནས་ཞན་ཐོའུ་བར་རྐང་འཁོར་བསྐོར་ཏེ་དངུལ་ཆ་ཚང་རྫོགས་ཚར་བས། ཐབས་མེད་པར་ལམ་གླ་སློང་གི་ཡོད་སྐོར་བརྗོད་བྱུང་།

ཁ་སང་གང་ནས་ཡོང་བ་ཡིན།

ཁ་སང་ཞེ་དབྱང་ནས།

　　 ཡིན་ནའང་། གྲོང་མི་ཚོས་མི་འདི ༣ གྱི་ཐོབ་ཐང་དངོས་དང་ཀུན་སློང་ལ་དོགས་པ་ཟ་གི་ཡོད་དེ། བགྲེས་པོ་ཞིག་གིས་བརྗོད་པ་ལྟར་ན་ཁོས་མི་དེ་གསུམ་གྱིས་ཉུང་མཐའ་ཡང་ཟླ་ཕྱེད་ཀྱི་རིང་ལ་དེར་སློང་མོ་བྱས་བསྡད་པ་མཐོང་ཞིང་། ཁོ་ཚོས་རྫུན་ལབ་ཀྱི་ཡོད་པ་རེད།

ཁྲོམ་རའི་ཕྱི་རུ་ཟླ་ཕྱེད་ལྷག་ལ་བསྡད་སོང་། རེད། ཁྲོམ་རའི་ཕྱི་རུ།

དེ་ཡང་ཁོ་ཚོ་གསུམ་པོ་རེད་དམ།

རེད། ཁོ་ཚོ་གསུམ་ཀ་རེད།

　　 ཡང་ལམ་གླ་སློང་གི་ཡོད་པའི་མིང་གཡར་བ་ཞིག་རེད། ནན་ཅིང་དུ། སློང་མ་བ་ཞིག་གིས“རུས་ཐལ”པང་དུ་བཟུང་ནས་སྲང་ལམ་དུ་ཐོན། ཁོས་མགོ་ལ་རས་དཀར་དཀྲིས་པ་དང་ལག་པར་རུས་ཐལ་སྒམ་ཆུང་བཟུང་སྟེ་པུས་མོ་སར་བཙུགས་ནས་སྡོད་ཅིང་། མདུན་དུ་ཤོག་དཀར་གྱི་ངོས་སུ་ཨ་མ་གློ་བུར་དུ་ནད་ཀྱིས་གྲོངས་པས། ཨ་མའི་རུས་ཐལ་ཁྱེར་ནས་ཕྱིར་ཁྱིམ་དུ་ཁྱེར་ཏེ་དུར་སྦས་བྱེད་སྤྱད་ཀྱི་སྒོར ༥༦༠ ད་ཆ་འཕྲལ་འཕྲལ་མཁོ་ཆེ་ཞེས་བྲིས་ཡོད་པ་དང་། འདི་མཐོང་རྗེས་ལམ་འགྲོ་བ་གྲོང་མི་ཚང་མས་དངུལ་ཁུག་ཕངས་མེད་དུ་སློག་གི་ཡོད།

　　 གྲོང་མི།

　　 ཁོས་ཨ་མའི་མིང་ཁྱེར་ནས་དོན་འདི་འདྲ་བ་སྒྲུབ་སྲིད་ཀྱི་མ་རེད། ངས་བསམ་ན་དངུལ་ག་འདྲ་ཞིག་འཚོལ་འདོད་ཡོད་ནའང་ཨ་མའི་དོན་འདི་སྤྱོད་སྲིད་ཀྱི་མ་རེད། ངའང་དང་པོ་ཡིད་ཏོག་ཙམ་ཆེས་བྱུང་།

　　 ཆུ་ཚོད་གཉིས་ཙམ་ཡང་མ་འགོར་བས། སྐྱེས་པ་དེར་སྒོར་སྟོང་ཙམ་གྱི་ཡོང་འབབ་ཐོབ་བྱུང་། ཡིན་ཡང་སྐྱེས་པ་དེས་དངུལ་འབོར་ཆེན་རང་གི་ཨམ་ཕྲག་ཏུ་ཁ་རོག་གེར་ལྡུག་གི་ཡོད་པ་གྲོང་མིས་མཐོང་བས། ལམ་སེང་ཉེན་རྟོག་པར་བརྡ་བརྒྱབ་པ་རེད། མི་དམངས་ཉེན་རྟོག་པས་སྐྱེས་པ་དེའི་སྒམ་ཆུང་གི་ཁ་ཕྱེ་རུ་འཇུག་དུས། བདེན་པ་ལྷང་ལ་བུད།

ཁ་ཕྱེས།

ཁ་ག་འདྲ་ཟེ་ཕྱེ།

ཁ་ཕྱེས།

ཕྱེ་ཐུབ་མི་འདུག

ལྟོས་དང་། འདི་ག་རེ་རེད།

ཤོག་སྒམ་གྱིས་བཟོས་པ་རེད།

　　མཐའ་མར་སྐྱེས་པ་དེས་རང་གིས་སྒྲུང་རྫུན་བཟོ་བྱས་པ་ཡིན་ལུགས་ཁས་ལེན་བྱས་པ་རེད། ཡིན་ནའང་རྒྱུ་མཚན་ག་འདྲ་ཞིག་གི་དབང་གིས་ཡིན་ཀྱང་རུང་། རྫུན་གཏམ་འདི་དག་བསྒྲིགས་ནས་རྒྱ་སྲང་དུ་སློང་མོ་བྱེད་པ་ནི་མི་རྣམས་ཀྱི་སེམས་བཟང་པོ་ལ་ཐང་ཁུག་གཡོགས་པ་དང་ཕོག་ཐུག་ཡིན་པ་སྨོས་མེད་ཡིན།

བརྙན་གཏོང་ཁང་གི་གཙོ་སྐྱོང་བ།

　　 ད་གིན་ང་ཚོས་མཐོང་བ་དེ་རྒྱ་སྲང་གི་སློང་མོ་བྱེ་བྲག་པ་ཁ་ཤས་རེད། དེ་ཚོ་ཚང་མར་ཐུན་མོང་གི་ཆ་ཞིག་ཡོད་པ་ནི་སྒྲུང་བཟོ་རྒྱུ་སྟེ་མིའི་གདུང་སེམས་ཐོབ་ཆེད་ཡ་ང་བ་དེ་འདྲ་ཡིན་ཁུལ་གྱིས་དངུལ་གཡོ་ལེན་བྱེད་ཀྱི་ཡོད་པ་རེད། བྱུང་རིམ་ལ་ཁྱད་པར་ཡོད་ན་གཏོགས་ཐབས་ཤེས་དེ་གཅིག་པ་གཅིག་རྐྱང་རེད། འདི་འདྲ་ཡིན་པ་ག་རེ་རེད། འདིའི་རྒྱབ་ན་གསང་བ་ག་རེ་ཡོད་པ་རེད། རང་རེའི་གསར་འགོད་པས་དེ་ལས་ཀྱང་ཞིབ་པའི་བརྟག་དཔྱད་བྱས་ཡོད།

　　 འདི་པེ་ཅིང་གྲོང་ཁྱེར་ཁྲའོ་ཡང་ཆུས་ཀྱི་བཟོ་མིའི་ལུས་རྩལ་ཐང་གི་བྱང་ལམ་རེད། ཟླ ༡ ཚེས ༡༧ ཉིན་གྱི་ཞོགས་པར། གསར་འགོད་པས་བརྙན་གཟུགས་འདི་ལྟ་བུ་ཞིག་བླངས། རྒྱ་ལམ་བྱང་ངོས་ཀྱི་མི་ཚོགས་འགྲོ་འོང་མང་སར་སློང་མོ་བ་གཉིས་ཞོགས་པའི་ཆུ་ཚོད ༩ ནས་གནས་དེར་སླེབས། པུས་བཙུགས་ནས་བསྡད་ཡོད་པའི་མི་དེའི་བཟོ་ལྟར་བལྟས་ན་ལོ་བཞི་བཅུ་ལྔ་བཅུའི་ཚོད་ཙམ་ཡིན་པ་འདྲ། ཁོས་ལམ་འགྲོ་བར་ཕྱག་མཚམས་མི་ཆད་པར་འཚལ་གྱིན་ཡོད་ཅིང་། འཁྲིས་སུ་ལོ་ན་དྲུག་ཅུ་ཙམ་ཡིན་པ་ཞིག་གིས་མལ་ཐུལ་གྱོན་ཞིང་མིག་བཙུམས་ནས་ཉལ་འདུག གདོང་ལ་བལྟས་ནས་ནད་ལྕི་མདོག་ཁ་པོ་ཞིག་ཏུ་མཐོང་། ཁོ་གཉིས་ཀྱིས་མདུན་དུ་ཁུག་མ་རལ་པོ་ཞིག་བཞག་འདུག་ལ། ནང་གི་སྒོར ༡ དང་ཟུར ༥ ཡིན་པ་བཅུ་གྲངས་ཤིག་འདུག སློང་མོ་བ་དེ་གཉིས་ཀྱིས་འགྲམ་དུ་ནད་ཐོའམ་ཡི་གེ་སོགས་རོགས་སྐྱོབ་ཀྱི་ཡི་གེ་གང་ཡང་མེད་ནའང་མི་མི་ཉུང་བ་ཞིག་གིས་གདུང་སེམས་ཐོབ་བྱུང་། གསར་འགོད་པས་འགྲམ་ནས་སྐར་མ ༡༥ ཞིབ་ལྟ་བྱས་བསྡད་པའི་རིང་ལ། ལམ་འགྲོ་བ་གཉིས་གསུམ་ཞིག་གིས་རོགས་སྐྱོར་བྱས་བྱུང་བ་དང་། བྱ་སྤུའི་ལྭ་བ་གྱོན་མཁན་བགྲེས་པོ་ཞིག་ཆེད་དམིགས་དེར་ཡོང་སྟེ་དངུལ་སློང་མོ་བའི་ལག་ཏུ་བཞག་བྱུང་། ཞིབ་ལྟ་བྱས་པས་བགྲེས་པོ་དེས་དངུལ་མི་ཉུང་བ་ཞིག་སྦྱིན་འདུག

སྤོ་ལགས། ཁྱེད་ཀྱིས་ད་གིན་དངུལ་ག་ཚོད་སྦྱིན་པ།

སྒོར ༥༠

 

དེ་འདྲ་མང་པོ་སྦྱིན་ན་ཅི་བྱེད?

ང་ལ་གོམས་གཤིས་ཤིག་ཡོད། དགེ་ལས་རེད། ང་ཞུགས་འདོད་ཡོད།

འགྲེལ་བཤད་པ། བགྲེས་པོ་འདི་ལྟ་བུའི་ལམ་འགྲོ་སེམས་བཟང་པོ་མི་ཉུང་གསར་འགོད་པས་མཐོང་ཞིང་། སློབ་ཕྲུག་ཡིན་བཟོ་ཡོད་པའི་ན་གཞོན་ཞིག་གིས་སློང་མོ་བའི་ཁུག་མར་དངུལ་བཅུ་གྲངས་ཤིག་བཞག་པ་མ་ཟད། རང་གིས་ཁྱེར་ཡོད་པའི་ཁ་ཟས་ཀྱང་ཁོ་ཚོར་སྤྲད།

གྲོང་མི་ཀ་བ།

ནད་ག་རེ་རེད། ཚབས་ཆེ་པོ་ཨེ་རེད།

གྲོང་མི་ཀ་བ།

བཟའ་རྒྱུ་འདི་ངས་ད་སོ་མ་ཉོས་པ་ཡིན། ཅུང་ཙམ་འཁྱག་འདུག་མོད། ཁྱོད་ཀྱིས་ལོངས་དང་།

སྐབས་དེར། ནད་ལྕི་ན་རོགས་སྐྱོབ་ལས་ཁུངས་ལ་འབྲེལ་བ་བྱེད་ཡོང་ཞེས་ལམ་དུ་འགྲོ་མཁན་ཁྲོད་བརྗོད་མཁན་ཡང་བྱུང་མོད། སློང་མོ་བ་དེས་མི་དགོས་ཚུལ་གསལ་པོ་བརྗོད།

ངས་ཁྱོད་ཚོར་རོགས་བྱེད་ཆོག དགེ་ལས་སྡེ་ཁག་གིས་ཁྱོད་ཚོར་རོགས་པ་བྱེད་ཐུབ་ཀྱི་རེད།

མི་དགོས།

　　 ལམ་འགྲོ་བ་སེམས་ཁུར་བྱེད་མཁན་དག་གིས་སྐད་ཆ་དྲིས་པར་སློང་མོ་བ་དེས་ལན་སྟབས་བདེ་པོ་ལས་རྒྱག་གི་མེད་པ་དང་། ལན་དེའང་མ་གེ་མོག་གེ་ཡིན་པ་གསར་འགོད་པས་ཤེས་བྱུང་། པུས་བཙུགས་མཁན་སློང་མོ་བ་དེས་བརྗོད་ན། ཁོ་ཚོ་པེ་ཅིང་གི་ཡིན་པ་དང་ཉིན་ལྟར་སློང་མོ་བྱས་པའི་དངུལ་གྱིས་ནད་བཅའ་ཡི་ཡོད་པ་དང་། ཏོག་ཙམ་ནས་ནང་ལ་ལོག་གི་ཡིན་ཟེར།

ཁྱོད་ཀྱི་ཕ་ཡུལ་ག་ནས་ཡིན་པ།

པེ་ཅིང་ནས།

པེ་ཅིང་རང་ནས་ཡིན་པས།

ཨིན།

ཁྱོད་ཚོ་ག་པར་བསྡད་ཡོད། ངས་ཁྱོད་ཚོ་ཕར་སྐྱེལ་དགོས་ཀྱི་འདུག་གམ།

ཕ་གི་ན་ཡོད། ཁྱིམ་ན་འདུག་གི་ཡོད།

ཐག་རིང་པོ་མིན་ནམ།

ཨིན། ཏོག་ཙམ་ནས་འགྲོ་གི་ཡིན།

　　 ཉིན་འདི་ནི་གཟའ་སྤེན་པ་རེད། བཟོ་བའི་ལུས་རྩལ་གྱི་བྱང་ལམ་ནས་མི་ཚོགས་འགྲོ་འོང་བྱེད་ཅིང་། དེ་ལས་སྤྲང་པོ་གཉིས་ཀྱི་ཁུག་མ་རུ་དངུལ་མཚམས་མི་འཆད་པར་སྟེར་གྱི་འདུག་ལ། མི་དེ་གཉིས་ཀྱང་ཁ་མལ་དེ་རུ་བསྡད་འདུག སྐབས་དེར་པུས་བཙུགས་བསྡད་ཡོད་པའི་སློང་མོ་བ་དེས་རུམ་ནས་ཐ་མག་བླངས་ཏེ་ཁམ་དོ་འཇིབས། སློབ་ཕྲུག་སེམས་བཟང་དེས་ཁྱེར་ཡོང་བའི་ཟ་མ་ཁོ་གཉིས་ཀྱི་རྒྱབ་ཏུ་བཞག་སྟེ་མིག་གིས་ལྟ་ཙམ་ཡང་བྱེད་ཀྱི་མི་འདུག ཉིན་གུང་སླེབས་ལ་ཉེ་དུས། མགོ་ལ་ཞྭ་མོ་གྱོན་པའི་བུད་མེད་ལོ་གཞོན་ཞིག་མངོན་བྱུང་། མོས་སློང་མོ་བ་དེར་སྟབས་བདེ་ཐུག་པ་སྦངས་བཞག་ཡོད་པ་ཞིག་སྤྲད་རྗེས་བུད་སོང་། ཡིན་ནའང་སྐར་མ་བཞི་ལྔ་ཙམ་ནས། མོ་ཡང་ཕྱིར་སླེབས་བྱུང་། སློང་མོ་བར་སྐད་ཆ་ལབ་ཞོར་དང་མགོ་བསྒུར་ནས་ཅི་ཞིག་ཁྱེར་བཞིན་འདུག སྐབས་འདིར་གསར་འགོད་པས་གསལ་གྱི་ལེར་མཐོང་བྱུང་། མ་གཞི་མོས་སློབ་མ་དེ་བསྐྱལ་ཡོང་བའི་ཟ་མ་ཁྱེར་ཕྱིན་པ་རེད།

　　 སྐབས་འདིར་ད་་གིན་ས་ལ་ཉལ་ཡོད་པའི་རྒན་པོ་དེའང་མཐོང་རྒྱུ་མི་འདུག གསར་འགོད་པས་ཉེ་སར་བཙལ་མཐར། སྡོད་ཁུལ་ཐོག་ཁང་གི་འགབ་ཏུ་ད་གོང་གི་བུད་མེད་གཞོན་ནུ་དེ་མཐོང་ཞིང་། མོ་དང་རྒན་པོ་ཞིག་ཐག་ཉེ་སར་སར་བསྡད་དེ་གཉིས་ཀ་དྲོས་ཇ་འཐུང་གིན་འདུག ཞིབ་ཏུ་ལྟ་དུས། རྒན་པོ་དེ་ནི་མ་གཞི་ད་གིན་སར་ཉལ་ཡོད་པའི་སློང་མོ་བ་དེ་རེད། བུད་མེད་གཞོན་ནུ་འདི་དང་རྒན་པོ་སློང་མོ་བ་དེ་གཉིས་ཀྱི་འབྲེལ་བ་རྒྱུན་ལྡན་མིན་པ་གསལ་པོ་རེད། སྐབས་དེར་ཡང་བུད་མེད་རྒན་པ་ཞིག་སླེབས་བྱུང་། མོས་སློང་མོ་བ་དེར་སྐད་ཆ་ཞིག་བཤད་རྗེས་གནམ་ཟམ་དུ་བུད་ཅིང་། ཡང་པུས་བཙུགས་ནས་སློང་མོ་བྱེད་བཞིན་པ་གཞན་ཞིག་ལ་ཡང་སྐད་ཆ་འགའ་བཤད་རྗེས། སར་ཡོད་པའི་མལ་ཐུལ་དུ་འཛུལ་སོང་།

ཁྱོད་ལ་ཅི་མ་ཉན་པ་རེད།

ན་བྱུང་།

ག་རེ་ན་བྱུང་།

གྲུམ་ནད།

ག་ཚོད་འགོར་སོང་།

ལོ་གཉིས་འགོར་སོང་།

ད་ཅི་བྱ།

འགུལ་མི་ཐུབ།

འགུལ་མི་ཐུབ་བམ།

ཨིན།

མི་འདི་ཁྱོད་ཀྱི་ག་རེ་ཡིན་པ།

བཟའ་ཟླ།

　　 ད་ལྟ་ཉལ་བསྡད་ཡོད་པའི་བུད་མེད་རྒན་པ་དེ་ད་སོ་མ་ག་འདྲ་བྱས་ནས་ཡོང་བར་ང་ཚོས་ཅིག་ལྟ་ཡོང་། གོམ་སྟབས་མགྱོགས་པོ་བྱས་ནས་ཚུར་ཡོང་གིན་པའི་བུད་མེད་དེ་མིག་རྡེབ་དབང་ཙམ་གྱི་རིང་ལ་སར་ལུས་ནས་འགུལ་མི་ཐུབ་པའི་ནད་པ་དེར་གྱུར་བ་རེད། གནམ་ཟམ་ཐོག་གི་སློང་མོ་བ་འདི་གཉིས་དང་དེ་སྔོན་གསར་འགོད་པས་མཐོང་བའི་དེ་གཉིས་ཀྱི་སློང་མོ་བྱེད་སྟངས་དེ་གཅིག་པ་གཅིག་རྐྱང་རེད། ཆུ་ཚོད ༡ གི་རྗེས་སུ། གསར་འགོད་པ་ཡང་གནམ་ཟམ་དུ་ཡོང་། སྐབས་འདིར། ཡང་བློ་ཡུལ་ལས་འདས་པའི་རྣམ་པ་ཞིག་མཐོང་། ད་གིན་སར་ཉལ་བསྡད་ཡོད་པའི་བུད་མེད་རྒན་པ་དེ་སར་པུས་བཙུགས་སུ་བསྡད་ཡོད་ཅིང་། མ་གཞི་པུས་བཙུགས་ནས་བསྡད་ཡོད་པའི་རྒན་པོ་དེ་མལ་ཐུལ་ནང་དུ་འཛུལ་འདུག

འདིར་སླེབས་ནས་ག་ཚོད་འགོར་སོང་།

ཟླ་བ་གཅིག

ལོ་གཅིག་ཨེ?

ཉིན་ཁ་ཤས།

ཉིན་ག་ཚོད།

ཟླ་བ་གཅིག

　　 པར་མིག་གི་མདུན་དུ། རྒན་མོ་དེས་གསར་འགོད་པའི་དྲི་བ་འདྲི་བ་དོགས་གཟབ་བྱེད་ཀྱི་ཡོད་པ་ཧ་ཅང་གསལ་པོ་རེད། མོས་ས་ན་ཉལ་བསྡད་ཡོད་པ་དེ་མོའི་བཟའ་ཟླ་ཡིན་པ་དང་ནད་ལྕི་མོ་ཕོག་ཡོད་པ་དེ་ཁོ་ན་ནན་བཤད་བྱེད། བརྙན་རིས་འདི་ལ་ཞིབ་ཏུ་བལྟས་ན། མལ་ཐུལ་གྱི་འོག་ཏུ་འཛུལ་ཡོད་པའི་རྒན་པོ་དེས་ལན་རེར་ཁ་རོག་གེར་ཕྱི་རུ་ལྟ་ཙམ་བྱེད་ཅིང་། ཡང་ལམ་སེང་ཕྱིར་འཛུལ་འགྲོ་གི་འདུག གསར་འགོད་པས་ནན་བཅག་བྱས་པས། སར་ཉལ་ཡོད་པ་དེས་གཞི་ནས་ཁ་གྲགས་བྱུང་།

ན་གི

ན་གི་ཨེ? ཁྱོད་ག་རེ་ན་གི་འདུག

སྙིང་གི་ནད།

སྙིང་གི་ནད། ཁྱོད་པེ་ཝེ་སྨན་ཁང་དུ་ཕྱིན་ནས་ཅིག་ལྟོས་དང་། ཡང་མིན་ངས་ཁྱོད་ལ་རོགས་པ་བྱེད།

འབྲེལ་བ་བྱེད་མི་དགོས། ང་རང་གིས་དངུལ་གསོག་ཡོང་།

　　 སྐབས་འདིར་ས་རུ་ཉལ་བསྡད་ཡོད་པ་ནི་ད་གིན་པུས་བཙུགས་ནས་སློང་མོ་བྱེད་མཁན་གྱི་རྒན་པོ་དེ་ཡིན་པ་གསལ་པོ་མཐོང་གི་འདུག ཡིན་ངོ་མ་ནི་མི་གཉིས་ཀྱིས་རེས་མོས་སྒོས་འཁྲབ་སྟོན་བྱེད་ཀྱི་ཡོད་པ་རེད། འདི་དུས་ཕྱི་དྲོར་སླེབས་ཚར་འདུག གསར་འགོད་པ་དེ་སྔོན་སློང་མོ་བ་གཉིས་སྡོད་སར་ཕྱིན་པ་དང་ཞྭ་མོ་གྱོན་པའི་བུད་མེད་གཞོན་ནུ་དེ་སྐབས་སྐབས་སུ་ཐག་ཉེ་བཅར་ཡོང་བ་མཐོང་། དགོང་མོ་ཆུ་ཚོད ༨ གྱི་སྟེང་དུ། ཉིན་གང་པོར་སློང་མོ་བྱས་པའི་ཕོ་དེ་གཉིས་ཀྱིས་ཅ་ལག་བསྡུ་གསོག་བརྒྱབ་པ་དང་། ཁུག་མའི་ནང་གི་དངུལ་ཚང་མ་ཕྱིར་བཏོན་ཡོང་། དེ་རིང་གི་ཡོང་སྒོ་འབེལ་བ་བལྟས་པ་ཙམ་གྱིས་ཤེས་ཐུབ། ཐང་གི་ཉལ་ཆས་ཀྱང་བལྟབས་ཏེ་སློང་མོ་གཉིས་གཞོན་ནུ་མ་དེའི་རྗེས་འབྲངས་ནས་གཞུང་ལམ་བརྒལ་ཅིང་སྤྱི་སྤྱོད་རླངས་འཁོར་ལ་བསྡད། གསར་འགོད་པས་རྗེས་དེད། ཆུ་ཚོད་གཅིག་དང་ཕྱེད་ཙམ་སྟེ་འབབ་ཚིགས་ཐེངས ༣ ལ་བརྗེས་རྗེས། ཧེ་ཏེན་ཆུས(海淀区)བརྡ་འཕྲིན་ལམ་གྱི་ཉེ་སྐོར་དུ་སླེབས་ཤིང་། དེ་ནས་སྡོང་གསེང་དུ་ཡལ་སོང་། སྐབས་དེར་གསར་འགོད་པས་ཡང་གནམ་ཟམ་སྟེང་གི་སློང་མོ་བ་གཉིས་སྟེས་དབང་གིས་མཐོང་ཞིང་། ཁོ་གཉིས་ཀྱང་སླེབས་མ་ཐག་པ་རེད་ལ། སྒོ་རྩིས་ཚོང་ར་དེར་འཛུལ་སོང་། གསར་འགོད་པས་དེ་མུར་རྗེས་དེད་ནས་གནས་ཚུལ་འདི་ལྟ་བུ་བརྙན་དུ་ལོན།

　　 གནམ་ཟམ་སྟེང་གི་སློང་མོ་བ་གཉིས་ཀྱིས་ལུས་ཀྱི་དངུལ་སིལ་མ་ཡོངས་རྫོགས་བཏོན་ཏེ་ཁྱོན་བརྒྱ་ལོར ༤ ལ་བརྗེས་རྗེས་ཚོང་རར་ཁ་བྲལ་བ་དང་། མཐར་ཧེ་ཏེན་ཆུས་ཀྱི་ཀྲིན་པའེ་དར་ཆ་གྲོང་ཚོ་སྟེ་དམངས་ཀྱི་སྡོད་ཁང་མི་མཐོང་ས་ཞིག་ཡོད་པ་དེར་སླེབས། མཚན་མོ་ཡིན་ཡང་ར་སྐོར་དུ་མིའི་གྲིབ་གཟུགས་ཡོམ་ཡོམ་འགུལ་གྱིན་འདུག་ལ། དེ་མེ་གསོས་ས་ཟ་མ་བཟོ་རྩིས་བྱ་ཡི་འདུག གསར་འགོད་པས་འདིར་ཞག་སྒུག་བྱ་རྒྱུ་ཐག་བཅད། ཉིན་གཉིས་པའི་ཞོགས་པའི་ཆུ་ཚོད ༦ དང་ཕྱེད་ཀའི་སྟེང་ར་སྐོར་ནང་གི་མིའི་གྲིབ་མ་འགུལ་བྱུང་། ཆུ་ཚོད ༧ པར་ར་སྐོར་ལས་མི་བསྟུད་མར་ཕྱིར་ཐོན་ཞིང་། མཐའ་མ་སྡོད་ཁང་དེ་ནས་ཕྱིར་ཐོན་པའི་མི ༧ འདུག བདུན་པོའི་ནང་གསར་འགོད་པས་གཞོན་ནུ་མ་དེ་ལས་གཞན་ལྟོས་འཇོག་གིས་ཅུང་གཞོན་པའི་སྐྱེས་པ་ཞིག་ཀྱང་མཐོང་། གཞན ༥ པོ་ནི་ལོ་ན་མཐོ་བའི་རྒན་རྒོན་ཁ་ཅིག་རེད། དེའི་ནང་ཉིན་སྔ་མར་གསར་འགོད་པས་རྗེས་འདེད་བྱས་པའི་སློང་མོ་བ་དེ་གཉིས་ཀྱང་འདུག མི ༧ པོ་ཕྱིན་ཚར་རྗེས། གསར་འགོད་པས་ཁང་པ་གླ་ཁུལ་གྱིས་སྡོད་ཁང་དེར་འཛུལ། ར་སྐོར་དེར་ཁང་མིག་བཞི་ལྔ་ཞིག་འདུག གསར་འགོད་པས་གནམ་ཟམ་སྟེང་གི་སློང་མོ་བ་དེ་གཉིས་བསྐྱར་དུ་མཐོང་། ཡིན་ནའང་ད་ལྟ་ཁོ་གཉིས་ཀྱི་ཐོབ་ཐང་གྲོང་ཁྱེར་གྱི་ལས་ཀ་བ་དཀྱུས་མར་འགྱུར་འདུག

སྡོང་པོ་འཛུགས་རྒྱུ་དང་ལྗང་བསྒྱུར་བྱ་རྒྱུ་ཨེ།

ཨིན།

　　 གསར་འགོད་པས་རྟོག་ཞིབ་བྱས་པ་ལྟར་ན། མི་འདི་གཉིས་དང་། དེའི་ཁར་སྔ་མོར་ཕྱིར་ཕྱིན་པའི་མི ༧ བསྣན་པའི་མི ༩ པོ་འདི་རུ་ཉུང་མཐའ་ཡང་ལོ་གཉིས་ལ་བསྡད་ཡོད་ཅིང་ཆེད་ལས་སློང་མོ་བ་སྐོར་གཅིག་ཡིན་འདུག དེའི་ནང་གི་ཕོ་གཞོན་མོ་གཞོན་དེ་གཉིས་རྩ་འཛུགས་བྱས་ཐོག རྒན་པོ ༧ པོ་ཚོ ༣ ལ་བགོས། ན་བའི་མིང་གིས་སྔ་འགྲོ་ཕྱི་ཡོང་བྱེད་ཅིང་། པེ་ཅིང་གྲོང་ཁྱེར་གྱི་འབྱོར་བ་རྒྱས་པའི་ས་ཚིགས་ཁག་ཏུ་ཆེད་ལས་སློང་མོ་བྱེད། རྩ་འཛུགས་པས་ལམ་ཐིག་བཟོས་ནས། རྗེས་འདེད་དོ་དམ་བྱེད་ཅིང་ཟ་འཐུང་གནས་མལ་ལ་བདག་བྱེད། རྒན་པོ་དག་གིས་བསླངས་ཡོང་བའི་རྒྱུ་དངོས་ཕལ་ཆེ་བ་དོ་དམ་མཁན་གཞོན་ནུ་ཕོ་མོ་གཉིས་ལ་སྤྲོད་དགོས་ཀྱི་འདུག

དོ་དམ་བྱེད་མཁན་སུ་རེད།

ཆ་ཡོད་མཁན།

བཟའ་ཟླ་གཉིས་ཀ་རེད། ལོ་སུམ་ཅུ་ཙམ།

ཆ་ཡོད་མཁན་ཀ་པ།

འདི་ཤོག་ཁ་ཞིག་ལ་གཏོགས་ཀྱི་ཡོད།

དོ་དམ་ག་འདྲ་བྱས་ནས་བྱེད་ཀྱི་རེད།

ཆ་ཡོད་མཁན་ཀ་པ།

ངས(སློང་མོ་བ)དངུལ་བསླངས་ན། ངས(སློང་མོ་བ)ཁྱོད(དོ་དམ་པ)ལ་སྤྲད་དགོས་རེད། དེ་ནས་ཁྱོད(སློང་མོ་བ)ལ་ཟླ་རེར་སྒོར་ཉིས་བརྒྱ་སུམ་བརྒྱ་སྟེར་གྱི་རེད། ཁྱོད་ཀྱི་ཟ་འཐུང་ངས་བདག་བྱེད་ཀྱི་རེད།

སྙན་སྒྲོན་ཁང་གི་གཙོ་སྐྱོང་པ།

　　 ལྷག་བསམ་དཀར་མཁན་ལ་མགོ་ལ་རྫུན་དང་གཡོ་ཡིས་ཐང་ཁུག་གཡོགས་མཁན་སྲང་མདོའི་སློང་མོ་བ་དག་གི་སྤྱོད་པ་དེ་དངོས་འབྲེལ་བྱས་ནས་དམངས་ཁྲིམས་ཀྱི་རྩ་དོན་དང་སྤྱི་པའི་སྲོལ་བཟང་དང་འགལ་ཡོད་ལ། གལ་ཏེ་སྣང་ཚུལ་འདི་དག་གི་ཕག་ཏུ་བཙན་ཤེད་དང་གནོད་འཚེ་ཡོད་ཚེ་དེ་བས་ཀྱང་ཉེས་ཁྲིམས་ལ་ཐོགས་པ་ཡིན་པས་ཆད་པ་ནན་མོ་ངེས་པར་གཅོད་དགོས་པ་ཞིག་རེད། དོན་ལ་རང་ཅག་ལ་ཆོད་ཆེ་བའི་སྤྱི་ཚོགས་གསོ་སྐྱོབ་ལམ་ལུགས་ཡོད་པས་སྤྱི་མི་སུ་གང་ཞིག་དཀའ་ངལ་ལ་འཕྲད་པ་ཡིན་ན། ཁྱིམ་ནས་དམངས་སྲིད་ཅུས་དང་ཕྱི་ནས་རོགས་སྐྱོབ་ས་ཚིགས་བཙལ་ཆོག་པས། སྲང་ལམ་ནས་སློང་མོ་བྱེད་པའི་སྣང་ཚུལ་འདི་དག་ལ་ང་ཅག་གིས་དོགས་གཟབ་ཆེ་རུ་བྱེད་དགོས་པར་འདུག

　　 ཁྱེད་ཀྱིས་དེ་རིང་གི《ཀུན་གླེང་བཅར་འདྲི》ལ་གཟིགས་པར་ཐུགས་རྗེ་ཆེ། སླར་མཇལ་ཡོང་།(རྩོམ་འགན་པ། རྟ་མགྲིན)